നിർമല വിളമ്പി ‘ആന്ധ്ര മീൽസ്’; നടുക്കഷ്ണം നിതീഷിന്; ‘പേടിച്ച്’ ഡബിൾ എൻജിൻ ഓഫാക്കി മോദി?

ബിഹാറിന്റെ ഊർജാവശ്യങ്ങൾ നിറവേറ്റുന്നതിനായി 2400 മെഗാവാട്ട് വൈദ്യുതി നിലയം സ്ഥാപിക്കും. ഭഗൽപൂരിലെ പിർപൈന്തിയിലാണ് നിലയം വരുന്നത്. ഇതിനുപുറമേ സംസ്ഥാനത്തിന്റ ഉൽപാദനം വർധിപ്പിക്കുന്നതിനും മൂലധനം ആകർഷിക്കുന്നതിനുമായി വ്യവസായ ഇടനാഴിയും നടപ്പിലാക്കും. ടൂറിസം മേഖലയിലും ബിഹാറിന് ഏറെ പദ്ധതികൾ ബജറ്റിൽ വകയിരുത്തിയിട്ടുണ്ട്. ഗയയിലെ വിഷ്ണുപദ് ക്ഷേത്രം, ബോധഗയയിലെ മഹാബോധി ക്ഷേത്രം എന്നിവ കാശി മോഡലിൽ വികസിപ്പിക്കുമെന്നതാണ് പ്രധാന വാഗ്ദാനം. നളന്ദയെ ടൂറിസം ഹബാക്കും. ബുദ്ധ, ജൈന മതവിഭാഗങ്ങളുടെ ആരാധനാലയങ്ങളിലേക്കുള്ള ആത്മീയ ടൂറിസം വികസിപ്പിക്കുന്നതിനായി രാജ്ഗിർ പട്ടണത്തെ വികസിപ്പിക്കാനും ബജറ്റ് നിർദേശമുണ്ട്. 

∙ പ്രത്യേക പദവിയില്ല 

ബജറ്റിന് മുന്നോടിയായുള്ള  യോഗങ്ങളിൽ ആന്ധ്രയ്ക്കും ബിഹാറിനും പ്രത്യേക സംസ്ഥാന പദവി നൽകണമെന്ന ആവശ്യമാണ് നിതീഷ് കുമാറും ചന്ദ്രബാബു നായിഡുവും പ്രധാനമായും ഉയർത്തിയത്. ഇതിൽ ബിഹാറിന്റെ ആവശ്യം നടക്കില്ലെന്ന് കേന്ദ്രം പറഞ്ഞതായി കഴിഞ്ഞ ദിവസം റിപ്പോർട്ടുകൾ പുറത്തുവന്നിരുന്നു. എന്നാൽ ഇന്ത്യാ സഖ്യം വിട്ടെത്തി സഹായിച്ച നിതീഷിനെ പരമാവധി സന്തോഷിപ്പിക്കാൻ ബജറ്റിലൂടെ മൂന്നാം മോദി സർക്കാർ ശ്രമിച്ചത് പകൽ പോലെ വ്യക്തമാണ്. സഭയിൽ ആന്ധ്രയ്ക്കും ബിഹാറിനുമുള്ള പദ്ധതികൾ ഒന്നൊന്നായി മുന്നിലെ ടാബിൽ നിന്നും നിര്‍മല പുറത്തെടുക്കുമ്പോൾ പ്രതിപക്ഷത്തെ എംപിമാർ പ്രതിഷേധ സൂചകമായി ശബ്ദമുയർത്തിയെങ്കിലും ഒന്നും സംഭവിച്ചില്ല.

എന്നാൽ ഭരണപക്ഷ ബെഞ്ചിലിരുന്ന ടിഡിപി നേതാവും കേന്ദ്ര മന്ത്രിയുമായ റാം മോഹൻ നായിഡുവിന്റെ മനസ്സിലെ സന്തോഷം പിടിച്ചുനിർത്താനാവാതെ മുഖത്ത് നിറചിരിയായി മാറിയത് പല തവണയാണ്. സന്തോഷത്തോടെ അദ്ദേഹം പെരുവിരലുയർത്തി സംസ്ഥാനത്തിലേക്കുള്ള പദ്ധതികളെ സ്വാഗതം ചെയ്തു. അടുത്ത വർഷം നിയമസഭാ തിരഞ്ഞെടുപ്പ് നടക്കുന്ന ബിഹാറിലും നിതീഷ് കുമാർ സർക്കാരിന് ഏറെ ആശ്വാസം പകരുന്നതാണ് ബജറ്റ്.

ആന്ധ്രയ്ക്കും ബിഹാറിനും പ്രത്യകമായി സംസ്ഥാന പദവികൾ നൽകിയില്ലെങ്കിലും ഇരുസംസ്ഥാനങ്ങളെയും ഉൾപ്പെടുത്തിയുള്ള പൂർവോദയ പദ്ധതിയും ബജറ്റിൽ പ്രഖ്യാപിച്ചു. ബിഹാർ, ജാർഖണ്ഡ്, പശ്ചിമ ബംഗാൾ, ഒഡീഷ, ആന്ധ്ര പ്രദേശ് എന്നീ സംസ്ഥാനങ്ങളുടെ സമഗ്രപദ്ധതിയാണ് ലക്ഷ്യം. ഈ സംസ്ഥാനങ്ങളിൽ അടിസ്ഥാന സൗകര്യങ്ങൾ, മാനവവിഭവശേഷി, സാമ്പത്തിക വികസനം ഇതെല്ലാം ലക്ഷ്യമിട്ടുള്ള പദ്ധതികളാണ് തയാറാക്കുക. എന്നാൽ പ്രഖ്യാപിച്ച പദ്ധതികളിൽ സിംഹഭാഗവും ആന്ധ്രയും ബിഹാറും സ്വന്തമാക്കുന്നതിനാണ് രാജ്യം സാക്ഷ്യം വഹിച്ചത്. പ്രത്യേക പദവി ലഭിച്ചില്ലെങ്കിൽ പ്രത്യേക പാക്കേജ് ബിഹാറിന് വേണമെന്നാണ് ജെഡിയു ആവശ്യപ്പെട്ടിരുന്നത്. ബജറ്റിൽ ബിഹാറിന് ലഭിച്ച പരിഗണന പാർട്ടിയെ പിണക്കില്ലെന്നത് ഉറപ്പാണ്.

∙ എവിടെ മോദിയുടെ ഗാരന്റി?

ബജറ്റിൽ കേരളത്തിന് പ്രത്യേകിച്ച് ഞെട്ടലൊന്നും ഉണ്ടായില്ല. ബജറ്റവതരണത്തിന് ശേഷമുണ്ടായ, മന്ത്രിമാരുടെയും ജനപ്രതിനിധികളുടെ പ്രതികരണത്തിൽനിന്നും വ്യക്തമാവുന്നതും ഇതാണ്. ഇക്കുറി തൃശൂരിൽ ബിജെപി ജയിച്ചതും സുരേഷ് ഗോപിയും ജോർജ് കുര്യനും കേന്ദ്രമന്ത്രിമാരായതും കേരളത്തിന് ഗുണകരമാവുമെന്നാണ് പ്രതീക്ഷിച്ചത്. എന്നാൽ നിരാശയായിരുന്നു ഫലം. കേരളത്തിന്റെ ആവശ്യങ്ങൾ ഡൽഹിയിലെത്തി നിർമല സീതാരാമനെ നേരിട്ടുകണ്ട് ധനമന്ത്രി കെ.എൻ ബാലഗോപാൽ അറിയിക്കുകയും ചെയ്തതാണ്. സില്‍വര്‍ലൈന്‍, എയിംസ്, 24,000 കോടിയുടെ പാക്കേജ്, വിളകൾക്ക് താങ്ങുവില തുടങ്ങിയ ആവശ്യങ്ങൾ ഉയർത്തിയെങ്കിലും ഇതൊന്നും നിർമലയുടെ ബജറ്റവതരണത്തിൽ ഇടം പിടിച്ചില്ല.

നിർമല അവതരിപ്പിച്ചത് രണ്ടു സംസ്ഥാനങ്ങള്‍ക്കു വേണ്ടിയുള്ള ബജറ്റാണെന്നാണ് ആന്ധ്രയേയും ബിഹാറിനെയും മനസ്സിൽ വച്ചുകൊണ്ട് മന്ത്രി കെ.രാജൻ പ്രതികരിച്ചത്. അതേസമയം ബിജെപി അക്കൗണ്ട് തുറന്നപ്പോള്‍ സംസ്ഥാനത്തിന്റെ അക്കൗണ്ട് പൂട്ടുകയാണ് കേന്ദ്രം ചെയ്തതെന്നാണ് ധനമന്ത്രി കെ.എന്‍.ബാലഗോപാല്‍ പ്രതികരിച്ചത്. കേന്ദ്ര ബജറ്റ് ജനവിരുദ്ധവും നിരാശാജനകവുമാണെന്നും അദ്ദേഹം പറഞ്ഞു. അതേസമയം വികസിത ഭാരതത്തിലേക്കുള്ള ചുവടുവയ്പ്പാണ് ബജറ്റെന്നാണ് ബിജെപി സംസ്ഥാന അധ്യക്ഷൻ കെ.സുരേന്ദ്രന്റെ പ്രതികരണം. വരുംനാളുകളിൽ സംസ്ഥാനത്തിന് കടമെടുക്കാനെങ്കിലും നിര്‍മല സീതാരാമൻ അനുകൂല നിലപാട് സ്വീകരിക്കുമോ എന്നതാണ് ഇനി അറിയേണ്ടത്?

∙ ഓഫാക്കിയോ ഡബിൾ എൻജിൻ?

മോദിസർക്കാരിന്റെ മുൻബജറ്റുകളിൽ എക്സ്പ്രസ് ഹൈവേകളും വ്യാവസായിക ഇടനാഴികളുമെല്ലാം ബിജെപി ഭരിക്കുന്ന സംസ്ഥാനങ്ങളുടെ പേരിനൊപ്പമാണ് കേൾക്കാറുള്ളത്. പ്രധാനമായും യുപിയുമായി ബന്ധപ്പെടുത്തി. എന്നാൽ ഇക്കുറി നിർമലയുടെ ബജറ്റവതരണം കണ്ടവർ എത്രപ്രാവശ്യം യുപിയടക്കമുള്ള സംസ്ഥാനങ്ങളുടെ പേരുകൾ കേട്ടു എന്ന് സ്വയം ചോദിക്കണം. ധനമന്ത്രിയുടെ പ്രഖ്യാപനങ്ങൾക്ക് കൈകൾ ഉയർത്തി ഡെസ്കിൽ അടിച്ച് പ്രോത്സാഹിപ്പിക്കുന്ന പ്രധാനമന്ത്രിയെ ഇടയ്ക്കിടെ കാണാമായിരുന്നു. എന്നാൽ ഭരണബെഞ്ചുകളിലെ മുഖങ്ങളിൽ ബജറ്റ് നൽകിയ ആനന്ദം കുറവായിരുന്നു.