ഫോണില്‍ പോലും കേജ്‍രിവാളുമായി സംസാരമില്ല, കേരള സർക്കാർ അഴിമതിയുടെ ചെളിക്കുണ്ടിൽ: പ്രശാന്ത് ഭൂഷൺ

∙ തിരഞ്ഞെടുപ്പ് കമ്മിഷൻ സ്വതന്ത്രമല്ലെന്നാണോ താങ്കൾ പറയുന്നത്. അതിനുമേൽ കടിഞ്ഞാണിട്ടിരിക്കുന്നത് ആരാണ്?

ഒരിക്കലും തിരഞ്ഞെടുപ്പ് കമ്മിഷൻ ഒരു സ്വതന്ത്രസ്ഥാപനമല്ല. അതിന്റെ പ്രസക്തി തന്നെ ചോദ്യം ചെയ്യപ്പെടുകയാണ്. ഭരണകക്ഷിയുടെ ഉപകരണമായി തിരഞ്ഞെടുപ്പ് കമ്മിഷൻ മാറി.

∙ രാജ്യം മറ്റൊരു ലോക്സഭാ തിരഞ്ഞെടുപ്പിലേക്ക് നീങ്ങുകയാണ്. നിലവിലെ രാഷ്ട്രീയ അവസ്ഥയെ എങ്ങനെ നോക്കികാണുന്നു?

സമാനതകളില്ലാത്ത പ്രതിസന്ധികളിലൂടെയാണ് നമ്മുടെ രാജ്യം കടന്നുപോകുന്നത്. ഒരുകാലത്തുമില്ലാത്ത പ്രതിസന്ധി എന്നുതന്നെ പറയാം. ഹിറ്റ്ലറിന്റെ ഭരണത്തിനു സമാനമായ ഭരണമാണ് ഇവിടെ നടക്കുന്നത്. 2024ലും ഇത്തരമൊരു അവസ്ഥയിൽ ജീവിക്കേണ്ടിവരുന്നത് വിഷമകരം തന്നെയാണ്. മതേതരത്വം ചോദ്യം ചെയ്യപ്പെടുന്നു. വർഗീയ കക്ഷികൾ തടിച്ചുകൊഴുക്കുകയാണ്. പൗരന്റെ ഭക്ഷണത്തിനും സ്വാതന്ത്ര്യത്തിനും മേൽവരെ മോദി വാൾ ചുഴറ്റുകയാണ്. ഭരണഘടന സ്ഥാപനങ്ങളെ ഒന്നൊന്നായി തകർത്തു. 

നമ്മുടെ വിദ്യാഭ്യാസ മേഖലതന്നെയാണ് അതിനു ഏറ്റവും വലിയ ഉദാഹരണം. വർഗീയതയാണ് പാഠപുസ്തകങ്ങളിൽ കുത്തിനിറയ്ക്കുന്നത്. സിലബസ് പരിഷ്കരണമെന്നു പറഞ്ഞ് രാജ്യത്ത് നടക്കുന്നത് എന്താണ്? വ്യാജമായി നിർമിക്കപ്പെട്ട ചരിത്രമാണ് വിദ്യാർഥികൾ പഠിക്കുന്നത്. ഈ സർക്കാരിനെ താഴെയിറക്കുക വലിയ ജോലി തന്നെയാണ്. ഈ സർക്കാർ നമ്മുടെ രാജ്യത്തെ കൊണ്ടെത്തിച്ച ഗുരുതരപ്രതിസന്ധികളിൽ നിന്നും കരകയറണം.

∙ പ്രതിപക്ഷത്ത് ഐക്യമില്ലാത്തത് ബിജെപിയെ സംബന്ധിച്ച് നേട്ടമല്ലേ?

പ്രതിപക്ഷ പാർട്ടികളിൽ പലതും ദീർഘകാലം സംസ്ഥാനങ്ങളും രാജ്യവുമൊക്കെ ഭരിച്ച് ഇപ്പോൾ ശോഷിച്ചു നിൽക്കുന്നവരാണ്. ആ പാർട്ടികളുടെ നേതാക്കളിൽ പലരും അഴിമതിക്കാരാണ്. ബിജെപിയുടെ ഏറ്റവും വലിയ നേട്ടവും അതുതന്നെയാണ്. അന്വേഷണ ഏജൻസികളെ ഉപയോഗിച്ച് ബിജെപിക്ക് അവരെ ഭയപ്പെടുത്താൻ സാധിക്കും. ആ സാധ്യത ഉപയോഗിച്ചാണ് പാർട്ടികളെ പിളർത്തുന്നതും നേതാക്കളെ അവർ വിലയ്ക്കെടുക്കുന്നതും.

∙ പ്രതിപക്ഷത്തെ നയിക്കാൻ രാഹുൽഗാന്ധി യോഗ്യനാണോ?

അദ്ദേഹത്തെ കൊണ്ടു സാധിക്കും. ഒരിക്കലും പ്രധാനമന്ത്രിയാകാൻ ആഗ്രഹിക്കാത്ത വ്യക്തിയാണ് രാഹുലെന്ന് എനിക്ക് തോന്നുന്നു. പക്ഷെ രാഹുലിനൊപ്പം വലിയൊരു പട കൂടി വേണം. അത് അദ്ദേഹത്തിന് കിട്ടുന്നോയെന്ന് സംശയമുണ്ട്. പിസിസി പ്രസിഡന്റുമാരുടെയും മുഖ്യമന്ത്രിമാരുടെയും മേൽ അദ്ദേഹത്തിന് കടിഞ്ഞാണുണ്ടായിരിക്കണം.അവരെയൊക്കെ ഇന്ന് അദ്ദേഹമല്ല, മറ്റു പലരുമാണ് നിയമിക്കുന്നത് എന്നാണ് എനിക്ക് തോന്നുന്നത്. അദ്ദേഹം സ്ഥാനം ഏറ്റെടുത്ത് കോൺഗ്രസിന്റെ മുൻനിരയിൽ തന്നെ  നിൽക്കണം.

∙ ആം ആദ്മി പാർട്ടിയുടെ സ്ഥാപകരിൽ ഒരാളാണല്ലോ. അവരുടെ ഇപ്പോഴത്തെ പ്രവർത്തനങ്ങളിൽ തൃപ്തനാണോ?

ഒട്ടും തൃപ്തനല്ല. ആം ആദ്മി പാർട്ടി വലിയ പ്രതീക്ഷകളോടെ ഉണ്ടാക്കിയ ഒരു പ്രസ്ഥാനമാണ്. ശരിയായ രാഷ്ട്രീയത്തിനു വേണ്ടിയായിരുന്നു ആ തീരുമാനം. സാധാരണ രാഷ്ട്രീയ പാർട്ടികളെപ്പോലെ പ്രവർത്തിക്കാനല്ല ആഗ്രഹിച്ചിരുന്നത്. പക്ഷേ ഇന്ന് അതൊരു അഴിമതി പാർട്ടിയായി മാറി. ആം ആദ്മി പാർട്ടിയുടെ പ്രവർത്തനം ഒട്ടുംസുതാര്യമല്ല. മറ്റു പാർട്ടികളും ആ പാർട്ടിയും തമ്മിൽ എന്തെങ്കിലും വ്യത്യാസമുണ്ടെന്ന് തോന്നുന്നുമില്ല.

∙ അരവിന്ദ് കേജ്‍രിവാളുമായി ഇപ്പോഴും സൗഹൃദമുണ്ടോ?

ഒരു സൗഹൃദവുമില്ല. ഫോണിൽ പോലും സംസാരിക്കാറില്ല.