‘സ്നേഹമാണഖിലസാരമൂഴിയിൽ’ എന്നു കുമാരനാശാൻ പാടിയത് ‘ഡേറ്റയാണഖിലസാരമൂഴിയിൽ’ എന്ന് മാറ്റിപ്പാടേണ്ട കാലത്താണ് നമ്മൾ ജീവിക്കുന്നത്. ഡേറ്റയുമായി അത്രമേൽ ബന്ധപ്പെട്ടാണ് നമ്മുടെയൊക്കെ ദിവസേനയുള്ള ഡിജിറ്റൽ ജീവിതം. ഈ ഡേറ്റയുടെ സുരക്ഷയ്ക്കായി കേന്ദ്രസർക്കാർ പാർലമെന്റിൽ അവതരിപ്പിച്ച ഡിജിറ്റൽ വ്യക്തി വിവരസുരക്ഷാ (ഡിപിഡിപി) ബിൽ അധികം വൈകാതെ യാഥാർഥ്യമാകും. 6 വർഷത്തോളം നീണ്ട ചർച്ചകൾക്കും കൂടിയാലോചനകൾ‌ക്കും ശേഷമാണ് പരിഷ്കരിച്ച ബിൽ പാർലമെന്റിലെത്തിയിരിക്കുന്നത്. ബിൽ ലോക്സഭയിൽ പാസായി. ബിൽ നിയമമാകുമ്പോൾ ദൈനംദിന ജീവിതത്തിൽ ഒട്ടേറെ മാറ്റങ്ങളാണ് നമ്മളെ കാത്തിരിക്കുന്നത്. ചില ഉദാഹരണങ്ങളിലൂടെ..

∙ കടകളിൽ ഫോൺ നമ്പർ നൽകുമ്പോൾ

തുണിക്കടയിലെ ബില്ലിങ് കൗണ്ടറിലെത്തുമ്പോൾ നമ്മളോട് മൊബൈൽ നമ്പർ ചോദിക്കുന്നത് പതിവാണ്. ഇലക്ട്രോണിക് രൂപത്തിലുള്ള ബിൽ ഫോണിൽ ലഭിക്കാനായി നിങ്ങൾ ഫോൺ നമ്പർ നൽകിയെന്നു കരുതുക. എങ്കിൽ ഇനി മുതൽ ബിൽ അയയ്ക്കുന്നതിനു മാത്രമേ ആ നമ്പർ സ്ഥാപനത്തിന് ഉപയോഗിക്കാനാവൂ. അതുവച്ച് ഓഫർ മെസേജുകൾ അയയ്ക്കാൻ കഴിയില്ലെന്നു ചുരുക്കം. ‘പർപ്പസ് ലിമിറ്റേഷൻ’ എന്നാണിതിനെ വിളിക്കുന്നത്.

ഓഫർ മെസേജുകളും മറ്റും അയയ്ക്കണമെങ്കിൽ ഇനിമുതൽ വ്യാപാര സ്ഥാപനങ്ങൾ ഉപയോക്താക്കളിൽ നിന്ന് പ്രത്യേകമായ അനുമതി (കൺസന്റ്) തേടണം. ഈ ഡേറ്റ എന്തിനുപയോഗിക്കും ഡേറ്റ എങ്ങനെ പിൻവലിക്കാം പരാതി ആരോട് പറയണം എന്നതടക്കമുള്ള വിവരങ്ങൾ നൽകി വേണം സമ്മതം വാങ്ങാൻ. ഇനി നിങ്ങൾ സമ്മതം നൽകിയെന്നു കരുതുക. ഒരു ഘട്ടത്തിൽ തുണിക്കടയിൽ നിന്നുള്ള മെസേജുകൾ വേണ്ടെന്നു തോന്നിയാൽ, ഇതിൽ നിന്ന് ഒഴിവാകാൻ എളുപ്പമാണ്. സ്ഥാപനത്തിന്റെ അനുമതി മാനേജർ / ഡേറ്റ പ്രൊട്ടക‍്ഷൻ ഓഫിസർക്ക് ഒരു ഇമെയിൽ അയച്ചാൽ നിങ്ങളുടെ വിവരങ്ങൾ നീക്കം ചെയ്യും.

∙ 'അമ്മേ, അച്ഛാ..അനുമതി തായോ'

18 വയസ്സിൽ താഴെയുള്ള കുട്ടികൾ ഇനി ഓരോ വെബ്സൈറ്റിലും ആപ്പിലും റജിസ്റ്റർ ചെയ്യാൻ മാതാപിതാക്കളുടെയോ രക്ഷിതാക്കളുടെയോ പിറകേ നടക്കേണ്ടി വരും. ഉദാഹരണത്തിന് ഫെയ്സ്ബുക്കിൽ 15 വയസ്സുകാരന് അക്കൗണ്ട് എടുക്കണമെങ്കിൽ ഫെയ്സ്ബുക് ആ കുട്ടിയുടെ മാതാപിതാക്കളുടെ അനുമതി (വെരിഫയബിൾ കൺസന്റ്) സ്വീകരിക്കണം. ഇത് ഒടിപി, ഐഡി വെരിഫിക്കേഷൻ രീതിയിലോ മറ്റോ ആയിരിക്കും നടപ്പാകുക. ഉദാഹരണത്തിന് കുട്ടി അക്കൗണ്ട് റജിസ്റ്റർ ചെയ്യുമ്പോൾ രക്ഷിതാവിന്റെ ഫോണിൽ എത്തുന്ന ഒടിപി നൽകിയായിരിക്കും ഭാവിയിൽ റജിസ്ട്രേഷൻ നടപടിക്രമം പൂർത്തിയാവുക.

നിലവിൽ ഫെയ്സ്ബുക്കിലും മറ്റും 13 വയസ്സിനു മുകളിലുള്ളവർക്ക് സ്വന്തം നിലയിൽ അക്കൗണ്ട് സൃഷ്ടിക്കാം. 13 വയസ്സിനു മുകളിലുള്ളയാളാണെന്ന് സ്വയം സാക്ഷ്യപ്പെടുത്തിയാൽ മതി. എന്നാൽ ബിൽ നിയമമായാൽ ഇത്തരം ഓൺലൈൻ ഇടപാടുകൾ കുട്ടികൾക്ക് സ്വന്തം നിലയ്ക്ക് ചെയ്യാനാവില്ല.

ഒരു കമ്പനി കുട്ടികളുടെ വിവരങ്ങൾ സുരക്ഷിതമായാണ് കൈകാര്യം ചെയ്യുന്നതെന്ന് സർക്കാരിനു ബോധ്യപ്പെട്ടാൽ അവയ്ക്ക് ഇളവു നൽകാം. എന്നാൽ ഈ ഇളവ് സമൂഹമാധ്യമങ്ങൾക്ക് നൽകില്ലെന്നാണ് ഐടി മന്ത്രാലയ വൃത്തങ്ങൾ പറഞ്ഞിരിക്കുന്നത്. പകരം കുട്ടികളുടെ വിദ്യാഭ്യാസം, ശേഷി പരിപേഷണം (സ്കില്ലിങ്) തുടങ്ങിയവയുമായി ബന്ധപ്പെട്ട സേവനങ്ങൾക്കായിരിക്കും ഇളവ്. എന്നാൽ ഇത്തരം സേവനങ്ങൾ നൽകുന്ന കമ്പനികൾ കെവൈസി നടപടിക്രമങ്ങളടക്കം സുരക്ഷിതമായി പൂർത്തിയാക്കുന്നുവെന്ന് ഉറപ്പുവരുത്തേണ്ടി വരും.

∙ കുട്ടികൾ സേർച് ചെയ്താൽ...

നമ്മൾ ഇന്റർനെറ്റിൽ എന്തെങ്കിലുമൊക്കെ സേർച് ചെയ്യുകയോ സ്ഥിരമായി ചില പേജുകൾ സന്ദർശിക്കുകയോ ചെയ്താൽ, അതുമായി ബന്ധപ്പെട്ട പരസ്യങ്ങൾ ലഭിക്കാറുണ്ട്. എന്നാൽ, ഈ ബിൽ നിയമമായാൽ കുട്ടികളെ ഇത്തരം പരസ്യം കാണിക്കാൻ കമ്പനികൾക്ക് അനുമതിയുണ്ടാകില്ല. കുട്ടികളുടെ ഇന്റർനെറ്റ് ഇടപാടുകൾ ട്രാക്ക് ചെയ്ത് അവരെ നിരീക്ഷിക്കുന്ന ഒരു സംവിധാനവും സ്ഥാപനങ്ങൾക്ക് ഏർപ്പെടുത്താനാവില്ല.