‘ഭാവി’ പറഞ്ഞ് പുട്ടിൻ; അഭിനന്ദിച്ചവരിൽ മോദി, ഷി, ‌കിം...; ബാലറ്റില്‍ ഭർത്താവിന്റെ പേരെഴുതി യൂലിയ; ഇനിയും വരുമോ യുദ്ധം?

തിരഞ്ഞെടുപ്പിന്റെ അവസാന ദിവസങ്ങളിൽ ‍ഡ്രോൺ ആക്രമണവും നടന്നു. സ്പൊറീഷ്യയിലെ യുക്രെയ്ൻ നിയന്ത്രിത മേഖലയിലെ പോളിങ് ബൂത്തിൽ ഡ്രോൺ വീണ് തീ പടർന്നിരുന്നു. തിരഞ്ഞെടുപ്പ് അട്ടിമറിക്കാൻ യുക്രെയ്ൻ ശ്രമിക്കുന്നതായി റഷ്യ ആരോപിച്ചു. രാജ്യത്തിന്റെ പരമാധികാരത്തിനു ഭീഷണിയുയർന്നാൽ ആണവായുധം പ്രയോഗിക്കുമെന്ന് റഷ്യൻ പ്രസിഡന്റ് വ്ലാഡിമിർ പുട്ടിൻ പറഞ്ഞത് വിവാദമായിരുന്നു.

സോവിയറ്റ് യൂണിയന്റെ തകർച്ച 20–ാം നൂറ്റാണ്ടിലെ തന്നെ ഏറ്റവും വലിയ ദുരന്തം ആണെന്നാണു പുട്ടിന്റെ അഭിപ്രായം. യുക്രെയ്ൻ റഷ്യയുടെ കിരീടത്തിലെ രത്നമാണെന്നും ഇരുരാജ്യങ്ങളും ഒരൊറ്റ ജനതയാണെന്നും പുട്ടിൻ വാദിക്കുന്നു. സോവിയറ്റ് യൂണിയന്റെ നഷ്ടപ്രതാപം വീണ്ടെടുക്കുക എന്നത് അദ്ദേഹത്തിന്റെ പ്രഖ്യാപിത ലക്ഷ്യമാണ്. അതിന്റെ തുടക്കമായാണു 2014ൽ യുക്രെയ്നിൽ നിന്നു ക്രൈമിയ പിടിച്ചെടുത്ത് റഷ്യയോടു ചേർത്തതും യുക്രെയ്ൻ പ്രദേശത്ത് രണ്ടു വർഷത്തിലേയായി യുദ്ധം തുടരുന്നതും.

∙ പ്രതിഷേധിക്കാം, ഉച്ചയ്‌ക്കെത്തി...

തിരഞ്ഞെടുപ്പിനെ തുടർന്ന്, പ്രതിപക്ഷ കക്ഷികൾ മാർച്ച് 18ന് ഞായറാഴ്ച ഉച്ചസമയത്ത് ഒരുമിച്ച് വോട്ടു ചെയ്യാനെത്തി ‘ഉച്ചസമരം’ നടത്തിയിരുന്നു. പുട്ടിനെതിരെയുള്ള പ്രതീകാത്മക സമരമായിരുന്നു ഇത്. പുട്ടിന്റെ കടുത്ത വിമർശകനും പ്രതിപക്ഷനേതാവുമായിരുന്ന അലക്സി നവൽനി ജയിലിൽ ദുരൂഹസാഹചര്യത്തിൽ മരിച്ചതിനു ശേഷമാണു തിരഞ്ഞെടുപ്പ് നടക്കുന്നത്. തന്റെ മരണത്തിനു മുൻപേ തന്നെ ഇത്തരത്തിലുള്ള പ്രതിഷേധം നടത്താൻ നവൽനി നിർദേശിച്ചിട്ടുണ്ടായിരുന്നു. ഇതേത്തുടർന്ന്, പുട്ടിനെതിരെ ഉച്ചസമരം നടത്താൻ അലക്സി നവൽനിയുടെ ഭാര്യ, യൂലിയ ആഹ്വാനം ചെയ്തു. പോളിങ് ബൂത്തുകൾക്ക് മുൻപിൽ നീണ്ട് നിരയായി നിന്ന് ആളുകൾ പ്രതീകാത്മക സമരത്തിലേർപ്പെട്ടു.

ബാലറ്റിൽ താൻ ഭർത്താവിന്റെ പേരാണ് എഴുതിയത് എന്ന് യൂലിയ പറഞ്ഞു. പുട്ടിന് എന്തു സന്ദേശമാണ് നൽകാനുള്ളത് എന്ന ചോദ്യത്തിന് കൊലയാളിയായ അയാളോട് ഒന്നും പറയാൻ ആഗ്രഹിക്കുന്നില്ല എന്നതായിരുന്നു മറുപടി. റഷ്യയിലെ ഏറ്റവും വലിയ സ്വതന്ത്ര പത്രസ്ഥാപനമായ മെഡൂസ, ‘കള്ളൻ, കൊലയാളി’ എന്നെല്ലാം ആളുകൾ എഴുതി വച്ച ബാലറ്റുകൾ പ്രദർശിപ്പിച്ചിരുന്നു. പ്രതിഷേധങ്ങളോട് പുട്ടിൻ പ്രതികരിച്ചില്ല. പൊതുവേ, എതിരാളികളെ വെട്ടിവീഴ്ത്തി മുന്നോട്ടു പോകുന്ന ശീലമാണ് പുട്ടിന്റേത്.

ശത്രുക്കളാരെന്നു തിരിച്ചറിയുകയും അവരെയെല്ലാം നിഷ്ക്രിയരാക്കുകയും കലയാണു രാഷ്ട്രീയമെന്നു പറഞ്ഞ ഇവാൻ ഇൽയിനിന്റെ തത്വചിന്തയാണു വ്ളാഡിമിർ പുട്ടിന്റെ വഴിവിളക്ക്. പതിനാലാം വയസ്സിൽ സഹപാഠിയുടെ കാൽ അടിച്ചൊടിച്ച പുട്ടിൻ, അതേപ്പറ്റി അധ്യാപികയോടു പറഞ്ഞത് ‘ചിലർക്ക് അടിയുടെ ഭാഷ മാത്രമേ മനസ്സിലാകൂ’ എന്നാണ്. ജൂഡോയിൽ അതിസമർഥനായ പുട്ടിന്‌‌ ബ്ലാക് ബെൽറ്റ് പുട്ടിൻ എന്നുമറിയപ്പെടുന്നു. ആയോധനകലയിലെന്ന പോലെ രാഷ്ട്രീയത്തിലും എതിരാളി ചുവടു വയ്ക്കും മുൻപേ അടിച്ചൊതുക്കുക എന്നതാണ് പുട്ടിന്റെ നിലപാട്.

∙ പുട്ടിന്റെ റഷ്യ ലോകത്തിനായി കാത്തുവച്ചിരിക്കുന്നത്...

യുദ്ധക്കുറ്റവാളിയും കൊലയാളിയുമായാണ് പാശ്ചാത്യ രാജ്യങ്ങളിൽ പുട്ടിൻ അറിയപ്പെടുന്നത്. അവർ പുട്ടിനെ ഏകാധിപതി എന്നു വിശേഷിപ്പിക്കുന്നു. എന്നാൽ രാജ്യത്തിനകത്ത് പുട്ടിനുള്ള ജനപിന്തുണ അദ്ഭുതകരമാണ്. 85 ശതമാനത്തോളം ആളുകളുടെ പിന്തുണ പുട്ടിന് ഉണ്ടെന്നാണ് സർവേ ഫലങ്ങൾ വ്യക്തമാക്കുന്നത്. തിരഞ്ഞെടുപ്പ് അതിനെ സാധൂകരിക്കുന്നതായി പുട്ടിന് അഭിമാനിക്കാം. എന്നിരുന്നാലും എതിരാളികളെ എല്ലാം അടിച്ചൊതുക്കിയും അലക്സി നവാൽനിയെ പോലുള്ളവരുടെ സ്വരങ്ങളെ എന്നന്നേക്കുമായി ഇല്ലതാക്കിയും വിമതസ്വരങ്ങളെ നിശബ്ദമാക്കിയുമുള്ള പുട്ടിന്റെ തേരോട്ടത്തിൽ ജനാധിപത്യ മൂല്യങ്ങൾ തെല്ലും കലർന്നിട്ടില്ലെന്നത് നിശ്ചയം.

ബ്രിട്ടിഷ് വിദേശകാര്യ സെക്രട്ടറി ഡേവിഡ് കാമറൂൺ ‘എക്സി’ൽ കുറിച്ചത്, യുക്രെയ്നിൽ അനധികൃതമായി തിരഞ്ഞെടുപ്പ് നടത്തിയതിനെതിരെയും മറ്റ് റഷ്യൻ ക്രമക്കേടുകൾക്ക് എതിരെയുമായിരുന്നു. യഥാർഥ തിരഞ്ഞെടുപ്പ് ഇത്തരത്തിലുള്ളവ ആകരുതെന്നും അദ്ദേഹം പറഞ്ഞു. യുക്രെയ്ൻ പ്രസിഡന്റ് വൊളോഡിമിർ സെലെൻസ്കി പറഞ്ഞത്, പുട്ടിൻ അധികാരത്തിൽ ഭ്രമിച്ചിരിക്കുകയാണെന്നും ഭരണത്തിനായി എന്തും ചെയ്യുമെന്നുമാണ്. ജനാധിപത്യപരമായും രാഷ്ട്രീയപരമായും ആശങ്കപ്പെടുത്തുന്ന അടിച്ചമർത്തലുകൾ നടന്ന തിരഞ്ഞെടുപ്പെന്നായിരുന്നു യൂറോപ്യൻ യൂണിയന്റെ പ്രതികരണം. 

യുക്രെയ്ൻ, മള്‍ഡോവ, ജോർജിയ എന്നീ രാജ്യങ്ങളിലെ ചില പ്രദേശങ്ങളിൽ വോട്ടെടുപ്പ് ഏർപ്പെടുത്തിയത് രാജ്യാന്തര നിയമങ്ങളുടെ കടുത്ത ലംഘനമാണെന്ന് ജർമനിയും പ്രതികരിച്ചു. ഇങ്ങനെ, ഒരൊറ്റ തിരഞ്ഞെടുപ്പിന്റെ പേരിൽ ലോകം രണ്ടു തട്ടിലാവുകയാണ്. ഇതിനെല്ലാം പുട്ടിൻ പറഞ്ഞ മറുപടിയിലുണ്ട്, വരുംനാളുകളിൽ റഷ്യയും പുട്ടിനും എത്രമാത്രം ലോകത്തിന് ആശങ്ക സൃഷ്ടിക്കുമെന്ന്. ‘ശരിയാണ്, നമുക്കു മുന്നിൽ ഒട്ടേറെ വെല്ലുവിളികളുണ്ട്. പക്ഷേ ഒരു കാര്യം ഞാൻ പറയാം: നമ്മളൊരുമിച്ചു നിന്നാൽ നമ്മെ വെല്ലുവിളിക്കാനോ നമ്മുടെ മനക്കരുത്തിനെയും ആത്മാഭിമാനത്തെയും അടിച്ചമർത്താനോ ഒരുത്തൻ പോലും ധൈര്യപ്പെടില്ല. അതിനു ശ്രമിച്ചവരെല്ലാം മുൻപ് പരാജയപ്പെട്ടതാണ്, ഭാവിയിലും പരാജയംതന്നെയാണ് അവരെ കാത്തിരിക്കുന്നത്’’ എന്നായിരുന്നു പുട്ടിന്റെ വാക്കുകൾ.