‘ഇംഗ്ലിഷ് പഠനം ഇങ്ങനെ മതിയോ’; വേണം അധ്യാപകർക്കും ‘പരീക്ഷ’; ഖാദർ കമ്മിറ്റി റിപ്പോർട്ടും വെളിച്ചം കാണില്ലേ?

സംസ്ഥാനത്തെ സ്‌കൂള്‍ വിദ്യാഭ്യാസ മേഖലയില്‍ ഘടനാപരമായി ഏറ്റവും നിര്‍ണായക മാറ്റങ്ങള്‍ക്കു വഴിതുറക്കുന്ന ശുപാര്‍ശകള്‍ നല്‍കി ഡോ.എം.എ.ഖാദര്‍ കമ്മിറ്റി രണ്ടു വര്‍ഷം മുന്‍പ് സമര്‍പ്പിച്ച റിപ്പോര്‍ട്ട് സര്‍ക്കാര്‍ കഴിഞ്ഞ ദിവസം ‘തത്വത്തില്‍’ അംഗീകരിച്ചെങ്കിലും നടപ്പാക്കുന്നത് അനിശ്ചിതമായി വൈകാനാണ് സാധ്യത. റിപ്പോര്‍ട്ട് നടപ്പാക്കുന്നതിനെതിരെ അധ്യാപക സംഘടനകള്‍ രംഗത്തെത്തിക്കഴിഞ്ഞു. സ്‌കൂള്‍ സമയമാറ്റം സംബന്ധിച്ച് മതസംഘടനകളും പ്രതിഷേധം ഉയര്‍ത്തിയിട്ടുണ്ട്. എല്ലാവരുമായി ചർച്ച നടത്തി, റിപ്പോര്‍ട്ടിലെ നിര്‍ദേശം ഓരോന്നും പരിശോധിച്ച് തുടര്‍നടപടി സ്വീകരിക്കും എന്നാണ് മന്ത്രിസഭ തീരുമാനമെടുത്തത്. ഹൈസ്‌കൂള്‍, ഹയര്‍സെക്കന്‍ഡറി ലയനത്തിനുള്ള ശുപാര്‍ശയും അധ്യാപകനിയമനത്തിന് പ്രത്യേക റിക്രൂട്ട്‌മെന്റ് ബോര്‍ഡ് എന്ന ശുപാര്‍ശയും ഇപ്പോള്‍ നിലനില്‍ക്കുന്ന തസ്തികകളെ ബാധിക്കുമെന്ന ആശങ്കയാണ് അധ്യാപകസംഘടനകൾക്കുള്ളത്.

വിദ്യാഭ്യാസ അവകാശ നിയമം (2009) നടപ്പാക്കുന്നതുമായി ബന്ധപ്പെട്ട് പൊതുവിദ്യാഭ്യാസ മേഖലയില്‍ വരുത്തേണ്ട പരിഷ്‌കാരങ്ങളെക്കുറിച്ചു പഠിക്കാനാണ് എസ്‌സിഇആര്‍ടി മുന്‍ ഡയറക്ടര്‍ ഡോ.എം.എ.ഖാദര്‍ അധ്യക്ഷനായി മൂന്നംഗ കമ്മിറ്റിയെ 2017 സെപ്റ്റംബറില്‍ സര്‍ക്കാര്‍ നിയോഗിച്ചത്. മൂന്നു മാസമായിരുന്നു ആദ്യം നിശ്ചയിച്ച കാലാവധി. ആറ് തവണ കാലാവധി നീട്ടിക്കൊടുത്ത ഖാദര്‍ കമ്മിറ്റി നാലര വര്‍ഷമെടുത്താണ് അന്തിമ റിപ്പോര്‍ട്ട് തയാറാക്കിയത്. 2019 ജനുവരിയിലാണ് റിപ്പോര്‍ട്ടിന്റെ ഒന്നാം ഭാഗം സമര്‍പ്പിച്ചത്. അതിലെ പല നിര്‍ദേശങ്ങളോടും കടുത്ത എതിര്‍പ്പുയര്‍ന്നിരുന്നു. ഇവയെല്ലാം എങ്ങനെ നടപ്പാക്കുമെന്നതില്‍ വ്യക്തത വരുത്തുന്നതും അക്കാദമിക കാര്യങ്ങളിലെ നിര്‍ദേശങ്ങള്‍ മുന്നോട്ടുവയ്ക്കുന്നതും രണ്ടാം ഭാഗത്തിലാണ്.

റിപ്പോര്‍ട്ട് പരസ്യപ്പെടുത്തുമെന്നു മന്ത്രി വി.ശിവന്‍കുട്ടി പല തവണ പ്രഖ്യാപിച്ചെങ്കിലും കൂടുതല്‍ വിവാദങ്ങള്‍ക്കും പ്രതിഷേധങ്ങള്‍ക്കും വഴിവയ്ക്കുമെന്നതിനാല്‍ 2 വര്‍ഷമായി രഹസ്യ രേഖയാക്കി വയ്ക്കുകയായിരുന്നു. കഴിഞ്ഞ നിയമസഭാ സമ്മേളനത്തില്‍ ആബിദ് ഹുസൈന്‍ തങ്ങള്‍ എംഎല്‍എ റിപ്പോര്‍ട്ടിന്റെ പകര്‍പ്പ് ആവശ്യപ്പെട്ടിട്ടും കൂടുതല്‍ പരിശോധന വേണമെന്ന് ചൂണ്ടിക്കാട്ടി നല്‍കാന്‍ തയാറായില്ല. റിപ്പോര്‍ട്ട് നടപ്പാക്കാന്‍ ശ്രമിച്ചാല്‍ പ്രതിഷേധവും നിയമപോരാട്ടവുമായി നേരിടുമെന്നാണ് പ്രതിപക്ഷ അധ്യാപക സംഘടനകളുടെ നിലപാട്. ലോകത്താകെ വിദ്യാഭ്യാസ രംഗത്ത് അനുദിനം മാറ്റങ്ങള്‍ സംഭവിച്ചുകൊണ്ടിരിക്കുകയും സാങ്കേതികവിദ്യയിലൂന്നിയ പുത്തന്‍ മുന്നേറ്റങ്ങള്‍ ഉണ്ടാകുകയും ചെയ്യുന്ന സാഹചര്യത്തിലാണ് 2017ല്‍ നിയോഗിക്കപ്പെട്ട സമിതി 2022ല്‍ സമര്‍പ്പിച്ച റിപ്പോര്‍ട്ടിലെ ശുപാര്‍ശകള്‍ നടപ്പാക്കാന്‍ നടപടികള്‍ വൈകുന്നത്.

കേരളത്തിലെ വിദ്യാഭ്യാസ നിലവാരം സംബന്ധിച്ച് മന്ത്രിമാര്‍ തന്നെ സംശയം ഉയര്‍ത്തിയതു വിവാദമാകുകയും പിന്നീടു തിരുത്തുകയും ചെയ്തത് അടുത്തിടെ ചര്‍ച്ചയായിരുന്നു. പ്ലസ് ടു പഠനം പൂര്‍ത്തിയാക്കുന്ന കുട്ടികള്‍ ഉന്നതപഠനത്തിനായി ദേശീയ തലത്തിലുള്ള പ്രവേശന പരീക്ഷകള്‍ എഴുതുമ്പോള്‍ പിന്നാക്കം പോകുന്നുവെന്നും ഇംഗ്ലിഷ് പ്രാവിണ്യം ഇല്ലാത്തത് അഭിമുഖങ്ങളില്‍ ഉള്‍പ്പെടെ മികച്ച അവസരങ്ങള്‍ നഷ്ടമാകാന്‍ കാരണമാകുന്നുവെന്നുമുള്ള വിമര്‍ശനമാണ് മാതാപിതാക്കള്‍ ഉള്‍പ്പെടെ ഉയര്‍ത്തുന്നത്. ഖാദര്‍ കമ്മിറ്റി റിപ്പോര്‍ട്ടിലെ ശുപാര്‍ശകള്‍ വെള്ളം ചേര്‍ക്കാതെ നടപ്പാക്കാന്‍ തിരഞ്ഞെടുപ്പ് കൂടി ആസന്നമാകുന്ന ഘട്ടത്തില്‍ സര്‍ക്കാരിന് ഏറെ വിയര്‍പ്പൊഴുക്കേണ്ടി വരുമെന്നാണ് ഈ രംഗത്തെ വിദഗ്ധരുടെ വിലയിരുത്തല്‍. എന്താണ് റിപ്പോർട്ടിലെ പ്രധാന ശുപാർശകൾ? എന്തുകൊണ്ടാണ് അത് വിവാദമാകുന്നത്?

∙ ‘എത്രയും വേഗം നടപ്പാക്കുന്നതാണ് നല്ലത്’

2019ല്‍ സമര്‍പ്പിച്ച റിപ്പോര്‍ട്ട് എത്രയും പെട്ടെന്ന് നടപ്പാക്കുകയാണ് വിദ്യാഭ്യാസ രംഗത്തിനു നല്ലതെന്ന് ഡോ.എം.എ.ഖാദര്‍ പറയുന്നു. അധ്യാപകസംഘടനകളുടെ പ്രതിഷേധം കാര്യങ്ങള്‍ അറിയാതെയാണ്. ഗള്‍ഫ് രാജ്യങ്ങളില്‍ ഉള്‍പ്പെടെ ക്ലാസുകള്‍ നേരത്തേ ആരംഭിച്ച് ഉച്ചയോടെ അവസാനിക്കുന്ന സമ്പ്രദായമാണല്ലോ. കേന്ദ്രീയവിദ്യാലയത്തിലും മിക്ക സിബിഎസ്ഇ സ്‌കൂളുകളിലും രാവിലെ നേരത്തേയാണ് ക്ലാസ് തുടങ്ങുന്നത്. സ്‌കൂള്‍ പ്രവൃത്തി സമയം മാറ്റുന്നതു സംബന്ധിച്ച് ഉയരുന്ന പരാതികളില്‍ കാര്യമില്ല. ഇംഗ്ലിഷ് വിദ്യാഭ്യാസത്തിന്റെ ഗുണനിലവാരം കുറയുന്നുവെന്നത് യാഥാര്‍ഥ്യമാണ്. അതില്‍ അധ്യാപകര്‍ക്ക് ഉത്തരവാദിത്തമുണ്ട്. സാധാരണക്കാരുടെ കുട്ടികളാണ് സര്‍ക്കാര്‍ സ്‌കൂളുകളിലേക്ക് എത്തുന്നത്. അവരുടെ ഇംഗ്ലിഷ് നിലവാരം മെച്ചപ്പെടുത്താന്‍ അധ്യാപകര്‍ക്കു കഴിഞ്ഞില്ലെങ്കില്‍ എന്തു ചെയ്യും.

പ്രീപൈമറി തലം മുതല്‍ അധ്യാപകരുടെ യോഗ്യത ബിരുദാനന്തര ബിരുദമാക്കുന്ന തരത്തില്‍ നടപടികള്‍ സ്വീകരിക്കണം. ഏറ്റവും താഴ്ന്ന ക്ലാസുകളിലാണ് ഏറ്റവും ജ്ഞാനമുള്ള അധ്യാപകര്‍ വേണ്ടത്. എങ്കിലേ കുട്ടികള്‍ക്ക് അടിത്തറ ഉണ്ടാകൂ. അധ്യാപകര്‍ക്ക് ഓരോ വിഭാഗത്തിലും പ്രാവീണ്യം വേണമെന്നും ശുപാര്‍ശ ചെയ്തിട്ടുണ്ട്. അധ്യാപക തസ്തികകള്‍ നഷ്ടപ്പെടും എന്ന ആശങ്കയാണ് പ്രതിഷേധങ്ങള്‍ക്ക് കാരണം എന്നാണ് ഞാന്‍ അറിഞ്ഞത്. അത് ആരോ സ്ഥാപിത താല്‍പര്യത്തോടെ പ്രചരിപ്പിക്കുന്നതാണ്. യഥാര്‍ഥത്തില്‍ തസ്തിക നഷ്ടം വരില്ല. ഒരു ക്ലാസില്‍ 35 കുട്ടികള്‍ എന്നാണു പറഞ്ഞിരിക്കുന്നത്. പിന്നെ എങ്ങനെയാണ് തസ്തിക നഷ്ടം വരുന്നത്?

ടീച്ചര്‍ എഡ്യൂക്കേഷന്‍ എങ്ങനെ വേണമെന്നതു സംബന്ധിച്ച് നമുക്ക് ഇന്നേവരെ ഒരു പോളിസി ഉണ്ടായിട്ടില്ല. ദേശീയ വിദ്യാഭാസ നയത്തില്‍ ചെറുതായി പറഞ്ഞുപോകുന്നെന്നു മാത്രം. ദക്ഷിണാഫ്രിക്കയ്ക്ക് ഇക്കാര്യത്തില്‍ മികച്ച നയമുണ്ട്. ഗുണമേന്മയുടെ വിദ്യാഭ്യാസം എന്നതിനാണ് റിപ്പോര്‍ട്ടില്‍ പ്രധാനമായും ഊന്നല്‍ നല്‍കിയിരിക്കുന്നത്. വിദ്യാർഥികളെയും അധ്യാപകരെയും നവീകരിക്കുക എന്നതാണ് ഇതിലെ പ്രധാനഘടകം. ക്ലാസില്‍ അധ്യാപകര്‍ പറയുന്നത് അതേപടി പഠിക്കുന്ന രീതിക്കു പകരം കുട്ടികള്‍ കൂടി സജീവപങ്കാളികളാകുന്ന തരത്തിലാവണം വിദ്യാഭ്യാസം. കുട്ടി പഠനത്തില്‍ പൂര്‍ണമായി മുഴുകുന്നതോടെ ഗുണനിലവാരം മെച്ചപ്പെടും. അത്തരമൊരു പഠനസമ്പ്രദായത്തിലാണ് റിപ്പോര്‍ട്ട് കൂടുതല്‍ ഊന്നല്‍ നല്‍കിയിരിക്കുന്നത്.