5 ലക്ഷം അക്കൗണ്ടിലിട്ടാൽ ആ നടി വരും; കമൽഹാസന് വരവേൽപ്, പത്മനാഭന് കാത്തിരിപ്പ്; ‘പാഠം പഠിപ്പിച്ച’ ചുള്ളിക്കാട്

∙ നാട്ടിലെ എഴുത്തുകാരനാണെങ്കിൽ ഒന്നും വേണ്ട!

നാട്ടിലെ എഴുത്തുകാരനാണെങ്കിൽ പ്രതിഫലവും വേണ്ട. കാർ, ഹോട്ടൽ ഭക്ഷണം ഒന്നും വേണ്ട. അയാൾ സമയത്തിനു മുൻപേ എത്തും. തനിക്കൊരവസരം നൽകിയതിന് സംഘാടക സമിതിക്കാരുടെ പേര് ഒന്നു രണ്ടു തവണ ആവർത്തിച്ചു പറയും. ചിലപ്പോൾ താനെഴുതിയ കവിതയോ കഥയോ വായിക്കുകയും ചെയ്യും. വലിയ എഴുത്തുകാരാണെങ്കിൽ സംഘാടക സമിതിക്കാരുടെ പേരൊന്നും ഉദ്ഘാടന പ്രസംഗത്തിൽ പരാമർശിക്കുക പോലുമില്ല. എന്നാൽ നാട്ടുകാരനായ എഴുത്തുകാരൻ തന്റെ എളിമകൊണ്ട് സംഘാടക സമിതിക്കാരെക്കുറിച്ചു നല്ല വാക്കുകളേ പറയൂ. തന്നെപ്പോലെ വളർന്നുവരുന്ന എഴുത്തുകാർക്ക് അവസരം നൽകിയതിനുള്ള നന്ദിയും. രാത്രിയിൽ നടക്കുന്ന ഗാനമേള, മിമിക്രി, ഹാസ്യ പരിപാടിക്ക് അഞ്ചുലക്ഷം രൂപയാകുമെന്നറിഞ്ഞാലും സംഘാടക സമിതിക്കു സന്തോഷമാണ്. അതു കാണാൻ ആളുകൾ കൂട്ടത്തോടെയെത്തും. 

∙ ഗാനമേളയോ സാഹിത്യ പ്രസംഗമോ നല്ലത്?

എം.മുകുന്ദന്റെയോ ടി.പത്മനാഭന്റെയോ പ്രസംഗം കേൾക്കാൻ യുവാക്കളാരുമുണ്ടാകില്ലെന്നാണ് സംഘാടക പക്ഷം. സാഹിത്യത്തോടു താൽപര്യമുള്ളവരേ എത്തൂ. എന്നാൽ മിമിക്രിക്കോ ഹാസ്യ പരിപാടിക്കോ അങ്ങനെയല്ല. ഗാനമേളയാണെങ്കിൽ തകർത്തു. എല്ലാവരും നൃത്തം ചെയ്തു പരിപാടി കേമമാക്കും. പാടാനെത്തുന്നവർ സദസ്സിലേക്കിറങ്ങി വന്നു പാടുമ്പോഴുണ്ടാകുന്ന അർമാദം ഒന്നു വേറെത്തന്നെയാണ്. ഇതൊക്കെയാണ് ഇപ്പോൾ നമ്മുടെ നാട്ടിൽ നടക്കുന്നത്. ഇങ്ങനെയൊരു സാംസ്കാരിക അന്തരീക്ഷത്തിൽ ജീവിക്കുമ്പോഴാണ് നമ്മുടെ സാഹിത്യ അക്കാദമിയൊക്കെ ആയിരം രൂപ പ്രതിഫലവുമായി എഴുത്തുകാരെ ക്ഷണിക്കുന്നത്. അക്കാദമിയുടെ ഏതെങ്കിലും സമിതിയിൽ അംഗമാണെങ്കിൽ എഴുത്തുകാർക്കു പ്രതിഫലവുമില്ല. ആകെ ലഭിക്കുന്നത് യാത്രാപ്പടി മാത്രം. 

∙ വരാനുള്ള കാരണം അക്കാദമിയോടുള്ള ആദരവ്

സാഹിത്യ അക്കാദമിയോടുള്ള ആദരവുകൊണ്ടാണു പല എഴുത്തുകാരും കുറഞ്ഞ പ്രതിഫലമായിട്ടും പങ്കെടുക്കുന്നത്. തന്റെ പ്രസംഗത്തിന്റെ ആമുഖത്തിൽ ബാലചന്ദ്രൻ ചുള്ളിക്കാടുതന്നെ ഇക്കാര്യം പറയുന്നുണ്ട്. കേരളത്തിൽ കൊട്ടിഘോഷിച്ചു നടന്ന മറ്റു സാഹിത്യോത്സവത്തിൽ പങ്കെടുത്തപ്പോഴുണ്ടായ അനുഭവം വച്ച് ഇനി അത്തരം പരിപാടികളിൽ പങ്കെടുക്കില്ല എന്നു തീരുമാനിച്ചതാണെന്നും എന്നാൽ അക്കാദമി പ്രസിഡന്റ് സച്ചിദാനന്ദനുമായുള്ള ബന്ധം കൊണ്ടാണു വന്നതെന്നും പറയുന്നുണ്ട്. മറ്റൊരവസരത്തിൽ നടത്താനിരുന്ന കുമാരനാശാൻ അനുസ്മരണ പ്രഭാഷണം അക്കാദമിയുടെ സൗകര്യത്തിനു വേണ്ടി സാഹിത്യോത്സവത്തിന്റെ കൂടെയാക്കിയതുകൊണ്ടാണു വന്നതെന്നും ചുള്ളിക്കാടു പറഞ്ഞിരുന്നു. 

∙ ജനം ഒഴുകിയെത്തി, എന്നിട്ടും...

അഞ്ചുദിവസമായി തൃശൂരിൽ നടന്ന സാഹിത്യോത്സവത്തിൽ ഏറ്റവുമധികം ആളുകൾ കേൾക്കാനെത്തിയ ഒരു വേദിയായിരുന്നു ചുള്ളിക്കാടിന്റേത്. രണ്ടുമണിക്കൂർ സമയമെടുത്താണ് ചുള്ളിക്കാട് ‘കരുണ’യെക്കുറിച്ചു പ്രഭാഷണം നടത്തിയത്. ഹാളിലും പുറത്തും നിന്നുകൊണ്ടാണ് നൂറുകണക്കിനാളുകൾ ആ പ്രസംഗം കേട്ടത്. ഒരു നിമിഷം പോലും മടുപ്പുതോന്നാത്ത വിധമായിരുന്നു ചുള്ളിക്കാടിന്റെ പ്രഭാഷണം. കഴിഞ്ഞവർഷം അദ്ദേഹം നടത്തിയ വൈലോപ്പിള്ളി ശ്രീധരമേനോൻ അസുസ്മരണ പ്രഭാഷണം സമൂഹമാധ്യമങ്ങളിൽ തരംഗമായിരുന്നു. അതുകൊണ്ടാണ് ഇക്കുറി ചുള്ളിക്കാടിനെ നേരിട്ടു കേൾക്കാൻ മറ്റു ജില്ലകളിൽ നിന്നുപോലുമാണ് ആളുകൾ അക്കാദമിയിലേക്കൊഴുകിയെത്തിയത്. 

ഈയൊരു പരിപാടിക്ക് അദ്ദേഹത്തിനു ലഭിച്ച കുറഞ്ഞ പ്രതിഫലത്തെക്കുറിച്ചു കേട്ടതോടെ പങ്കെടുത്തവർ വരെ ‘മോശമായിപ്പോയി’ എന്ന് തുറന്നുപറഞ്ഞു. അക്കാദമിക്കു വേണ്ടി സച്ചിദാനന്ദനൊക്കെ വിശദീകരണവുമായി എത്തിയെങ്കിലും കാലങ്ങളായി പുതുക്കാത്ത അക്കാദമി പ്രതിഫലത്തെക്കുറിച്ചു കേരളം ചർച്ച ചെയ്തുവെന്നതു നല്ലൊരു കാര്യമായി. ക്ഷേമ പെൻഷൻ പോലും കുടിശികയായ നാട്ടിൽ ആയിരം രൂപയെങ്കിലും പ്രതിഫലം ലഭിച്ചല്ലോ എന്ന് ദീർഘനിശ്വാസം വിടുന്നവരുമുണ്ടായിരുന്നു. 

∙ എന്നു തീരും ഈ ചിറ്റമ്മനയം?

സാഹിത്യകാരന്മാരോടും സാംസ്കാരിക പ്രവർത്തകരോടും നമ്മുടെ സമൂഹത്തിൽ ഇപ്പോഴും എപ്പോഴുമൊരു ചിറ്റമ്മനയമുണ്ട്. സാഹിത്യകാരന്മാരും സിനിമാപ്രവർത്തകരും പങ്കെടുക്കുന്ന ഒരു വേദിയിൽ ചെന്നാൽ ഇക്കാര്യം മനസ്സിലാകും. യഥാർഥത്തിൽ ആരാണ് വലിയവർ എന്നതല്ല ചോദ്യം. വർഷങ്ങളായി കഥകൾ മാത്രമെഴുതുന്ന ടി.പത്മനാഭൻ പങ്കെടുക്കുന്നൊരു ചടങ്ങിൽ ഒരു യുവ നടനോ നടിയോ എത്തിയാൽ സംഘാടകർ മുഴുവൻ അവർക്കു പിന്നാലെ പോകുന്നതു കാണാം. 

∙ കമൽഹാസന്റെ കാറിനു പോകാം, പത്മനാഭൻ റോഡരികിൽ!

കേരളം ആഘോഷിച്ചൊരു സാഹിത്യോത്സവം. അവിടെ ടി.പത്മനാഭനും നടൻ കമൽഹാസനും പങ്കെടുക്കുന്നത് ഒരേ ദിവസം ഒരേ സമയം രണ്ടു വേദിയിൽ. സംഘാടകരിലെ പ്രമുഖരെല്ലാം കമൽഹാസന്റെ വേദിയിലേക്കു പോയപ്പോൾ തന്റെ പ്രസംഗം കഴിഞ്ഞ് സംഘാടകരൊരുക്കിയ കാർ വരാൻ അര മണിക്കൂറാണ് ടി. പത്മനാഭൻ റോഡരികിൽ കാത്തുനിന്നത്. അദ്ദേഹംതന്നെ സംഘാടകരിൽ പ്രമുഖനെ വിളിച്ചെങ്കിലും മറുപടിയൊന്നും ലഭിച്ചില്ല. ഇത്തരം വേദികളിൽ പൊട്ടിത്തെറിക്കാറുള്ള പത്മനാഭൻ അന്ന് ക്ഷമയോടെ കാത്തുനിൽക്കുന്നതു കണ്ടു. 

അരമണിക്കൂർ കഴിഞ്ഞ് കാർ വന്നു മടങ്ങുന്നതുവരെ അദ്ദേഹം ആരോ കൊണ്ടുകൊടുത്ത കസേരയിൽ മിണ്ടാതിരുന്നു. വലിയ സെക്യൂരിറ്റി വലയത്തിൽ കമൽഹാസന്റെ കാർ കടന്നുപോകുമ്പോൾ ടി.പത്മനാഭൻ തനിക്കുള്ള കാറും കാത്ത് റോഡരികിൽ ഇരിക്കുകയായിരുന്നു. കോഴിക്കോട് കടപ്പുറത്ത് കടൽ അപ്പോഴും പ്രക്ഷുബ്ധമായിരുന്നു. ശാന്തമായ നദിയായിരുന്നു അന്നേരം പത്മനാഭൻ. അടുത്ത വർഷം അദ്ദേഹം ആ സാഹിത്യോത്സവത്തിൽ പങ്കെടുക്കാൻ പോയില്ല എന്നതാണ് അദ്ദേഹം സ്വയം ചെയ്ത നീതീകരണം. ഇത്രയെങ്കിലും ഒരു സാഹിത്യകാരൻ ചെയ്യാൻ തയാറായല്ലോ എന്നതാണ് ഉയർത്തിപ്പിടിക്കേണ്ട കാര്യം. ബാലചന്ദ്രൻ ചുള്ളിക്കാട് തുറന്നുപറഞ്ഞതുപോലെ.