‘ആ പെൺകുട്ടിക്ക് മുന്നിൽ അയാളുടെ നോട്ടം മാറി’: എന്നവസാനിക്കും ‘ജനറൽ കോച്ച്’ ദുരന്തം? ടിടിഇക്കു പോലുമില്ല സുരക്ഷ

അടുത്തിടെ, പുണെ എക്സ്പ്രസ് സ്റ്റോപ്പില്ലാത്ത സ്റ്റേഷനിൽ ഉൾപ്പെടെ പിടിച്ചിട്ട് പിന്നാലെ വന്ന ട്രെയിനുകൾ കടത്തിവിട്ടത് സംഘർഷാവസ്ഥ സൃഷ്ടിച്ചിരുന്നു. ആദ്യം പുറപ്പെടുന്ന ട്രെയിൻ സംബന്ധിച്ച് കൃത്യമായ വിവരം നൽകാതിരുന്നതോടെ മാറിക്കയറാനുള്ള അവസരവും യാത്രക്കാർക്ക് ലഭിച്ചില്ല. ഒടുവിൽ മയ്യനാട് സ്റ്റേഷനിൽ യാത്രക്കാർ പ്രതിഷേധിച്ചതോടെ ഇവിടെ സ്റ്റോപ്പില്ലാത്ത മറ്റൊരു ട്രെയിൻ നിർത്തിച്ച് യാത്രക്കാരെ കയറ്റിവിടുകയായിരുന്നു.

ട്രെയിനുകളുടെ ബഫർ സമയം ഒഴിവാക്കി കൃത്യസമയം ഷെഡ്യൂൾ ചെയ്ത് ഓടിക്കണം എന്നതാണ് മറ്റൊരു ആവശ്യം. ട്രെയിൻ യാത്ര അവസാനിപ്പിക്കുന്ന സ്റ്റേഷനോ പ്രധാന സ്റ്റേഷനുകള്‍ക്കോ മുൻപായി യാത്ര ചെയ്യാൻ ആവശ്യമായതിനേക്കാൾ കൂടിയ സമയം ഷെഡ്യൂളിൽ അനുവദിക്കുന്ന രീതിയാണിത്. ഇതോടെ വൈകി വരുന്ന ട്രെയിനുകൾക്ക് യാത്ര അവസാനിക്കുമ്പോൾ കണക്കുകളിൽ കൃത്യസമയം പാലിക്കാനോ സമയ നഷ്ടം കുറച്ചുകാണിക്കാനോ കഴിയും. എന്നാൽ കൃത്യസമയം പാലിച്ച് എത്തുന്ന സാഹചര്യത്തിൽ വഴിയിൽ ഇഴയുകയും ചെയ്യും. ഇതാണ് യാത്രക്കാരെ വലയ്ക്കുന്നത്. വന്ദേഭാരത് ട്രെയിനുകളുടെ സമയം ക്രമീകരിച്ച് മറ്റു ട്രെയിനുകൾക്ക് തടസ്സമുണ്ടാകാതെ സർവീസ് നടത്തണമെന്നും ആവശ്യമുണ്ട്.

∙ വേണം, 12 കാർ മെമു; വികസനങ്ങൾ

തിരക്കുള്ള സമയങ്ങളിൽ ട്രെയിനില്ല എന്നതാണ് മറ്റൊരു പ്രശ്നം. ഉള്ളതിനാകട്ടെ കോച്ചുകൾ കുറവും. പ്രധാന സ്റ്റേഷനുകളെ ബന്ധിപ്പിച്ച് കൂടുതൽ മെമു സർവീസുകൾ ആരംഭിക്കണമെന്ന ആവശ്യത്തിന് വർഷങ്ങളുടെ പഴക്കമുണ്ട്. തിരക്ക് പരിഗണിച്ച് 12 കാർ മെമു സർവീസ് നടത്തണം. ഇതിന്റെ അറ്റകുറ്റപ്പണിക്കുള്ള മെമു ഷെഡ് കൊല്ലത്ത് വേഗത്തിൽ പൂർത്തിയാക്കണം. സ്കൂൾ – കോളജ് – ഓഫിസ് സമയങ്ങളിൽ സർവീസുകൾ ക്രമീകരിക്കണം. ഷൊർണൂരിനും മംഗളൂരുവിനും ഇടയിൽ കൂടുതൽ മെമു ട്രെയിനുകൾ ഓടിച്ചാൽ മാത്രമേ ഇപ്പോഴത്തെ ദുരിതം ചെറിയ ഒരളവോളമെങ്കിലും പരിഹരിക്കാൻ സാധിക്കൂ.

മുൻപ് എറണാകുളം കേന്ദ്രീകരിച്ച് ഡെമു സര്‍വീസ് ആരംഭിച്ചെങ്കിലും ഉദ്ഘാടനം കഴിഞ്ഞ് മന്ത്രി പോയതിനു പിന്നാലെ ഡെമുവും പോയി. പകരമെത്തിയ മെമുവും പഴയ റൂട്ടിൽ നിലവിലില്ല. കണ്ണൂരിൽ പിറ്റ്‌ലൈൻ, നിലമ്പൂർ– നഞ്ചൻകോട് പാത, പാലക്കാട്– പൊള്ളാച്ചി പാതയിൽ കൂടുതൽ ട്രെയിനുകൾ, എറണാകുളത്തു പുതിയ ടെർമിനൽ തുടങ്ങിയവയും ഏറെ നാളായി ആവശ്യപ്പെടുന്നവയാണ്. സംസ്ഥാനത്തു പൂർണമായും ഓട്ടമാറ്റിക് സിഗ്നലിങ് സംവിധാനം എത്രയുംവേഗം ഏർപ്പെടുത്തണമെന്നും യാത്രക്കാർ ആവശ്യപ്പെടുന്നു.

∙ കോവിഡാനന്തരം വന്നതും പോയതും

ജനറൽ കോച്ചുകൾ, ലോക്കൽ ട്രെയിനുകൾ, ടിക്കറ്റ് നിരക്ക് ഇളവ് തുടങ്ങി സാധാരണ യാത്രക്കാരന്റെ ആശ്വാസങ്ങളിൽ പലതും കോവിഡ് കാലത്ത് റെയിൽവേ ഇല്ലാതാക്കി. പാസഞ്ചർ, മെമു സർവീസുകൾ ‘എക്സ്പ്രസ് സ്പെഷൽ’ എന്ന ഓമനപ്പേരിൽ ഓടിച്ചതോടെ മിനിമം നിരക്ക് 10 രൂപയിൽനിന്ന് 30 രൂപയായി ഉയർന്നു. സ്റ്റോപ്പുകളും വെട്ടിക്കുറച്ചു. ഈ ചീത്തപ്പേരിന് അടുത്തിടെ, ഒരു പരിധിവരെ റെയിൽവേ പരിഹാരം കണ്ടെങ്കിലും മുതിർന്ന പൗരൻമാർക്കുള്ള ടിക്കറ്റ് നിരക്കിലെ ഇളവ് ഉൾപ്പെടെ പലതും പുനഃസ്ഥാപിച്ചിട്ടില്ല.

സ്പെഷൽ ഫെയർ ട്രെയിനുകൾ ഓടിക്കാൻ മടിക്കാണിക്കാത്ത റെയിൽവേ അവശ്യ സമയങ്ങളിലെ സർവീസിന്റെ കാര്യത്തിൽ അനങ്ങാപ്പാറ നയമാണെന്നാണ് ആക്ഷേപം. കോവിഡാനന്തരം ട്രെയിനുകളിൽ വിതരണം ചെയ്യുന്ന ഭക്ഷണവും പുറത്തുനിന്നാക്കി. ഇവയുടെ വില നിയന്ത്രിക്കണമെന്നും നിലവാരം പരിശോധിച്ച് ഉറപ്പുവരുത്തി ബോധ്യപ്പെടുത്താനുള്ള സൗകര്യം ഒരുക്കണമെന്നും യാത്രക്കാർ ആവശ്യപ്പെടുന്നു. കോവിഡിനു ശേഷം ജനറൽ കോച്ചുകൾ കുറച്ചതു വൻ സുരക്ഷാ ഭീഷണിയാണ്. യാത്രക്കാർ ജനറൽ കോച്ചുകളിൽ ജീവൻ കയ്യിൽ പിടിച്ച് വാതിലിൽ തൂങ്ങിയും മറ്റും യാത്ര ചെയ്യുമ്പോൾ അത് റെയിൽവേ അറിഞ്ഞമട്ടില്ല. ഈ പ്രവണതയ്ക്ക് മാറ്റം വരാൻ എത്ര യാത്രക്കാരുടെ ചോര ഇനിയും വീഴേണ്ടിവരുമെന്നതാണ് ഉയരുന്ന ചോദ്യം.

∙ കണ്ണടച്ച് ഇരുട്ടാക്കുന്നതാര്?

യാത്രക്കാരുടെ എണ്ണത്തിലും വരുമാനത്തിലും രാജ്യത്തുതന്നെ മുൻനിരയിലുള്ള സംസ്ഥാനമാണ് കേരളം. കാസർകോടിനും തിരുവനന്തപുരത്തിനുമിടയിൽ വന്ദേഭാരത് ട്രെയിനുകളുടെ എണ്ണം രണ്ടായിട്ടും സീറ്റ് കിട്ടണമെങ്കിൽ ദിവസങ്ങൾക്കു മുൻപേ ശ്രമിക്കേണ്ട സാഹചര്യമാണ്. മംഗളൂരു– തിരുവനന്തപുരം, മംഗളൂരു– ചെന്നൈ, കണ്ണൂർ– ബെംഗളൂരു ട്രെയിനുകളുടെയെല്ലാം സ്ഥിതി ഇതുതന്നെ. ഡൽഹി, മുംബൈ തുടങ്ങിയ നഗരങ്ങളിലേക്കു യാത്ര ചെയ്യണമെങ്കിൽ രണ്ടോ മൂന്നോ മാസം മുൻപു ടിക്കറ്റ് എടുക്കണം. ഈ റൂട്ടുകളിലെല്ലാം കൂടുതൽ ട്രെയിനുകൾ അത്യാവശ്യമാണ്. ഇത്രയും കാലം കോട്ടയം വഴിയുള്ള പാത ഇരട്ടിപ്പിക്കൽ തീരട്ടെ എന്നായിരുന്നു റെയിൽവേ നിലപാട്. അതു കഴിഞ്ഞപ്പോൾ പ്ലാറ്റ്ഫോമില്ലെന്നായി.

എന്നാൽ, കൊച്ചുവേളിയിൽ ആറും കോട്ടയത്ത് അഞ്ചും പ്ലാറ്റ്ഫോമുകൾ വന്നിട്ടും വേണ്ടവിധം പ്രയോജനപ്പെടുത്തുന്നില്ല. കഴിഞ്ഞ ശബരിമല സീസണിൽ വന്ദേഭാരത് സർവീസ് ഉൾപ്പെടെ നിരവധി സ്പെഷൽ ട്രെയിനുകൾ കോട്ടയം കേന്ദ്രീകരിച്ച് വിജയകരമായി സർവീസ് നടത്തിയിരുന്നു. 1എ പ്ലാറ്റ്ഫോമാണ് വന്ദേഭാരതിനായി ഉപയോഗിച്ചത്. ഉത്സവ സ്പെഷൽ ട്രെയിനുകൾക്ക് അപ്പുറം ഒന്നും ചെയ്യാതിരിക്കാനുള്ള കാരണങ്ങൾ കണ്ടെത്തിക്കെ‍ാണ്ടേയിരിക്കുന്ന റെയിൽവേ, നിലവിലുള്ള സൗകര്യങ്ങൾ പൂർണമായി ഉപയോഗിച്ചു ട്രെയിനോടിക്കാൻ നടപടി എടുക്കുന്നില്ലെന്നാണ് പരാതി. ഉത്സവ സ്പെഷലുകൾ നേരത്തേ പ്രഖ്യാപിക്കാതെ, സ്വകാര്യ ബസുകളുടെ ടിക്കറ്റ് ബുക്കിങ് അവസാനിക്കും വരെ കാത്തിരിക്കുന്നതായും യാത്രക്കാർ ആരോപിക്കുന്നു.