അടിയന്തര സഹായം സജ്ജം, തുരങ്കത്തിൽ എന്താണ് സംഭവിച്ചത്? കുതിരാൻ യാത്ര വീണ്ടും കുരുക്കാകുമോ? എന്താണ് നിയന്ത്രണം? അറിയേണ്ടതെല്ലാം

കേരളത്തിൽ ആദ്യമായി ആറു വരിപ്പാത നിർമിച്ചത് സേലം- കൊച്ചി 544 ദേശീയപാതയിലെ മണ്ണുത്തി മുതൽ വടക്കഞ്ചേരി വരെയുള്ള 28.5 കിലോമീറ്ററിലാണ്. ദേശീയപാതയിൽ ആദ്യമായി ആറുവരിയിൽ തുരങ്കപാത നിർമിക്കുന്നതും ഇതേ പാതയിലെ കുതിരാനിലാണ്. പാലക്കാട്ടുനിന്നു കുതിരാൻ വഴി തൃശൂരിലേക്കുണ്ടായിരുന്ന പരമ്പരാഗത പാതയുടെ ചരിത്രം ടിപ്പു സുൽത്താന്റെ കാലത്തേക്കും നീളും. കുതിരപ്പുറത്തു പടയോട്ടം നടത്തിയ കാലത്തു ടിപ്പു സുൽത്താൻ വെട്ടിയ പാതയാണിതെന്നാണ് ഒരു കഥ. എന്നാൽ 1844ൽ ആണു കുതിരാനിലെ കാട്ടുപാത ഗതാഗതയോഗ്യമാക്കിയതെന്നു പാണഞ്ചേരി പഞ്ചായത്തു തയാറാക്കിയ ചരിത്രരേഖയിൽ പറയുന്നു. അക്കാലത്തെ ദിവാന്റെ മകനായ വെങ്കിട്ടരാമയ്യയുടെ ഭാര്യയ്ക്കും പരിവാരത്തിനും എളുപ്പത്തിൽ തമിഴ്നാട്ടിലെത്താൻ വേണ്ടിയാണു പാത ഗതാഗതയോഗ്യമാക്കിയത്.

എന്തായാലും, വളഞ്ഞു പുളഞ്ഞു പോയിരുന്ന കുതിരാനിലെ ആ പാതയുടെ നീളം 3 കിലോമീറ്റർനിന്ന് ഒരു കിലോമീറ്റർ ഋജുവാക്കുന്നതിനും വാഹനങ്ങളുടെ തടസ്സമില്ലാതെ കാടിനുള്ളിലൂടെ വന്യജീവികൾക്ക് സ്വച്ഛമായ സഞ്ചാരം ഉറപ്പുവരുത്തുന്നതിനുമാണു കുതിരാനിൽ ‘ഇരട്ടക്കുഴൽ’ തുരങ്കം നിർമിച്ചത്. 2014 ഒക്ടോബർ 9ന് ഒന്നാം തുരങ്കത്തിന്റെ നിർമാണത്തിനു തുടക്കം കുറിച്ചു. 2021 ജൂലൈ 31ന് പാലക്കാട് ഭാഗത്തുനിന്നു തൃശൂരിലേക്കു 995 മീറ്റർ നീളമുള്ള ആദ്യ തുരങ്കം സഞ്ചാരത്തിനു തുറന്നു കൊടുത്തു.

ആറു മാസത്തിനുള്ളിൽ 965 മീറ്റർ ദൈർഘ്യമുള്ള രണ്ടാമത്തെ തുരങ്കവും തുറന്നു കൊടുത്തതോടെ പതിറ്റാണ്ടുകൾ പഴക്കമുള്ള നിത്യേനയുള്ള ഗതാഗതക്കുരുക്ക് അവസാനിക്കുകയും ചെയ്തു. എന്നാലിപ്പോൾ കുതിരാൻ തുരങ്കത്തിൽ നാലു മാസത്തെ ഗതാഗത നിയന്ത്രണം വന്നിരിക്കുകയാണ്. ജനുവരി 9 മുതലാണ് നിയന്ത്രണം. എന്തുകൊണ്ടാണ് നിയന്ത്രണം? തുരങ്കത്തിലൂടെയുള്ള യാത്രയെ ഇത് ഏതെങ്കിലും തരത്തിൽ ബാധിക്കുമോ? എത്രകാലത്തേക്ക് നിയന്ത്രണം ഉണ്ടാകും? 

? കുതിരാൻ ടണലിൽ നടക്കുന്ന അറ്റകുറ്റപ്പണികൾ എന്താണ്.

∙ തൃശൂർ ഭാഗത്തേക്കുള്ള കുതിരാൻ തുരങ്കത്തിന്റെ മുകൾഭാഗത്ത് 490 മീറ്റർ ഇനിയും കോൺക്രീറ്റ് ചെയ്യാനുണ്ട്. നിലവിൽ ഈ ഭാഗത്ത് ഷോർട്ട്ക്രീറ്റാണ് നടത്തിയിട്ടുള്ളത്. പൊട്ടിച്ചു നീക്കിയ കല്ലുകളുടെ മുകൾഭാഗത്ത് സിമന്റിന്റെ പൂശൽ മാത്രം നടത്തിയിട്ടുള്ളതാണു ഷോർട്ട് ക്രീറ്റ്. എന്നാൽ തൃശൂരിൽനിന്നു പാലക്കാട്ടു ഭാഗത്തേക്ക് പോകുന്ന തുരങ്കത്തിൽ മുകൾഭാഗത്ത് എട്ടിഞ്ചോളം കനത്തിൽ കോൺക്രീറ്റ് ചെയ്തിരുന്നു. സുരക്ഷാ പരിശോധനയ്ക്കിടയിൽ ആദ്യ തുരങ്കത്തിനുള്ളിലും പൂർണമായും കോൺക്രീറ്റ് ചെയ്യണമെന്ന് നിർദ്ദേശം വന്നു. അതിനിടെ, തുരങ്കത്തിനുള്ളിൽ മേൽഭാഗത്തുനിന്ന് പാറകൾക്കിടയിലെ വിള്ളലുകൾ വഴി നീരൊഴുക്ക് ശക്തമായെന്നും റിപ്പോർട്ടുകളുണ്ടായി. ഇതേ തുടർന്നാണ് തുരങ്കത്തിനുള്ളിൽ കോൺക്രീറ്റ് ജോലികൾ തുടങ്ങുന്നത്.

? ടണലിലെ ഗതാഗതത്തിന്റെ ഇപ്പോഴത്തെ സ്ഥിതി എന്താണ്.

∙ ഒരു തുരങ്കം പൂർണമായും അടച്ചതിനാൽ രണ്ടാമത്തെ തുരങ്കത്തിലൂടെയാണ് ഇരുഭാഗത്തേക്കും ഗതാഗതം. തൃശൂരിൽനിന്ന് എത്തുന്ന വാഹനങ്ങൾ വഴുക്കുംപാറ മേൽപ്പാതയിലൂടെ തുരങ്കമുഖത്തിനു സമീപം എത്തി അനായാസം കടന്നുപോകുന്നു. പാലക്കാട് നിന്നും തൃശൂരിലേക്ക് പോകുന്ന വാഹനങ്ങൾ ഇരുമ്പുപാലത്തെ റിസർവോയറിനു കുറുകെയുള്ള പുതിയ പാലത്തിൽ എത്തി ഇടതുവശത്തു കൂടി തുരങ്കത്തിനുള്ളിലേക്ക് പ്രവേശിക്കണം.

? ശരാശരി ഒരു വാഹനം കടന്നു പോകാൻ എത്ര സമയം എടുക്കുന്നു.

∙ കുതിരാൻ തുരങ്കത്തിനുള്ളിൽ പരമാവധി വേഗത ആദ്യഘട്ടത്തിൽ മണിക്കൂറിൽ 40  കിലോമീറ്റർ എന്ന് രേഖപ്പെടുത്തിയിരുന്നു എങ്കിലും എല്ലാ വാഹനങ്ങളും ശരാശരി  80 കിലോമീറ്റർ വേഗതയിലാണ് പോയിരുന്നത്. എന്നാൽ ഗതാഗത നിയന്ത്രണം വന്നതോടെ പരമാവധി വേഗത 40 കിലോമീറ്ററായി ആയി കുറഞ്ഞു. നേരത്തേ ഒരു മിനിറ്റു മുതൽ രണ്ടു മിനിറ്റ് വരെയുള്ള സമയം കൊണ്ട് തുരങ്കം കടന്നുപോകാൻ ആകുമായിരുന്നു. എന്നാൽ നിലവിൽ രണ്ടു മുതൽ അഞ്ചു വരെ മിനിറ്റ് തുരങ്കത്തിലൂടെ യാത്രയ്ക്ക് വേണ്ടിവരുന്നു.