‘മകൾക്ക് പ്രത്യേക ശക്തി’: മൃതദേഹം മടക്കി പെട്ടിയിലാക്കി: നാട്ടുകാർ സംശയിച്ചു, വാടകവീട്ടിൽ എന്തിന് ഇത്രയേറെ കർട്ടൻ?

വിജയന്റെ മകളുടെ കയ്യിൽ അനുഭവപ്പെട്ടിരുന്ന ബുദ്ധിമുട്ട് പൂജയിലൂടെ മാറ്റാമെന്ന് വിശ്വസിപ്പിച്ചാണ് നിതീഷ് ഇവർക്കൊപ്പം കൂടുന്നത്. നിതീഷിന്റെ നിർദേശങ്ങൾക്ക് അനുസരിച്ച് അവർ ജീവിതരീതി വരെ മാറ്റിയപ്പോൾ ബന്ധുക്കളിൽ നിന്നും നാട്ടുകാരിൽ നിന്നുമെല്ലാം അകലം പാലിക്കേണ്ടിവന്നു. ഒടുവിൽ ഒരുഘട്ടത്തിൽ ഇവരെ കാണാതായെന്ന് വ്യക്തമാക്കി വിജയന്റെ സഹോദരി പൊലീസിൽ പരാതി വരെ നൽകിയിരുന്നു. അതിനുശേഷം കട്ടപ്പനയിൽവച്ച് ഒരു ബന്ധു വിജയനെയും മറ്റും കണ്ടതായി അറിയിച്ചതോടെയാണ് അവർ ജീവനോടെയുണ്ടെന്ന് ബന്ധുക്കൾ മനസ്സിലാക്കിയത്.

വിജയന്റെ മകൾക്ക് പ്രത്യേക ശക്തിയുണ്ടെന്ന് വിശ്വസിപ്പിച്ചാണ് നിതീഷ് ഇവരെ പൊതുസമൂഹത്തിൽ നിന്ന് അകറ്റിയത്. മറ്റുള്ളവരുമായി ഇടപഴകിയാൽ ശക്തി ക്ഷയിക്കുമെന്നാണ് വിശ്വസിപ്പിച്ചിരുന്നത്. മകളെ വിവാഹം കഴിപ്പിച്ചാൽ ശക്തി വർധിക്കുമെന്ന് വിശ്വസിപ്പിച്ചെന്നും സൂചനയുണ്ട്. അതിനുശേഷമാണ് യുവതിക്ക് നിതീഷിൽ കുഞ്ഞ് ജനിച്ചത്. ആശുപത്രിയിലാണ് കുഞ്ഞിന് ജന്മം നൽകിയതെങ്കിലും അവിടെ കൊടുത്തത് മറ്റൊരു വിലാസമാണെന്ന് പൊലീസ് പറയുന്നു. അതിനാലാണ് കുഞ്ഞിനെ കാണാതായിട്ടും മറ്റാരും അറിയാതിരുന്നത്. പൊതുസമൂഹവുമായി അകൽച്ച പാലിച്ചിരുന്നതിനാൽ കുഞ്ഞ് ജനിച്ച വിവരം മറ്റാരും അറിഞ്ഞതുമില്ല.

വിജയന്റെയും കുടുംബത്തിന്റെയും വീടും സ്ഥലവും വൻതുകയ്ക്ക് വിറ്റതായി വിവരമുണ്ടെങ്കിലും ആ പണം എന്തു ചെയ്‌തെന്ന കാര്യത്തിൽ അവ്യക്തതയുണ്ട്. ആ പണം മുഴുവൻ ചെലവായെന്നാണ് നിതീഷിൽ നിന്ന് പൊലീസിനു ലഭിച്ച സൂചനയെന്നാണ് വിവരം. നിലവിൽ ചെലവിന് പണമില്ലാത്തതിനാലാണ് മോഷണത്തിന് ഇറങ്ങിയതെന്നും പറയുന്നു. വിഷ്ണുവിനെ ഉപയോഗിച്ചാണ് നിതീഷ് മോഷണം നടത്തിയിരുന്നത്. വർക്‌ഷോപ്പിൽ മോഷണത്തിനു കയറിയതും വിഷ്ണുവായിരുന്നു. നിതീഷ് ഈ സമയം പുറത്തു കാവൽ നിൽക്കുകയായിരുന്നു. കക്കാട്ടുകടയിൽ വിജയന്റെ പേരിലാണ് വാടകയ്ക്ക് വീടെടുത്തത്.

∙ മൂന്നാക്കി മടക്കി കുഴിയിലിറക്കി

വീടിനുള്ളിൽവച്ചുണ്ടായ തർക്കത്തിനിടെ വിജയനെ ചുറ്റികയ്ക്ക് തലയ്ക്കടിച്ച് കൊലപ്പെടുത്തിയശേഷം വീടിനുള്ളിൽ മറവു ചെയ്യാൻ  കുഴിയെടുത്തത് ഒന്നര ദിവസത്തോളമെടുത്താണ്. തുടർന്ന് മൃതദേഹം മൂന്നായി വളച്ച് തലഭാഗം മുട്ടിനോടു ചേർത്തുവച്ച് കാർഡ്‌ബോർഡ് പെട്ടിയിലാക്കി അതിനു മുകളിൽ പാക്കിങ് ടേപ്പ് ഒട്ടിച്ചാണ് കുഴിക്കുള്ളിൽ ഇറക്കിയതെന്നാണ് നിഗമനം. മൃതദേഹം കണ്ടെത്തിയപ്പോൾ പെട്ടി അഴുകി നശിച്ചിരുന്നെങ്കിലും ടേപ്പ് കണ്ടെത്തിയതായി സ്ഥലത്ത് ഉണ്ടായിരുന്ന കാഞ്ചിയാർ പഞ്ചായത്ത് പ്രസിഡന്റ് സുരേഷ് കുഴിക്കാട്ട് പറഞ്ഞു.

മൂന്നരയടിയോളം സമചതുരാകൃതിയിൽ നാലടിയോളം താഴ്ചയിലാണ് കുഴിയെടുത്തിരുന്നത്. മൃതദേഹം കണ്ടെത്താനായി സമാന്തരമായി കുഴികൾ തീർത്തുകൊണ്ടാണ് അന്വേഷണ സംഘം നടപടി തുടങ്ങിയത്. പുതുതായി കോൺക്രീറ്റ് ചെയ്തതിനാൽ അതിനടിയിലാണ് മൃതദേഹമെന്ന് വ്യക്തമായിരുന്നു. ഈ ഭാഗം അൽപം താഴ്ന്ന നിലയിലുമായിരുന്നു. മൃതദേഹം അഴുകിയതിനാലാകാം കോൺക്രീറ്റ് ചെയ്തിരുന്ന ഭാഗം താഴ്ന്നതെന്നാണ് നിഗമനം.

ആദ്യം വസ്ത്രത്തിന്റെ ഭാഗങ്ങളും മറ്റുമാണ് കുഴിയിൽ നിന്ന് കണ്ടെത്തിയത്. പാന്റ്സും ഷർട്ടും ബെൽറ്റും കുഴിയിൽ നിന്ന് കണ്ടെത്തിയതായി ജനപ്രതിനിധികൾ പറഞ്ഞു. ഒരു എയർ ഗണ്ണും പൂജയ്ക്ക് ഉപയോഗിച്ചിരുന്ന ചിത്രങ്ങളും വിളക്കും പൂജാമന്ത്രങ്ങളുള്ള പുസ്തകങ്ങളും വീട്ടിൽ ഉണ്ടായിരുന്നു.

∙ അധികം ശ്രദ്ധിക്കപ്പെടാത്ത വീട്

കട്ടപ്പന–കുട്ടിക്കാനം നിർദിഷ്ട മലയോര ഹൈവേയിൽ കാഞ്ചിയാർ പഞ്ചായത്തിലെ കക്കാട്ടുകട ജംക്‌ഷനു സമീപത്തെ പഞ്ചായത്ത് റോഡിൽ കൂടി ഏകദേശം 300 മീറ്റർ മാറിയാണ് വീട്. 2023 ജൂണിലാണ് വിജയന്റെ പേരിൽ വീട് വാടകയ്ക്ക് എടുത്തത്. വീടുപണി നടക്കുന്നതിനാൽ ഏതാനും നാൾ തനിക്കും മകനും താമസിക്കാനാണെന്നാണ് വിജയൻ വീട്ടുടമസ്ഥയെ ധരിപ്പിച്ചത്. അജിത്ത് എന്ന പേരാണ് വിജയന്റെ മകൻ വിഷ്ണു പറഞ്ഞിരുന്നത്. വിജയന്റെ പേരിലാണ് വീട് വാടകയ്ക്ക് എടുത്തത്. വിജയനും മകനും മാത്രമാണ് ഇപ്പോൾ താമസിക്കാനുള്ളതെന്നും ചെന്നൈയിൽ ബാങ്കിൽ ജോലി ചെയ്യുന്ന മകളും അവിടെയുള്ള അമ്മയും രണ്ടുമാസം കഴിയുമ്പോൾ വരുമെന്നുമാണ് വിജയൻ പറഞ്ഞത്. മകളുടെ വിവാഹമാണെന്നും അതിനു മുന്നോടിയായി ഇരുപതേക്കറിൽ വീടുപണി നടക്കുകയാണെന്നും വിശ്വസിപ്പിച്ചു.

വല്ലപ്പോഴും വാടക വീട്ടിൽ വന്നുപോകുകയേയുള്ളൂവെന്നും പറഞ്ഞിരുന്നു. കൃഷി ആവശ്യത്തിനായി ചില ദിവസങ്ങളിൽ ഉച്ച മുതൽ വൈകിട്ടുവരെ വീടിനു സമീപം ചെലവഴിച്ചിട്ടും വീടിനുള്ളിൽനിന്ന് ചെറിയ അനക്കംപോലും ഉണ്ടായിട്ടില്ലെന്ന് വീട്ടുടമസ്ഥ പറയുന്നു. വീടിന്റെ ജനലുകൾ മുഴുവൻ കർട്ടൻ ഇട്ട് മറച്ചിരുന്നത് ചെറിയ സംശയത്തിന് ഇടയാക്കിയിരുന്നു. വീടുപണി നടക്കുന്നതിനാൽ താൽക്കാലികമായി വാടക വീടെടുത്തവർ എന്തിനാണ് ഇത്രയധികം കർട്ടനുകൾ ഇട്ടിരിക്കുന്നതെന്ന് സംശയിച്ചിരുന്നു. നിതീഷ് ഈ വീട്ടിൽ താമസിക്കാൻ ഉണ്ടാവില്ലെന്നാണ് പറഞ്ഞിരുന്നത്. ഇയാളുടെ മാതാപിതാക്കൾക്ക് തിരുവനന്തപുരത്ത് പൊലീസിലാണ് ജോലിയെന്നും വിശ്വസിപ്പിച്ചു.

മൃതദേഹം മറവു ചെയ്തിരുന്ന മുറിയിൽ മറ്റ് വസ്തുക്കൾ ഒന്നും ഉണ്ടായിരുന്നില്ല. മറ്റു രണ്ട് മുറികളിൽ പൂജകൾ ചെയ്യാനായി കറുത്ത പ്ലാസ്റ്റിക് കൊണ്ട് മറച്ച് പ്രത്യേക ക്രമീകരണം ഒരുക്കിയിരുന്നു. മുറികൾക്കുള്ളിലെല്ലാം ചാക്കുകെട്ടുകളാണ്. ജനലുകളെല്ലാം പ്ലാസ്റ്റിക് കൊണ്ട് മറച്ചിരുന്നു. ഇതിൽ ഒരു മുറിയിലാണ് വിജയന്റെ ഭാര്യ സുമയും മകളും കഴിഞ്ഞിരുന്നത്. ഈ മുറിയിലെ ഭിത്തിയിലെ തട്ടുപോലുള്ള ഭാഗത്ത് പാചകം ചെയ്യാനുള്ള ക്രമീകരണവും ഒരുക്കിയിരുന്നു.

∙ പൊലീസിന്റെ വിജയം

മോഷണക്കേസിനു പിന്നാലെ ഇരട്ടക്കൊലപാതകത്തിന്റെ ചുരുളഴിച്ചത് പൊലീസിന്റെ അന്വേഷണ മികവ്. മോഷണശ്രമത്തിനിടെ പിടിയിലായ നിതീഷും വിഷ്ണുവും ഏതു നാട്ടുകാരാണെന്ന് കൃത്യമായ നിശ്ചയം ഉണ്ടായിരുന്നില്ല. മോഷണക്കേസിൽ പിടിയിലായവരുടെ ചിത്രവും മറ്റും വാർത്തയായതോടെയാണ് ഇവരുടെ ബന്ധുക്കളിൽ ചിലർ വിവരം അന്വേഷിച്ചെത്തിയത്.