ഒപ്പമുള്ള ചിത്രങ്ങളിൽ മോദിയും ഷിയും ബൈഡനും..: മകളെ 'പ്രധാനമന്ത്രി'യാക്കുമോ ഷെയ്ഖ് ഹസീന?

∙ സ്വാതന്ത്ര്യപ്പോരാളി, ചോര ഏറെക്കണ്ട കുടുംബം

രാഷ്ട്രീയം ഷെയ്ഖ് ഹസീന കുടുംബത്തിന് അന്യമല്ല. സ്വാതന്ത്ര്യ സമര സേനാനിയും  ബംഗ്ലദേശിന്റെ രാഷട്രപിതാവുമായ ഷെയ്ഖ് മുജിബുർ റഹ്മാന്റെ മകളാണ് ഷെയ്ഖ് ഹസീന. ഇന്ത്യൻ പ്രധാനമന്ത്രിയായിരുന്ന ഇന്ദിരാ ഗാന്ധിയുടെ നേതൃത്വത്തിൽ പാക്കിസ്ഥാനിൽനിന്ന് ബംഗ്ലദേശിനെ മോചിപ്പിച്ച ശേഷം ആ രാജ്യത്ത് ആദ്യമായി പ്രസിഡന്റായതും മുജിബുർ റഹ്മാനാണ്. എന്നാൽ 1975ൽ ഷെയ്ഖ് ഹസീന, സഹോദരി ഷെയ്ഖ് രഹാന എന്നിവരൊഴികെ മുജിബ് കുടുംബം മുഴുവൻ പട്ടാള അട്ടിമറിക്കിടെ കൊല്ലപ്പെട്ടു. അന്ന് പശ്ചിമ ജർമനി സന്ദർശിക്കുകയായിരുന്നതിനാലാണ് രണ്ടു പെൺമക്കളും രക്ഷപ്പെട്ടത്. 

മുജിബുർ റഹ്മാൻ, ഭാര്യ, ആൺമക്കൾ, വീട്ടിലെ പരിചാരകർ‌ അടക്കം 19 പേരാണ് അന്ന് കൊല്ലപ്പെട്ടത്. സൈനിക നേതൃത്വമായിരുന്നു ഈ അട്ടിമറിക്കു പിന്നിലെന്നാണ് പിന്നീട് പുറത്തു വന്ന വിവരം. രാഷ്ട്രപിതാവിനെ കൊലപ്പെടുത്തിയവരിൽ രണ്ടു പേർ ഇപ്പോഴും യുഎസിലും കാനഡയിലും ജീവിച്ചിരിപ്പുണ്ടെന്നും അവരെ വിട്ടു തരണമെന്നും ബംഗ്ലദേശ് അടുത്തിടെയും ആവശ്യപ്പെട്ടിരുന്നു. ദശകങ്ങളായി പിടിയിലാകാതിരുന്ന അബ്ദുൽ മജീദ് എന്നയാളെ 2020ൽ പിടികൂടി സർക്കാർ തൂക്കിലേറ്റിയിരുന്നു.

രാജ്യത്തെ ഏറ്റവും വലിയ രാഷ്ട്രീയ കുടുംബവും അതിന്റെ നേതാവുമെന്ന നിലയിൽ തന്റെ രാഷ്ട്രീയ പിൻഗാമിയായി ഷെയ്ഖ് ഹസീന ആരെയാണ് തിരഞ്ഞെടുക്കുക എന്ന ചോദ്യം ഏറെക്കാലമായി ബംഗ്ലദേശിൽ ചർച്ചാ വിഷയമാണ്. സഹോദരി ഷെയ്ഖ് രഹാന, മകൻ സജീദ് വാസീദ് ‘ജോയ്’ എന്നിരേക്കാൾ സൈമയാണ് തന്റെ രാഷ്ട്രീയ പിൻഗാമിയാകാൻ യോഗ്യ എന്ന് ഷെയ്ഖ് ഹസീന തീരുമാനിച്ചിട്ടുണ്ട് എന്നാണ് വിവിധ റിപ്പോർട്ടുകൾ. 

ആണവ ശാസ്ത്രജ്ഞനായ ഡോ. എം.എ.വസിദ് മിയാ ആണ് ഷെയ്ഖ് ഹസീനയുടെ ഭർത്താവ്. കംപ്യൂട്ടർ എൻജിനീയറിങ് വിദ്യാഭ്യാസം പൂർത്തിയാക്കിയ മകൻ സാജിദ് യുഎസിലാണ് സ്ഥിരതാമസമാക്കിയിരിക്കുന്നത്. എന്നാൽ ബംഗ്ലദേശിനെ ഡിജിറ്റൈസ് ചെയ്യുന്ന പദ്ധതിക്ക് ചുക്കാൻ പിടിക്കുന്നത് അദ്ദേഹമാണ്. ഷെയ്ഖ് രഹാനയുടെ മകളാണ് ബ്രിട്ടിഷ് ലേബർ പാർട്ടി എം‌പിയായ തുലിപ് സിദ്ദിഖ്.