ചാണ്ടി: ങേ, എന്ത്?

 

അച്ചു: ഒരുമ്മ!

 

സൂമിൽ പൊട്ടിച്ചിരി!

 

ഉമ്മൻ ചാണ്ടിയെക്കാണാൻ അടുത്ത സന്ദർശകരെത്തി. അദ്ദേഹം ബൈ പറഞ്ഞുപോയി: അപ്പോ ശരി മോളെ. ഉടനെ കാണാം.

 

അച്ചു: അപ്പയെ ഞാൻ വിളിച്ചിട്ട് മൂന്നാഴ്ചയെങ്കിലുമായി. അപ്പയ്ക്കു സംസാരിക്കാൻ ചെറിയ ബുദ്ധിമുട്ടുണ്ട്. ഞാൻ കൂടെ വിളിച്ചു കൂടുതൽ സംസാരിപ്പിക്കേണ്ട എന്നു കരുതി.

 

ചാണ്ടി: സൗണ്ട് റെസ്റ്റ് എടുക്കാൻ പക്ഷേ അപ്പയ്ക്കു പറ്റില്ലല്ലോ!

 

മറിയം: ശരിയാണ്. അപ്പയ്ക്ക് എപ്പോഴും ആളുകളോടു മിണ്ടിക്കൊണ്ടിരിക്കണം. ഫോൺ ഒന്നും വന്നില്ലെങ്കിൽ സങ്കടമാണ്!

 

ചോദ്യം: നിങ്ങൾക്ക് അപ്പനിൽ ഏറ്റവും ഇഷ്ടപ്പെട്ട കാര്യമെന്താണ്? ഇഷ്ടമില്ലാത്തതും?

 

അച്ചു: അപ്പയുടെ അറിവ്, സഹിഷ്ണുത, ഇച്ഛാശക്തി... അങ്ങനെ പലതുമുണ്ട്. പക്ഷേ, എന്നെ ഏറ്റവും അദ്ഭുതപ്പെടുത്തുന്നത്, നിസ്വാർഥ്വതയാണ്. ഒരു മനുഷ്യന് ഇങ്ങനെ നിസ്വാർഥനാകാൻ കഴിയുമോ എന്നത് ആശ്ചര്യമാണ്. അപ്പയുടെ ദൗർബല്യവും അതാണ്.

 

മറിയം: ശരിയാണ്. അനുകമ്പയും ക്ഷമയും നിസ്വാർഥതയും ഇത്രയും ഞാൻ വേറൊരാളിൽ കണ്ടിട്ടില്ല. പിന്നെ, അപ്പ ഇങ്ങനെയായതുകൊണ്ട് ഞങ്ങൾക്കു ചില നഷ്ടങ്ങളുണ്ട്. ഒരു സിനിമയ്ക്കു പോകാൻ കിട്ടില്ല, സ്കൂളിലോ കോളജിലോ ഒന്നു വരില്ല! പക്ഷേ, ഞങ്ങൾ മൂന്നും ചെറുപ്പത്തിലേ ആ യാഥാർഥ്യവുമായി പൊരുത്തപ്പെട്ടതാണ്.

 

ചാണ്ടി: രണ്ടുപേരും പറഞ്ഞതിനു പുറമെ, രാഷ്ട്രീയ വിദ്യാർഥി എന്ന നിലയിൽ എന്റെ ആരാധന അപ്പയുടെ പ്രായോഗികജ്ഞാനത്തിലും ബുദ്ധിയിലുമാണ്. ഏതു പ്രശ്നത്തിനും അപ്പയുടെ കയ്യിൽ പരിഹാരമുണ്ട്. പിന്നെ ആരെയും വേദനിപ്പിക്കാതിരിക്കാനുള്ള ശ്രദ്ധ. രണ്ടും വലിയ പാഠമാണ്.

 

ചോദ്യം: ഈ ഘട്ടത്തിൽ അപ്പയ്ക്കു നിങ്ങൾ മൂന്നു പേരും എന്ത് ഉപദേശമാണു കൊടുക്കുക?

 

വീണ്ടും ചിരി!

 

മൂന്നു പേരും: ഇത്രയും ജീവിതം കണ്ട, അതിലൂടെ നായകനായി മുന്നേറുന്ന അപ്പയ്ക്ക് ഞങ്ങൾ എന്തു ഉപദേശം കൊടുക്കാനാ? ആരോഗ്യകാര്യത്തിൽ കുറച്ചൂടെ ശ്രദ്ധയാകാം എന്നു മാത്രമേ പറയാനുള്ളൂ.

 

ആ ഒത്തുചേരൽ നിറഞ്ഞ ചിരികളോടെ പൂർത്തിയായ ശേഷവും ആ വാട്‌സാപ് ഗ്രൂപ്പ് ഞങ്ങൾ തുടർന്നു. ‘സീ യൂ സൂൺ’ എന്ന മലയാള സിനിമ ഒടിടിയിൽ വന്ന സമയമായിരുന്നു. വാട്‌സാപ് ഗ്രൂപ്പിന് ‘സീ യൂ സൂൺ – ഓസി സാർ’ എന്നായിരുന്നു പേര്. ഉമ്മൻ ചാണ്ടിയുടെ വിശേഷങ്ങളും ആരോഗ്യവിവരങ്ങളുമൊക്കെ ചാണ്ടി അവിടെ ഇടയ്ക്കിടെ അപ്ഡേറ്റ് ചെയ്തുകൊണ്ടിരുന്നു. പിറന്നാളുകളിലും വാർഷികങ്ങളിലും ആശംസകൾ പങ്കുവച്ചു. 

 

ഒടുവിൽ ഇന്നു പുലർച്ചെ, 4.50 ന് ചാണ്ടി ഉമ്മന്റെ ഒറ്റവരി മെസേജ് ഗ്രൂപ്പിൽ വന്നു: Heaven.

 

സ്വർഗമുണ്ടെങ്കില്‍ അവിടെയിപ്പോൾ, ആൾക്കൂട്ടം ഇരമ്പിയാർക്കുന്നുണ്ടാകും...

 

 

∙ ഉമ്മൻചാണ്ടിയുമായി 2010ൽ നടത്തിയ അഭിമുഖത്തിലെ പ്രസക്ത ഭാഗങ്ങൾ: 

 

∙ നാൽപതു വർഷത്തിനിടെ നമ്മുടെ രാഷ്‌ടീയമൊക്കെ എങ്ങനെയാണു മാറിയത്? 

 

പൊതുപവർത്തനത്തിലും പ്രവർത്തകരിലും വലിയ മാറ്റങ്ങളുണ്ടായിട്ടുണ്ട്. പണ്ടൊക്കെ നയങ്ങളും പരിപാടികളും വളരെ പ്രധാനമായിരുന്നു. പ്രകടനപത്രിക ആധികാരികരേഖയായിരുന്നു. ഞങ്ങളൊക്കെ അസംബ്ലിയിൽ പ്രകടനപത്രികയുമായി പോയാണു പസംഗിക്കുക. ഇന്നിപ്പോൾ പ്രകടന പത്രികയൊക്കെ വെറും ചടങ്ങായി. ഇന്നൊക്കെ ഒരു മുണ്ടും ഷർട്ടും മാറുന്ന ലാഘവ ബുദ്ധിയോടുകൂടി പാർട്ടികളുടെ നയങ്ങൾ മാറുന്നു. പ്രഖ്യാപനങ്ങൾ മാറുന്നു. നടപടികൾ മാറുന്നു. 

പണത്തിന്റെ സ്വാധീനമേറി. എന്റെ ആദ്യ ഇലക്‌ഷനിൽ ചെലവ് 22,500 രൂപയായിരുന്നു. 20,000 രൂപ പാർട്ടി തന്നു. 1250 രൂപ ബന്ധുക്കളും കൂട്ടുകാരും പിരിച്ചു തന്നു. ജയിച്ചാൽ 500 രൂപ തരാമെന്ന് ഒരാൾ പറഞ്ഞിരുന്നു. അതുകൂടി കിട്ടിയതോടെ എന്റെ കടംതീർന്നു. തിരഞ്ഞെടുപ്പിനു മൂന്നാഴ്‌ച കഴിഞ്ഞു പട്‌നയിൽ നടന്ന എഐസിസി സമ്മേളത്തിനു പോകാനുള്ള ടിക്കറ്റും അതിൽനിന്നെടുത്തു. ഇപ്പോൾ അങ്ങനെയാണോ തിരഞ്ഞെടുപ്പൊക്കെ? 

 

∙ യൂത്ത് കോൺഗ്രസുകാരനായാണല്ലോ സഭയിലെത്തുന്നത്. ആദ്യസഭയിലെ മറക്കാനാവാത്ത അനുഭവങ്ങൾ എന്തൊക്കെയാണ്? 

 

സി. അച്യുതമേനോൻ മന്തിസഭയിൽ 1971 ൽ ആണു കോൺഗ്രസും ചേരുന്നത്. കെ.ടി. ജോർജാണു ധനമന്ത്രി. ചെറുപ്പക്കാരൻ. വളരെ പെട്ടെന്നു മിടുക്കു തെളിയിച്ചു. 1972ലെ ബജറ്റിന്റെ ധനാഭ്യർഥന ചർച്ച നടക്കുന്നു. ജോർജ് സാറിന്റെ പിന്നിലുള്ള രണ്ടാം നിരയിലാണു ഞാനിരിക്കുന്നത്. സംസാരിച്ചു കൊണ്ടിരിക്കെ പെട്ടെന്ന് അദ്ദേഹം കുഴഞ്ഞുവീണു. ആശുപതിയിൽ കൊണ്ടുപോയി അഞ്ചു മണിക്കൂർ കഴിഞ്ഞപ്പോൾ അദ്ദേഹം മരിച്ചു. അതു മറക്കാനാവില്ല. അത്തരമൊരു സംഭവം പിന്നീട് ഉണ്ടായിട്ടുമില്ല. 

 

∙ ഉമ്മൻ ചാണ്ടിയെ ഒരിക്കലും ദേഷ്യപ്പെട്ടു കണ്ടിട്ടില്ല. നിയമസഭയിൽ ക്ഷുഭിതനായ സന്ദർഭങ്ങളുണ്ടോ?

 

പൊതുവെ ആരോടും ദേഷ്യപ്പെടുന്ന സ്വഭാവമില്ല. പക്ഷേ, ചില അവസരങ്ങളിൽ മനസ്സിൽ അങ്ങനെ തോന്നും. തോന്നിയാലും ഒരു സെക്കൻഡ്, രണ്ടു സെക്കൻഡ് കൊണ്ട് അതങ്ങ് അടക്കാനാണു നോക്കുക. 

 

∙ എങ്കിലും, വിഷമവും ക്ഷോഭവുമൊക്കെ വന്നിട്ടുണ്ടാവില്ലേ?

 

1987 ൽ എം.വി. രാഘവൻ സിപിഎം വിട്ട് അഴീക്കോട്ടുനിന്നു ജയിച്ചു വന്നു. സഭയിൽ സഹകരണ സംഘത്തെക്കുറിച്ചുള്ള എന്തോ ഒരു സബ്‌മിഷൻ അദ്ദേഹം ഉന്നയിച്ചു. അന്നു സഹകരണ മന്ത്രിയായ ടി.കെ. രാമകൃഷ്‌ണൻ നിഷേധിച്ചുകൊണ്ടു മറുപടി പറഞ്ഞപ്പോൾ രാഘവൻ അതു സംബന്ധിച്ച ഒരു രേഖ ടികെയുടെ മുൻപിലെത്തി കൊടുക്കാൻ ശമിച്ചു. ടികെ വാങ്ങിയില്ല. രാഘവൻ അതു മന്ത്രിയുടെ പോക്കറ്റിലിട്ടു കൊടുത്തു. ഞാനിതു കണ്ടുകൊണ്ടിരിക്കുകയാണ്. അപ്പോഴേക്കും സിപിഎമ്മിലെ ഫയർബാൻഡ് എംഎൽഎമാർ രാഘവൻ ടികെയെ കയ്യേറ്റം ചെയ്‌തുവെന്ന ആരോപണവുമായി ചാടിയിറങ്ങി വന്നു. ഇ.പി. ജയരാജനൊക്കെയുണ്ട്. അവരെല്ലാം ചേർന്നു രാഘവനെ സഭയുടെ നടുത്തളത്തിലിട്ട്, സ്‌പീക്കറുടെ മുൻപിൽ ചവിട്ടി മെതിച്ചു. വാച്ച് ആൻഡ് വാർഡ് തടഞ്ഞില്ല. ദയനീയമായ ചിത്രം. മർദിച്ചവർക്കെതിരെ അന്ന് ഒരു നടപടിയുമുണ്ടായില്ല. രാഘവനെ സസ്‌പെൻഡ് ചെയ്യുകയും ചെയ്‌തു. അത്തരം അനീതികൾ വല്ലാതെ വിഷമിപ്പിച്ചിട്ടുണ്ട്. 

 

∙ സംവാദത്തിന്റെ കാലമാണല്ലോ ഇത്. നിയമസഭയിൽ ഉമ്മൻ ചാണ്ടി പങ്കെടുത്ത സംവാദങ്ങളിൽ ഓർമയിലുള്ളത് ഏതാണ്? 

 

1981ൽ 82 ദിവസം മാതം ആയുസ്സുണ്ടായ കെ. കരുണാകരൻ മന്ത്രിസഭയിൽ ഞാൻ മന്ത്രിയായിരിക്കുമ്പോൾ വനംവകുപ്പിലെ ഒരു ഇടപാടിൽ അഴിമതി നടന്നുവെന്ന് അടുത്ത സഭയിൽ സിപിഎം ആരോപണമുന്നയിച്ചു. സിറ്റിങ് ജഡ്‌ജി അന്വേഷിക്കണമെന്ന് ഇതേക്കുറിച്ചു ചർച്ചയിൽ ഞാൻ ആവശ്യപ്പെട്ടു. ഓരോ കാര്യങ്ങളായി പുറത്തുവന്നപ്പോൾ, എന്റെ കാലത്ത് അഴിമതിയില്ലെന്നു മാത്രമല്ല, അതിനു മുൻപു സിപിഐ മന്ത്രിമാർ വകുപ്പു ഭരിച്ച ഘട്ടത്തിലെ ചില ക്രമക്കേടുകൾ പുറത്തുവരികയും ചെയ്‌തു. സിപിഐയിൽ കെ.പി. പ്രഭാകരനൊക്കെയാണ് അന്ന്. സിപിഎമ്മും സിപിഐയും തമ്മിലുള്ള പശ്‌നമായി അതു മാറി. അതു രാഷ്‌ടീയമായി ഞങ്ങൾക്കു വലിയ ഗുണം ചെയ്‌തു. ജസ്‌റ്റിസ് ജോർജ് വടക്കേലായിരുന്നു അന്വേഷണം. കേരളത്തിൽ സിറ്റിങ് ജഡ്‌ജി അന്വേഷിച്ച അവസാനത്തെ കേസായിരുന്നു അത്. സിറ്റിങ് ജഡ്‌ജിയുടെ അന്വേഷണത്തിൽ എന്നെ ഒരു സാക്ഷിയായി പോലും തെളിവെടുപ്പിനു വിളിച്ചില്ല. അന്വേഷണ റിപ്പോർട്ടിൽ എന്റെ പേരുപോലുമുണ്ടായിരുന്നുമില്ല. 

 

∙ കെ. കരുണാകരന്റെയും എ.കെ. ആന്റണിയുടെയും ഒപ്പം മന്ത്രിയായിരുന്നല്ലോ. അവരെ എങ്ങനെ വിലയിരുത്തുന്നു? 

 

ആന്റണിയിൽനിന്നു വളരെയേറെ കാര്യങ്ങൾ നമുക്കു പഠിക്കാനുണ്ട്. വളരെ സൂക്ഷിച്ചും മനസ്സിലാക്കിയും തീരുമാനങ്ങൾ എടുക്കുന്ന ആളാണ്. ഒരിക്കലും ഒരു തീരുമാനമെടുത്തിട്ട് അതു തെറ്റാകുന്ന സാഹചര്യം സാധാരണനിലയിൽ ഉണ്ടാവില്ല. അദ്ദേഹത്തെ ആർക്കും സ്വാധീനിക്കാനും കഴിയില്ല. മെറിറ്റ് നോക്കിയേ ചെയ്യൂ. ആന്റണിയുടെ ഏറ്റവും വലിയ ഗുണവും മൈനസ് പോയിന്റും അതു തന്നെയാണ്. രാഷ്‌ട്രീയത്തിൽ പലരെയും സഹായിക്കുക, അവരുടെ സപ്പോർട്ട് കിട്ടുക അങ്ങനെയൊന്നും ചിന്തിക്കുന്ന ആളല്ല ആന്റണി. അങ്ങനെയൊരു സപ്പോർട്ട് ആഗ്രഹിക്കുന്നുമില്ല. ഒരു വിധത്തിലുള്ള സമ്മർദങ്ങളും ആന്റണിയെ സംബന്ധിച്ചിടത്തോളം ഉണ്ടാവില്ല. കരുണാകരൻ പ്രായോഗികമായി കാര്യങ്ങൾ നടത്തി മുന്നോട്ടുനീങ്ങുന്ന ആളാണ്. അതിനകത്തു പലപ്പോഴും ആക്ഷേപങ്ങൾ വന്നെന്നു വരും. തർക്കങ്ങൾ വന്നെന്നും വരും. വിവാദങ്ങൾ വരും. അതു കൂസാതെ മുൻപോട്ടു പോകുന്നു. 

 

∙ ഈ രണ്ടു രീതികളുടെയും ഒരു മിക്‌സാണോ ഉമ്മൻ ചാണ്ടി? 

 

ജനാധിപത്യത്തിൽ ഭരണാധികാരിക്ക് ഉണ്ടാവേണ്ട ഗുണങ്ങളെന്നു ഞാൻ വിശ്വസിക്കുന്നതു സത്യസന്ധതയും സാമാന്യബുദ്ധിയുമാണ്. പൊതുവായ അറിവും കാര്യങ്ങളും വച്ചും മറ്റുളളവരുടെ ഉപദേശം സ്വീകരിച്ചും മറ്റുള്ളവരെ വിശ്വാസത്തിലെടുത്തും നമുക്കു കാര്യങ്ങൾ നടത്താൻ പറ്റും. സത്യസന്ധതയില്ലാതെ ജനങ്ങൾക്കു വിശ്വാസമുള്ള ഭരണാധികാരിയായി പ്രവർത്തിക്കാൻ കഴിയില്ല. അതോടൊപ്പം പ്രായോഗികമായി ഫലമുണ്ടാകുന്ന പ്രവർത്തനവും വേണം. അതാണ് എന്റെ രീതി. 

 

∙ ഉമ്മൻ ചാണ്ടി മുഖ്യമന്ത്രിയായപ്പോൾ ഭരണവേഗം ചർച്ചാ വിഷയമായി. കോൺഗ്രസിൽ വേഗം പൊതുവെ കരുണാകരനുമായി ബന്ധപ്പെട്ടായിരുന്നു മുൻപു പരാമർശിക്കപ്പെട്ടിരുന്നത്? 

 

നമ്മുടെ മനസ്സിൽ ഒരു പ്രശ്‌നം നീതിയാണ്, ന്യായമാണ് എന്നു ബോധ്യപ്പെട്ടു കഴിഞ്ഞാൽ അതിന് എന്തെങ്കിലും ഒരു മാർഗം കണ്ടുപിടിച്ചു ചെയ്യണമെന്നു നിർബന്ധമുണ്ട്. എനിക്കു പത്തു കാര്യം ചെയ്യാൻ പറ്റുന്ന സ്‌ഥാനത്തു നൂറു കാര്യം എന്റെയടുത്തു വന്നു പെടുകയാണ്. ഒരു കാര്യം മാറ്റിവച്ചുകൊണ്ട് എനിക്കൊരു രാത്രി കിടക്കാൻ പറ്റുകയില്ല. എനിക്കതു പോസിറ്റീവായി തീർക്കണം. അപ്പോൾ തീരുമാനം സ്‌പീഡിലെടുത്തേ പറ്റൂ. ഈ സ്‌പീഡ് എടുക്കുമ്പോൾ ചിലപ്പോൾ തെറ്റുകൾ വരും. എന്റെ മനസ്സിൽ ശരിയെന്നു തോന്നിയാൽ നൂറു കാര്യം വന്നാൽ നൂറും ചെയ്യും. അതിൽ പത്തെണ്ണം തെറ്റിയേക്കാം. എല്ലാം പരിശോധിച്ചാണു ചെയ്യാൻ പോകുന്നതെങ്കിൽ 10 കാര്യമേ ചെയ്യാൻ പറ്റൂ. 90 കാര്യങ്ങളും ചെയ്യാൻ പറ്റില്ല. അപ്പോൾ ഞാൻ എപ്പോഴും നൂറുകാര്യങ്ങളാണ് ഓപ്‌റ്റ് ചെയ്യുന്നത്. അപ്പോൾ ചില തെറ്റു വരും. തെറ്റു വരുമ്പോൾ ജനങ്ങളോടുതന്നെ തുറന്നു പറയും. 

 

∙ ക്ഷമാശീലത്തെക്കുറിച്ചു മുൻപു പറഞ്ഞു. അതുപോലെ പുതിയവർ ഉമ്മൻ ചാണ്ടിയിൽനിന്നു മറ്റെന്തൊക്കെയാണു പഠിക്കേണ്ടത്? 

 

ഞാൻ എല്ലാറ്റിനും ഒരു മാതൃകയൊന്നുമല്ല. ഒരു കാര്യത്തിലാണ് എനിക്കു കോംപ്രമൈസ് ഇല്ലാത്തത്– ജനങ്ങളുമായുള്ള ബന്ധം. ദുരഭിമാനം പൊതുപവർത്തകനു പാടില്ല. ജനവുമായുള്ള അകൽച്ചയുണ്ടാകുന്നതു ജനാധിപത്യത്തിന്റെ പരാജയത്തിന്റെ തുടക്കമാണ്. ജനങ്ങളുമായുള്ള ബന്ധം നശിക്കരുത്. എന്റെ ശക്‌തിയും പചോദനവും അതാണ്. 

 

∙ കോൺഗ്രസിന്റെ ഒരു കാലത്തെ ചരിത്രത്തിൽ മുഴുവൻ കെ. കരുണാകരൻ-എ.കെ. ആന്റണി പോരുണ്ട്. ആന്റണിയുടെ പേരായിരുന്നുവെങ്കിലും യുദ്ധതന്ത്രജ്‌ഞൻ ഉമ്മൻ ചാണ്ടിയായിരുന്നല്ലോ? 

 

യൂത്ത് കോൺഗ്രസ് സെറ്റായിരുന്നു ഞങ്ങളൊക്കെ. 1967 മുതൽ ചെറുപ്പക്കാരുടെയും സീനിയേഴ്‌സിന്റെയും ഒരു വേർതിരിവുണ്ടായിരുന്നു. അതു ശക്‌തിപ്പെട്ടു മുൻപോട്ടു വന്നു. എഴുപതുകളിൽ രണ്ടു ചേരികളായി. എന്റെ കൂറ് എപ്പോഴും യൂത്തിനോടൊപ്പമായിരുന്നെങ്കിലും ഒരു പൊട്ടിത്തെറിയിലേക്കു പോകരുത് എന്ന നിലപാടായിരുന്നു. അതിന്റെ അടിസ്‌ഥാനത്തിൽ മധ്യസ്‌ഥതയുടെ ലെവലിൽ അങ്ങോട്ടുമിങ്ങോട്ടും സംസാരിച്ചിരുന്നു. അഡ്‌ജസ്‌റ്റ്‌മെന്റ് വരുത്താനുമൊക്കെ ശ്രമിച്ചു. പക്ഷേ, 1975 ൽ അടിയന്തരാവസ്‌ഥ ആയപ്പോഴേക്കു ചർച്ച പോലും സാധ്യമല്ലാത്ത രീതിയിൽ മുഖാമുഖം രണ്ടു ഗ്രൂപ്പായി വന്നു. ഒരു ഗ്രൂപ്പിന്റെ ഭാഗമായി നിന്നേ മതിയാകൂ എന്ന സ്‌ഥിതി വന്നപ്പോഴാണ് എനിക്കു രംഗത്തുവരേണ്ടി വന്നത്. അപ്പോഴും മിതത്വം പാലിക്കാൻ എപ്പോഴും ശ്രമിച്ചു. ആഗ്രഹിച്ചു. പക്ഷേ, ചില ഘട്ടങ്ങളിൽ അതു പരിധി വിട്ടുപോയി. അതിൽ വിഷമവുമുണ്ട്. 

 

∙ എ.കെ. ആന്റണിയും ഉമ്മൻ ചാണ്ടിയും തമ്മിലുള്ള ബന്ധം എല്ലാക്കാലത്തും മലയാളിക്ക് ഒരു കൗതുകമാണ്. ആന്റണിയുടെ നിഴൽ, രണ്ടാമൂഴക്കാരൻ എന്നൊക്കെ ഉമ്മൻ ചാണ്ടി വിശേഷിപ്പിക്കപ്പെട്ടു. രണ്ടാമനായതിന്റെ നഷ്‌ടങ്ങളുണ്ടായിട്ടുണ്ടോ? 

 

മാധ്യമങ്ങളിൽ വന്നതിലൊന്നും ഒരടിസ്‌ഥാനവുമില്ല. ഞങ്ങൾ വിദ്യാർഥി രാഷ്‌ട്രീയം മുതൽ ഒരുമിച്ചു മുന്നോട്ടു വന്നു. ആ ഒരു ബന്ധം എന്നും ഉണ്ട്. ആ കാര്യത്തിൽ എനിക്ക് ആന്റണിയോട് ഒരു ശതമാനം പോലും അഭിപ്രായ വ്യത്യാസമില്ല. ആന്റണി എടുക്കുന്ന ചില തീരുമാനങ്ങളിൽ അഭിപ്രായ വ്യത്യാസമുണ്ടായിട്ടുണ്ട്. അതു പലപ്പോഴും പരസ്യമായും പ്രകടിപ്പിച്ചിട്ടുണ്ട്. നയങ്ങളിലും സമീപനങ്ങളിലും ചില വ്യത്യാസങ്ങൾ ഉണ്ടായി. വ്യക്‌തിപരമായ ബന്ധത്തിന് പക്ഷേ ഒരു മാറ്റവുമില്ല. 

 

∙ മുഖ്യമന്തി സ്‌ഥാനത്തുനിന്നുള്ള ആന്റണിയുടെ രാജിയുമായി ബന്ധപ്പെട്ടു ചില പ്രചാരണങ്ങളുണ്ടായല്ലോ. ഉമ്മൻ ചാണ്ടിയാണു ചരടുവലിച്ചത് എന്നൊക്കെയുള്ള മട്ടിൽ? 

 

ആന്റണി രാജി വച്ചത് ആരും ആവശ്യപ്പെട്ടിട്ടല്ല. ആരും കേരളത്തിൽനിന്നു പറഞ്ഞിട്ടില്ല. ഗ്രൂപ്പിസം ആളിക്കത്തി നിൽക്കുന്ന സമയമാണ്. ആ സമയത്തു പോലും ഒരു എംഎൽഎയും ആന്റണി മാറാൻ പറഞ്ഞില്ല. അംസബ്ലിയിൽ വോട്ടെടുപ്പിലൂടെ മാറ്റാൻ ശമിച്ചവരോ രാജ്യസഭാ തിരഞ്ഞെടുപ്പിൽ റിബൽ സ്‌ഥാനാർഥിയെ നിർത്തിയവരോ പോലും ആവശ്യപ്പെട്ടില്ല. എല്ലാ എംഎൽഎമാരും ആന്റണി മാറേണ്ട കാര്യമില്ല, ഉത്തരവാദി ആന്റണിയല്ല, മറ്റു ഘടകങ്ങളാണ് എന്നു പറഞ്ഞ് ആന്റണിയെ സപ്പോർട്ട് ചെയ്‌തു. ആന്റണി രാജി എന്ന നിലപാടിൽ ഉറച്ചുനിന്നപ്പോൾ സോണിയ ഗാന്ധി മനസ്സില്ലാ മനസ്സോടെയാണ് അനുമതി കൊടുത്തത്. രാജിവയ്‌ക്കുന്ന കാര്യം എന്നോടു പോലും പറഞ്ഞിരുന്നില്ല. വിമാനത്താവളത്തിൽ വച്ചു രാജി നൽകിയെന്ന് അവിടെനിന്നു വിളിച്ചു പറഞ്ഞപ്പോഴാണു ഞാനറിയുന്നത്. 

 

∙ ആന്റണി, ഉമ്മൻ ചാണ്ടിയെ 1995ലും 2001ലും മാറ്റിനിർത്തിയതായും കഥകളുണ്ടായി? 

 

ഒരടിസ്‌ഥാനവുമില്ല. അതിൽ ആന്റണിക്ക് ഒരു ഉത്തരവാദിത്തവുമില്ല. ഞാൻ അദ്ദേഹത്തോടു നീതി പുലർത്താതിരിക്കുകയാണു ചെയ്‌തത്. ’95ൽ എനിക്ക് ആശയപരമായ കാരണമുണ്ടായിരുന്നു. അതിനു തൊട്ടുമുൻപു കരുണാകരനെതിരെ പാർട്ടിക്കകത്തും പുറത്തും ഞാൻ നീക്കങ്ങൾ നടത്തിയിരുന്നു. അതിൽ പലപ്പോഴും പാർട്ടിയുടെ അച്ചടക്കത്തിന്റെ സീമകൾ പോലും ലംഘിച്ചുപോയിട്ടുണ്ട്. അദ്ദേഹത്തിന്റെ ഒരു പ്രവർത്തനംകൊണ്ടു പാർട്ടിക്കു ദോഷമുണ്ടാകും എന്നു വിശ്വസിച്ചു ചെയ്‌തതായിരുന്നു. പക്ഷേ, അതിനു വേണ്ടി സ്വീകരിച്ച മാർഗം അതിർവരമ്പുകൾ ലംഘിച്ചോ എന്ന് എനിക്കു തന്നെ ഒരു കുറ്റബോധമുണ്ടായിരുന്നു. അങ്ങനൊരു ശ്രമം നടത്തിയശേഷം വരുന്ന സർക്കാരിൽ ഞാൻ അംഗമായാൽ ഞാൻ ചെയ്‌തതെല്ലാം സ്‌ഥാനത്തിനു വേണ്ടിയാണ് എന്നുകൂടി അർഥം വരും. അതുകൊണ്ടു മാറി നിന്നു. ആന്റണി എന്നെ ഒരുപാടു നിർബന്ധിച്ചുവെങ്കിലും ഞാൻ ശക്‌തമായ നിലപാടെടുത്തു. 

 

2001ൽ ആന്റണി നേരത്തേ തന്നെ പറഞ്ഞു, ’95ലെ നിലപാടു പറ്റില്ല. ’95ൽ താൻ ഉണ്ടായിരുന്നെങ്കിൽ കുറേക്കൂടി സഹായകരമാകുമായിരുന്നു എന്നൊക്കെ. ഞാൻ സമ്മതിക്കുകയും ചെയ്‌തു. അപ്പോഴാണു കരുണാകരൻ കെ.വി. തോമസിന്റെ പേരു മുന്നോട്ടുവച്ചത്. നല്ല ഭൂരിപക്ഷം നേടി വന്ന സമയത്ത് അങ്ങനൊരു തർക്കം വന്നാൽ നമുക്കു ദോഷം ചെയ്യുമെന്നു പറഞ്ഞു ഞാൻ പിന്മാറി. ആന്റണി സമ്മതിച്ചില്ല, ആളുകളെല്ലാം ഉമ്മൻ ചാണ്ടി വരുമെന്നു കരുതിയിരിക്കുകയാണ് എന്നു നിർബന്ധിച്ചു. വിഷമിക്കേണ്ട, എന്റെ കയ്യിൽ മാർഗമുണ്ട്, ഞാൻ യുഡിഎഫ് കൺവീനറായിക്കോളാം എന്നു പറഞ്ഞു. അങ്ങനെ കെ. ശങ്കരനാരായണൻ മന്ത്രിസഭയിലേക്കു വന്നപ്പോൾ ഞാൻ പകരം യുഡിഎഫ് കൺവീനറായി. ഈ രണ്ടു സംഭവത്തിലും ആന്റണിക്ക് ഒരു പങ്കുമില്ല. 

 

∙ ഉമ്മൻ ചാണ്ടി എന്ന പ്രതിപക്ഷ നേതാവിന്റെ അഞ്ചുവർഷം അവസാനിക്കുന്നു. പ്രതിപക്ഷം ഇഫക്‌ടീവ് ആയിരുന്നോ? 

 

നിയമസഭയിൽ  ഞങ്ങൾ ഒരു അഴിമതി ആരോപണം ഉന്നയിക്കുന്നുണ്ടെങ്കിൽ അതിന്റെ മുഴുവൻ കാര്യങ്ങളും അറിഞ്ഞതിനു ശേഷമേ ചെയ്യൂ. ഇപ്പോൾ ഈ ലോട്ടറിയുമായി ബന്ധപ്പെട്ടു വന്ന പ്രശ്‌നം, അതിന്റെ മുഴുവൻ സാഹചര്യങ്ങളും അതിന്റെ മുഴുവൻ രേഖകളും കാര്യങ്ങളുമെല്ലാം വന്നതിനുശേഷമാണ് ആക്ഷേപമുന്നയിച്ചത്. അതേ ഉത്തരവാദിത്തോടെയാണു ഞങ്ങൾ പ്രതികരിച്ചിട്ടുള്ളത്. ഞങ്ങൾ പറഞ്ഞ കാര്യങ്ങളിൽ സത്യം ഉണ്ട് എന്നു ജനങ്ങൾക്കു പോലും സംശയം വരത്തക്ക രീതിയിലുള്ള പ്രതികരണമാണു സർക്കാരിന്റെയും ധനമന്ത്രിയുടെയും ഭാഗത്തുനിന്ന് ഉണ്ടായത്. ഈ അഞ്ചുവർഷത്തിനിടയിൽ രണ്ടു ഹർത്താലാണു യുഡിഎഫ് നടത്തിയത്. അതിൽതന്നെ കുറ്റബോധം എനിക്കുണ്ട്. കാരണം, ഹർത്താലിൽ നമ്മൾ എന്താണോ ഉദ്ദേശിക്കുന്നത് അതല്ല നടക്കുന്നത്. ജനങ്ങളാണു കഷ്‌ടപ്പെടുന്നതും ബുദ്ധിമുട്ടുന്നതും.

 

English Summary: Why Puthuppalli Loves Oommen Chandy This Much! – A Personal Memory Note