∙ ഇടിച്ചുകയറിയ ബുൾഡോസറുകൾ

പതിറ്റാണ്ടുകളായി മരവിപ്പിക്കപ്പെട്ടിരുന്ന വനം നിയമങ്ങൾ ബിരേൻ സിങ് ഉരുക്കുമുഷ്ടിയോടെ നടപ്പാക്കിയതാണ് കുക്കി ഗോത്രങ്ങളെ ചൊടിപ്പിച്ചത്. ചുരചന്ദ്പൂർ– നോനി ജില്ലയിലെ 38 ഗ്രാമങ്ങൾ സംരക്ഷിത വനമേഖലയിലാണെന്ന് അടുത്തിടെ സർക്കാർ കണ്ടെത്തി. ഇത് അനധികൃതമായി കൈയേറിയിട്ടുള്ളതാണെന്നും ഇവിടെയുള്ളവർ അനധികൃത കുടിയേറ്റക്കാരാണ് എന്നും വ്യക്തമാക്കി ഇവിടെനിന്ന് ഒഴിയാൻ നിർദേശിക്കുകയും ചെയ്തു. ഇതിനു പുറമെ, അനധികൃത കുടിയേറ്റക്കാരെ കണ്ടെത്താൻ സർവെ നടത്തുമെന്നും സർക്കാർ വ്യക്തമാക്കി. എന്നാൽ സ്വാതന്ത്ര്യത്തിനും മുൻപേ തലമുറകളായി തങ്ങൾ താമസിച്ചിരുന്ന പ്രദേശങ്ങളാണ്, രേഖകളില്ല എന്ന പേരിൽ ഏറ്റെടുത്ത് വനസംരക്ഷണം നടപ്പാക്കാൻ സർക്കാർ ശ്രമിക്കുന്നതെന്നായിരുന്നു കുക്കികളുടെ മറുപടി. മെയ്തെയ് വിഭാഗത്തിന് ഗോത്രവർഗ മേഖലകളിലേക്ക് കടന്നുകയറാനുള്ള പദ്ധതിയുടെ ഭാഗമായുള്ള ശ്രമമാണ് ഇതെന്നും കുക്കികൾ ആരോപിച്ചു.

കാട്ടിൽനിന്നുള്ള കുടിയൊഴിപ്പിക്കൽ പ്രശ്നത്തിൽ ഏപ്രിൽ അവസാന ആഴ്ചയോടെ ചുരചന്ദ്പുർ ജില്ലയിലെ സ്ഥിതിഗതികൾ വഷളായി തുടങ്ങിയിരുന്നു. കുക്കികളും മിസോകളും ഉൾപ്പെടെയുള്ള ഒട്ടേറെ ഗോത്ര വർഗക്കാരെ ‘സംരക്ഷിത വനമേഖല’യിൽനിന്ന് ഇറക്കി വിടാനുള്ള തീരുമാനം അംഗീകരിക്കില്ലെന്ന് ഗോത്രസംഘടനകൾ വ്യക്തമാക്കി. എന്നാൽ സർക്കാർ അതിനോടകം ഇടപെടൽ ആരംഭിച്ചിരുന്നു. സംരക്ഷിതവനത്തിലുള്ളിലാണെന്ന് പറഞ്ഞ് കുക്കി ഗ്രാമങ്ങൾ ബുൾഡോസർ ഉപയോഗിച്ചു തകർത്തു. കുക്കി കുന്നുകളിൽ വ്യാപകമായിരുന്ന നിയമവിരുദ്ധ പോപ്പി കൃഷി കൂട്ടത്തോടെ നശിപ്പിച്ചു. മ്യാൻമറിൽനിന്നെത്തുന്ന കുക്കി കുടിയേറ്റക്കാർക്കു നേരെ ശക്തമായ നടപടി സ്വീകരിച്ചു. ‌

അതോടെ ഗോത്ര വിഭാഗങ്ങളുടെ കൂട്ടായ്മയായ ‘ഇൻഡിജീനസ് ട്രൈബൽ ലീ‍ഡേഴ്സ് ഫോറം – ഐടിഎൽഎഫ്’ സംസ്ഥാന ബന്ദും പ്രഖ്യാപിച്ചു. ഈ സമയത്താണ് മുഖ്യമന്ത്രി ബിരേൻ സിങ് ഇവിടുത്തെ ന്യൂ ലംക ടൗണിൽ ഒരു ജിംനേഷ്യം ഉദ്ഘാടനം ചെയ്യാനും സത്‍ഭാവന മണ്ഡപ് എന്ന സ്ഥലത്ത് പൊതുയോഗത്തിൽ പങ്കെടുക്കാനും തീരുമാനിക്കുന്നത്. എന്നാൽ ഇതിന്റെ തലേന്ന് ഗോത്രവിഭാഗക്കാരിൽ ചിലർ ഈ ജിംനേഷ്യം തീയിട്ടു നശിപ്പിച്ചു. അതോടെ മുഖ്യമന്ത്രിയുടെ പരിപാടികളെല്ലാം റദ്ദാക്കേണ്ടി വന്നു. കലാപത്തിന്റെ തീപ്പൊരി അവിടെനിന്നാണു പൊട്ടിവീണതെന്ന് ഒരു വിഭാഗം ഇന്നും വിശ്വസിക്കുന്നു.

∙ കലാപത്തിലേക്ക് കോടതിവിധിയും

മണിപ്പൂരിൽ 21 ശതമാനം സംവരണം പട്ടികവർഗ വിഭാഗത്തിൽപ്പെടുന്ന ഗോത്രവർഗക്കാർക്കും 17 ശതമാനം ഒബിസിക്കാർക്കും രണ്ടു ശതമാനം പട്ടികജാതിക്കാർക്കുമാണ്. തങ്ങളെ പട്ടികവർഗ വിഭാഗത്തിൽ ഉൾപ്പെടുത്തണം എന്ന ആവശ്യം ഏറെക്കാലമായി മെയ്തെയ് വിഭാഗക്കാർ ആവശ്യപ്പെടുന്നതാണ്. തങ്ങൾക്കു 10% സ്ഥലം മാത്രമാണുള്ളതെന്നും ഗോത്ര വിഭാഗക്കാർ മറ്റു ഭൂപ്രദേശങ്ങൾ കയ്യടക്കിവച്ചിരിക്കുകയാണെന്നുമാണ് അവരുടെ വാദം. തങ്ങൾ പട്ടികവർഗ വിഭാഗമായിരുന്നു എന്നും ഇന്ത്യൻ യൂണിയനിൽ ചേർന്നതിനു ശേഷമാണ് ഈ പദവി നഷ്ടപ്പെട്ടതെന്നും മെയ്തെയ് വിഭാഗം വാദിക്കുന്നു. തങ്ങളുടെ ഗോത്രവും പാരമ്പര്യവും ഭാഷയുമെല്ലാം സംരക്ഷിക്കാൻ പട്ടികവർഗ പദവി ആവശ്യമാണെന്നും ഇവർ പറയുന്നു. അതിനിടെ, പട്ടികവർഗ പദവി ആവശ്യപ്പെട്ടുള്ള മെയ്തെയ് വിഭാഗത്തിന്റെ ഹർജി ഹൈക്കോടതി പരിഗണിച്ചു. ഈ വിഭാഗത്തിന് പട്ടിക വർഗ പദവി നൽകുന്ന കാര്യത്തിലുള്ള ശുപാർശ സംസ്ഥാന സർക്കാരിനു കേന്ദ്ര സർക്കാരിന് നൽകിക്കൂടേ എന്നായിരുന്നു ഉത്തരവ്.

അതോടെ മെയ്തെയ്– കുക്കി സംഘർഷം അതിന്റെ മൂർധന്യാവസ്ഥയിലെത്തി. മേയ് മൂന്നിന്, ഗോത്രവർഗ വിഭാഗങ്ങൾക്ക് ഐക്യദാർഢ്യം പ്രഖ്യാപിച്ചുകൊണ്ട് ഓൾ ഇന്ത്യ സ്റ്റുഡന്റ്സ് യൂണിയൻ ഓഫ് മണിപ്പൂർ, എടിഎസ്‍യുഎം, നടത്തിയ മാർച്ചോടു കൂടി സംഘർഷം രണ്ടാം ഘട്ടത്തിലേക്കു കടക്കുകയായിരുന്നു. മെയ്തെയ് വിഭാഗങ്ങൾക്ക് ഭൂരിപക്ഷമുള്ള ബിഷ്ണുപൂരുമായി അതിർത്തി പങ്കിടുന്ന പ്രദേശമാണ് ചുരാചന്ദ്പൂർ. അവിടെ നടന്ന മാർച്ച് സംഘർഷത്തിൽ കലാശിക്കുകയും മെയ്തെയ് വിഭാഗക്കാർ ആക്രമിക്കപ്പെട്ടു എന്ന വാർത്ത കാട്ടുതീ പോലെ പരക്കുകയും ചെയ്തു. അതോടെ ഇംഫാലിൽ കുക്കി-സൊ വിഭാഗക്കാരും വ്യാപകമായി ആക്രമിക്കപ്പെട്ടു. 

കുക്കി വിഭാഗക്കാർ ചുരാചന്ദ്പുരിലെ റാലിയിൽ തോക്കുകളുമായി പങ്കെടുത്തെന്നും തങ്ങളുടെ ഗ്രാമങ്ങൾ ചുട്ടെരിച്ചെന്നുമാണ് മെയ്തെയ് സംഘടനകൾ ആരോപിച്ചത്. സമാധാനപരമായ റാലി കഴിഞ്ഞു മടങ്ങിയവരെ മെയ്തെയ്കളാണ് ആക്രമിച്ചതെന്നും അതാണ് പ്രശ്നങ്ങളിലേക്കു നയിച്ചതെന്നും കുക്കി വിഭാഗക്കാരും ആരോപിച്ചു. അതുവരെ പുകഞ്ഞുനിന്നത് പിന്നീടങ്ങോട്ട് ആളിക്കത്തുകയായിരുന്നു. ആരാധനാലയങ്ങളും വീടുകളുമുൾപ്പെടെ അഗ്നിക്കിരയായി. ഒട്ടേറെ ജില്ലകളിൽ നിരോധനാജ്ഞ പ്രഖ്യാപിച്ചു. ഇന്റർനെറ്റ് വിലക്കി, സൈന്യമിറങ്ങി. കേന്ദ്ര മന്ത്രിയുടെയും സംസ്ഥാന മന്ത്രിമാരുടെയും വീടു വരെ അഗ്നിക്കിരയാക്കി. പൊലീസ് സ്റ്റേഷൻ ആക്രമിച്ച് തോക്കുകളും ആയുധങ്ങളും അക്രമകാരികൾ കവർന്നു. കുട്ടികളെ ഉൾപ്പെടെ ജീവനോടെ ചുട്ടുകൊലപ്പെടുത്തിയ വാർത്തകളും കൂട്ട ബലാത്സംഗ റിപ്പോർട്ടുകളും മണിപ്പുരിൽനിന്നു തുടർച്ചയായി വരുന്നു. മരണസംഖ്യ നൂറും കടന്ന് കുതിക്കുകയാണെന്നും റിപ്പോർട്ടുകളുണ്ട്. ഒട്ടേറെ പേർ പലായനം ചെയ്തു. അരലക്ഷത്തോളം പേരെ ഇതിനോടകം കലാപം ബാധിച്ചു കഴിഞ്ഞു. 

മേയ് മൂന്നിനു തുടങ്ങി ജൂൺ 22ലെത്തുമ്പോൾ, 50 ദിവസം പിന്നിട്ടിട്ടും കലാപത്തെ അടിച്ചമർത്താൻ കേന്ദ്രത്തിനോ സംസ്ഥാനത്തിനോ സാധിച്ചിട്ടില്ല. മണിപ്പൂരിലെ യഥാർഥ നാശനഷ്ടങ്ങളുടെ കണക്കും ഇതുവരെ പുറത്തുവന്നിട്ടില്ല. മെയ്തെയ് വിഭാഗക്കാർക്കും കുക്കി വിഭാഗക്കാർക്കും ഒരുപോലെ യോജിക്കാൻ കഴിയുന്ന ഒരു തീരുമാനത്തിന്മേൽ നടക്കുന്ന സമാധാന ചർച്ചകൾക്കേ ഇനി ആ സംസ്ഥാനത്തെ തീ കെടുത്താനാകൂ. അത് എത്രയും വേഗമുണ്ടാകുമെന്നുതന്നെ പ്രത്യാശിക്കാം. ജൂലൈയോടെയെങ്കിലും കലാപം അവസാനിക്കുമെന്നും...

English Summary: What is the Reason Behind the Manipur Riots? Who are Meiteis and Kukis? Explained