‘ആപ്’ എംഎൽഎമാരെ മറുകണ്ടം ചാടിക്കാൻ ബിജെപി? കേജ്‌രിവാളിന്റെ പ്രതിച്ഛായ തകർത്ത ‘പ്രതികാരം’

പക്ഷേ, എഎപിയുടെ അഴിമതിവിരുദ്ധ പ്രതിച്ഛായ ഉത്തരേന്ത്യയിലെ സാധാരണക്കാർക്കിടയിൽ അതിവേഗം സ്വീകാര്യത നേടി. പതിറ്റാണ്ടുകളായി രാഷ്ട്രീയക്കാരുടെയും അവരുടെ ശിങ്കിടികളുടെയും അഴിമതിയും കൊള്ളരുതായ്മകളും കണ്ടു പൊറുതിമുട്ടിയ സാധാരണക്കാർ, വള്ളിച്ചെരിപ്പിട്ട് മഫ്ളർ കഴുത്തിൽ ചുറ്റി, വാഗൺ ആർ സ്വയം ഓടിച്ചുവന്ന മനുഷ്യനെ ഗാന്ധിജിയുടെ മാതൃകയിലുള്ള പൊതുപ്രവർത്തകനായി കണ്ടു. അദ്ദേഹം പറയുന്നത് സത്യമാണെന്ന് അവർ വിശ്വസിച്ചു. അതോടെ, എഎപി രൂപീകരിക്കും മുൻപ് അന്നാ ഹസാരെയെപ്പോലുള്ളവരുടെ കൂടെ നിന്നു നടത്തിയ അഴിമതി വിരുദ്ധ സമരങ്ങളുടെ പൈതൃകവും അദ്ദേഹത്തിനു കൈവന്നു.

∙ ‘അഴിമതിക്കാരാണെല്ലാം’

ഈ രാജ്യത്ത് എല്ലാവരും അഴിമതിക്കാരാണെന്നു സ്ഥാപിക്കാനാണ് കേ‌ജ്‌രിവാളും സംഘവും ആദ്യം മുതൽ ശ്രമിച്ചത്. ഭരിക്കുന്ന രാഷ്ട്രീയക്കാർ, കോർപറേറ്റുകൾ, ഉദ്യോഗസ്ഥവൃന്ദം തുടങ്ങി സർവരും അഴിമതിയിൽ മുങ്ങിക്കുളിച്ചവരാണെന്നും അതിനെല്ലാം എതിരെ പോരാടാൻ പിറവിയെടുത്ത അവതാരങ്ങളാണ് താനും സഹപ്രവർത്തകരുമെന്നും അദ്ദേഹം പ്രചരിപ്പിച്ചു. 2011 ൽ തുടങ്ങിയ ‘ഇന്ത്യ അഴിമതിക്കെതിരെ’ (India againist corruption) പ്രക്ഷോഭകാലത്തും പിറ്റേവർഷം ആം ആദ്മി പാർട്ടി രൂപീകരിച്ച ശേഷവും ഈ പ്രചാരണം വലിയ തോതിൽ വിജയിക്കുന്നതാണു കണ്ടത്. അന്നു പ്രതിപക്ഷത്തായിരുന്ന ബിജെപി ഇതിനു സർവാത്മനാ പിന്തുണ നൽകുകയും ചെയ്തു.

ചൂലുമായി ഇറങ്ങിയ കേ‌ജ്‌രിവാളിന്റെ അഴിമതി വിരുദ്ധ പ്രചാരണത്തിന്റെ ആദ്യ ഇര അന്ന് ഡൽഹി മുഖ്യമന്ത്രിയായിരുന്ന ഷീല ദീക്ഷിതായിരുന്നു. 2013ൽ കോൺഗ്രസിനെ തകർത്ത് ഡൽഹിയിൽ അദ്ദേഹം അധികാരം പിടിച്ചു. 2014 ൽ പ്രധാനമന്ത്രി ഡോ. മൻമോഹൻ സിങ്ങും എഎപിയുടെ പ്രചാരണത്തിനിരയായി കളങ്കിതനെന്നു മുദ്രകുത്തപ്പെട്ടു പടിയിറങ്ങേണ്ടിവന്നു. 

∙ മദ്യനയക്കേസെന്ന വജ്രായുധം

അഴിമതിവിരുദ്ധ പ്രതിച്ഛായയ്ക്കു രാജ്യവ്യാപകമായി സ്വീകാര്യത ലഭിക്കുമെന്നു തിരിച്ചറിഞ്ഞ കേ‌ജ്‌രിവാൾ, ഡൽഹിയിൽ സ്ഥാനം ഉറപ്പിച്ചശേഷം രാജ്യം മുഴുവൻ പ്രവർത്തനം വ്യാപിപ്പിക്കാൻ ശ്രമിച്ചു. 2019 ലെ ലോക്സഭാ തിരഞ്ഞെടുപ്പിൽ പഞ്ചാബിലെ സംഗ്രൂറിൽ (ഭഗവന്ത് മാൻ) മാത്രമേ വിജയിക്കാൻ കഴിഞ്ഞുള്ളൂവെങ്കിലും പാർട്ടിക്ക് രാജ്യവ്യാപക മേൽവിലാസം ലഭിച്ചു. 2022 മാർച്ചിൽ നടന്ന നിയമസഭാ തിരഞ്ഞെടുപ്പിൽ 117ൽ 92 സീറ്റ് നേടിയ പാർട്ടി പഞ്ചാബിൽ അധികാരം പിടിച്ചു. 42 ശതമാനം വോട്ട് നേടിയ ആപ്പിനു പിന്നിൽ 22.98 ശതമാനം വോട്ടും 16 സീറ്റുമായി കോൺഗ്രസ് പ്രതിപക്ഷമായി. 6.6 ശതമാനം വോട്ട് മാത്രം ലഭിച്ച ബിജെപിക്ക് 2 സീറ്റേ ലഭിച്ചുള്ളൂ.

ആ വർഷം ഡിസംബറിൽ നടന്ന ഗുജറാത്ത് നിയമസഭാ തിരഞ്ഞെടുപ്പിൽ 182ൽ 156 സീറ്റ് (52.5 ശതമാനം വോട്ട്) നേടിയ ബിജെപി അധികാരം നിലനിർത്തിയെങ്കിലും എഎപിയുടെ വളർച്ച അവരെ അമ്പരപ്പിച്ചു. 5 സീറ്റേ ലഭിച്ചുള്ളൂവെങ്കിലും എഎപി 12.92 ശതമാനം വോട്ട് നേടി. കോൺഗ്രസിന് 17 സീറ്റും 27.28 ശതമാനം വോട്ടും ലഭിച്ചു. പഞ്ചാബിനൊപ്പം ഗോവയിലും ഒരുകൈ നോക്കിയ എഎപിക്ക് 2 സീറ്റേ കിട്ടിയുള്ളൂ. ബിജെപിക്കും (33.31 ശതമാനം) കോൺഗ്രസിനും (23.46 ശതമാനം) പിന്നിൽ 6.77 ശതമാനം വോട്ടും നേടി.

ബിജെപിയുടെ ഹൃദയഭൂമിയായ ഗുജറാത്തിലും മറ്റ് ഉത്തരേന്ത്യൻ സംസ്ഥാനങ്ങളിലും കേ‌ജ്‌രിവാളിന്റെ അഴിമതിവിരുദ്ധ പ്രതിച്ഛായ ക്ലച്ചു പിടിക്കുന്നത് അവർക്കു വിട്ടുകളയാൻ പറ്റുന്നതാവില്ലല്ലോ. ഈ പ്രതിച്ഛായ കോൺഗ്രസിന്റെ വോട്ടുബാങ്കിൽ കൂടുതൽ വിള്ളലുണ്ടാക്കിയാൽ 2027ൽ നടക്കേണ്ട അടുത്ത ഗുജറാത്ത് നിയമസഭാ തിരഞ്ഞെടുപ്പിൽ അത് ബിജെപിക്കു ഭീഷണിയായേക്കാം. അതുകൊണ്ടുതന്നെ എഎപിയുടെയും കേ‌ജ്‌രിവാളിന്റെയും അഴിമതിവിരുദ്ധ പ്രതിച്ഛായ ഏതുവിധേനയും തകർക്കേണ്ടത്, എക്കാലവും രാജ്യം ഭരിക്കണമെന്ന ബിജെപിയുടെ ദീർഘകാല ലക്ഷ്യം കൈവരിക്കുന്നതിന് അനിവാര്യമാണ്. അത് അഴിമതിയുടെ പേരിൽത്തന്നെയാകണമെന്നും അവർക്കു നിർബന്ധമുണ്ട്. അഴിമതിയുടെ പേരിൽ മറ്റുള്ളവരെ ചെളിവാരിയെറിഞ്ഞ് അധികാരത്തിലേറിയെ കേ‌ജ്‌രിവാളിനെ അഴിമതിക്കാരനായി ചിത്രീകരിച്ച് താഴെയിറക്കിയാലേ ആ ലക്ഷ്യം പൂർണമാവുകയുള്ളൂ. മദ്യനയക്കേസ് അവർക്കു ലഭിച്ച വജ്രായുധമായും മാറി.