ഈ 57 സ്ഥലങ്ങളിൽ, എല്ലാ രാജ്യക്കാർക്കും വീസയില്ലാതെ യാത്ര ചെയ്യാൻ അനുമതി നൽകുന്ന 12 സ്ഥലങ്ങളും ഉൾപ്പെടും. എന്നാൽ, ഒരു രാജ്യക്കാരനും വീസയില്ലാതെ പ്രവേശനം അനുവദിക്കാത്ത രാജ്യങ്ങളുമുണ്ട്. അഫ്ഗാനിസ്ഥാൻ, ഉത്തര കൊറിയ, പാപ്പുവ ന്യൂ ഗിനിയ, തുർക്ക്മെനിസ്ഥാൻ എന്നിവിടങ്ങളിലേക്കു പ്രവേശിക്കണമെങ്കിൽ ഏതു രാജ്യക്കാരനും വീസ നേരത്തേ എടുക്കണം. 

∙ ഒന്നാം സ്ഥാനം സിംഗപ്പൂരിന്; ഏറ്റവും പിറകിൽ അഫ്ഗാനിസ്ഥാൻ

ലോകത്തെ പാസ്പോർട്ടുകളിൽ ഏറ്റവും മുന്നിലുള്ളത് സിംഗപ്പുർ പാസ്പോർട്ട് ആണ്. ലോകത്തെ 227 യാത്രാ കേന്ദ്രങ്ങളിൽ 192 സ്ഥലങ്ങളിലേക്ക് സിംഗപ്പുർ വീസയുള്ളവർക്ക് നേരത്തേ വീസ എടുക്കാതെ യാത്ര ചെയ്യാനാകും. കഴിഞ്ഞ അഞ്ച് വർഷമായി ജപ്പാൻ ആയിരുന്നു ഒന്നാം സ്ഥാനത്ത്. ജപ്പാനെ മൂന്നാം സ്ഥാനത്തേക്കു പിന്തള്ളിയാണ് സിംഗപ്പുർ ഇപ്പോൾ ഒന്നാം സ്ഥാനത്തെത്തിയത്. പത്ത് വർഷത്തിനിടെ 25 റാങ്കുകൾ ഉയർത്തിയാണ് സിംഗപ്പുർ പുതിയ ഇൻഡെക്സിൽ ഒന്നാമതെത്തിയത്. സ്പെയിൻ, ഇറ്റലി, ജർമനി എന്നിവയാണ് രണ്ടാം സ്ഥാനത്തുള്ള രാജ്യങ്ങൾ. ഈ രാജ്യങ്ങളുടെ പാസ്പോർട്ട് ഉള്ളവർക്ക് 190 സ്ഥലങ്ങളിലേക്ക് വീസയില്ലാതെ പ്രവേശിക്കാനാകും. മൂന്നാം സ്ഥാനത്തുള്ള ഓസ്ട്രിയ, ഫിൻലൻഡ്, ഫ്രാൻസ്, ജപ്പാൻ, ലക്സംബർഗ്, ദക്ഷിണ കൊറിയ, സ്വീഡൻ എന്നീ രാജ്യങ്ങളുടെ പാസ്പോർട്ട് ഉള്ളവർക്ക് 189 സ്ഥലങ്ങളിലേക്ക് വീസയില്ലാതെ യാത്ര ചെയ്യാം. 

ഡെൻമാർക്ക്, അയർലൻഡ്, നെതർലൻഡ്സ്, യുകെ എന്നീ രാജ്യങ്ങളുടെ പാസ്പോർട്ടിന് നാലാം സ്ഥാനമാണുള്ളത്. ഈ പാസ്പോർട്ട് കൈവശമുള്ളവർക്ക് 188 സ്ഥലങ്ങളിലേക്ക് വീസയില്ലാതെ യാത്ര ചെയ്യാം. ബെൽജിയം, ചെക് റിപ്പബ്ലിക്, മാൾട്ട, ന്യൂസീലൻഡ്, നോർവേ, പോർച്ചുഗൽ, സ്വിറ്റ്സർലൻഡ് എന്നീ രാജ്യങ്ങളുടെ പാസ്പോർട്ട് ആണ് അഞ്ചാം സ്ഥാനത്ത്. ഇവർക്ക് 187 സ്ഥലങ്ങളിലേക്കു യാത്ര ചെയ്യാം. 10 വർഷം മുൻപു വരെ ഒന്നാം സ്ഥാനത്തു തുടർന്നിരുന്ന യുഎസ് പാസ്പോർട്ട് പുതിയ ഇൻഡെക്സിൽ എട്ടാം സ്ഥാനത്താണ്. യുകെ നാലു വർഷത്തിനു ശേഷമാണ് ആറാം സ്ഥാനത്തുനിന്ന് നാലാം സ്ഥാനത്ത് എത്തുന്നത്. പത്തു വർഷം മുൻപ് യുഎസ്, യുകെ പാസ്പോർട്ടുകളായിരുന്നു ഇൻഡെക്സിൽ ഒന്നാം റാങ്കിലുണ്ടായിരുന്നത്.

അഫ്ഗാനിസ്ഥാൻ ആണ് പാസ്പോർട്ട് ഇൻഡെക്സിൽ ഏറ്റവും പിറകിൽ. വെറും 27 രാജ്യങ്ങളിലേക്ക് മാത്രമേ അഫ്ഗാൻ പാസ്പോർട്ടുള്ളവർക്ക് വീസയില്ലാതെ യാത്ര ചെയ്യാനാകൂ. ഇറാഖ്, സിറിയ രാജ്യങ്ങളാണ് അഫ്ഗാനിസ്ഥാനു മുന്നിലുള്ള രണ്ടു രാജ്യങ്ങൾ. ഇറാഖ് പാസ്പോർട്ട് ഉള്ളവർക്ക് 29 സ്ഥലങ്ങളിലേക്കും സിറിയൻ പാസ്പോർട്ടുള്ളവർക്ക് മുപ്പത് സ്ഥലങ്ങളിലേക്കും യാത്ര ചെയ്യാനാകും. ലോക രാജ്യങ്ങളുടെ പാസ്പോർട്ടുകളുടെ ശക്തിയും ദൗർബല്യവും അളക്കുന്ന ലോകത്തിലെ ഏജൻസിയാണ് ഹെൻലി. രാജ്യാന്തര വിമാന യാത്രാ അതോറിറ്റി (ഐഎടിഎ) നൽകുന്ന യാത്രികരുടെ വിവരങ്ങളുടെ അടിസ്ഥാനത്തിലാണ് പാസ്പോർട്ട് ഇൻഡെക്സ് തയാറാക്കുന്നത്. ലണ്ടൻ ആസ്ഥാനമായി പ്രവർത്തിക്കുന്ന ഇമിഗ്രേഷൻ കൺസൽറ്റൻസിയാണ് ഹെൻലി.

∙ ബിസിനസുകാർ ഇന്ത്യ വിടുന്നു!

ചൈന കഴിഞ്ഞാൽ ഏറ്റവും കൂടുതൽ സമ്പന്നർ രാജ്യം വിടുന്നത് ഇന്ത്യയിൽനിന്നാണെന്നതിന്റെ കണക്കും പുറത്തു വന്നിട്ടുണ്ട്. ഹെൻലി റിപ്പോർട്ട് പ്രകാരം, 2023 അവസാനിക്കുമ്പോഴേക്കും 6500 സമ്പന്നർ ഇന്ത്യ വിടുമെന്നാണു കണക്ക്. 2022ൽ 7500 പേരായിരുന്നു ഇന്ത്യ വിട്ടത്. 2023 അവസാനിക്കുമ്പോഴേക്കും 13,500 ചൈനക്കാർ രാജ്യം വിടുമെന്നു പറയുന്നു. ചൈനയിൽനിന്ന് 2022ൽ രാജ്യംവിട്ട സമ്പന്നരുടെ എണ്ണം 10,800 ആണ്. ഇന്ത്യയിൽനിന്നുള്ള ബിസിനസുകാരും സമ്പന്നരും അധികവും തിരഞ്ഞെടുക്കുന്നത് ദുബായിയും സിംഗപ്പൂരുമാണ്. ഗോൾഡൻ വീസ, വ്യവസായത്തിന് അനുകൂലമായ സാഹചര്യം, സ്വൈര്യജീവിതം, കൂടുതൽ അവസരങ്ങൾ, നല്ല അന്തരീക്ഷം തുടങ്ങിയ കാരണങ്ങൾകൊണ്ടാണ് ദുബായ് ബിസിനസുകാർക്കു പ്രിയപ്പെട്ടതാകുന്നത്.

2023 അവസാനിക്കുമ്പോൾ യുഎഇയിലേക്ക് 4500 സമ്പന്നർ അധികമായി എത്തുമെന്നാണു പ്രതീക്ഷിക്കുന്നത്. സിംഗപ്പൂരിലേക്ക് 3200 പേരും. ലോകത്തിന്റെ വിവിധ രാജ്യങ്ങളിൽനിന്നുള്ള സമ്പന്നർ ഏറ്റവും കൂടുതൽ തിരഞ്ഞെടുക്കുന്ന രാജ്യം ഓസ്ട്രേലിയ ആണ്. 2023 അവസാനിക്കുമ്പോൾ 5200 ബിസിനസുകാർ ഓസ്ട്രേലിയയിൽ എത്തുമെന്നാണു കരുതുന്നത്. യുഎസ്, സ്വിറ്റ്സർലൻഡ്, കാനഡ, ഗ്രീസ്, ഫ്രാൻസ്, ന്യൂസീലൻഡ് എന്നിവയാണ് ബിസിനസുകാരെ ആകർഷിക്കുന്ന മറ്റു രാജ്യങ്ങൾ.

English Summary : Now Indians can Travel Visa Free to 57 Countries- Explained