ഓൺലൈൻ ട്രേഡിങ് ആപ്പുകളുണ്ടാക്കിയുള്ള തട്ടിപ്പുകൾ വഴി ഇപ്പോഴും കേരളത്തിന് ദിവസവും നഷ്ടമാകുന്നത് ലക്ഷങ്ങളാണ്. കൊച്ചിയിൽ രണ്ടാഴ്ച മുൻപ് ഒരു  കോടി രൂപ ലോട്ടറിയടിച്ചുവെന്ന് പറഞ്ഞു വന്ന സന്ദേശത്തിനു പിന്നാലെ പോയ വീട്ടമ്മയ്ക്ക് നഷ്ടപ്പെട്ടത് ഒരു കോടി രൂപയാണ്. ഇതിൽ ക്രൈംബ്രാഞ്ചിന്റെ സാമ്പത്തിക കുറ്റാന്വേഷണ വിഭാഗം കേസെടുത്തു. ഇത്തരം വലിയ തട്ടിപ്പുകൾക്കു പിന്നിൽ പ്രവർത്തിക്കുന്നവരെ പിടികൂടാനാണ് ഇന്റർപോൾ സഹായം ലഭിക്കുക. സാധനങ്ങൾ വാങ്ങി അപ്പോൾതന്നെ മറിച്ചുവിൽക്കുന്ന ആപ്പുകളിലാണ് മലയാളിയുടെ പണം കൂടുതലും പോകുന്നത്. ഇതെല്ലാം ചൈനയുടെ ആപ്പുകളാണ്. 

∙ നിങ്ങളെ അഭിനന്ദിച്ചവർക്ക് അതിനും ശമ്പളം കിട്ടും  

വ്യാപാര  തട്ടിപ്പാണ് ഇപ്പോഴും സജീവമായി രാജ്യത്ത് നടക്കുന്ന പ്രധാന തട്ടിപ്പുകളിലൊന്ന്. വീട്ടിലിരുന്ന് വരുമാനമുണ്ടാക്കാമെന്ന് തുടങ്ങുന്ന ഫെയ്സ്ബുക് പോസ്റ്റിൽ നിന്നാണ് മിക്കവരും ഇൗ തട്ടിപ്പിലേക്ക് വീഴുന്നത്. അതിൽ ക്ലിക്ക് ചെയ്യുന്ന ഉടനെ നമ്മളെ ഒരു ‘ടെലിഗ്രാം’ ആപ് ഗ്രൂപ്പിലേക്ക് ചേർക്കുന്നു. പിന്നെ നമ്മൾ കാണുന്ന കാഴ്ചകളെല്ലാം മനസ്സിനെ ചാഞ്ചാടിക്കും. പലർക്കും പതിനായിരങ്ങളും ലക്ഷങ്ങളും മണിക്കൂറുകൾക്കകം ലാഭം കിട്ടിയിന്റെ സന്ദേശങ്ങൾ. ഗ്രൂപ്പിലുള്ളവരെല്ലാം പണം കിട്ടിയവനെ അഭിനന്ദനങ്ങൾ കൊണ്ടു മൂടുന്നു. ചുമ്മാ വീട്ടിലിരുന്നാണ് നിമിഷങ്ങൾക്കകം ഈ പണം ഉണ്ടാക്കുന്നതെന്ന തോന്നൽ അതോടെ ശക്തമാകും. അതു പോരേ ഗ്രൂപ്പിലെത്തിയ ‘പുതുമുഖ’ത്തിന്റെ മനസ്സു മാറാൻ.

ആകർഷകമായ ഇടപാടുകളാണ് പിന്നെ നടക്കുന്നത്. ആദ്യം ഒരു ബ്രാൻഡഡ് ഷൂ ആയിരിക്കും വിൽക്കാനിടുക. 10,000 രൂപയുടെ ഷൂ അപ്പോൾ വാങ്ങുകയാണെങ്കിൽ 2000 രൂപയ്ക്ക്. ആവേശം മാറാതെ കാശുണ്ടാക്കാനുള്ള ആർത്തിയുമായിരിക്കുന്ന നമ്മൾ 2000 രൂപ അക്കൗണ്ടിലേക്ക് അയച്ചുകൊടുത്തു വാങ്ങുന്നു. അപ്പോഴതാ വരുന്നു ആ ഷൂ കൊടുക്കുന്നോ 7000 രൂപ തന്നേക്കാമെന്ന് പറഞ്ഞ് മറ്റൊരാൾ. നമ്മൾ 2000 രൂപയ്ക്ക് വാങ്ങിയതിന് മിനിറ്റുകൾക്കുള്ളിൽ 5000 ലാഭം. അപ്പോൾതന്നെ കച്ചവടം  ഉറപ്പിക്കുന്നു. നമ്മളുടെ അക്കൗണ്ട് നമ്പരിലേക്ക് 5000 രൂപ കൂട്ടി 7000 രൂപ അപ്പോൾ തന്നെ കിട്ടുന്നു. അഭിമാനം കൊണ്ട് പൂരിതമാകാൻ പിന്നെന്തുവേണം. 

ഗ്രൂപ്പിൽ നമ്മളെയും അഭിനന്ദിക്കാൻ എല്ലാവരുമെത്തും. അങ്ങനെ ഷൂ മാറി, പിന്നെ ലാപ്ടോപ്പായി, പിന്നെ പത്ത് ലാപ്ടോപ് ഒരുമിച്ച് വാങ്ങി വിൽക്കുന്നതായി. അങ്ങനെ മെല്ലെ ആയിരങ്ങളുടെ ഇടപാട് ലക്ഷങ്ങളുടെയാകും. ഇത് പിന്നീട് ഓരോ ലക്ഷത്തിനും പോയിന്റുകളാകും. പോയിന്റ് ഒരുമിച്ച് കൂട്ടിയിട്ടാൽ വലിയൊരു തുക കിട്ടുമെന്നാകുന്നു. നമ്മൾ ലക്ഷങ്ങൾ ഇറക്കി വലിയ സാധനങ്ങൾ വാങ്ങി മറിച്ചു വിൽക്കാമെന്ന സ്ഥിതിയിലെത്തി. അതോടെ വായ്പയെടുത്തും പലിശയ്ക്കെടുത്തും ലക്ഷങ്ങൾ ഇറക്കും, അതിനെല്ലാം സാധനം വാങ്ങും. പണം അങ്ങോട്ട് ഇട്ടുകൊടുക്കും. പിന്നെ കുറച്ചുകഴിയുമ്പോൾ ടെലഗ്രാം ഗ്രൂപ്പുതന്നെ കാണില്ല. അവർ മുങ്ങി!

∙ 4000 രൂപ നാലു കോടിയാക്കിയ സംഘം, ബാങ്ക് വെബ്‌സൈറ്റും തകർത്തു 

ടെലിഗ്രാം ഗ്രൂപ്പിൽ അഭിനന്ദനം പറഞ്ഞതും കച്ചവടം നടത്തി ലാഭമുണ്ടാക്കിയെന്ന് പറഞ്ഞവരുമെല്ലാം ആ ഗ്രൂപ്പിലെ തട്ടിപ്പുകാരായിരുന്നു. പാർട്ട് ടൈം ജോലി, സിനിമ റേറ്റിങ് തുടങ്ങി തട്ടിപ്പിന്റെ ഒാരോ വഴിയടയ്ക്കുമ്പോൾ പുതിയ രീതി വരുന്നു. കർണാടകയിൽ സംഭവിച്ചത് മറ്റൊന്നാണ്. ആദായ നികുതി വകുപ്പിന്റെ വെബ്സൈറ്റ് തന്നെ ഹാക്ക് ചെയ്തു നടന്ന തട്ടിപ്പ് സുരക്ഷാ ഏജൻസികളെ ഞെട്ടിച്ചു. ആദായനികുതി വകുപ്പിന്റെ വെബ്ൈസറ്റിൽ നികുതിയടച്ച് റിട്ടേൺ പ്രതീക്ഷിച്ചിരിക്കുന്നവരുടെ പണം തട്ടിയെടുക്കുന്നതായിരുന്നു ബുദ്ധി. വെബ്സൈറ്റിൽനിന്ന് റിട്ടേൺ തുക പോകേണ്ടുന്നവരുടെ ബാക്ക് അക്കൗണ്ടുകളെല്ലാം തിരുത്തി പകരം തട്ടിപ്പിനു വേണ്ടി ആരംഭിച്ച അക്കൗണ്ട് നമ്പറുകൾ നൽകി. ഇൗ തട്ടിപ്പിന്റെ കേന്ദ്രവും ചൈനയാണെന്ന് സ്ഥിരീകരിച്ചു. 

മഹാരാഷ്ട്രയിൽ വലിയൊരു ബാങ്കിലാണ് തിരിമറി നടന്നത്. ബാങ്ക് ഉദ്യോഗസ്ഥന്റെ ഇമെയിൽ ഹാക്ക് ചെയ്ത് അതിൽ സൂക്ഷിച്ചിരുന്ന ബാങ്ക് സിസ്റ്റത്തിലേക്ക് കയറുന്ന ഔദ്യോഗിക പാസ്‌വേഡും മറ്റും ശേഖരിച്ചു. അതുപയോഗിച്ച് പണം ബാങ്ക് സോഫ്റ്റ്‌വെയറിലേക്ക് കയറി. 4000 രൂപ അക്കൗണ്ടിലുള്ളവർക്ക് പൂജ്യം അധികം ചേർത്ത് 4 കോടിയാക്കി നൽകി വരെ തട്ടിപ്പ് നടന്നു. ഇൗ പണം പലപ്പോഴായി ബാങ്കിൽനിന്ന് പിൻവലിച്ചു. ബാങ്ക് സാമ്പത്തികമായി കുഴഞ്ഞപ്പോഴാണ് പണം ഇത്തരത്തിൽ പിൻവലിച്ചതായി വിവരം ലഭിച്ചത്. ആ ആന്വേഷണവും ചെന്നെത്തിയത് ചൈനയിൽ. 

ഫോണിലെ കോൺടാക്ട് നമ്പരുകളുടെ എണ്ണവും ഫെയ്സ്ബുക്കിലെ ഫ്രണ്ട്സിന്റെ എണ്ണവും കണക്കിലെടുത്താണ് ലോൺ ആപ്പുകൾ വായ്പാ തുക നിശ്ചയിക്കുന്നത്. പണം തിരിച്ചടച്ചില്ലെങ്കിൽ ഇൗ  ഫോൺ നമ്പറുകളിലേക്കും ഫ്രണ്ട്സ് അക്കൗണ്ടുകളിലേക്കും മോർഫ് ചെയ്ത നഗ്ന ചിത്രങ്ങൾ അയയ്ക്കുന്നതാണ് രീതി. ഇരുനൂറിലധികം വായ്പ ആപ്പുകൾ നിലവിൽ ഉണ്ടെന്നാണു കണ്ടെത്തൽ. ഇതിൽ മിക്കതും തട്ടിപ്പ് കണ്ടെത്തി നിരോധിക്കുമ്പോൾ അടുത്ത ആപ് എത്തും. 5000, 10000 വായ്പയെടുത്താൽ തിരിച്ചടയ്ക്കേണ്ടിവരുന്നത് മുഴുവൻ ജീവിതവുമാണ്. ഒന്നും ഇൗടുവയ്ക്കാതെ പെട്ടെന്ന് പണംതരുമെന്ന വാഗ്ദാനത്തിൽ കുടുങ്ങുന്നവരുടെ ജീവിതംതന്നെ ആപ്പുകൾ തിരിച്ചെടുക്കുന്നു. അടച്ചാലും അടച്ചാലും തീരാതെ വരുന്നതോടെ ഒരു ആപ്പിലെ കടം തീർക്കാൻ മറ്റൊരു ആപ്പിൽനിന്ന് പണമെടുക്കുന്നു. 

∙ നിങ്ങളുടെ കളിപ്പാട്ടത്തിൽ ചൈനയുടെ ചിപ്പുണ്ടോ!

ദിവസവും കേൾക്കുന്ന സൈബർ സാമ്പത്തിക തട്ടിപ്പുകൾ ചെറിയൊരു ഭീഷണിയായി മാത്രമേ രാജ്യത്തെ സുരക്ഷാ ഏജൻസികൾ കാണുന്നുള്ളൂ. അവർ നൽകുന്ന ഭീഷണി മുന്നറിയിപ്പ് മറ്റു ചിലതാണ്. ചൈന വർഷങ്ങളെടുത്ത് നമ്മുടെ രാജ്യത്തേക്കു വേണ്ട എല്ലാ സാധനങ്ങളും ഉൽപാദിപ്പിച്ച് നൽകിയതിലുള്ള വലിയ ഭീഷണി. ഏതു സാധനത്തിലും ചൈന നൽകിയ ചിപ്പും സെമികണ്ടക്ടറുകളും ഉപയോഗിച്ചിരിക്കുന്നുവെന്നത് വൈകിയെങ്കിലും തിരിച്ചറിഞ്ഞ സത്യമാണ്, ഒപ്പം ഭീഷണിയും. വീട്ടിലെ കളിപ്പാട്ടത്തിൽ മുതൽ യുദ്ധവിമാനത്തിന്റെ വരെ നിർണായകമായ ഘടകങ്ങളിൽ വരെ ഉപയോഗിച്ചിരിക്കുന്ന ചിപ്പുകൾ എല്ലാം ചൈനയുടെതാണ്. ഇൗ ചിപ്പുകളിലൂടെ എന്തും നിയന്ത്രിക്കാമെങ്കിലോ? 

നമ്മുടെ രാജ്യത്ത് ഉപയോഗിക്കുന്ന മൊബൈൽ ടവറുകളിലുമുണ്ട് ചൈനയുടെ ചിപ്പും സെമികണ്ടക്ടറുകളും .ചൈനയുടെ ചിപ് നിഷ്കളങ്കമാണോ അതിൽ മറ്റെന്തെങ്കിലും ഒളിപ്പിച്ചിട്ടുണ്ടോയെന്നത് രാജ്യത്തെ സുരക്ഷാ വിദഗ്ധർ കഴിഞ്ഞ പത്ത് വർഷമായി ചോദിക്കുന്ന ചോദ്യമാണ്. ചൈനയുടെ ഇൗ ചിപ്പിന്റെ ‘നിഷ്കളങ്കത’യിൽ ഇന്ത്യൻ സുരക്ഷാ ഏജൻസികൾ സംശയം പ്രകടിച്ചപ്പോൾ മുതൽ പ്രധാനമന്ത്രി നരേന്ദ്രമോദി മറു പദ്ധതികൾ ആലോചിക്കാൻ നിർദേശിച്ചു. അങ്ങനെയാണ് മെയ്ക് ഇൻ ഇന്ത്യ പദ്ധതി വരുന്നത്. 

രാജ്യത്തെ സുരക്ഷാ ഏജൻസികൾ മുതൽ തന്ത്രപ്രധാനമായ എല്ലാ സർക്കാർ സംവിധാനങ്ങൾക്കും ആവശ്യമായതെല്ലാം സ്വന്തം നിലയിൽ നിർമിക്കണം എന്നതാണ് നിലവിലെ ഇന്ത്യൻ നയം. കഴിഞ്ഞ 8 വർഷമായി ഇത് നടക്കുന്നു. പത്തോ പതിനഞ്ചോ വർഷംകൊണ്ട് സുരക്ഷാ ഏജൻസികൾ ഉപയോഗിക്കുന്ന എല്ലാ ചൈനീസ് നിർമിത ഉപകരണങ്ങളും ഒഴിവാക്കും. തദ്ദേശീയമായി നിർമിച്ചവയിലേക്കു മാറും. ഇക്കാര്യത്തിൽ വേഗം കൂട്ടാൻ രാജ്യത്തെ പൊലീസ് സേനയെയും കേന്ദ്ര സർക്കാർ നിരന്തരം നിർബന്ധിക്കുന്നത് ചൈനയുടെ സൈബർ ഭീഷണിയുടെ വലുപ്പം അത്രകണ്ട് വലുതാണെന്നു തിരിച്ചറി‍ഞ്ഞു തന്നെയാണ്.

English Summary: The Chinese Invisible 'Danger Net' Behind Cyber Frauds in India