∙ അഖിലേന്ത്യാ സുന്നി ജംഇയ്യത്തുൽ ഉലമാ

1989 ൽ സമസ്തയിൽ ഉണ്ടായ പിളർപ്പിനെ തുടർന്നാണ് അഖിലേന്ത്യാ സുന്നി ജംഇയ്യത്തുൽ ഉലമാ രൂപം കൊള്ളുന്നത്. എപി വിഭാഗം സമസ്തയെന്ന പേരിൽ അറിയപ്പെടുന്ന ഈ സംഘടനയുടെ ജനറൽ സെക്രട്ടറിയാണ് പിളർപ്പിന്റെ സമയത്ത് മുശാവറ അംഗമായിരുന്ന കാന്തപുരം എ.പി.അബൂബക്കർ മുസല്യാർ. കോഴിക്കോട് മർകസാണ് സംഘടനയുടെ ആസ്ഥാനം. യുവജന സംഘടനയായ സുന്നി യുവജന സംഘം, വിദ്യാർഥി സംഘടനയായ സുന്നി സ്റ്റുഡന്റ്സ് ഫെഡറേഷൻ, സുന്നി വിദ്യാഭ്യാസ ബോർഡ് തുടങ്ങി ഒട്ടേറെ പോഷക സംഘടനകൾ എപി വിഭാഗത്തിനുമുണ്ട്.

അഖിലേന്ത്യാ സുന്നി ജംഇയ്യത്തുൽ ഉലമയുടെ ഒരു പോഷക സംഘടനയാണ് കേരള മുസ‌്‌ലിം ജമാഅത്ത്. കാന്തപുരം എ.പി.അബൂബക്കർ മുസല്യാർ തന്നെയാണ് ഇതിന്റെ പ്രസിഡന്റ്. ഇബ്രാഹിം ഖലീലുൽ ബുഖാരി തങ്ങളാണ് ജനറൽ സെക്രട്ടറി. മർകസ്, നോളജ് സിറ്റി തുടങ്ങി മത ഭൗതിക മേഖലകളിൽ ഒട്ടേറെ സ്ഥാപനങ്ങൾ ഇന്ന് സംസ്ഥാനത്തിന് അകത്തും പുറത്തുമായി എപി വിഭാഗത്തിനുണ്ട്. ഇകെ വിഭാഗം ലീഗിനൊപ്പം അണിനിരന്നപ്പോൾ സിപിഎമ്മിനൊപ്പം അണിനിരന്നവരാണ് എപി വിഭാഗം. മുസ്‌ലിം ജനസാമാന്യത്തിൽ ഇടതു പക്ഷത്തിന് വേരോട്ടം ഉണ്ടായതും മലബാറിൽ പല സീറ്റുകളിലും വിജയം നേടിയതും എപി വിഭാഗം പിന്തുണച്ചു തുടങ്ങിയതോടെയാണ്. ഇടതു ഭരണത്തിൽ പല സ്ഥാനങ്ങളും ഇതോടെ എപി വിഭാഗത്തിന് ലഭിച്ചിരുന്നു. ചില സമയങ്ങളിലെങ്കിലും പ്രത്യക്ഷമായ രാഷ്ട്രീയ യുദ്ധത്തിലേക്കും ഇത് വഴിവച്ചിരുന്നു.

∙ ഐക്യ ശ്രമങ്ങൾ വിജയിക്കുമോ

പതിറ്റാണ്ടുകളായി നീണ്ടു നിൽക്കുന്ന സുന്നികൾക്കിടയിലെ ഭിന്നത പരിഹരിക്കണമെന്ന ആവശ്യം പലപ്പോഴായി ഉയർന്നു വരാറുണ്ട്. പല മഹല്ലുകളിലും സ്ഥാപനങ്ങളിലും അധികാരത്തിന്റെ പേരിൽ തർക്കം രൂക്ഷമാവുകയും ആക്രമണത്തിലേക്ക് വരെ വഴി മാറുകയും ചെയ്തിട്ടുമുണ്ട്. കുറച്ചു കാലം മുൻപ് വരെ ഇരുവിഭാഗം അണികളും തമ്മിൽ പോർവിളികളും വെല്ലുവിളികളും വരെ സജീവമായിരുന്നു. മാധ്യമ അഭിമുഖങ്ങളിൽ സുന്നി ഐക്യത്തിന് വേണ്ടി രണ്ട് വിഭാഗം നേതാക്കളും വാദിക്കാറുണ്ടെങ്കിലും പ്രായോഗിക തലത്തിലേക്ക് എത്തിയിരുന്നില്ല.

കഴിഞ്ഞ ദിവസം പുറത്ത് വന്ന കാന്തപുരം എ.പി.അബൂബക്കർ മുസല്യാരിന്റെ അഭിമുഖത്തിൽ സുന്നി ഐക്യത്തെ കുറിച്ചും മുസ്‌ലിം ലീഗുമായി യോജിച്ചു പോകുന്നതിനെ കുറിച്ചും അഭിപ്രായം പങ്കു വച്ചതോടെയാണ് വിഷയം വീണ്ടും സജീവമായത്. മുസ‌്‌ലിം ലീഗുമായുള്ള ബന്ധത്തെക്കുറിച്ച് കാന്തപുരത്തിന്റെ വാക്കുകൾ: ‘‘മുസ്‌ലിം ലീഗുമായി ഒരുമിച്ചു പോകുന്നതാണ് നല്ലതെന്ന് ഞങ്ങൾ എപ്പോഴും പറയാറുണ്ട്. അസുഖ ബാധിതനായിരുന്ന സമയത്ത് ബഹുമാനപ്പെട്ട പാണക്കാട് സാദിഖലി തങ്ങളും മറ്റുള്ള പാണക്കാട്ടെ തങ്ങൻമാരും സന്ദർശിച്ചിരുന്നു. കുഞ്ഞാലിക്കുട്ടി സാഹിബും വന്നിരുന്നു. ഒന്നിച്ചു പോകുന്നതിലൂടെയെ പുരോഗതിയും നന്മയും സാധ്യമാകൂ’’.

സുന്നി ഐക്യം സംബന്ധിച്ച്, ‘‘എനിക്ക് അതിയായ ആഗ്രഹമുണ്ട്. എല്ലാവരുമായും യോജിച്ചു പോകാൻ താൽപര്യമുണ്ട്. രാജ്യത്തിന്റെ നന്മയ്ക്കും രക്ഷയ്ക്കും അതാണ് നല്ലത്. ആരാണ് തടസ്സം നിൽക്കുന്നത് എന്നറിയില്ല. സമസ്ത പ്രസിഡന്റ് ജിഫ്രി തങ്ങളുമായും നല്ല ബന്ധമാണുള്ളത്’’ എന്നാണ് കാന്തപുരം പറഞ്ഞത്.

∙ തുടർ ചലനങ്ങൾ ഉണ്ടാവും

പ്രസ്താവനയെ സ്വാഗതം ചെയ്ത് സമസ്തയും ലീഗും ഉടൻ തന്നെ രംഗത്തെത്തി. കാന്തപുരത്തിന്റെ പ്രസ്താവന കാലഘട്ടത്തിന്റെ ആവശ്യമാണെന്നും ലീഗ് ന്യൂനപക്ഷത്തിന്റെ പൊതു പ്ലാറ്റ്ഫോം ആണെന്നുമായിരുന്നു സാദിഖലി തങ്ങളുടെ പ്രതികരണം. സമസ്ത എക്കാലവും സുന്നി ഐക്യത്തിനായുള്ള വ്യവസ്ഥാപിതമായ ഏതു നിർദേശവും സ്വാഗതാർഹമാണെന്നായിരുന്നു സമസ്ത നേതാക്കളുടെ പ്രതികരണം. പ്രസ്താവനയക്ക് ശേഷം അബ്ദു സമദ് സമദാനി എംപി കാന്തപുരത്തെ മർകസിൽ പോയിക്കാണുകയും ചെയ്തിരുന്നു. മധ്യസ്ഥ ചർച്ചയ്ക്ക് മുൻകൈ എടുക്കാൻ തയാറാണെന്ന് പാണക്കാട് സാദിഖലി തങ്ങൾ അറിയിച്ചതോടെ ചർച്ചകൾ മുന്നോട്ടാണെന്ന് വ്യക്തം.

∙ രാഷ്ട്രീയ ലാഭം ആർക്ക്

സുന്നി ഐക്യം സംഭവിച്ചാൽ സ്വാഭാവികമായും അതിന്റെ രാഷ്ട്രീയ ലാഭം മുസ്‌ലിം ലീഗിന് തന്നെയാകും എന്നതിൽ സംശയമില്ല. ഇകെ വിഭാഗത്തിലെ ഭൂരിഭാഗവും എപി വിഭാഗത്തിലെ ചെറിയൊരു വിഭാഗവും മുൻപേ ലീഗിന് കൂടെ നിൽക്കുന്നവരാണ്. മറ്റു മുസ്‌ലിം സമുദായങ്ങളിലും ലീഗിന് കാര്യമായ സ്വാധീനമുണ്ട്. എപി വിഭാഗത്തിന്റെ പിന്തുണ കൂടി ഉറപ്പാക്കാനായാൽ മുസ്‌ലിം വിഭാഗത്തിൽ നിലവിലുള്ള രാഷ്ട്രീയ ശക്തി ഇനിയും ലീഗിന് വർധിപ്പിക്കാനാവും. അതേ സമയം ഇത് മലബാറിൽ ഇടതു പക്ഷത്തിന് വലിയ തിരിച്ചടി നൽകുകയും ചെയ്യും.

മുസ്‌ലിം സമുദായത്തിൽ ഇപ്പോൾ എപി വിഭാഗം മാത്രമാണ് പ്രത്യക്ഷത്തിൽ ഇടതു ആഭിമുഖ്യം പുലർത്തുന്നത്. അത് നഷ്ടപ്പെട്ടാൽ മലബാറിലെ പല സീറ്റുകളിലും സിപിഎം വിയർക്കും. അതേ സമയം ലീഗിന് ഐക്യം ഗുണം ചെയ്യുമെങ്കിലും യുഡിഎഫിന് ഇതിന്റെ ഗുണം ലഭിക്കുമോ എന്ന് കണ്ടറിയണമെന്ന് വാദിക്കുന്നവരുമുണ്ട്. കാന്തപുരം വഴി ലീഗിനെ ഇടതു പാളയത്തിൽ എത്തിക്കാനുള്ള നീക്കമായും വിലയിരുത്തുന്നുണ്ടെങ്കിലും സാധ്യത കുറവാണെന്നാണ് കരുതുന്നത്. ഏക വ്യക്തി നിയമത്തെക്കുറിച്ച് സിപിഎം സംഘടിപ്പിക്കുന്ന സെമിനാറിലേക്ക് ലീഗീനും സമസ്തക്കുമുള്ള ക്ഷണവും ഇതിലേക്കുള്ള പാലമായി കാണാം. കർണാടക തിരഞ്ഞെടുപ്പ് വിജയത്തോടെ എൽഡിഎഫിനൊപ്പം ചേരണമെന്ന ലീഗിലെ വാദത്തിന് അയവ് വന്നിട്ടുണ്ട്. നേതാക്കൾക്ക് എൽഡിഎഫിനൊപ്പം ചേരണമെന്നുണ്ടായാൽ പോലും അണികളെ ബോധ്യപ്പെടുത്തൽ എളുപ്പമാകില്ലെന്നാണ് വിലയിരുത്തൽ. 

മുൻപ് സാമുദായികമായ പല വിഷയങ്ങളിലും മുസ്‌ലിം ലീഗ് മുൻകൈ എടുത്ത് വിളിച്ചു കൂട്ടുന്ന മുസ്‌ലിം കോഓർഡിനേഷൻ കമ്മിറ്റി യോഗങ്ങളിൽ നിന്നു മാറി നിന്നിട്ടുള്ളവരാണ് എപി വിഭാഗം. അവർ ഇത്തവണ ലീഗിനോട് ചേരാൻ താൽപര്യമുണ്ടെന്ന് പറഞ്ഞ് രംഗത്ത് വരുന്നത് ഇടതുപക്ഷത്തെ ഭീതിയിലാക്കുന്നുണ്ട്. രണ്ടാം പിണറായി സർക്കാർ രംഗത്ത് വന്ന ശേഷം കാര്യമായ പരിഗണന ലഭിക്കുന്നില്ലെന്ന പരാതിയും നിലപാട് മാറ്റത്തിന് കാരണമായെന്ന് കരുതുന്നു. എപി വിഭാഗത്തിന്റെ മുഖപത്രമായ സിറാജിലെ ലേഖകനായിരുന്ന കെ.എം.ബഷീറിന്റെ മരണത്തിന് ഉത്തരാവാദിയായ ശ്രീറാം വെങ്കിട്ടരാമനെ ആലപ്പുഴ കലക്ടറാക്കാൻ നടത്തിയ നീക്കവും എപി വിഭാഗത്തിനിടയിൽ വലിയ പ്രതിഷേധത്തിന് ഇടയാക്കിയിരുന്നു. 

∙ ഏക സിവിൽ കോഡിനെതിരെയുള്ള പ്രതിഷേധം

ഇപ്പോഴത്തെ ഐക്യ സുന്നി ആഹ്വാനത്തിന് പിന്നിലെ മറ്റൊരു കാരണം ഏക സിവിൽ കോഡിനെതിരെയുള്ള പ്രതിഷേധം ഒന്നിച്ചു നടത്തണമെന്നത് കൂടിയാണ്. മുൻപ് പൗരത്വ ഭേദഗതിക്കെതിയുള്ള സമരത്തിൽ ഇരു വിഭാഗം നേതാക്കളും ഒരുമിച്ചു വേദിയിലെത്തിയിരുന്നു. ലീഗ് സമുദായ സംഘടനകളെയും രാഷ്ട്രീയ സംഘടനകളെയും യോജിപ്പിച്ച് ഏക സിവിൽ കോഡിനെതിരെ ശക്തമായ പ്രതിഷേധം സംഘടിപ്പിക്കുമെന്ന് അറിയിച്ചിരുന്നു. എപി വിഭാഗത്തിന്റെ പുതിയ നീക്കം കണ്ടാണ് ഏക സിവിൽ കോഡിനെതിരെ ശക്തമായ പ്രതിഷേധവുമായി സിപിഎം രംഗത്തു വന്നതെന്നും വിലയിരുത്തപ്പെടുന്നു. അതേ സമയം ഏക സിവിൽ കോഡ് വിഷയത്തിൽ സിപിഎമ്മുമായി സഹകരിക്കുമെന്ന സമസ്ത അധ്യക്ഷൻ ജിഫ്രി മുത്തുക്കോയ തങ്ങളുടെ പ്രസ്താവന സമസ്തയും ലീഗും തമ്മിൽ അടുക്കുന്നതിന്റെ സൂചനയായി വ്യാഖാനിക്കപ്പെടുന്നുണ്ട്. എപി വിഭാഗം പോയാലും ഇകെ വിഭാഗത്തിൽ നിന്ന് ചെറിയ നേട്ടമെങ്കിലും ഉണ്ടാക്കാൻ കഴിയുമോ എന്നാണ് സിപിഎം പ്രതീക്ഷിക്കുന്നത്.

1926 ൽ സ്ഥാപിതമായ സമസ്ത 2026 ൽ അതിന്റെ നൂറാം വാർഷികം ആഘോഷിക്കാൻ ഒരുങ്ങുകയാണ്. ആ ആഘോഷത്തിൽ ഇരു സുന്നികളും ഒരുമിച്ച് ആഘോഷിക്കണമെന്നാണ് ഐക്യത്തിന് വേണ്ടി വാദിക്കുന്നവരുടെ ആഗ്രഹം. ജിഫ്രി മുത്തുക്കോയ തങ്ങളും കാന്തപുരം എ.പി.അബൂബക്കർ മുസല്യാരും പാണക്കാട് സാദിഖലി ശിഹാബ് തങ്ങളും ഒരുമിച്ച് ഈ വേദിയിലെത്തുമെന്നാണ് ഇവരുടെ പ്രതീക്ഷ. ലയനം എന്നതിനപ്പുറം ഒരുമിച്ച് മുന്നോട്ടു പോകാൻ ഇരു സമസ്തകളും തീരുമാനിച്ചാൽ രാഷ്ട്രീയമായും സംഘടനാ പരമായും വലിയ മാറ്റത്തിനാണ് വഴി തെളിയിക്കുക. സുന്നികളുടെ വിലപേശൽ ശക്തിയും സ്വാധീനവും വർധിപ്പിക്കാനും ഇത് ഇടയാക്കും.

മുസ്‌ലിം ലീഗിലെ സാമുദായിക സമവാക്യങ്ങളും ഇത് തിരുത്തിക്കുറിക്കും. സുന്നി–മുജാഹിദ് വിഭാഗങ്ങൾക്ക് കാര്യമായ സ്വാധീനമുള്ള ലീഗിൽ ഇത് മാറ്റങ്ങൾ കൊണ്ടുവരും. എന്നാൽ പതിറ്റാണ്ടുകളായി രണ്ട് സംഘടനയായി നിൽക്കുന്നതിനാൽ ഐക്യം പ്രായോഗികമായി എങ്ങനെ നടപ്പിലാക്കും എന്നതാണ് ചോദ്യം. പാണക്കാട് സാദിഖലി തങ്ങളുടെയും മുസ്‌ലിം ലീഗിന്റെയും നിലപാടും ഇരു സമസ്തകളുടെയും സഹകരണ മനോഭാവവും വിട്ടുവീഴ്ചയും നീക്കങ്ങളിൽ പ്രധാനമാണ്. സാമുദായിക ഐക്യം രാഷ്ട്രീയ ഐക്യത്തിലേക്കും വഴി തെളിയിച്ചേക്കാം എന്നതിനാൽ സൂക്ഷ്മതയോടെ തന്നെയാണ് ഇരു മുന്നണികളും ഇക്കാര്യത്തിൽ മുന്നോട്ടു നീങ്ങുന്നത്.

English Summary : How far the sunni unification is possible and what's its impact on Kerala politics?