ഭാര്യയെ അടിച്ചും മുടി ചുറ്റിപ്പിടിച്ചും പൊലീസ്: റിദാനെ കൊന്നതാര്, മാമി മറഞ്ഞതെവിടെ? ആ മൊബൈലില്‍ എന്താണ്?

‘‘സ്വർണക്കടത്തിലെ പല കാര്യങ്ങളും എനിക്കറിയാം. എല്ലാ തെളിവുകളും കയ്യിലുണ്ട്.’’ എടവണ്ണ ചെമ്പക്കുത്ത് അറയിലകത്ത് റിദാൻ ബാസിൽ പിതൃസഹോദരൻ മുജീബ് റഹ്മാനോട് ഇതു പറയുന്നത് 2023 ഏപ്രിലിൽ. രണ്ടാഴ്ചയ്ക്കകം ചെമ്പക്കുത്ത് പുളിക്കുന്ന് മലയിൽ വെടിയേറ്റു മരിച്ച നിലയിൽ ഈ ഇരുപത്തിനാലുകാരനെ കണ്ടെത്തി. വീട്ടിൽനിന്നു വിളിച്ചു കൊണ്ടുപോയ മുഹമ്മദ് ഷാൻ ഉൾപ്പെടെ 8 പേരെ പൊലീസ് അറസ്റ്റു ചെയ്തു. വെടിയുതിർത്തതെന്നു കരുതുന്ന പിസ്റ്റൾ ഷാനിന്റെ വീടിന്റെ പിന്നിലെ വിറകുപുരയിൽ കണ്ടെത്തി.

പ്രവാസി വ്യവസായിയുടെ സ്ഥാപനത്തിലായിരുന്നു ഷാൻ ജോലി ചെയ്തിരുന്നത്. ആ ജോലി കളഞ്ഞതിലുള്ള വൈരാഗ്യമാണു കൊലപാതകത്തിനു കാരണമെന്നു പൊലീസ് പറഞ്ഞിരുന്നു. കേരള പൊലീസിന്റെ തലപ്പത്തുള്ള ചിലർക്കു കള്ളക്കടത്തു സംഘവുമായുള്ള ബന്ധത്തിന്റെ ഉദാഹരണമായി റിദാൻ ബാസിൽ കേസ് ഇപ്പോൾ, പി.വി.അൻവർ എംഎൽഎ ഉന്നയിക്കുന്നു. നേരത്തേ മനസ്സിലുണ്ടായിരുന്ന ചോദ്യങ്ങൾ ബന്ധുക്കൾ ആവർത്തിക്കുന്നു.

ആരാണു റിദാൻ ബാസിൽ? കടത്തിക്കൊണ്ടുവന്ന സ്വർണം കവർന്നു എന്ന സംശയത്തിന്റെ പേരിൽ തൃശൂർ കൊരട്ടി സ്വദേശിയെ തട്ടിക്കൊണ്ടുപോയി മർദിച്ച കേസിൽ റിദാൻ പ്രതിയായിരുന്നു. മുഹമ്മദ് ഷാനിന്റെ സഹോദരൻ നിസാമിനെയും കൂട്ടത്തിൽ അറസ്റ്റ് ചെയ്തിരുന്നു. നിസാമിനും സ്വർണക്കടത്തു സംഘങ്ങളുമായി ബന്ധമുണ്ടായിരുന്നതായി പൊലീസ് സംശയിച്ചു. റിദാനാകട്ടെ, ലഹരിമരുന്നു കേസിൽ ജയിൽ ശിക്ഷയനുഭവിച്ചിട്ടുണ്ട്. റിദാന്റെ കൊലപാതകത്തിനു സ്വർണക്കടത്തു കേസുമായി ബന്ധമുണ്ടെന്ന ആരോപണം ഉയർന്നെങ്കിലും പിന്നീട് ആ നിലയ്ക്ക് അന്വേഷണമുണ്ടായില്ല. മുൻ എസ്പി എസ്.സുജിത്ദാസ് ഇടപെട്ടെന്നാണു പി.വി.അൻവറിന്റെ ആരോപണം.

‘‘ഷാൻ വിളിച്ചുകൊണ്ടുപോകുമ്പോൾ റിദാന്റെ കയ്യിൽ 2 ഫോണുകളുണ്ടായിരുന്നു. പൊലീസ് ഇതുവരെ അതു കണ്ടെത്തിയിട്ടില്ല. എല്ലാ തെളിവുകളും കയ്യിലുണ്ടെന്ന് അവൻ പറഞ്ഞിരുന്നു. ആ തെളിവുകൾ ആ ഫോണുകളിൽ ഉണ്ടായിരുന്നോ? അതിനു വേണ്ടിയാണോ അവനെ കൊലപ്പെടുത്തിയത്? ഉന്നതർ ഇതിനു പിന്നിലുണ്ടെന്നു ഞങ്ങൾ സംശയിക്കുന്നു. സിബിഐ അന്വേഷണം ആവശ്യപ്പെട്ടു മുഖ്യമന്ത്രിക്കു പരാതി നൽകും.’’ മുജീബ് റഹ്മാൻ പറയുന്നു. പൊലീസിന്റെ ഇടപെടലിൽ കുടുംബത്തിനു സംശയമുണ്ട്. റിദാൻ മരിച്ചതിന്റെ രണ്ടാം ദിവസം ഭാര്യ ഹിബ ഫാത്തിമയെ നിലമ്പൂരിലെത്തിച്ചു ചോദ്യം ചെയ്തു.

പ്രതി ഷാനുമായി ഫോണിൽ സംസാരിച്ചതിന്റെ തെളിവുകൾ കാണിച്ച് അന്വേഷണം വഴിതിരിച്ചുവിടാൻ പൊലീസ് മനഃപൂർവം ശ്രമിച്ചെന്നാണ് ആരോപണം. മണിക്കൂറുകൾ ചോദ്യം ചെയ്തിട്ടും വഴങ്ങില്ലെന്നായപ്പോൾ മുഖത്തടിച്ചും മുടി ചുറ്റിപ്പിടിച്ചും ദ്രോഹിച്ചെന്നും കുടുംബം ആരോപിക്കുന്നു. 40 ലക്ഷം രൂപ നൽകി കേസൊതുക്കാൻ ഷാൻ തയാറാണെന്ന സൂചന പൊലീസുകാരിലൊരാൾ നൽകിയെന്നും കുടുംബം ആരോപിക്കുന്നു. മുഹമ്മദ് ഷാൻ ഉൾപ്പെടെ 8 പേർക്കും ജാമ്യം ലഭിച്ചു.

റിദാന്റെ ഭാര്യയെ ചോദ്യം ചെയ്യലിന്റെ പേരിൽ ഉപദ്രവിച്ചപ്പോഴൊക്കെ അന്നത്തെ മലപ്പുറം എസ്പി സുജിത്ദാസ് സ്ഥലത്തു ക്യാംപ് ചെയ്തിരുന്നു എന്നു ബന്ധുക്കൾ ആരോപിക്കുന്നു. റിദാനെ കൊന്നതു സ്വർണക്കടത്തു ലോബിയുടെ ആളുകളാണെങ്കിൽ, അവരെ സംരക്ഷിക്കാനുള്ള വ്യഗ്രത പൊലീസിന്റെ തലപ്പത്തുനിന്ന് ഉണ്ടായെന്നാണ് ആരോപണം. അല്ലായിരുന്നെങ്കിൽ കേസന്വേഷണം വഴിതെറ്റിപ്പോവില്ലായിരുന്നു. റിദാൻ വധക്കേസിൽ ജാമ്യത്തിലിറങ്ങിയ പ്രതികളാരും ഇപ്പോൾ പൊലീസിന്റെ നിരീക്ഷണത്തിലില്ല. അന്വേഷണം തുടരുന്നില്ല, വിചാരണ തുടങ്ങിയിട്ടുമില്ല.

∙ പൊലീസിൽ ഒരാൾക്കെതിരെ മാത്രം നടപടി

സ്വർണക്കടത്തുകാരുമായുള്ള ബന്ധം ആരോപിച്ച് മലപ്പുറം ജില്ലയിൽ ഇതുവരെ നടപടിക്കു വിധേയനായത് ഒറ്റ പൊലീസ് ഉദ്യോഗസ്ഥൻ മാത്രം; പെരുമ്പടപ്പ് എസ്ഐ ആയിരുന്ന കൊല്ലം കടയ്ക്കൽ സ്വദേശി എൻ.ശ്രീജിത്ത്. സ്വർണക്കടത്തുകാർക്കുവേണ്ടി വിവരങ്ങൾ ചോർത്തി, വഴിവിട്ട സാമ്പത്തിക ഇടപാടുകൾ നടത്തി എന്നിങ്ങനെയുള്ള ആരോപണങ്ങൾ ശരിയെന്ന് അന്വേഷണത്തിൽ ബോധ്യപ്പെട്ടതിന്റെ അടിസ്ഥാനത്തിൽ 2023 ഡിസംബറിലായിരുന്നു നടപടി. സ്വർണക്കടത്തു സംഘങ്ങളുമായി ശ്രീജിത്ത് സാമ്പത്തിക ഇടപാടു നടത്തിയതിന്റെ ഫോൺ രേഖകൾ കണ്ടെത്തിയതായി സസ്പെൻഷൻ ഉത്തരവിലുണ്ടായിരുന്നു. ഇതേ ശ്രീജിത്താണ് മലപ്പുറം എസ്പിയുടെ ക്യാംപ് ഓഫിസിലെ മരം മുറിയുമായി ബന്ധപ്പെട്ട് ആദ്യം പരാതി നൽകിയത്.