കൊലയാളികൾക്ക് വിളമ്പിയത് 'ആസാദി കാ അമൃത്'! ടിപി ഘാതകർക്ക് വേണ്ടി 'ഇടങ്കണ്ണ്' തുടിക്കുന്നത് ആരുടെ?

ടി.പി കേസിലെ കുറ്റവാളികൾക്ക് 20 വർഷത്തേക്കു ശിക്ഷയിളവ് നൽകരുതെന്നു ഹൈക്കോടതി ഉത്തരവിട്ടശേഷവും ഇവരെ ശിക്ഷയിളവിനുള്ള പട്ടികയിൽ ഉൾപ്പെടുത്തിയത് ജയിൽ ആസ്ഥാനത്തു നേരത്തേ അറി‍ഞ്ഞു. ഹൈക്കോടതി വിധി വന്നതു ഫെബ്രുവരിയിലാണ്. 2024 മേയ് 30നു കണ്ണൂർ സെൻട്രൽ ജയിലിൽനിന്നു ജയിൽ ആസ്ഥാനത്തെത്തിയ പട്ടികയിലും ടി.പി കേസിലെ കുറ്റവാളികളുണ്ടായിരുന്നു. കോടതി വിധിക്കുശേഷവും പട്ടികയിൽ ഇവർ ഉൾപ്പെട്ടതു ജയിൽ ആസ്ഥാനത്തെ ഉന്നതർ അറിഞ്ഞിട്ടും ഇടപെട്ടില്ലെന്നത് ഇക്കാര്യത്തിൽ ജയിൽവകുപ്പിന്റെയും സർക്കാരിന്റെയും ഗൂഢ താൽപര്യം വ്യക്തമാക്കുന്നു.

ആസാദി കാ അമൃത് മഹോത്സവത്തിന്റെ ഭാഗമായി തടവുകാർക്കു ശിക്ഷയിളവു നൽകാൻ 2022 നവംബറിൽ സർക്കാർ മാനദണ്ഡമുണ്ടാക്കിയ ശേഷം രണ്ടു തവണയാണു കണ്ണൂർ സെൻട്രൽ ജയിലിൽനിന്നു തടവുകാരുടെ പട്ടിക ജയിൽ ആസ്ഥാനത്തേക്കു നൽകിയത്. ആദ്യത്തേതു 2023 ജനുവരി 30ന്. സർക്കാർ നിയോഗിച്ച ഉപസമിതിയുടെ പ്രാഥമിക പരിശോധനയ്ക്കു ശേഷം ജയിൽ മോചനം അടുത്തിരിക്കുന്നവരുടെ പേരുകൾ ഒഴിവാക്കാൻ ആഭ്യന്തരവകുപ്പ് നിർദേശിച്ചു. 

ജൂൺ 30ന് അകം ജയിൽ മോചിതരാകുന്നവരുടെ പേരുകൾ ഒഴിവാക്കി പട്ടിക പുതുക്കി സമർപ്പിക്കാൻ ജയിലുകളോടു ജയിൽ ആസ്ഥാനത്തുനിന്നു മേയ് 24നു നിർദേശിച്ചു. മേയ് 30നു കണ്ണൂർ സെൻട്രൽ ജയിലിൽനിന്ന് 188 പേരുടെ പട്ടിക നൽകി. രണ്ടു പട്ടികയിലും ടി.പി കേസിലെ കുറ്റവാളികളുണ്ടായിരുന്നു. ഇതിനുശേഷമാണു പൊലീസ് റിപ്പോർട്ട് ഉൾപ്പെടെയുള്ള രേഖകൾ ആവശ്യപ്പെട്ട് ആഭ്യന്തരവകുപ്പ് ജൂൺ 3നു കത്തയച്ചത്. ഇതിനായി റിപ്പോർട്ട് തേടുമ്പോഴാണു പട്ടിക പുറത്തായത്.

ശിക്ഷയിളവിനുള്ള പട്ടികയിൽ അനർഹരുണ്ടെന്നു കണ്ടതിനാൽ മാനദണ്ഡങ്ങൾ പാലിച്ചു പട്ടിക പുതുക്കാൻ സർക്കാർ നിർദേശിച്ചിരുന്നുവെന്നാണ് വിവാദത്തിൽനിന്നു തലയൂരാൻ സർക്കാർ ഇപ്പോൾ കണ്ടെത്തിയ പിടിവള്ളി. മൂന്ന് ഉദ്യോഗസ്ഥരെ സസ്പെൻഡ് ചെയ്തുകൊണ്ടുള്ള വാർത്തക്കുറിപ്പിൽ മുഖ്യമന്ത്രിയുടെ ഓഫിസും നിയമസഭയിൽ മന്ത്രി എം.ബി.രാജേഷും, ജൂൺ 3ന് ആഭ്യന്തര സെക്രട്ടറി ജയിൽ ഡിജിപിക്ക് അയച്ച ഈ കത്തിനെ പരാമർശിച്ചിരുന്നു. എന്നാൽ, വിവാദമുണ്ടായതിനു പിന്നാലെ ജയിൽ ആസ്ഥാനത്തുനിന്നിറക്കിയ വിശദീകരണക്കുറിപ്പിലെയും കണ്ണൂർ സെൻട്രൽ ജയിൽ ജോയിന്റ് സൂപ്രണ്ടിന്റെ കത്തിലെയും ഉള്ളടക്കം ഇതിനു വിരുദ്ധമാണ്.