തോക്കെടുത്ത പൊലീസിന് സ്റ്റാമെറിന്റെ കയ്യടി; കോടതിയിലും ഞെട്ടിച്ചു; പുതിയ പ്രധാനമന്ത്രി പുറത്തെടുക്കുമോ ആ 10 നയങ്ങൾ?

രോഗ അവധി പോലെയുള്ള അടിസ്ഥാന അവകാശങ്ങൾ ഉറപ്പാക്കാനും രംഗത്തിറങ്ങി. ആദർശവാദിയല്ല പ്രായോഗികവാദിയായ രാഷ്ട്രീയ നേതാവായാണ് അദ്ദേഹം ലേബറിനെ നയിച്ചത്. കടുത്ത ഇടതുപക്ഷ നിലപാടും കടുത്ത വലതുപക്ഷ നിലപാടും മാറ്റിവച്ചു സാമ്പത്തിക സ്ഥിരത, തൊഴിലാളിഅവകാശങ്ങൾ എന്നിവ അടിസ്ഥാനമാക്കിയ അദ്ദേഹത്തിന്റെ നിലപാടുകളെ ചിലർ സ്റ്റാമെറിസം എന്നു വിളിച്ചുതുടങ്ങിയിട്ടുണ്ട്.

∙ ഋഷി സുനകിന്റെ മടക്കം അവസാനംവരെ പൊരുതി

ഡിസംബർ വരെ കാലാവധി ഉണ്ടായിരുന്നിട്ടും ഋഷി സുനക് മേയ് അവസാനം നേരത്തേ തിരഞ്ഞെടുപ്പ് പ്രഖ്യാപിച്ചത് എല്ലാവരെയും അദ്ഭുതപ്പെടുത്തിയിരുന്നു. ചില പാർട്ടിനേതാക്കളും ഈ നടപടിയെ വിമർശിച്ചിരുന്നു. ബ്രിട്ടന്റെ സാമ്പത്തികരംഗം വർഷാവസാനം ആകുമ്പോഴേക്കും കൂടുതൽ മോശമാകാനാണു സാധ്യത എന്നു കണ്ടാണു നേരത്തേ വോട്ടെടുപ്പു പ്രഖ്യാപിച്ചതെന്നാണു ചിലർ വിലയിരുത്തിയത്. ഇംഗ്ലിഷ് ചാനൽ വഴി അനുദിനം വർധിക്കുന്ന അനധികൃത കുടിയേറ്റമാണു മറ്റൊരു മുഖ്യപ്രശ്നം. അഭയാർഥികളെ റുവാണ്ടയിലേക്കു നാടുകടത്താനുള്ള സുനകിന്റെ പദ്ധതി ഫലപ്രദമാണെന്ന് ആരും കണക്കിലെടുത്തില്ല. 

അഭിപ്രായ സർവേകളെല്ലാം എതിരായിരുന്നു. അതിനാൽ പരാജയം ആരെയും അമ്പരപ്പിച്ചില്ല. വെള്ളിയാഴ്ച രാവിലെ ചാൾസ് രാജാവിനെ കണ്ടു രാജി സമർപ്പിക്കാൻ പോകും മുൻപ് പ്രധാനമന്ത്രിയെന്ന നിലയിൽ സുനക് നടത്തിയ വിടവാങ്ങൽ പ്രസംഗം 4 മിനിറ്റ് നീണ്ടു.  ഭാര്യ അക്ഷത മൂർത്തി ഒപ്പമുണ്ടായിരുന്നു. 

ബ്രിട്ടിഷ് പ്രധാനമന്ത്രി പദത്തിലെത്തുന്ന വെള്ളക്കാരനല്ലാത്ത ആദ്യത്തെയാളും ആദ്യത്തെ ഇന്ത്യൻ വംശജനുമാണു ഋഷി സുനക്. 2 നൂറ്റാണ്ടിനിടയിലെ ബ്രിട്ടനിലെ ഏറ്റവും പ്രായം കുറഞ്ഞ പ്രധാനമന്ത്രിയെന്ന റെക്കോർഡും സ്വന്തം. (അധികാരത്തിലേറുമ്പോൾ 42 വയസ്സ്. ബ്രിട്ടന്റെ പ്രധാനമന്ത്രിമാരിൽ ഏറ്റവും ധനികനും സുനകാണ്.) 

ഋഷിയുടെ ഭാര്യ അക്ഷത മൂർത്തി ഇൻഫോസിസ് സ്ഥാപകൻ എൻ.ആർ.നാരായണമൂർത്തിയുടെയും ഇൻഫോസിസ് ഫൗണ്ടേഷൻ അധ്യക്ഷ സുധ മൂർത്തിയുടെയും മകളാണ്. അവിഭക്ത ഇന്ത്യയിലെ ഗുജ്‌റൻവാലയിൽ നിന്നാണു (ഇപ്പോൾ പാക്കിസ്ഥാനിൽ) സുനകിന്റെ മുത്തച്ഛൻ 1930 കളിൽ കെനിയയിലേക്കു കുടിയേറിയത്. അച്ഛൻ കെനിയയിൽ ജനിച്ചു. അമ്മ ടാൻസനിയയിലും. അവർ പിന്നീടു ബ്രിട്ടനിലേക്കു കുടിയേറി. 1980 ൽ ബ്രിട്ടനിലെ സതാംപ്ടനിലാണു സുനക് ജനിച്ചത്. പിതാവ് അവിടെ ഡോക്ടറായിരുന്നു. അമ്മ ഫാർമസി നടത്തിയിരുന്നു. 

ഇൻവെസ്റ്റ് ബാങ്കിങ് രംഗത്തുനിന്നാണു സുനക് രാഷ്ട്രീയത്തിലേക്കു വന്നത്. 2015 ൽ വെള്ളക്കാർക്കു ഭൂരിപക്ഷമുള്ള മണ്ഡലമായ നോർത്ത് യോർക്‌ഷറിലെ റിച്ച്മണ്ടിൽ നിന്ന് ആദ്യം എംപിയായി. ബോറിസ് ജോൺസൺ മന്ത്രിസഭയിൽ 2019 ൽ ധനകാര്യ സഹമന്ത്രിയായി. മാസങ്ങൾക്കകം 2020 ഫെബ്രുവരിയിൽ 39-ാം വയസ്സിൽ ധനമന്ത്രിയും. ബ്രിട്ടിഷ് രാഷ്ട്രീയത്തിൽ പ്രധാനമന്ത്രി കഴിഞ്ഞാൽ രണ്ടാമൻ ധനമന്ത്രിയാണ്. ലോക്ഡൗൺ കാലത്തു നടപ്പാക്കിയ സാമ്പത്തിക ഉത്തേജക നടപടികൾ അദ്ദേഹത്തിനു പ്രശംസ നേടിക്കൊടുത്തു.