വീണ്ടുമൊരു ‘ഒക്ടോബർ പ്രഖ്യാപനം: ഒരൊറ്റ പ്രചാരണ വിഷയത്തിൽ പിടിമുറുക്കി ജമ്മു കശ്മീർ പാർട്ടികൾ

ജമ്മു കശ്മീരിൽ ഒരു പതിറ്റാണ്ടിനു ശേഷം നടക്കുന്ന നിയമസഭാ തിരഞ്ഞെടുപ്പിൽ ഏറ്റവും ചർച്ചയാകുന്ന വിഷയം കശ്മീരിന്റെ സംസ്ഥാനപദവി തന്നെയാകും എന്നതിന്റെ ആദ്യ സൂചനകൾ നാഷനൽ കോൺഫറൻസും പിഡിപിയും കോൺഗ്രസും നൽകിക്കഴി‍ഞ്ഞു. തിരഞ്ഞെടുപ്പിനു ശേഷമേ സംസ്ഥാനപദവി തിരിച്ചുനൽകൂവെന്നാണ് നേരത്തേ മുതൽ ബിജെപിയുടെയും കേന്ദ്രസർക്കാരിന്റെയും നിലപാട്.

മണ്ഡലപുനർനിർണയം, തിരഞ്ഞെടുപ്പ്, സംസ്ഥാനപദവി തിരിച്ചുനൽകൽ എന്നതാണു നടപടിയെന്നു വ്യക്തമാക്കി കഴിഞ്ഞയാഴ്ച ജമ്മു കശ്മീർ ലഫ്. ഗവർണർ മനോജ് സിൻഹ ബിജെപിയുടെ നയം ആവർത്തിക്കുകയും ചെയ്തു. തിരഞ്ഞെടുപ്പിനു മുൻപു സംസ്ഥാനപദവി തിരിച്ചുനൽകുന്നതു പ്രതിപക്ഷ പാർട്ടികൾ നേട്ടമാക്കുമെന്നാണു ബിജെപി കണക്കുകൂട്ടൽ. ദീർഘനാളായി തങ്ങൾ നടത്തുന്ന പോരാട്ടത്തിന്റെ ഫലമാണു പദവി തിരിച്ചുകിട്ടാൻ കാരണമെന്നു വാദിക്കാനാണു പ്രതിപക്ഷ പാർട്ടികൾക്കു താൽപര്യം.

തിരഞ്ഞെടുപ്പെന്ന ജനാധിപത്യപ്രക്രിയ പൂർത്തിയാക്കിയ ശേഷം പദവി തിരിച്ചു നൽകുന്നത് കശ്മീരിൽ തങ്ങൾ സ്വീകരിച്ച നടപടികളെ വിമർശിക്കുന്നവർക്കു മറുപടിയാകുമെന്നും ബിജെപി കരുതുന്നു. സംസ്ഥാനത്തു തിരഞ്ഞെടുപ്പു നടത്താനുള്ള സുപ്രീം കോടതി വിധി ഇപ്പോഴത്തെ തിരഞ്ഞെടുപ്പു പ്രഖ്യാപനത്തെ സ്വാധീനിച്ചെന്നു വ്യക്തമാണ്. തിരഞ്ഞെടുപ്പു നടത്താൻ സമയപരിധി നിശ്ചയിച്ചു നൽകിയ കോടതി പക്ഷേ, സംസ്ഥാനപദവിയുടെ കാര്യത്തിൽ സമയക്രമം പറഞ്ഞില്ല. അതാണു കേന്ദ്രസർക്കാർ ആയുധമാക്കുന്നത്.