മോദിയുടെ മന്ത്രിസഭയിൽ ‘കള്ളനെ പിടിച്ച പൊലീസും’; അറിയാം കേന്ദ്ര മന്ത്രിമാരുടെ വിദ്യാഭ്യാസം മുതൽ എല്ലാ യോഗ്യതകളും

നമ്മളെ നയിക്കുന്നവർക്ക് എന്തു വിദ്യാഭ്യാസ യോഗ്യത വേണം? പൊലീസ് കോൺസ്റ്റബിളായി വർഷങ്ങളോളം ജോലി ചെയ്തു രാഷ്ട്രീയത്തിലിറങ്ങി മന്ത്രിപദത്തിൽ എത്തിയവർ മുതൽ എൻജിനീയറിങ് ഡ്രോപൗട്ട്സ് വരെ മൂന്നാം മോദി മന്ത്രിസഭയിൽ അംഗങ്ങളാണ്. രണ്ട് മുൻ ഐഎഫ്എസ് ഉദ്യോഗസ്ഥരും ഐഎഎസുകാരുമെല്ലാം പുതിയ ‘ടീം മോദിക്ക്’ അഴകാകുന്നു. സ്വർണമെഡലോടെ ബിരുദാനന്തര ബിരുദം നേടി രാഷ്ട്രീയവഴി തിരഞ്ഞെടുത്തവരും പിഎച്ച്ഡിക്കാരും സ്കൂൾ, കോളജ് അധ്യാപകരുമെല്ലാം പട്ടികയിലുണ്ട്. ടൂൾ ഡിസൈനിലെ ഡിപ്ലോമയാണ് കാബിനറ്റ് മന്ത്രിമാരിൽ ഒരാളുടെ യോഗ്യത.

പൊതുവേ മന്ത്രിമാരുടെ വിദ്യാഭ്യാസ നിലവാരം മികച്ചതെന്നു വ്യക്തം. ബിരുദക്കാരും നിയമബിരുദധാരികളുമാണ് കൂടുതൽ. എംപിയായി വർഷങ്ങൾക്കു ശേഷം 2018ൽ 12–ാം ക്ലാസ് യോഗ്യത വനിതയും കൂട്ടത്തിലുണ്ട്. സത്യവാങ്മൂലം പ്രകാരം ഗുജറാത്ത് സർവകലാശാലയിൽ നിന്ന് എംഎ പൊളിറ്റിക്കൽ സയൻസും ഡൽഹി സർവകലാശാലയിൽ നിന്ന് ബിഎയുമാണ് ടീമിനെ നയിക്കുന്ന പ്രധാനമന്ത്രി നരേന്ദ്ര മോദിയുടെ യോഗ്യത. 

∙ നിർമല സീതാരാമൻ (64), ബിജെപി

കഴിഞ്ഞ രണ്ടു മോദി മന്ത്രിസഭകളിലായി ഒട്ടേറെ സുപ്രധാന വകുപ്പുകൾ കൈകാര്യം ചെയ്തു. കഴിഞ്ഞ സർക്കാരിൽ ധനമന്ത്രിയായി. അതിനു മുൻപ് പ്രതിരോധ മന്ത്രിയായിരുന്നു. രാജ്യത്തു പ്രതിരോധ വകുപ്പു കൈകാര്യം ചെയ്ത രണ്ടാമത്തെ വനിത. തമിഴ്നാട് മധുര സ്വദേശി. കർണാടകയിൽ നിന്നുള്ള രാജ്യസഭാംഗം. പാർട്ടി മുൻ വക്താവ്. സാമ്പത്തിക ശാസ്ത്രത്തിൽ ബിരുദാനന്തര ബിരുദം, എംഫിൽ.

∙ എസ്. ജയ്ശങ്കർ (69), ബിജെപി

കഴിഞ്ഞ സർക്കാരിൽ വിദേശകാര്യമന്ത്രി. വിദേശകാര്യ സെക്രട്ടറിയായ ശേഷമാണ് 1977 ബാച്ച് ഐഎഫ്എസ് ഉദ്യോസ്ഥനായ ജയ്ശങ്കർ രാഷ്ട്രീയത്തിലെത്തിയത്. യുഎസ്, ചൈന, ചെക്ക് റിപ്പബ്ലിക് എന്നിവിടങ്ങളിൽ ഇന്ത്യൻ അംബാസഡറും സിംഗപ്പൂരിൽ ഇന്ത്യൻ ഹൈക്കമ്മിഷണറുമായിരുന്നു. ഇന്ത്യയിലെ ശാക്തിക തന്ത്ര ചിന്തയുടെ പിതാവെന്ന് വിശേഷിപ്പിക്കപ്പെട്ടയാളാണ് ജയ്ശങ്കറിന്റെ പിതാവ് കെ.സുബ്രഹ്മണ്യം. ജെഎൻയുവിൽ നിന്ന് പൊളിറ്റിക്കൽ സയൻസിൽ ബിരുദാനന്തര ബിരുദവും പിഎച്ച്ഡിയും നേടി.

∙ മനോഹർ ലാൽ ഖട്ടർ (70) ബിജെപി

ഹരിയാനയിൽ ബിജെപിക്ക് വേരുണ്ടാക്കിയ നേതാവ്. സംസ്ഥാനത്തെ ആദ്യ ബിജെപി മുഖ്യമന്ത്രിയുമായി. ഭരണതുടർച്ച നേടിയെങ്കിലും സഖ്യകക്ഷിയായ ജെജെപി പിന്തുണ പിൻവലിച്ചതോടെ ഒഴിഞ്ഞു. കർണാലിൽ നിന്ന് രണ്ടു ലക്ഷത്തിൽപരം വോട്ടുകൾക്ക് ജയിച്ചാണ് ലോക്സഭയിലെത്തിയത്. ബിരുദധാരി.

∙ എച്ച്.ഡി. കുമാരസ്വാമി (64) ജനതാ ദൾ

കർണാടക മുൻ മുഖ്യമന്ത്രി. ജെഡിഎസിൽ പിതാവും മുൻ പ്രധാനമന്ത്രിയുമായ എച്ച്.ഡി. ദേവഗൗഡ കഴിഞ്ഞാൽ ഏറ്റവും ശക്തൻ. ദീർഘകാലം കർണാടകയിൽ നിയമസഭാംഗമായിരുന്നു. മാണ്ഡ്യയിൽ നിന്ന് 2.84 ലക്ഷം വോട്ടുകളുടെ ഭൂരിപക്ഷത്തിൽ ലോക്സഭയിലേക്ക് ജയിച്ചു. സിനിമ നിർമാതാവായും വിതരണ സ്ഥാപനം നടത്തിയും പേരെടുത്തു. ബിരുദധാരി. 

∙ പീയൂഷ് ഗോയൽ (59), ബിജെപി

കഴിഞ്ഞ സർക്കാരിൽ വാണിജ്യ–ഉപഭോക്തൃ മന്ത്രിയായിരുന്നു. റെയിൽവേ, കൽക്കരി, ധനകാര്യം, കമ്പനികാര്യം തുടങ്ങിയ വകുപ്പുകളും ഇടക്കാലത്തു കൈകാര്യം ചെയ്തു. നേരത്തേ ബിജെപി ദേശീയ ട്രഷററായിരുന്നു. ചാർട്ടേഡ് അക്കൗണ്ടന്റ്.

∙ കെ. റാംമോഹൻ നായിഡു (36),ടിഡിപി

തെലങ്കുദേശം പാർട്ടിയുടെ യുവ നേതാവും ദേശീയ ജനറൽ സെക്രട്ടറിയും. കഴിഞ്ഞ ലോക്സഭയിൽ പാർട്ടി കക്ഷി നേതാവായിരുന്നു. 2014 മുതൽ ശ്രീകാക്കുളം ലോക്സഭ മണ്ഡലത്തെ പ്രതിനിധീകരിക്കുന്നു. ദേവെ ഗൗഡ, ഐ.കെ. ഗുജ്റാൾ സർക്കാരുകളിൽ മന്ത്രിയായിരുന്ന കിഞ്ചരാപ്പു യെരൻ നായിഡുവിന്റെ മകനാണ്. യുഎസിൽ നിന്ന് ഇലക്ട്രിക്കൽ എൻജിനീയറിങ്ങിൽ ബിരുദം നേടിയ ശേഷം സിംഗപ്പുരിൽ ഒരു വർഷം ജോലി ചെയ്തു.

∙ പ്രഹ്ലാദ് ജോഷി (61), ബിജെപി

കഴിഞ്ഞ സർക്കാരിൽ പാർലമെന്ററി കാര്യമന്ത്രി. നേരത്തേ കർണാടക ബിജെപി പ്രസിഡന്റായിരുന്നു. ധാർവാഡിൽ നിന്നു വീണ്ടും ലോക്സഭയിലേക്ക് തിരഞ്ഞെടുക്കപ്പെട്ടു. ബിരുദധാരി.

∙ ജൂവൽ ഓറം (63) , ബിജെപി

വാജ്‌പേയ് മന്ത്രിസഭയിലും ഒന്നാം മോദി സർക്കാരിലും കാബിനറ്റ് മന്ത്രിയായിരുന്നു. തന്റെ തട്ടകമായ ഒഡീഷയിലെ സുന്ദർഗഡിൽ 1.38 ലക്ഷം വോട്ടുകൾക്ക് ജയിച്ചു. ബിജെപി സംസ്‌ഥാന അധ്യക്ഷനായിരുന്നു. ഇലക്ട്രിക്കൽ എൻജിനീയറിങ്ങിൽ ബിരുദധാരിയായ ജൂറൽ ഭെല്ലിൽ അസിസ്റ്റന്റ് ഫോർമാനായിരുന്നു.

∙ ഗിരിരാജ് സിങ് (71), ബിജെപി

കഴിഞ്ഞ മന്ത്രിസഭയിൽ ഗ്രാമവികസന മന്ത്രിയായിരുന്നു. ബിഹാറിലെ ബേഗുസാരായിൽ നിന്നുള്ള എംപി. ഭൂമിഹാറുകളുടെ പ്രമുഖ നേതാവ് നേരത്തെ സംസ്ഥാന മന്ത്രിയുമായിരുന്നു. ബിരുദധാരി.

∙ അശ്വിനി വൈഷ്ണവ് (53), ബിജെപി 

കഴിഞ്ഞ സർക്കാരിൽ റെയിൽവേ, ഐടി മന്ത്രി. വന്ദേഭാരത് ട്രെയിനുകളുടെ പേരിൽ പ്രശംസ നേടിയെങ്കിലും തുടർച്ചയായ റെയിൽ അപകടങ്ങളിൽ വിമർശനം കേട്ടു. നിലവിൽ ഒഡീഷയിൽ നിന്നുളള രാജ്യസഭാംഗം. മുൻ ഐഎഎസ് ഉദ്യോഗസ്ഥനായിരുന്ന അശ്വിനി വൈഷ്ണവ് 2019ൽ സിവിൽ സർവീസ് വിട്ട് ബിജെപിയിൽ ചേർന്നു. ബാലസോറിലും കട്ടക്കിലും കലക്ടറായി മികച്ച പ്രകടനം കാഴ്ചവച്ചു. കാൺപൂർ ഐഐടിയിൽ നിന്ന് എംടെക്ക്.

∙ ഹർദീപ് സിങ് പുരി (72), ബിജെപി

കഴിഞ്ഞ രണ്ടു മന്ത്രിസഭകളിലും സുപ്രധാന വകുപ്പുകൾ കൈകാര്യം ചെയ്തു. മുൻ മന്ത്രിസഭയിൽ നഗരവികസന, പെട്രോളിയം മന്ത്രിയായിരുന്നു. നിലവിൽ യുപിയിൽ നിന്നുള്ള രാജ്യസഭാംഗം. 1974 ബാച്ച് ഐഎഫ്എസ് ഉദ്യോഗസ്ഥൻ. 2009 മുതൽ 2013 വരെ ഐക്യരാഷ്ട്രസഭയിൽ ഇന്ത്യയുടെ സ്ഥിരം പ്രതിനിധി. ബ്രസീലിലും ബ്രിട്ടനിലും അംബാസഡർ ആയിരുന്നു. ചരിത്രത്തിൽ ബിരുദാനന്തരബിരുദധാരി.

∙ മൻസൂഖ് മാണ്ഡവ്യ (52), ബിജെപി

മോദിയും അമിത് ഷായും കഴിഞ്ഞാൽ ഗുജറാത്തിൽ നിന്നുള്ള പ്രധാന നേതാക്കളിൽ ഒരാൾ. കോവിഡ് പ്രതിസന്ധിക്കിടെ ആരോഗ്യമന്ത്രാലയത്തിന്റെ ചുമതല നേതൃത്വം വിശ്വസിച്ചേൽപ്പിച്ചു. ഭാവിയിൽ ഗുജറാത്ത് മുഖ്യമന്ത്രി പോലും ആയേക്കുമെന്നു കരുതപ്പെടുന്നു. നേരത്തേ രാജ്യസഭംഗമായിരുന്ന മാണ്ഡവ്യ ലോക്സഭയിലേക്കുള്ള കന്നി മത്സരത്തിൽ പോർബന്തറിൽ നിന്നു 3.8 ലക്ഷം വോട്ടുകൾക്കു ജയിച്ചു. എംഎ പൊളിറ്റക്കൽ സയൻസ്. 

∙ ജി. കിഷൻ റെഡ്ഡി (63), ബിജെപി

കഴിഞ്ഞ സർക്കാരിൽ സാംസ്കാരികം, വടക്കുകിഴക്കൻ മേഖലയുടെ വികസന വകുപ്പുകളുടെ ചുമതലയുള്ള മന്ത്രി. നിലവിൽ തെലങ്കാന പിസിസി അധ്യക്ഷൻ. തെലങ്കാനയിലെ പാർട്ടിയുടെ മികച്ച പ്രകടനത്തിന്റെ കൂടി തിളക്കത്തിലാണ് വീണ്ടും മന്ത്രിസഭയുടെ ഭാഗമാകുന്നത്. സെക്കന്ദരാബാദിൽ നിന്നുള്ള ലോക്സഭാംഗം. വിദ്യാഭ്യാസ യോഗ്യത ടൂൾ ഡിസൈൻസിൽ ഡിപ്ലോമ.

∙ ചിരാഗ് പസ്വാൻ (41), എൽജെപി

യുപിഎ, എൻഡിഎ സർക്കാരുകളിൽ മന്ത്രിയായിരുന്ന റാം വിലാസ് പസ്വാന്റെ മകൻ. പസ്വാന്റെ വിയോഗശേഷം പാർട്ടിയുടെ പിന്തുടർച്ചാവകാശത്തെ ചൊല്ലിയുണ്ടായ തർക്കത്തിൽ ബിജെപി നേതൃത്വത്തിന്റെ വിശ്വാസം നേടി. മത്സരിച്ച 5–ൽ അഞ്ചും വിജയിച്ചാണ് മുൻ സിനിമാതാരം കൂടിയായ ചിരാഗ് കേന്ദ്രമന്ത്രിസഭയിലെത്തുന്നത്. കുടുംബ തട്ടകമായ ബിഹാറിലെ ഹാജിപുരിൽ നിന്നു ലോക്സഭയിലേക്കു ജയിച്ചു. എൻജിനീയറിങ് പഠനത്തിന് ചേർന്നെങ്കിലും പൂർത്തിയാക്കിയില്ല.

∙ സി.ആർ. പാട്ടീൽ (69), ബിജെപി

മഹാരാഷ്ട്രയിലെ ജൽഗാവിൽ ജനിച്ച് ഗുജറാത്തിൽ ബിജെപിയുടെ അധ്യക്ഷപദം വരെ എത്തിയ നേതാവ്. പാട്ടീൽ നവ്‌സാരായിൽ നിന്നു തുടർച്ചയായി ലോക്സഭയിലേക്ക് ജയിച്ചു. സൂറത്ത് ഐടിഐയിൽ പഠിച്ച പാട്ടീൽ ഗുജറാത്ത് പൊലീസിൽ 14 വർഷം കോൺസ്റ്റബിളായിയിരുന്ന ശേഷമാണ് ബിജെപിയിൽ സജീവമായത്. ഹ്രസ്വകാലം മാധ്യമപ്രവർത്തകനുമായി.

സഹമന്ത്രിമാർ 

∙ ജിതിൻ പ്രസാദ (50), ബിജെപി

എഐസിസി ജനറൽ സെക്രട്ടറിയും യുപിഎ സർക്കാരിൽ മന്ത്രിയും വരെയായ നേതാവ് യുപിയിലെ കഴിഞ്ഞ നിയമസഭ തിരഞ്ഞെടുപ്പുകാലത്ത് ബിജെപിയിൽ ചേർന്നു. പഴയ കോൺഗ്രസ് നേതാവ് ജിതേന്ദ്ര പ്രസാദയുടെ മകനായ ജിതിൻ ഒരുഘട്ടത്തിൽ രാഹുൽ ഗാന്ധിയുടെ വിശ്വസ്ത സംഘത്തിലുണ്ടായിരുന്നു. വരുൺ ഗാന്ധിയുടെ സീറ്റായ പിലിബിത്തിൽ നിന്ന് ഇക്കുറി ജയിച്ചു. എംബിഎ ബിരുദധാരി.

∙ ശ്രീപദ് യശോ നായിക് (64), ബിജെപി

കഴിഞ്ഞ സർക്കാരിൽ ടൂറിസം മന്ത്രി സഹമന്ത്രി. ഒന്നാം മോദി സർക്കാരിൽ ആയുഷ് മന്ത്രിയായിരുന്നു. നോർത്ത് ഗോവയിൽ നിന്ന് 1999 മുതൽ തുടർച്ചയായി ജയിക്കുന്ന ശ്രീപദിനു ലോക്സഭയിലെത്തുന്നത് ആറാം വട്ടമാണ്. ഗോവ ബിജെപി പ്രസിഡന്റായിരുന്നു. ബിരുദധാരി.