∙ വഴികാട്ടിയ ക്യാമറകൾ

ദക്ഷിണ ധ്രുവത്തിൽ ലാൻഡ് ചെയ്യുന്ന സ്ഥലം കൃത്യമായി കണക്കാക്കാനായില്ലെങ്കിൽ പേടകം ഏതെങ്കിലും വമ്പൻ ഗർത്തത്തിലോ ചെരിവിലോ കുന്നിൻമുകളിലോ വന്നിറങ്ങേണ്ട അവസ്ഥയായിരുന്നു. അത്രയേറെ കുപ്രസിദ്ധമാണ് ദക്ഷിണധ്രുവ പ്രദേശം. ദൂരെനിന്ന് ചന്ദ്രോപരിതലത്തിലേക്കു നോക്കിയാൽ ചെറിയ കുണ്ടും കുഴിയുമാണെന്നൊക്കെയേ തോന്നുകയുള്ളൂ. എന്നാൽ അടുത്തു വരുമ്പോഴായിരിക്കും കുഴിയുടെയും കുന്നിന്റെയുമെല്ലാം ‘വലുപ്പം’ മനസ്സിലാകുക. പല കാലങ്ങളിലായി ഛിന്നഗ്രഹങ്ങൾ വന്നിടിച്ചും മറ്റുമുണ്ടായ ഗർത്തങ്ങളാണ് ചന്ദ്രനിലേറെയും. ഈ ഗർത്തങ്ങളെയും കുന്നുകളെയും ചെരിവുകളെയുമെല്ലാം നേരത്തേതന്നെ ഐഎസ്ആർഒ മാപ് ചെയ്തു വച്ചിരുന്നു. 

അതുകൂടാതെ ലാൻഡറിൽനിന്നു പകർത്തിയ ഗർത്തങ്ങളുടെയും കുന്നുകളുടെയുമെല്ലാം ചിത്രങ്ങളും ഐഎസ്ആർഒ ട്വിറ്ററിലൂടെ പങ്കുവച്ചിരുന്നു. ലാൻഡിങ്ങിന് അടുത്ത ദിവസങ്ങളിൽ ചന്ദ്രോപരിതലത്തിലെ കിടങ്ങുകളുടെയും കുന്നുകളുടെയും പേരുകൾ വരെ അടയാളപ്പെടുത്തിയ ചിത്രങ്ങളും പുറത്തുവിട്ടു. ഈ ചിത്രങ്ങളൊന്നും പക്ഷേ ഒരു രസത്തിന് എടുത്തു വച്ചതല്ല. അനുനിമിഷം മാറിക്കൊണ്ടിരിക്കുന്ന അന്തരീക്ഷമാണ് ചന്ദ്രനിൽ. അതിനാൽത്തന്നെ ഇന്നു കാണുന്ന ഗർത്തമോ കുന്നോ ആയിരിക്കില്ല നാളെ. അതിന്റെ ആകൃതിതന്നെ മാറിപ്പോയിട്ടുണ്ടാകാം. ചിലപ്പോൾ വലിയ പാറക്കഷ്ണങ്ങൾ പുതുതായി പ്രത്യക്ഷപ്പെട്ടിട്ടുണ്ടാകാം. ഛിന്നഗ്രഹത്തിന്റെ കഷ്ണങ്ങളുണ്ടാകാം. ഇതെല്ലാം കണ്ടെത്തുന്നതിനുള്ള ക്യാമറകളും ചന്ദ്രയാൻ 3ൽ ഉണ്ടായിരുന്നു. 

ഈ ചിത്രങ്ങളെല്ലാം ചേർത്ത് തയാറാക്കിയ ചന്ദ്രോപരിതലത്തിന്റെ ഒരു ‘മൂൺ റഫറൻസ് മാപ്’ ലാൻഡറിലേക്ക് ഫീഡ് ചെയ്തിരുന്നു. പുതിയ ചിത്രങ്ങൾ എടുക്കുമ്പോൾ ഈ റഫറൻസ് മാപ്പിലെ ചിത്രങ്ങളുമായി താരതമ്യം ചെയ്ത് ഉപരിതലത്തിലെ പ്രശ്നങ്ങൾ മനസ്സിലാക്കാനാകും. ലാൻഡർ പൊസിഷൻ ഡിറ്റക്‌ഷൻ ക്യാമറ (എൽപിഡിസി), ലാൻഡർ ഹൊറിസോണ്ടൽ വെലോസിറ്റി ക്യാമറ (എൽഎച്ച്‌വിസി), ലാൻഡർ ഹസാഡ് ഡിറ്റക്‌ഷൻ ആൻഡ് അവോയിഡൻസ് ക്യാമറ (എൽഎച്ച്ഡിഎസി) എന്നിവയാണ് ഈ ചിത്രം പകർത്തലിന് പേടകത്തെ സഹായിച്ചത്. ഇതു പരിശോധിച്ച് പേടകത്തിന്റെ ഗൈഡൻഡ് ആൻഡ് കൺട്രോൾ സിസ്റ്റത്തിന് തീരുമാനമെടുക്കാനും സാധിക്കും. നേരത്തേ ഇല്ലാതിരുന്ന എന്തെങ്കിലും തടസ്സം ഇപ്പോഴുണ്ടോയെന്നു തിരിച്ചറിയാം. പല ക്യാമറകള്‍ക്കും ചുമതലകളും പലതായിരുന്നു.

ലാൻഡ് ചെയ്യാനിരിക്കുന്ന പ്രദേശത്തെ കൃത്യമായി പരിശോധിക്കാനും അതീവ സൂക്ഷ്മമായി ചിത്രങ്ങൾ പകർത്താനുമാണ് എൽപിഡിസി സഹായിക്കുക. എന്നാൽ എൽഎച്ച്‌വിക്ക് മറ്റൊരു ദൗത്യമാണ്. ചന്ദ്രോപരിതലത്തിനു സമാന്തരമായി സഞ്ചരിക്കുന്ന പേടകത്തിന്റെ വേഗതയാണ് ഹൊറിസോണ്ടൽ വെലോസിറ്റി (തിരശ്ചീന പ്രവേഗം). എൽഎച്ച്‌വി ക്യാമറ പകർത്തുന്ന ദൃശ്യങ്ങളിലുണ്ടാകുന്ന മാറ്റം പരിശോധിച്ച് കൺട്രോൾ ആൻഡ് ഗൈഡൻസ് സംവിധാനത്തിന് ഈ പ്രവേഗം നിയന്ത്രിക്കാൻ സാധിക്കും. പേടകം തിരശ്ചീനമായ സഞ്ചരിക്കുന്നതിൽനിന്ന് ലംബമായി സഞ്ചരിക്കാൻ തുടങ്ങുന്നതോടെ ചിത്രങ്ങളുടെ ആംഗിളിലുൾപ്പെടെ മാറ്റം വരും. ഇതെല്ലാം പരിശോധിച്ചാൽ എത്രമാത്രം ലംബമായി പേടകം മാറി എന്നു മനസ്സിലാക്കാനാകും. മറിഞ്ഞുകിടക്കുന്ന ഒരു ഗ്ലാസ് നിവർത്തിവയ്ക്കുന്നതു പോലെയാണ് തിരശ്ചീനമായി സ‍ഞ്ചരിക്കുന്ന പേടകം ലംബമായി സഞ്ചാരം തുടങ്ങുന്നത്. മുൻ നിശ്ചയിച്ച പാതയിലൂടെയാണോ പേടകം യാത്ര ചെയ്യുന്നത് തുടങ്ങിയ കാര്യങ്ങളെല്ലാം മനസ്സിലാക്കാൻ എൽഎച്ച്‌വി ക്യാമറ പകർത്തുന്ന ചിത്രങ്ങളിലൂടെ സാധിക്കും. 

ഇവ കൂടാതെ ലാൻഡർ ഹസാഡ് ഡിറ്റക്‌ഷൻ ആൻഡ് അവോയിഡൻസ് ക്യാമറയുമുണ്ട്. പേരു പോലെത്തന്നെ വഴിയിലെ തടസ്സങ്ങൾ തിരിച്ചറിയാൻ ലാൻഡറിനെ സഹായിക്കുന്ന സംവിധാനമാണിത്. ലാൻഡിങ്ങിനൊരുങ്ങുന്നതിന് തീരുമാനിച്ച സ്ഥലത്ത് വമ്പന്‍ പാറകളോ വിള്ളലോ ചെരിവോ മറ്റു തടസ്സങ്ങളോ കണ്ടാൽ ഉടനെത്തന്നെ ഉയർന്ന നിലവാരത്തിലുള്ള ചിത്രങ്ങൾ പകർത്തി ഈ ക്യാമറ കൺട്രോൾ ആൻഡ് ഗൈഡൻസ് സംവിധാനത്തിനു കൈമാറും. കംപ്യൂട്ടർ വിഷൻ അൽഗോരിതത്തിന്റെ സഹായത്തോടെ അതിവേഗം ഈ ചിത്രങ്ങളെയെല്ലാം പരിശോധിച്ച് പേടകത്തിന്റെ ലാൻഡിങ് സൈറ്റ് മാറ്റാനുള്ള നിർദേശം നൽകാൻ സാധിക്കും. ഇതെല്ലാം നിമിഷനേരംകൊണ്ടാണ് സംഭവിക്കുന്നതെന്നോർക്കണം. 

ഫ്രണ്ട് ഫേസിങ് ക്യാമറയാണ് മൂന്നാം ചന്ദ്രയാന്റെ മറ്റൊരു പ്രത്യേകത. ചന്ദ്രയാൻ 2ലും ഇതുണ്ടായിരുന്നു. പക്ഷേ എടുക്കുന്ന ചിത്രങ്ങൾ അപ്പപ്പോൾത്തന്നെ പേടകത്തിലെ കൺട്രോൾ സംവിധാനത്തിലേക്ക് അയയ്ക്കാൻ പറ്റുമായിരുന്നില്ല. പക്ഷേ  ആ പ്രശ്നം ഇത്തവണ പരിഹരിച്ചു. ചന്ദ്രനിലേക്ക് ഇറങ്ങുന്നതിനു തൊട്ടു മുൻപുവരെ ചിത്രങ്ങളെടുക്കാൻ ഈ ക്യാമറയ്ക്കു സാധിച്ചു. വഴി മുടക്കി ഒരു കല്ല് കിടന്നാൽ പോലും കണ്ടെത്തി അതിനനുസരിച്ച് അതിവേഗം പേടകത്തിന്റെ ഗതി മാറ്റാൻ സഹായിക്കുന്നതായിരുന്നു ഈ ക്യാമറകളെല്ലാം. ഈ ക്യാമറകളോടൊപ്പം പേടകത്തിലെ ലേസർ അൾട്ടിമീറ്ററും (എൽഎഎസ്എ) സഹായത്തിനെത്തി. ഇവയ്ക്ക് ചന്ദ്രോപരിതലത്തിന്റെ 3ഡി മാപ് തയാറാക്കിയെടുക്കാൻ സാധിക്കുമായിരുന്നു.

∙ ‘റോഡിൽനിന്ന്’ ചന്ദ്രനിലേക്ക്...

റോഡിലൂടെ കാറിൽ കുതിച്ചു പായുമ്പോൾ ചിലപ്പോഴെങ്കിലും കണ്ടിട്ടുണ്ടാകും, റോഡരികിൽ ക്യാമറ പോലുള്ള ഒരുപകരണം പിടിച്ചുകൊണ്ട് പൊലീസോ മോട്ടർ വാഹനവകുപ്പ് ഉദ്യോഗസ്ഥരോ നിൽക്കുന്നത്. വാഹനത്തിന്റെ വേഗത അനുവദിച്ചതിലും അധികമാണോയെന്നു പരിശോധിക്കാനുള്ള ഡോപ്ലർ റഡാർ സ്പീഡ് ഗണ്‍ ആണത്. റോഡിലെ റഡാറിന് ചന്ദ്രനിലെന്താണു കാര്യം? അതിന്റെ ഉത്തരം ഐഎസ്ആർഒതന്നെ പറയും. ചന്ദ്രയാൻ 3ന്റെ ലാൻഡറിൽ അധികമായി ഘടിപ്പിച്ചിരിക്കുന്ന ഉപകരണങ്ങളിലൊന്നായിരുന്നു ലേസർ ഡോപ്ലർ വെലോസിമീറ്റർ (എൽഡിവി). ഡോപ്ലർ എഫക്ട് എന്ന തത്വമാണ് ഇവിടെ പ്രവർത്തികമാക്കിയിരുന്നത്. 

ചന്ദ്രനിലേക്ക് ഇറങ്ങുന്നതിനു മുന്നോടിയായി എൽഡിവി ഉപയോഗിച്ച്  ലേസർ രശ്മികൾ ചന്ദ്രോപരിതലത്തിലേക്ക് അയയ്ക്കും. ആ രശ്മികൾ ഉപരിതലത്തിൽ തട്ടി വെലോസിമീറ്ററിലേക്കു തിരിച്ചെത്തുന്ന സമയം കണക്കാക്കും. അവയുടെ തരംഗദൈർഘ്യത്തിൽ വ്യത്യാസം വന്നിട്ടുണ്ടാകും. അതു താരതമ്യം ചെയ്താണ് വേഗം അളക്കുക. ഉപരിതലത്തിൽ കുന്നോ കുഴിയോ ചെരിവോ ഉണ്ടെങ്കിൽ ലേസർ രശ്മികൾ പതിച്ച് തിരികെ വരാനെടുക്കുന്ന സമയത്തിലും വ്യത്യാസമുണ്ടാകും. ഈ സമയം മനസ്സിലാക്കിയെടുത്ത് വേഗത നിയന്ത്രിക്കാൻ ലാൻഡറിനെ സഹായിക്കുകയാണ് എൽഡിവി ചെയ്യുക. ചന്ദ്രയാൻ രണ്ടിലും ഇത് സ്ഥാപിക്കണമെന്ന് ആലോചിച്ചതായിരുന്നു. എന്നാൽ ഗ്രൗണ്ട് ടെസ്റ്റിൽ ഇതു പരാജയപ്പെടുകയായിരുന്നു. അതോടെ ഒഴിവാക്കി. പക്ഷേ നാലു വർഷംകൊണ്ട് എൽവിഡി സാങ്കേതികതയില്‍ ഇന്ത്യ മിടുക്ക് തെളിയിച്ചു, അങ്ങനെ സെൻസറിന് മൂന്നാം ചന്ദ്രയാനിലേക്കുള്ള വഴിയും തെളിഞ്ഞു.

പേടകത്തിന്റെ മുന്നോട്ടുള്ള യാത്രയ്ക്കു വേണ്ട നിർണായക വിവരങ്ങൾ നൽകുന്നതിനു സഹായിക്കുന്ന സംവിധാനമായി ലേസർ ഇനർഷ്യൽ റഫറൻസിങ് ആൻഡ് ആക്സിലറോമീറ്റർ പാക്കേജും (എൽഐആർഎപി) ഉണ്ടായിരുന്നു. പേടകത്തെ ഉപരിതലത്തിൽ കൃത്യമായി വിന്യസിക്കുന്നതിനു വേണ്ട വിവരങ്ങൾ കൈമാറുന്നതും എൽഐആർപിയാണ്. ഉദാഹരണത്തിന് പേടകം ഉപരിതലത്തിലേക്ക് ഇറങ്ങുമ്പോഴും ലാൻഡിങ് കഴിയുമ്പോഴുമെല്ലാം പലവിധ ഉപകരണങ്ങളും ആന്റിനകളും സോളർ പാനലുകളുമെല്ലാം കൃത്യമായ ദിശയിലേക്കു തിരിച്ചു വയ്ക്കുന്നതിനുള്ള നിർദേശങ്ങൾ നൽകേണ്ടതുണ്ട്. ആക്സിലറോമീറ്ററുകളിൽനിന്നുള്ള വിവരങ്ങള്‍ ശേഖരിച്ച് അതിനനുസരിച്ച് ത്രസ്റ്ററുകളുടെ പ്രവർത്തനം ക്രമീകരിക്കുന്നതിനുള്ള കൺട്രോൾ സിസ്റ്റം കൂടിയാണിത്. പേടകത്തിന്മേലുണ്ടാകുന്ന ഗുരുത്വാകർഷണബലത്തെപ്പറ്റിയും ഇതുവഴി അറിയാൻ സാധിക്കും. ലാൻഡിങ് ഘട്ടത്തിൽ ഗുരുത്വാകർഷണത്തിന്റെ ‘ആക്രമണ’ത്തിൽനിന്ന് ചന്ദ്രയാനെ രക്ഷിക്കാന്‍ മുന്നിൽനിന്നതും എൽഐആർഎപിയാണ്.

ഇതോടൊപ്പമാണ് കെഎ–ബാൻഡ് അൾട്ടിമീറ്ററിന്റെ (കെഎആർഎ) സഹായവും. ഏകദേശം 26.5 മുതൽ 40 ഗിഗാഹെർട്സ് വരെയായിരിക്കും കെഎ–ബാൻഡ് റേഡിയോ തരംഗങ്ങളുടെ തരംഗദൈർഘ്യം. ഈ തരംഗങ്ങളെ ചന്ദ്രോപരിതലത്തിലേക്ക് അയച്ച് അവ തിരികെ എത്താനെടുക്കുന്ന ദൂരം കണക്കാക്കി, ഉപരിതലവും പേടകവും തമ്മിലുള്ള അകലം കൃത്യമായി കണക്കാക്കാൻ സഹായിച്ചത് ഇതാണ്. തരംഗങ്ങളുടെ പ്രതിഫലനം പരിശോധിച്ച് ചന്ദ്രോപരിതലത്തിലെ കുന്നും കുഴികളും ചെരിവുകളും വരെ തിരിച്ചറിയാം. പേടകം താഴേക്കിറക്കുന്നതിനിടെ എന്തെങ്കിലും തടസ്സങ്ങള്‍ വഴിയിലുണ്ടെങ്കിൽ അതും തിരിച്ചറിയാൻ സാധിക്കും. ക്യാമറകൾക്കൊപ്പം കെഎആർഎ കൂടിയാകുന്നതോടെ മാർഗതടസ്സമില്ലാതെ പേടകത്തിന്റെ യാത്ര ഉറപ്പായി.

ലാൻഡറിന് കൃത്യമായി ഒരിടത്ത് ഇറങ്ങാനായില്ലെങ്കിൽ റോവറിന് താഴേക്ക് ഇറങ്ങി വരാനുള്ള റാംപ് നിവർത്താനാകില്ല. ലാൻഡറിന്റെ ഒരു വശം തുറന്നാണ് റാംപ് ആയി മാറുന്നത്. അത് നിവർത്തിയാൽത്തന്നെ, ചെരിവിലാണ് ലാൻഡിങ്ങെങ്കിൽ അത് ചന്ദ്രോപരിതലത്തിൽ സ്പർശിക്കുമോ എന്ന കാര്യത്തിലും സംശയമാണ്. അത്തരമൊരു റാംപ് വഴി എങ്ങനെ റോവർ ഇറക്കുമെന്നതായിരുന്നു ഗവേഷകർ നേരിട്ട മറ്റൊരു ചോദ്യം. എന്നാൽ സെൻസറുകളും ക്യാമറകളുമെല്ലാം കൃത്യമായി പ്രവർത്തിച്ചതോടെ ആ ചോദ്യംതന്നെ അപ്രസക്തമായി.

∙ മനുഷ്യൻ ജയിച്ചു, സോഫ്റ്റ്‌വെയറും!

ഭൂമിയിൽനിന്ന് കമാൻഡ് കൊടുത്തെങ്കിലും, എഐ സഹായത്തോടെ സ്വയം തീരുമാനമെടുത്താണ് ചന്ദ്രയാൻ 3 ലാൻഡർ ചന്ദ്രനിലിറങ്ങിയത്. അതിനാൽത്തന്നെ ഉപരിതലത്തിലെ പ്രശ്നങ്ങൾ കണ്ടു തിരിച്ചറിഞ്ഞ് സ്വയം തീരുമാനമെടുക്കേണ്ടത് നിർണായകമാണ്. മനുഷ്യബുദ്ധി പ്രയോഗിക്കാനാകാത്തതിനാൽ ആ ഘട്ടത്തിൽ ബന്ധപ്പെട്ട സോഫ്റ്റ്‌വെയറുകളായിരിക്കും പേടകത്തെ നിയന്ത്രിക്കുക. അതിനൊരു ഗൈഡൻസ് അൽഗോരിതവുമുണ്ടായിരിക്കും. ഇവയിലുണ്ടായ പാളിച്ചയാണ് രണ്ടാം ചന്ദ്രയാൻ തകർന്നു വീഴാനുണ്ടായ പ്രധാന കാരണങ്ങളിലൊന്ന്. 

അന്ന് അൽഗോരിതം പാളിയതോടെ വേഗനിയന്ത്രണം നഷ്ടപ്പെട്ടു. പ്രതീക്ഷിച്ചതിലും വേഗത്തിൽ പേടകം ചന്ദ്രോപരിതലത്തിൽ ഇടിച്ചിറങ്ങുകയായിരുന്നു. പേടകത്തിന്റെ നിർണായക നിമിഷത്തിൽ സോഫ്റ്റ്‌വെയറിന്റെ കണക്കുകൂട്ടലുകളിലൊന്നു പാളിപ്പോയതിന്റെ ഫലം. എന്നാൽ ഇവയെല്ലാം നവീകരിച്ചെടുത്താണ് ചന്ദ്രയാൻ മൂന്നിൽ ഉപയോഗിച്ചിരിക്കുന്നത്. ഒരേസമയം ഒട്ടേറെ വിവരങ്ങൾ അപഗ്രഥിച്ചു തീരുമാനമെടുക്കാൻ കഴിയുന്നതാണ് പുതിയ സോഫ്റ്റ്‌വെയർ–അൽഗോരിതം സംവിധാനം. മുകളിൽപ്പറഞ്ഞ ക്യാമറകളിൽനിന്നും സെൻസറുകളിൽനിന്നുമെല്ലാം ലഭിക്കുന്ന വിവരങ്ങൾ അപ്പപ്പോൾത്തന്നെ ഗൈഡൻസ് ആൻഡ് കണ്‍ട്രോൾ സിസ്റ്റത്തിലേക്ക് അയയ്ക്കുകയാണു ചെയ്തത്. 

ഈ ഡേറ്റ അപഗ്രഥിക്കുന്നത് ഓട്ടണമസ് നാവിഗേഷൻ ഗൈഡൻസ് ആൻഡ് കൺട്രോൾ (എൻജിസി) അൽഗോരിതം സിസ്റ്റമാണ്. ഈ വിവരങ്ങളെല്ലാം നിമിഷ നേരം കൊണ്ട് പരിശോധിച്ച് ലാൻഡിങ് സൈറ്റ് തീരുമാനിക്കാനുള്ള ശേഷി ഈ അൽഗോരിതത്തിനുണ്ടായിരുന്നു, ആവശ്യമെങ്കിൽ ലാൻഡിങ് സൈറ്റ് മാറ്റുന്നതിനും. ലാൻഡറിലെ കംപ്യൂട്ടർ സംവിധാനം അപഗ്രഥിച്ചെടുത്ത ഈ വിവരങ്ങളുടെ അടിസ്ഥാനത്തിലായിരിക്കും എൻജിന്റെ വേഗവും നിയന്ത്രിക്കുക. ഓരോ ഘട്ടത്തിലും ഈ വിവരങ്ങളുടെയെല്ലാം അടിസ്ഥാനത്തിൽ എൻജിസി സിസ്റ്റം പേടകത്തിന്റെ സഞ്ചാരപഥം പരിഷ്കരിച്ചുകൊണ്ടേയിരിക്കും. ഇതിനെല്ലാം ആവശ്യമായ ഇന്ധനം ലാൻഡറിൽ ഇത്തവണ കൂടുതലായി ശേഖരിച്ചിട്ടുണ്ടായിരുന്നു. എന്തെങ്കിലും കാരണത്താൽ ലാൻഡിങ് സൈറ്റ് മാറ്റേണ്ടി വന്നാല്‍ അതിനു വേണ്ട ഇന്ധനവും റെഡിയായിരുന്നു. എന്നാൽ ചന്ദ്രയാന്‍ 3 പേടകത്തിന് അതൊന്നും ആവശ്യമായി വന്നില്ലെന്നു മാത്രം.

വിശാലമായ മൈതാനത്തിൽ അടയാളപ്പെടുത്തിയിരിക്കുന്ന ഒരിടത്ത് കൃത്യമായി ലാൻഡ് ചെയ്യുന്നതു പോലെയായിരുന്നു ചന്ദ്രയാൻ രണ്ടിന്റെ ലാൻഡിങ്. അരക്കിലോമീറ്റർ നീളവും വീതിയുമുള്ള പ്രദേശമായിരുന്നു ലാൻഡിങ്ങിന് ലഭിച്ചിരുന്നത്. ഇത് അതീവ ദുഷ്കരമായിരുന്നു. എന്നാൽ മൂന്നാം ചന്ദ്രയാന് ലാൻഡ് ചെയ്യാൻ നാലു കിമീ നീളവും രണ്ടര കിലോമീറ്റർ വീതിയുമുള്ള സ്ഥലമുണ്ടായിരുന്നു. ഇതിൽ എവിടെ വേണമെങ്കിലും ഇറങ്ങാം. അതോടെ വളരെ ‘കംഫർട്ട്’ ആയിത്തന്നെ ചന്ദ്രയാൻ ഒരു സ്ഥലം കണ്ടെത്തി ലാൻഡും ചെയ്തു. എന്നാൽ ഈ ലാൻഡിങ്ങിനിടെ എന്തെങ്കിലും പാളിച്ചകൾ പറ്റിയാലോ? അതു തടയാനും ഇത്തവണ ഒരു വഴി ഐഎസ്ആർഒ ഒരുക്കിയിരുന്നു.

∙ കരുത്തുറ്റ കാലുകളിൽ നിവർന്നു നിന്നു, ഇന്ത്യൻ അഭിമാനം

ചന്ദ്രോപരിതലത്തിൽ മൂന്നു മീറ്റർ വരെ മുകളിലെത്തി, സുരക്ഷിതമായ ലാൻഡിങ് സ്ഥലം കണ്ടെത്തി, താഴേക്ക് ഒരൊറ്റ വരവായിരുന്നു ചന്ദ്രയാൻ 3 പേടകം ചെയ്തത്. ചന്ദ്രയാൻ 2 ആണെങ്കിൽ ആ നിമിഷംതന്നെ കാലൊടിഞ്ഞ് ഉപരിതലത്തിൽ കിടപ്പിലായേനെ. എന്നാൽ മൂന്നാം ചന്ദ്രയാന്റെ കാലുകൾക്ക് ഐഎസ്ആർഒ കൂടുതല്‍ കരുത്തു പകർന്നിരുന്നു. ഹെലികോപ്റ്ററിലും ക്രെയിനിലുമെല്ലാം തൂക്കിയിട്ട് താഴേക്കെറിഞ്ഞ് പരീക്ഷിച്ച കാലുകളായിരുന്നു അവ. ചന്ദ്രന്റെ ഉപരിതലത്തിനു സമാനമായ പ്രതലം ഭൂമിയിൽ സൃഷ്ടിച്ച് അവയിലേക്ക് ലാൻഡറിന്റെ മാതൃകയെ എറിഞ്ഞും പലവട്ടം ഈ കാലുകളുടെ ബലം പരീക്ഷിച്ചു. അതിനാൽത്തന്നെ പൂച്ചയെപ്പോലെ, നാലുകാലിൽത്തന്നെ വീഴും ചന്ദ്രയാൻ 3, അതാണ് സംഭവിച്ചതും. 

ചന്ദ്രയാന്‍ 2 നിയന്ത്രണം വിട്ട് ഇടിച്ചിറങ്ങിയപ്പോൾ കാലുകളെല്ലാം തകർന്നിരുന്നു. എന്നാൽ എത്ര വലിയ വീഴ്ചയിലും ഉണ്ടാകുന്ന ‘ഷോക്ക്’ ആഗിരണം ചെയ്യാൻ സാധിക്കുന്ന തരത്തിലുള്ള സംവിധാനം മൂന്നാം ചന്ദ്രയാന്റെ ലാൻഡറിന്റെ നാലു വശത്തെ കാലുകളിലും ഐഎസ്ആർഒ ഒരുക്കിയിരുന്നു. ഓരോ കാലിന്റെയും അറ്റത്ത് ഒരു ഷോക്ക് അബ്സോർബർ സംവിധാനമുണ്ടാകും. വീഴ്ചയുടെ ആഘാതം അതാണ് ഏറ്റുവാങ്ങുക. ലാൻഡറിലേക്കോ അതിനകത്തെ റോവറിലേക്കോ ആഘാതം എത്തുകയേ ഇല്ല. അതീവസൂക്ഷ്മമായിട്ടായിരുന്നു ലാൻഡറിന്റെ കാലുകളിൽ ഇതെല്ലാം ഘടിപ്പിച്ചിരുന്നത്. ചന്ദ്രയാൻ 2ന്റെ പരാജയം പഠിച്ച സമിതിയുടെ പ്രധാന നിർദേശങ്ങളിലൊന്നും മൂന്നാം ചന്ദ്രയാന്റെ കാലുകളുടെ ശക്തി കൂട്ടണമെന്നായിരുന്നു. ഒടുവിൽ ആ കാലുകളിൽ ഉറച്ചുനിന്ന് ഇന്ത്യയും പറഞ്ഞു: ചന്ദ്രനിലേക്ക് ഇതാ ഞങ്ങളും എത്തിയിരിക്കുന്നു.

English Summary: How did Chandrayaan 3 Land on the Moon? What Equipments Helped the Mission to Land Safely? Explained