‘ബിജെപി വളർന്നു, ആർഎസ്എസ് തുണ വേണ്ട’: നിരോധിക്കുമെന്ന് ഉദ്ധവ്: നഡ്ഡയുടെ നിലപാടിന് പിന്നിലെന്ത്?

മാതൃപ്രസ്ഥാനത്തെ തള്ളിപ്പറയുന്ന നടപടിയായാണ് ജെ.പി.നഡ്ഡയുടെ വാക്കുകളെ ഉദ്ധവ് താക്കറെ ഉൾപ്പെടെ പലരും വ്യാഖ്യാനിക്കുന്നത്. എന്നാൽ, നഡ്ഡയുടെ നിലപാടിൽ പുതുമയില്ലെന്നതാണ് വാസ്തവം. ആർഎസ്എസിന്റെ ചട്ടക്കൂടും പ്രചാരകരുമാണ് ബിജെപിയുടെ കരുത്തെന്നത് പാർട്ടി നിഷേധിക്കാത്ത വസ്തുതയാണ്. അതായത്, ബിജെപിയുടെ അടിസ്ഥാന മനുഷ്യവിഭവ സംഭാവന ആർഎസ്എസിൽനിന്നാണ്. ഇത്തവണത്തെ തിരഞ്ഞെടുപ്പിലും അതു പ്രകടമാണ്. എങ്കിലും ബിജെപി സ്വതന്ത്രമായാണ് പ്രവർത്തിക്കുന്നതെന്ന പ്രതീതിയുണ്ടാക്കാനുള്ള ശ്രമങ്ങളുടെ തുടർച്ച മാത്രമായി നഡ്ഡയുടെ പ്രസ്താവനയെ വ്യാഖ്യാനിക്കാം.

ഭരണപരമായി നോക്കുമ്പോൾ, വിവിധ വിഷയങ്ങളിലെ നിലപാടുകൾക്കുൾപ്പെടെ ‘സ്വതന്ത്ര അസ്തിത്വ’ വാദം ബിജെപിക്ക് ആവശ്യമാണ്. ആർഎസ്എസിന്റെ സ്വാധീനത്താലുള്ള നിലപാടെന്നു വ്യാഖ്യാനമുണ്ടാവുന്നത് ഗുണകരമാവാത്ത സാഹചര്യങ്ങളുണ്ട്. അതനുസരിച്ചുള്ള മുൻകരുതൽ ആർഎസ്എസിന്റെ ഭാഗത്തുനിന്നുമുണ്ടാകാറുണ്ട്. അതുകൊണ്ടുതന്നെ, നഡ്ഡയുടെ വാക്കുകൾ ആർഎസ്എസ് നേതൃത്വത്തെ രോഷം കൊള്ളിക്കുമെന്നു കരുതാനാവില്ല. ആശയപരമായല്ല, സംഘടനാപരമായി മാത്രമാണ് തനിച്ചുനിൽക്കാൻ പാർട്ടിക്കു ശേഷിയായെന്ന് നഡ്ഡ പറയുന്നത്. ബിജെപി തനിച്ചാണ് കാര്യങ്ങൾ നടത്തുന്നതെന്നു പറയുന്നതിന് തിരഞ്ഞെടുപ്പു പ്രചാരണപരമായ പ്രസക്തിയും കൽപിക്കാം. 

സാമ്പത്തിക– വിദേശ നയങ്ങൾ, അയോധ്യാ പ്രശ്നം തുടങ്ങിയവയിൽ വാജ്പേയി സർക്കാരിന്റെ സമീപനത്തോട് ആർഎസ്എസ് പരസ്യമായി വിയോജിച്ചിരുന്നു എന്നതു വസ്തുതയാണ്. വാജ്പേയ് സർക്കാരിന്റെ പ്രവർത്തനം ആർഎസ്എസ്, ബിജെപി നേതാക്കൾ ഒരുമിച്ചിരുന്ന് അവലോകനം ചെയ്യാറുമുണ്ടായിരുന്നു. സാമ്പത്തിക നയങ്ങളിലും മറ്റും ബിഎംഎസ് മോദി സർക്കാരിനെയും അതിന്റെ ഉപദേശകരെയും വിമർശിച്ചിട്ടുണ്ട്. എന്നാൽ, സംഘപരിവാർ അജൻഡയിലെ പ്രധാന വിഷയങ്ങൾക്കൊക്കെ മോദി മുൻഗണന ഉറപ്പാക്കിയിട്ടുണ്ട്.