നെറ്റിയിൽ ശ്രീരാമമുദ്ര; രാമകഥ പറയുന്ന വീഥികൾ; നിർത്താതെ പാടുന്ന ‘വീണ’; കാണാം അയോധ്യയിലെ കാഴ്ചകൾ...

രാം രല്ലയുടെ പ്രാണ പ്രതിഷ്ഠയ്ക്ക് ഇനി ഒരു നാൾ മാത്രം ബാക്കി നിൽക്കേ ഭക്തസാഗരമാവുകയാണ് അയോധ്യ. രാമമന്ത്രത്തിൽ മുഴുകുന്ന, തീർഥാടന നഗരം. അയോധ്യയിലെ ഓരോ ഇടവഴികളും രാമക്ഷേത്രത്തിലേക്ക് എത്തുന്ന ഭക്തരെ വരവേൽക്കാൻ ഒരുങ്ങിക്കഴിഞ്ഞു. രാമക്ഷേത്രം മാത്രമല്ല അയോധ്യയിൽ തീർഥാടകരെ കാത്തിരിക്കുന്നത്. രാവും പകലും ലതാമങ്കേഷ്കറുടെ ഭജന ഉയരുന്ന ലതാമങ്കേഷ്ക്കർ ചൗക്ക് പുതിയ വികസന പദ്ധതിയുടെ ഭാഗമാണ്. സരയൂ നദിയിൽ നിന്ന് റോഡിലേക്കുള്ള പടവുകൾ ഇഷ്ടിക കൊണ്ട് കെട്ടി ഗാലറികളാക്കിയിട്ടുണ്ട്. സരയൂ ആരതി കഴിഞ്ഞെത്തുന്നവർക്ക് ഇവിടെയിരുന്നാൽ അയോധ്യയുടെ വർണഭംഗിയും രാമകഥയുടെ ലൈറ്റ് ആൻഡ് സൗണ്ട് ഷോയും കണ്ടാസ്വദിക്കാം.

24 മണിക്കൂറും രാമായണ പാരായണമുള്ള രാമകഥാ പാർക്കും അയോധ്യയിൽ ഒരുങ്ങിക്കഴിഞ്ഞു. രാമകഥാ സന്ദർഭങ്ങൾ കൊത്തിവച്ച ചുമരുകളും അങ്ങിങ്ങായി കാണാം. രാമക്ഷേത്രത്തിന്റെ നിർമാണത്തിനൊപ്പം നടന്ന വികസന പദ്ധതികളിൽ മുഖം മാറിയ അയോധ്യയിലേക്ക് എണ്ണമില്ലാത്ത ജനങ്ങളാണ് വന്നിറങ്ങുന്നത്. താമസത്തിനും ഭക്ഷണത്തിനും ടൂറിസ്റ്റുകൾക്ക് നിർദേശം നൽകാനെത്തുന്നവർക്കും തീ പിടിച്ച വില. രാമക്ഷേത്രത്തിന്റെ മാതൃകയും നെറ്റിയിൽ പതിക്കുന്ന ശ്രീരാമചിഹ്നവും മധുരപലഹാരങ്ങളും ഒക്കെയായി പ്രാദേശിക വിപണിയിലും ആഘോഷമാണ്. പ്രാണപ്രതിഷ്ഠയ്ക്ക് ഒരുങ്ങി നിൽക്കുന്ന അയോധ്യയിലെ കാഴ്ചകൾ കാണാം, മലയാള മനോരമ സീനിയർ ഫൊട്ടോഗ്രഫർ രാഹുൽ.ആർ.പട്ടം പകർത്തിയ ചിത്രങ്ങളിലൂടെ...