ശമ്പളദിനത്തിന്റെ തലേദിവസമായിരിക്കും മിക്കപ്പോഴും അത് സംഭവിക്കുക. എവിടെ നിന്നെങ്കിലും കറങ്ങിതിരിഞ്ഞ് ഒരു പച്ചക്കുതിര വീടിനുള്ളിലേക്ക് കയറിവരും. രാത്രിയിൽ കുടുംബാംഗങ്ങൾ ഒന്നിച്ചിരുന്ന് ടിവി കാണുന്ന സമയത്താവും മിക്കപ്പോഴും ടിയാന്റെ വരവ്. ‘‘കണ്ടില്ലേ പച്ചക്കുതിര, നാളെ ‌വീട്ടിൽ പണം വരുമെന്ന് അവനറിയാം’’ എന്നിങ്ങനെയുള്ള വാക്കുകൾ വീട്ടുകാരിൽനിന്ന് ഉടനെത്തും. കുട്ടികൾ ആരെങ്കിലും അതിനെ ഓടിപ്പിക്കാൻ ശ്രമിച്ചാൽ, ‘‘അതൊരു പാവമല്ല, അവിടിരുന്നോട്ടെ’’ എന്ന ഡയലോഗു കൊണ്ട് ആ നീക്കത്തിനു തടയിടും. അടുത്തിടെ ഒരു പാറ്റയെ കണ്ടപ്പോൾ അതിന്റെ പിന്നാലെ പോയി ചൂലുകൊണ്ട് അടിച്ചോടിച്ച അതേയാൾ പച്ചക്കുതിരയുടെ കാര്യത്തിൽ ‘നിലപാട്’ മാറ്റിയതു കണ്ട് കുട്ടി അന്തംവിട്ടു നിൽക്കും. ഇതെല്ലാം കാണുന്ന പച്ചക്കുതിരയാകട്ടെ, കുറച്ചു നേരം അവിടെ ഗമയിലൊക്കെ ചാടി നടന്ന ശേഷം എങ്ങോ പോയി മറ‍യും.

എന്താണ് കേരളത്തിലെ വീടുകളിൽ പച്ചക്കുതിരയ്ക്ക് ഇത്രയേറെ ‘ഡിമാൻഡ്’? ഇപ്പോൾ പച്ചക്കുതിരയെക്കുറിച്ചു പറയാൻ മറ്റൊരു കാരണം കൂടിയുണ്ട്. വെറുതെ ചാടി നടന്നിരുന്ന പച്ചക്കുതിരയെ 'ഡാ എൽദോ, നിന്നെ സിനിമയിലെടുത്തെടാ' എന്ന ഡയലോഗു പോലെ കേരള ഭാഗ്യക്കുറി വകുപ്പ് ഏറ്റെടുത്തിരിക്കുകയാണ്.

കേരളത്തിലെ ഭാഗ്യക്കുറിയുടെ ഭാഗ്യമുദ്രയായാണ് ഇനി മുതൽ ഇത്തിരികുഞ്ഞൻ പച്ചക്കുതിരയ്ക്ക് സ്ഥാനക്കയറ്റം കൈവന്നിരിക്കുന്നത്. കേരള സർക്കാരിന് വരുമാനം നേടിക്കൊടുക്കുന്നതിൽ ഭാഗ്യക്കുറിക്കു വലിയ പങ്കാണുള്ളത്. ഇക്കാര്യത്തിന് കേരള ഗവർണർ ആരിഫ് മുഹമ്മദ്ഖാന്റെ വരെ സാക്ഷ്യമുണ്ട്. അങ്ങനെയിരിക്കുന്ന ഭാഗ്യക്കുറിയുടെ ഭാഗ്യമുദ്രയാകാൻ ക്ഷണം കിട്ടുകയെന്നതു ചെറിയ കാര്യമാണോ!

പക്ഷേ പച്ചക്കുതിരയ്ക്ക് കേരള ഭാഗ്യക്കുറി വകുപ്പ് ആദരം നൽകിയത് ഇഷ്ടമാവാത്ത ഒരു വിഭാഗവും ഉണ്ട്. ഭാഗ്യം കൊണ്ടുവരും എന്ന അന്ധവിശ്വാസം പ്രചരിപ്പിക്കുന്ന ജീവിയുടെ പ്രാധാന്യം ഇടതു സർക്കാർ ഭരിക്കുന്ന സമയത്തുതന്നെ പ്രചരിപ്പിക്കുന്നതിലാണ് എതിർപ്പ്. സമൂഹമാധ്യമങ്ങളിലും ഇതു സംബന്ധിച്ച ചൂടേറിയ ചർച്ചകൾ നടക്കുന്നുണ്ട്.

പച്ചനിറത്തെ രാഷ്ട്രീയവുമായി കൂട്ടിക്കെട്ടിയ ചർച്ചകളും ഏറെ. എന്തുകൊണ്ടാകും പച്ചക്കുതിരയെ ഭാഗ്യക്കുറിയുടെ ഭാഗമാക്കാൻ സർക്കാർ തീരുമാനിച്ചത്. പണം കൊണ്ടുവരും എന്നു വിശ്വസിക്കുന്ന ഈ ജീവിയുടെ കഥകൾ കേരളമണ്ണിൽ മാത്രം ഒതുങ്ങി നിൽക്കുന്നതല്ല. ഇന്നീ ലോകം മുഴുവൻ വിളങ്ങീടുന്ന ഭാഗ്യത്തിന്റെ 'കാരണഭൂതനായ' പച്ചക്കുതിരയെ കുറിച്ച് വിശദമായിത്തന്നെ അറിയാം...

∙ ‘ഞാനാണ് നിങ്ങളുടെ പുൽച്ചാടി’

ദശലക്ഷക്കണക്കിന് വർഷങ്ങൾക്ക് മുന്‍പേ ഭൂമിയിൽ പുൽച്ചാടികളുണ്ടായിരുന്നു എന്നാണു കണക്കാക്കുന്നത്. ഒരുപക്ഷേ ദിനോസറുകൾക്കും മുൻപേ അവ ഇവിടെ ഉണ്ടായിരുന്നു. ഷഡ്പദങ്ങളിൽ സെലിഫറ (Caelifera) എന്ന ഉപവിഭാഗത്തിൽ പെടുന്ന ഒരു തരം പ്രാണിയാണ് പുൽച്ചാടി. ഭൂമിയിൽ പതിനായിരത്തോളം വ്യത്യസ്ത ഇനത്തിൽപ്പെട്ട പുൽച്ചാടികളുണ്ട്.

ഓരോയിടത്തും അവയുടെ ആവാസ വ്യവസ്ഥയ്ക്ക് അനുസരിച്ചുള്ള നിറമാണ് മിക്കപ്പോഴും ഉണ്ടാവുക. ഇത് വേട്ടക്കാരിൽനിന്ന് രക്ഷപ്പെടാൻ സഹായിക്കുന്നു. അന്റാർട്ടിക്ക ഒഴികെയുള്ള എല്ലാ ഭൂഖണ്ഡത്തിലും ഈ കുഞ്ഞൻമാർ കാണപ്പെടുന്നുണ്ട്. എന്നാൽ വരണ്ട ഉഷ്ണമേഖലകളിലാണ് പുൽച്ചാടികളെ കൂടുതലായും കണ്ടുവരുന്നത്. പുൽമേടുകളും, പാടങ്ങളുമാണ് ഇവയുടെ ഇഷ്ട ആവാസ കേന്ദ്രം. 

നീണ്ട പിൻകാലുകളാണ് ഇവയുടെ പ്രത്യേകത. ഈ കാലുകളുടെ സഹായത്താലാണ് പുൽച്ചാടി ദീർഘ ദൂരം ചാടുന്നത്. 20 അടിവരെ ഉയരത്തിൽ, സ്വന്തം വലിപ്പത്തിന്റെ 200 മടങ്ങ് വരെ ചാടാന്‍ കഴിവുള്ളവയാണിവ. വെട്ടുകിളിയുടെ വിഭാഗത്തിൽ പെടുന്ന ഇത്തിരിക്കുഞ്ഞൻമാരാണ് പുൽച്ചാടികൾ.

പ്രധാനമായും പച്ച, തവിട്ട് നിറങ്ങളിലാണ് പുൽച്ചാടികളെ കാണപ്പെടുന്നത്. ഒരു സെന്റീമീറ്റർ മുതൽ ഏഴു സെന്റീമീറ്റർ വരെ ഇവയ്ക്ക് നീളമുണ്ടാവും. തലയിലല്ല പുൽച്ചാടിയുടെ വയറ്റിലാണ് ചെവി സ്ഥിതിചെയ്യുന്നത്. പുൽച്ചാടികളിൽ ചിലയിനം ഉയർന്ന ശബ്ദം പുറപ്പെടുവിക്കാൻ കഴിവുള്ളവയാണ്. രാത്രി ശബ്ദമുണ്ടാകുന്ന ചീവീട് തന്നെ ഉദാഹരണം.

സാധാരണയായി പുൽച്ചാടികൾ ഇലകളാണു ഭക്ഷണമാക്കുന്നത്. മാർദ്ദവമേറിയ തളിരിലകളെ ഞൊടിയിടകൊണ്ട് ഇവ തിന്നുതീർക്കും. അതേസമയം ചെറുപ്രാണികളെയും ഇവ അകത്താക്കാറുണ്ട്. പുൽച്ചാടികളുടെ വിഭാഗത്തിൽപ്പെടുന്ന, കൂട്ടത്തോടെ എത്തി വിളകൾ മുഴുവൻ തിന്നുതീർക്കുന്ന വെട്ടുകിളികൾ കർഷകരുടെ പ്രധാന വെല്ലുവിളിയാണ്.