തലച്ചോറിനെയും ബാധിക്കുന്ന 'ഗ്യാസ് ചേംബർ' ജീവിതം; ശ്വാസം തേടി നാടു വിടുന്നവർ: എന്നു മാറും ഡൽഹിയുടെ 'പ്രദോഷൻ'!

ബ്രിട്ടിഷ് ഭരണ കാലത്ത് ഡൽഹിക്കു പുറമേ ഹിമാചൽ പ്രദേശിലെ ഷിംലയായിരുന്നു ഇന്ത്യയുടെ വേനൽക്കാല തലസ്ഥാനം. ഡൽഹിയിൽ ചൂടു കൂടുമ്പോൾ വൈസ്രോയിയും മറ്റ് ഭരണാധികാരികളും ഷിംലയിലേക്ക് പോകും. ഷിംലയാണ് പിന്നെ ഭരണ സിരാകേന്ദ്രം. ഇന്ത്യയ്ക്ക് സ്വാതന്ത്ര്യം ലഭിച്ചതോടെ വേനൽക്കാല തലസ്ഥാനം എന്ന സ്ഥാനം ഷിംലയ്ക്ക് നഷ്ടമായി. എന്നാൽ അടുത്ത കാലത്ത് നവംബർ, ഡിസംബർ മാസങ്ങളിൽ ഷിംലയിലേക്ക് പോകുന്ന ഡൽഹി നിവാസികളുടെ എണ്ണം കൂടുകയാണ്. ഷിംല മാത്രമല്ല ഡെറാഡൂണ്‍, നൈനിറ്റാൾ, മസൂറി തുടങ്ങിയ സ്ഥലങ്ങളിലേക്ക് ഡൽഹി നിവാസികള്‍ യാത്ര ചെയ്യുന്നു. ചൂടിൽ നിന്ന് രക്ഷപ്പെടാനല്ല ഈ യാത്ര. ശുദ്ധ വായു ശ്വസിക്കാനാണ് മികച്ച സാമ്പത്തിക സ്ഥിതിയുള്ളവർ ഡിസംബറിൽ ഡൽഹി വിടുന്നത്. ഡൽഹിയിലെ വായു നിലവാരം ഈ മാസങ്ങളിൽ മോശമാകുന്നതാണ് കാരണം. 

നവംബർ അവസാനത്തോടെയോ ഡിസംബറിന്റെ ആരംഭത്തിലോ ആണ് മുൻ വർഷങ്ങളിൽ ഡൽഹി കടുത്ത വായു മലിനീകരണത്തിൽ ശ്വാസം മുട്ടുന്നത്. എന്നാൽ, ഈ വർഷം നവംബറിന്റെ തുടക്കംതന്നെ തലസ്ഥാനത്തെ അന്തരീക്ഷം പുകമഞ്ഞു തിങ്ങി മൂടിക്കെട്ടി. ഒരാഴ്ചയോളം വായുമലിനീകരണം എല്ലാ പരിധികളും വിട്ട് നഗരത്തെ അക്ഷരാർഥത്തിൽ ഗ്യാസ് ചേംബറാക്കി മാറ്റി. വായു മലിനീകരണം മൂലം സ്കൂളുകൾക്കും കോളജുകൾക്കും അവധി നൽകി. ഇതിനിടെ ഭൂകമ്പം വന്നതോടെ ജനങ്ങൾക്ക് വീട്ടിൽ ഇരിക്കാനും കഴിയാതെയായി. വീടിന് അകത്ത് ഭൂകമ്പവും പുറത്തു വായുമലിനീകരണവും. അങ്ങനെയിരിക്കെ നവംബർ 11 ന് ഒരു പകൽ മുഴുവൻ നീണ്ട മഴ പെയ്തു. തുടർച്ചയായ 7 ദിവസം മങ്ങിക്കിടന്നിരുന്ന കാഴ്ചകൾ ഡൽഹി നിവാസികൾക്കു മുന്നിൽ തെളിഞ്ഞു. പൊടിയും പുകയും കഴുകിയിറങ്ങി അന്തരീക്ഷം പാടേ തെളിഞ്ഞു. 

പക്ഷേ, ആ തെളിച്ചത്തിന് ദീർഘായുസ്സില്ലായിരുന്നു. 12ന് ദീപാവലി. നിരോധനങ്ങൾക്കു മീതെ മതിമറന്നാഘോഷിച്ച ജനം പടക്കം പൊട്ടിച്ചു പുകയും പൊടിയും നിറച്ച് ഡൽഹിയിലെ വായുനിലവാരം പഴയ പടിയാക്കി. ദീപാവലി ആഘോഷം കഴിഞ്ഞതോടെ സ്ഥിതി മാറി. അതോടെ വായു ഗുണനിലവാരം (എക്യുഐ) 150 ൽ താഴെയായിരുന്നത് ഒറ്റ ദിവസം കൊണ്ട് 450 ന് മുകളിലായി. നഗരത്തിലെ പല പ്രധാന സ്ഥലങ്ങളിലും വായു നിലവാരം അതിരാവിലെ തന്നെ 300 മീതെ ഉയർന്നു.

ചിലയിടത്ത് എല്ലാ പരിധികളും ലംഘിച്ചു 900 വരെയായി. ധിർപുർ, ലോധി റോഡ്, പുസ, നോയിഡ ഗുരുഗ്രാം, ആയാ നഗർ എന്നീ ഹോട്ട് സ്പോട്ടുകളിലെല്ലാം രാവിലെ വായു നിലവാരം 500നു മീതെയായി. ജവഹർലാൽ നെഹ്റു സ്റ്റേഡിയത്തിൽ രാവിലെ 910ഉം ലജ്പത് നഗറിൽ 959ഉം കരോൾ ബാഗിൽ 779ഉം ആയിരുന്നു രാവിലെ 6 മണിക്ക് വായു നിലവാരം. സാധാരണയായി വായു നിലവാരം 200നും 300നും ഇടയിൽ ആകുന്നതു തന്നെ അപകടകരമാണ്. 0–50നും ഇടയിലുള്ള വായു നിലവാരമാണ് മികച്ചതായി കണക്കാക്കുന്നത്. എത്രത്തോളം രൂക്ഷമാണ് ഡൽഹിയിലെ വായു മലീനികരണം? എന്തുകൊണ്ടാണ് തലസ്ഥാന നഗരത്തിൽ പോലും ശുദ്ധ വായു നൽകാൻ കഴിയാത്തത്? 

∙ പുക 'വലിക്കാൻ' സ്മോഗ് ടവർ, പഠിക്കാൻ സമിതികളുടെ ഘോഷയാത്ര 

ഡൽഹിയിലെ അന്തരീക്ഷ മലിനീകരണത്തിനു പരിഹാരം തേടി 1985ൽ പരിസ്ഥിതി പ്രവർത്തകൻ എം.സി. മേത്ത നൽകിയ പരാതിയിലാണ് സുപ്രീംകോടിയുടെ പരിഗണനയിൽ ഇപ്പോഴും ഈ വിഷയമുള്ളത്. ഡ‍ൽഹിയിലെ വായു മലിനീകരണത്തിനു നാലു പതിറ്റാണ്ടിനോട് അടുക്കുന്ന ചരിത്രമുണ്ടെന്ന് മേത്തയുടെ ഹർജി ഓർമിപ്പിക്കുന്നു. അതിനു ശേഷം എത്രയെത്ര പരാതികൾ, സമിതികൾ, പഠന റിപ്പോർട്ടുകൾ തുടങ്ങി പൊടിയും പുകയും വലിച്ചെടുക്കാൻ സ്മോഗ് ടവറുകൾ വരെ വന്നിട്ടും മലിനീകരണത്തിന് ഒരു മയവുമില്ലാതെ എല്ലാ വർഷവും വന്നു ഭീതിപ്പെടുത്തുന്നു. ചർച്ചകളും പഠനങ്ങളും സമിതികളുംകൊണ്ട് ഡൽഹിയിലെ വായു മലിനീകരണത്തിന് പരിഹാരം കണ്ടെത്താൻ കഴിയില്ലെന്ന് സുപ്രീംകോടതിതന്നെ പലയാവർത്തി വ്യക്തമാക്കിയിട്ടുണ്ട്. 

വാഹനങ്ങളിൽനിന്നും നിർമാണ സ്ഥലങ്ങളിൽനിന്നുമാണ് വായുവിനെ മലിനമാക്കുന്ന പൊടി പ്രധാനമായും എത്തുന്നത്. അയൽ സംസ്ഥാനങ്ങളിൽ പാടത്തു തീയിടുന്നത് കർശനമായി തടയണമെന്നും കാർഷികാവശിഷ്ടങ്ങൾ സംസ്കരിക്കാൻ ബദൽ മാർഗങ്ങൾ ഏർപ്പെടുത്തണമെന്നും സുപ്രീംകോടതി കർശന നിർദേശം നൽകിയിരുന്നു. കേന്ദ്ര കാബിനറ്റ് സെക്രട്ടറിയുടെ അധ്യക്ഷതയിൽ സംസ്ഥാനങ്ങളുടെ യോഗം ചേരുകയും ചെയ്തു. സ്ഥിതിഗതികൾ വിലയിരുത്താൻ കൺട്രോളർ ഓഫ് എയർ ക്വാളിറ്റി മാനേജ്മെന്റിന്റെ ഫ്ലയിങ് സ്ക്വാഡ് സംഘത്തെയും സംസ്ഥാനങ്ങളിൽ വിന്യസിച്ചിട്ടുണ്ട്. 

∙ തീയില്ലാതെ ഈ പുകയില്ല, ആരണയ്ക്കും ഈ പാടങ്ങളിലെ തീയിടൽ 

ഡൽഹിയിലെ പുകമഞ്ഞിന്റെ ഭൂരിഭാഗവും സംഭാവന ചെയ്യുന്നത് ഡൽഹിയുടെ അയൽ സംസ്ഥാനങ്ങളായ പഞ്ചാബ്, ഹരിയാന, ഉത്തർപ്രദേശ്, രാജസ്ഥാൻ എന്നിവിടങ്ങളിൽ കർഷകർ പാടത്തു കാർഷികാവശിഷ്ടങ്ങൾക്ക് തീയിടുന്നതിൽ നിന്നാണ്. അയൽ സംസ്ഥാനങ്ങളിലെ പാടത്തു നിന്നുയരുന്ന പുക ഡൽഹിക്ക് മീതെ വന്നു മഴക്കാറു പോലെ മൂടി നിന്ന് ശ്വാസം മുട്ടിക്കുന്ന ദുരവസ്ഥ പതിറ്റാണ്ടുകളായി ഇവിടുത്തെ ജനങ്ങൾ അനുഭവിക്കുന്നതാണ്. ഈ സംസ്ഥാനങ്ങളിലെ കർഷകർക്കു തീയിടുകയല്ലാതെ മറ്റു മാർഗവുമില്ല.

നെല്ല് പഞ്ചാബിലോ ഹരിയാനയിലോ പ്രാദേശിക വിളയല്ല. ഓരോ വിളവെടുപ്പ് കഴിയുമ്പോഴും വൈക്കോൽ ഉൾപ്പെടെയുള്ള കാർഷികാവശിഷ്ടങ്ങൾ കത്തിച്ചു കളഞ്ഞാലേ ഇവർക്ക് അടുത്ത കൃഷിക്ക് നിലമൊരുക്കാൻ പറ്റൂ. ഈ അവശിഷ്ടങ്ങൾ സംസ്കരിക്കുന്നതിനുള്ള യന്ത്രം ഉണ്ടെങ്കിലും സാധാരണ കർഷകർക്ക് പ്രാപ്യമല്ല. ഒരു ദിവസം 30,000ലേറെ രൂപ വരും വാടക. മാത്രമല്ല, ആവശ്യക്കാരുടെ ആധിക്യമനുസരിച്ചു ലഭ്യവുമല്ല. കാത്തിരുന്നു നേരം കളയാനില്ലാത്ത കർഷകർ പാടത്തു തീയിടുക തന്നെ ചെയ്യും.