മലയാളി മനസ്സു കവർന്ന് സതീഷ് സെയിൽ; ‘ഫാൻസ് ക്ലബ് പ്രസിഡന്റാകാൻ മഞ്ചേശ്വരം എംഎൽഎ; അർജുനായി ‘കന്നഡയിൽ’ വിരിഞ്ഞ സൗഹൃദം!

∙ തങ്ങൾ പറഞ്ഞ് വന്നു, പിന്നെ മടങ്ങാനായില്ല അഷറഫിന്

‘സംഭവ ദിവസം പാണക്കാട് സാദിഖലി ശിഹാബ് തങ്ങൾ ആവശ്യപ്പെട്ടിട്ടാണ് ഞാൻ ആദ്യമായി ഷിരൂരിലെത്തുന്നത്. ഒന്നോ രണ്ടോ ദിവസം താമസിച്ച് സ്ഥിതിഗതികൾ മനസ്സിലാക്കി മടങ്ങി വരാമെന്നായിരുന്നു തീരുമാനിച്ചത്. പക്ഷേ അധികം താമസിയാതെ തന്നെ അർജുനെ അവിടെ ഉപേക്ഷിച്ച് വരാനാവില്ലെന്ന് മനസ്സ് പറഞ്ഞു. ഇടയ്ക്ക് അർജുന്റെ കോഴിക്കോട്ടേക്ക് വീട്ടിലേക്ക് പോകണമെന്ന് ആലോചിക്കുകയും ബന്ധുക്കൾ വിളിക്കുകയും ചെയ്തു. എന്നാൽ അർജുനുമായി മാത്രമേ അവിടേക്കു മടങ്ങു എന്നു പിന്നീട് തീരുമാനിക്കുകയായിരുന്നു. ഒടുവിൽ കോഴിക്കോട് അർജുന്റെ വീട്ടിലെത്തി മടങ്ങുമ്പോൾ ഒരു വലിയ ഉദ്യമം അവസാനിച്ചതിന്റെ സമാധാനമുണ്ടായിരുന്നു.’ അഷറഫ് പറഞ്ഞു.

‘ദുഃഖവും ആശങ്കയും നിറ‍ഞ്ഞ നാളുകളായിരുന്നു ഷിരൂരിലെ ഓരോ ദിവസങ്ങളും. ഇതുവരെ കണ്ടിട്ടില്ലാത്ത പല യന്ത്രങ്ങളും സാങ്കേതിക വിദ്യകളും ഈ ദിവസങ്ങളിൽ അവിടെ എത്തി.’– എ.കെ.എം,അഷറഫ് പറഞ്ഞു. തിരച്ചിൽ നടന്ന 2 ദിവസം മാത്രമാണ് അഷറഫ് ഷിരൂരിൽ ഇല്ലാതിരുന്നത്. അർജുൻ കാണാതായ ആദ്യ ദിവസം മുതൽ ഇന്നലെ കോഴിക്കോട് മൃതദേഹം എത്തുന്നതുവരെ 72 ദിവസം നീണ്ട പരിശ്രമമാണ് മറ്റു പലരെയും പോലെ കാസർകോട്ടെ ഈ എംഎൽഎയും പൂർത്തിയാക്കിയത്.

∙ മന്ത്രിയാവാൻ കർണാടകയുടെ സെയിൽ, കേരളത്തിന്റെയും

സതീഷ് കൃഷ്ണ സെയിൽ എന്ന 58 വയസ്സുകാരൻ 2013ൽ സ്വതന്ത്ര സ്ഥാനാർഥിയായാണ് കർണാടക നിയമസഭയിലേക്ക് ആദ്യം ജയിച്ചത്. എന്നാൽ 2018ലെ തിരഞ്ഞെടുപ്പിൽ ബിജെപിക്കും ജനതാദളിലും പിന്നിൽ മൂന്നാം സ്ഥാനത്തായി പരാജയപ്പെട്ടു. 2023ലെ നിയമസഭാ തിരഞ്ഞെടുപ്പിൽ കോൺഗ്രസിനു വേണ്ടി 2138 വോട്ടിന്റെ നേരിയ വ്യത്യാസത്തിൽ ബിജെപി എതിരാളിയെ പരാജയപ്പെടുത്തി അദ്ദേഹം തിരിച്ചുവരവ് നടത്തി.

സിദ്ധരാമയ്യ മന്ത്രി സഭയിൽ സതീഷ് മന്ത്രിയാവുമെന്ന് പ്രതീക്ഷയുണ്ടായിരുന്നു. എന്നാൽ മത്സ്യത്തൊഴിലാളി വിഭാഗത്തിൽ നിന്നുള്ള ജനപ്രതിനിധി എന്ന നിലയിലാണ് മംഗൾ വൈദ്യയെ പിന്നീട് മന്ത്രിയാക്കിയത്.

മന്ത്രി നാഗേഷ രാജി വച്ച ഒഴിവിൽ സെയിലിനെ പരിഗണിക്കാനുള്ള സാധ്യത തള്ളിക്കളയാനാവില്ല. ഷിരൂരിലെ സേവനത്തിലൂടെ ലഭിച്ച ജനസമ്മതിയും എഐസിസി ജനറൽ സെക്രട്ടറി കെ.സി.വേണുഗോപാലുമായുണ്ടാക്കിയ അടുപ്പവും സെയിലിന് അനുകൂല ഘടകമാണ്. അർജുന്റെ കുടുംബത്തിന് കർണാടക സർക്കാർ നൽകിയ 5 ലക്ഷത്തിനു പുറമേ സ്വന്തം വിഹിതമായി ഒരു ലക്ഷവും സെയിൽ കൈമാറിയിരുന്നു.

∙ മുതൽക്കൂട്ടായത് അഷറഫിന്റെ കന്നഡയും

കാസർകോട് ജില്ലയിലെ മഞ്ചേശ്വരം മണ്ഡലത്തിൽ നിന്നുള്ള മുസ്‌ലിം ലീഗ് എംഎൽഎയാണ് എ.കെ.എം.അഷറഫ്. മഞ്ചേശ്വരം മുൻ എംഎൽഎ എം.സി.കമറുദ്ദീൻ ഫാഷൻ ഗോൾഡ് ജ്വല്ലറി നിക്ഷേപത്തട്ടിപ്പുമായി ബന്ധപ്പെട്ട കേസിൽ ഉൾപ്പെട്ടതിനെത്തുടർന്നാണ്  2021 നിയമസഭാ തിരഞ്ഞെടുപ്പിൽ കമറുദ്ദീനെ മാറ്റി എ.കെ.എം. അഷറഫിന് ലീഗ് സീറ്റ് കൊടുത്തത്.