മറുകണ്ടം ചാടിയവരുടെ മണ്ഡലങ്ങളിൽ എന്തു സംഭവിച്ചു? ‘സിനിമ’ ഗുണം ചെയ്തത് ബിജെപിക്കോ കോൺഗ്രസിനോ?

വർഷങ്ങൾ നീണ്ട മുന്നൊരുക്കം, മാസങ്ങൾ നീണ്ട പ്രചാരണം, വോട്ടെടുപ്പിന് ശേഷം ദിവസങ്ങൾ നീണ്ട കണക്കുകൂട്ടലുകൾ, ഒടുവിൽ ജയം, പുതിയ മന്ത്രിമാർ... ഇന്ത്യ കാത്തിരുന്ന ലോക്സഭാ തിരഞ്ഞെടുപ്പുഫലം സമ്മാനിച്ചത് ഒട്ടേറെ കൗതുകങ്ങൾ കൂടിയാണ്. തിരഞ്ഞെടുപ്പിനു തൊട്ടു മുൻപ് മറുകണ്ടം ചാടി സ്ഥാനാർഥിത്വം നിലനിർത്തിയവർക്ക് എന്തു സംഭവിച്ചു? വിവാദ നായകന്മാരുടെ അവസ്ഥ എന്തായി? കോൺഗ്രസ് വിട്ട് മിനിറ്റുകൾക്കുള്ളിൽ ബിജെപിയിൽ സ്ഥാനാർഥിത്വം നേടിയെടുത്ത മുൻ എംപിയുടെ അവസ്ഥയോ? സിനിമയിൽ നിന്നു നേരിട്ട് സ്ഥാനാർഥിത്വം ലഭിച്ച നടി ജയിച്ചു കയറിയോ?‌ ഇങ്ങനെ നീണ്ടു നീണ്ടു പോകുന്നു 2024ലെ വോട്ടുൽസവത്തിലെ വിശേഷങ്ങൾ. 7 ഘട്ടങ്ങളിലായി 543 മണ്ഡലങ്ങളിലേക്കു നടന്ന തിരഞ്ഞെടുപ്പിൽ സൂറത്തിൽ മാത്രം എതിരില്ലാതെ സ്ഥാനാർഥി തിരഞ്ഞെടുക്കപ്പെട്ടു. അവിടെ പക്ഷേ നോട്ടയ്ക്കു കിട്ടിയത് റെക്കോർഡ് വോട്ട്. കോൺഗ്രസ് സ്ഥാനാർഥിയില്ലാത്തതിനാൽ നോട്ടയ്ക്കു വോട്ട് ചെയ്യാൻ പാർട്ടി ആഹ്വാനം ചെയ്യുകയായിരുന്നു. കേരളത്തിലെ മണ്ഡലങ്ങൾ ഒഴിച്ചു നിർത്തിയാൽ പലതരം കൗതുകങ്ങൾ നിറച്ച മണ്ഡലങ്ങൾ ഒട്ടേറെയാണ്. അവയിൽ ശ്രദ്ധ നേടിയ ചില മണ്ഡലങ്ങളിലെ വിശേഷങ്ങളാണ് ഇവിടെ പങ്കുവയ്ക്കുന്നത്. വോട്ടെടുപ്പു കഴിഞ്ഞാലും ഇനി അഞ്ചു വർഷത്തേയ്ക്കും, ചിലപ്പോൾ അതിനുമപ്പുറത്തേയ്ക്കും മായാതെ നിൽക്കും ഈ കൗതുകങ്ങൾ...