തുരങ്കത്തിൽ ജീവനെടുക്കാൻ കാത്തിരിക്കുന്ന വിഷവാതകം: രക്ഷാപ്രവർത്തകരോട് ഡോക്ടർ പറയുന്നു: ഇക്കാര്യങ്ങൾ ശ്രദ്ധിക്കണം

46 മണിക്കൂർ നീണ്ട രക്ഷാപ്രവർത്തനം വിഫലമാക്കിയാണ് ആമയിഴഞ്ചാൻ തോട്ടിലെ മാലിന്യത്തിൽ മുങ്ങിപ്പോയ ശുചീകരണത്തൊഴിലാളി ജോയിയുടെ മൃതദേഹം തകരപ്പറമ്പിന് സമീപം കണ്ടെത്തുന്നത്. കൈ മെയ് മറന്നുള്ള രക്ഷാപ്രവർത്തനം പരാജയപ്പെട്ട നിമിഷം. ജൂലൈ 14ന് രക്ഷാപ്രവർത്തനം നടക്കുന്നതിനിടെ റെയിൽവേ പ്ലാറ്റ്ഫോമിന് അടിയിൽ, ജോയിയെ കാണാതായ സ്ഥലത്തുനിന്നു 10 മീറ്ററോളം അകലെ ടണലിൽ ശരീരഭാഗം പോലെ ഒരു കാഴ്ച മിന്നിമാഞ്ഞിരുന്നു. ടണലിനുള്ളിൽ പരിശോധനയ്ക്കു കയറ്റിവിട്ട ജെൻറോബട്ടിക്സ് കമ്പനിയുടെ ‘ഡ്രാക്കോ’ എന്ന റോബട്ടിന്റെ ക്യാമറക്കണ്ണുകളിൽ പതിഞ്ഞ ദൃശ്യം പ്രതീക്ഷയുണർത്തി. മുങ്ങൽവിദഗ്ധരുടെ രണ്ടു സംഘങ്ങൾ പരിശോധിച്ചപ്പോൾ അതു ശരീരമല്ല, മാലിന്യമാണെന്നു സ്ഥിരീകരിച്ചു.

രക്ഷാദൗത്യത്തിന്റെ 24–ാം മണിക്കൂറിനോടടുപ്പിച്ചാണു മനുഷ്യന്റെ കാലുകളെന്നു തോന്നിക്കുന്ന ദൃശ്യങ്ങൾ മോണിറ്ററിൽ തെളിഞ്ഞത്. ഉടൻ മുങ്ങൽവിദഗ്ധർ തിരച്ചിലിനിറങ്ങി. പിന്നാലെ, ക്യാമറയിൽ കണ്ട വസ്തു ഒഴുകിനീങ്ങി. ഇതു മാലിന്യമായിരിക്കുമെന്നു മുങ്ങൽ വിദഗ്ധർ സംശയിച്ചെങ്കിലും 10 മീറ്റർ കൂടി മുന്നോട്ടു പോയി സ്കൂബാ സംഘം പരിശോധിച്ചു. ക്യാമറയിൽ കണ്ടത് ശരീരഭാഗമല്ലെന്നും സ്ഥിരീകരിച്ചു. ഇതോടെയാണ് അപകടം സംഭവിച്ച പ്രദേശത്തെ തിരച്ചിൽ മതിയാക്കിയത്. 13ന് രാത്രിയും 14നും ജെൻറോബട്ടിക്സിന്റെ തന്നെ ആൾനൂഴി വൃത്തിയാക്കുന്ന ‘ബാൻഡികൂട്ട്’ റോബട്ടിനെ ഇറക്കിയും തിരച്ചിൽ നടത്തിയിരുന്നു. മാലിന്യക്കൂമ്പാരത്തിനിടയിലൂടെ കൂടുതൽ പരിശോധന നടത്താൻ കഴിയാത്തതിനാൽ രണ്ടു റോബട്ടുകളുടെയും പ്രവർത്തനം വൈകാതെ അവസാനിപ്പിച്ചു.

∙ രക്ഷാപ്രവർത്തനം നേരിട്ട വെല്ലുവിളികൾ

അതിരൂക്ഷ ഗന്ധം, ഇടുങ്ങിയ തുരങ്കം, മുങ്ങൽ വിദഗ്ധർക്കു മുന്നോട്ടു പോകാനാകാത്തവിധം ചെളിയും അതിൽ ഉറച്ചു കിടക്കുന്ന മാലിന്യവും. റെയിൽപാളത്തിനു താഴെയായതിനാൽ യന്ത്രങ്ങൾ ഉപയോഗിക്കാനുണ്ടായിരുന്ന പരിമിതി.

∙ തോടിന് ‘മേൽപാളം’

തമ്പാനൂർ മുതൽ പുത്തരിക്കണ്ടം വരെ നെൽപാടമായിരുന്നു. 1931ൽ റെയിൽവേ ലൈൻ സ്ഥാപിച്ചപ്പോഴാണ് ആമയിഴഞ്ചാൻ തോട് ട്രാക്കിനടിയിലായത്. തോടിനു മുകളിൽ കോൺക്രീറ്റ് ചെയ്ത ശേഷമാണു റെയിൽപാളം പണിതത്. പുറമേനിന്നു കാണുന്ന വീതി ഉള്ളിലേക്കില്ല. തമ്പാനൂർ കോഫി ഹൗസിനും പവർ ഹൗസിനും ഇടയിൽ 35 മീറ്റർ ഭാഗത്തു മാത്രമേ ഓട പുറത്തുനിന്നു കാണാനാകൂ. തോട്ടിലേക്ക് ഇറങ്ങാൻ മാൻഹോളുകൾ മാത്രമാണ് ആശ്രയം.