ഗൾഫ് പ്രവാസികൾ, സാമ്പത്തിക തകർച്ച...; ഇറാൻ– ഇസ്രയേൽ സംഘർഷം യുദ്ധമായാൽ ഇന്ത്യ എന്തു ചെയ്യും? നീക്കം തുടങ്ങി കേന്ദ്രം

ഇപ്പോൾ യുദ്ധത്തിലേക്ക് നീങ്ങാനുള്ള സാധ്യതയുള്ള ഇസ്രയേലിലും ഇറാനിലുമായി ജോലി തേടി എത്തിയ 30,000ത്തോളം ഇന്ത്യക്കാർ ഉണ്ടെന്നാണ് കരുതപ്പെടുന്നത്. ഇതിൽ 20,000ത്തോളം പേരും ഇസ്രയേലിലാണ്. 2023 ഒക്ടോബറിൽ ഇസ്രയേൽ– ഹമാസ് സംഘർഷം പൊട്ടിപ്പുറപ്പെട്ട ശേഷം നാട്ടിലേക്ക് വരാൻ താൽപര്യമുള്ള ഇന്ത്യൻ പ്രവാസികളെ ഇസ്രയേലിൽ നിന്നും സുരക്ഷിതരായി മടക്കി എത്തിച്ചിരുന്നു. ‘ഓപറേഷൻ അജയ്’ എന്നപേരിൽ നടത്തിയ ഈ സുരക്ഷിത ഒഴിപ്പിക്കലിൽ 1300 ഇന്ത്യക്കാരാണ് തിരികെ എത്തിയത്. എന്നാൽ ഇതിനു ശേഷവും ഇന്ത്യയിൽനിന്നും തൊഴിലാളികൾ ഇസ്രയേലിലേക്ക് എത്തിയിട്ടുണ്ട്. പ്രധാനമായും കെട്ടിടനിർമാണ തൊഴിലാളികള്‍ക്കാണ് വീസ അനുവദിച്ചത്. ഇരു സർക്കാരുകളും ഇതുസംബന്ധിച്ച കരാർ ഒപ്പിട്ടിരുന്നു. 

ഇന്ത്യക്കാരായ പതിനായിരത്തോളം പേർ ഇറാനിൽ കഴിയുന്നുണ്ടെന്നാണ് കണക്കുകൾ സൂചിപ്പിക്കുന്നത്. ഇറാനും ഇസ്രയേലിനും ഇടയിലെ യുദ്ധം കൂടുതൽ വ്യാപിച്ചാൽ വരും നാളുകളിൽ ഇന്ത്യയെ സംബന്ധിച്ചിടത്തോളം പൗരൻമാരെ സുരക്ഷിതമായി ഒഴിപ്പിക്കുക വലിയൊരു ചുമതലയാവും. എന്നാൽ മധ്യപൂർവ– പശ്ചിമേഷ്യൻ രാജ്യങ്ങളുമായുള്ള അടുത്ത ബന്ധം ഒഴിപ്പിക്കൽ സുഗമമാക്കുമെന്നും കരുതാം. മേഖലയിൽ മൊത്തമായി 90 ലക്ഷത്തോളം ഇന്ത്യൻ പ്രവാസികൾ കഴിയുന്നുണ്ടെന്നാണ് വിദേശകാര്യമന്ത്രാലയത്തിന്റെ കണക്ക്. ഗൾഫ് രാജ്യങ്ങളായ യുഎഇ, സൗദി അറേബ്യ, കുവൈത്ത്, ഖത്തർ, ഒമാൻ, ബഹ്‌റൈൻ എന്നിവിടങ്ങളിലാണ് പ്രധാനമായും ഇന്ത്യൻ പ്രവാസികളുള്ളത്. ഇതിൽ യുഎഇയിലാണ് കൂടുതലാളുകൾ– 34.1 ലക്ഷം. സൗദി അറേബ്യയിൽ 25.9 ലക്ഷം പ്രവാസികളുമുണ്ട്. 10.2 ലക്ഷം ഇന്ത്യക്കാർ കുവൈത്തിലും 7.4 ലക്ഷം പേർ ഖത്തറിലും 7.7 ലക്ഷം ആളുകൾ ഒമാനിലും 3.2 ലക്ഷം പേർ ബഹ്‌റൈനിലും കഴിയുന്നുണ്ട്.

∙ എണ്ണവിലയ്ക്ക് തീപിടിക്കും

ഇറാൻ- ഇസ്രയേൽ സംഘർഷം ഏറ്റവും കൂടുതൽ ആശങ്കയുണ്ടാക്കുന്നത് എണ്ണവിപണിയെയാണ്. പെട്രോളിയം ഉൽപാദകരാജ്യങ്ങളുടെ കൂട്ടായ്മയായ ഒപെക്കിലെ (Organization of the Petroleum Exporting Countries) പ്രധാന അംഗമാണ് ഇറാൻ. 2018ൽ ഇന്ത്യയ്ക്ക് എണ്ണ നൽകിയിരുന്ന രണ്ടാമത്തെ വലിയ രാജ്യം ഇറാനായിരുന്നു. യുഎസ് ഉപരോധങ്ങൾ അംഗീകരിക്കുന്നതിന്റെ ഭാഗമായിട്ടാണ് ഇന്ത്യ ഇറാനുമായുള്ള എണ്ണവ്യാപാരം നിർത്തിവച്ചത്. നിലവിൽ ഇറാനിൽ നിന്നും ഇന്ത്യ എണ്ണവാങ്ങുന്നില്ലെങ്കിലും ഇറാനിൽനിന്നുള്ള എണ്ണക്കയറ്റുമതി തടസ്സപ്പെട്ട് രാജ്യാന്തര വിപണിയിൽ വിലക്കയറ്റമുണ്ടായാൽ അത് ഇന്ത്യയേയും ബാധിക്കും. 

റഷ്യൻ എണ്ണ ഇന്ത്യയിലേക്ക് ഒഴുകുന്നതിന് മുൻപ് രാജ്യത്തിന്റെ ഊർജ ആവശ്യങ്ങൾക്കായുള്ള ക്രൂഡ് ഓയിലിന്റെ 80 ശതമാനവും മധ്യപൂർവ– പശ്ചിമേഷ്യൻ രാജ്യങ്ങളിൽനിന്നുമാണ് എത്തിയിരുന്നത്. പ്രകൃതി വാതകത്തിനായും ഈ രാജ്യങ്ങളെ ഇന്ത്യ ആശ്രയിക്കുന്നുണ്ട്. അതിനാൽ മേഖലയില്‍ ഒരു സമ്പൂർണ യുദ്ധം ദീർഘനാളത്തേക്ക് ഉണ്ടാവുന്നത് ഇന്ത്യയ്ക്ക് ഹിതകരമായിരിക്കില്ല. 2024 ഓഗസ്റ്റിൽ പുറത്തുവന്ന കണക്കുപ്രകാരം ഇന്ത്യയുടെ എണ്ണ വാങ്ങലിൽ 36 ശതമാനവും നികത്തുന്നത് റഷ്യൻ എണ്ണയാണ്. തൊട്ടുമുൻപുള്ള ജൂലൈ മാസത്തിൽ ഇത് 44 ശതമാനമായിരുന്നു. എന്നാൽ റഷ്യൻ എണ്ണ നിർബാധം ഇന്ത്യയിലേക്ക് എത്തുമ്പോഴും മൊത്തം ഇറക്കുമതിയുടെ 40 മുതൽ 44 ശതമാനം വരെ പശ്ചിമേഷ്യൻ രാജ്യങ്ങളായ ഇറാഖ്, സൗദി അറേബ്യ, യുഎഇ, കുവൈത്ത് എന്നിവിടങ്ങളിൽ നിന്നുമാണ്. 

യുദ്ധഭീതി തുടർന്നാൽ ഇന്ത്യ കൂടുതൽ എണ്ണ റഷ്യയിൽനിന്ന് ഇറക്കുമതി ചെയ്യേണ്ടി വരും. യുഎസിന്റെ ഉൾപ്പെടെ എതിർപ്പ് വകവയ്ക്കാതെ റഷ്യയിൽ നിന്നും എണ്ണവാങ്ങാൻ ഇന്ത്യ എടുത്ത തീരുമാനം എത്രത്തോളം ഗുണകരമായിരുന്നു എന്ന് ഈ സംഭവങ്ങൾ തെളിയിക്കുന്നു. അതേസമയം ഇന്ത്യയുടെ എൽഎൻജി (ദ്രവീകൃത വാതകം) ഇറക്കുമതിയുടെ വലിയ അളവും മധ്യപൂർവ ദേശത്തുനിന്നും പശ്ചിമേഷ്യയിൽനിന്നുമാണ്. ഇതിൽ പകുതിയും ഇറക്കുമതി ചെയ്യുന്നത് ഖത്തറിൽ നിന്നുമാണ്. ഈ വർഷം ആദ്യം ഇരുരാജ്യങ്ങളും തമ്മിൽ 7800 കോടി ഡോളറിന്റെ എൽഎൻജി ഇടപാടിൽ ഒപ്പുവച്ചിരുന്നു. വരുന്ന 20 വർഷത്തേയ്ക്ക് കൂടി എൽഎൻജി വാങ്ങുന്നതുമായി ബന്ധപ്പെട്ടാണ് ഇന്ത്യ ഖത്തറുമായി കരാറൊപ്പിട്ടത്. 

ഇറാൻ–ഇസ്രയേൽ യുദ്ധം ആരംഭിച്ചാൽ അത് എണ്ണവിപണിയെ തീപിടിപ്പിക്കുമെന്നത് ഉറപ്പാണ്. ഇത് ഇന്ത്യയുടെ ഊർജ സുരക്ഷയ്ക്ക് ഏറെ ആശങ്ക ഉയർത്തുന്നുണ്ട്. രാജ്യന്തര തലത്തിൽ എണ്ണവില കുതിച്ചാൽ ഇന്ത്യയിലെ എണ്ണവിലയും വർധിക്കും. ഇത് ഇന്ത്യയിലെ വ്യവസായങ്ങളിന്മേലും ജനങ്ങളുടെ ജീവിതച്ചെലവുകളിലും നേരിട്ട് ആഘാതം ഏൽപ്പിക്കും. ഇസ്രയേലിലേക്ക് ഇറാന്റെ മിസൈൽ ആക്രമണമുണ്ടായതിന് തൊട്ടുപിന്നാലെ രാജ്യാന്തര വിപണിയിൽ എണ്ണവിലയിൽ വർധനവ് പ്രകടമായിക്കഴിഞ്ഞു. ഇറാന്റെ മിസൈൽ ആക്രമണത്തിന് ശക്തമായ തിരിച്ചടിയുണ്ടാകുമെന്ന ഇസ്രയേൽ അറിയിപ്പ് വന്നതിന് പിന്നാലെ എണ്ണവിലയിൽ മൂന്ന് ശതമാനത്തോളം വർധനവുണ്ടായതായാണ് രാജ്യാന്തര മാധ്യമങ്ങള്‍ റിപ്പോർട്ട് ചെയ്തത്. വരും നാളിൽ സംഘർഷത്തിന് അയവുവന്നില്ലെങ്കിൽ എണ്ണവില ഇനിയും ഉയരാനാണ് സാധ്യത. 

∙ തടസ്സപ്പെടുമോ ചരക്കുനീക്കം?

ഇറാൻ–ഇസ്രയേൽ സംഘർഷം തുറന്ന യുദ്ധത്തിലേക്ക് പോയാൽ മധ്യപൂർവദേശം വഴിയുള്ള ചരക്കുനീക്കത്തിനും സുരക്ഷാഭീഷണിയാണ്. യെമൻ കേന്ദ്രീകരിച്ചു പ്രവർത്തിക്കുന്ന ഇറാൻ അനുകൂലികളായ ഹൂതികൾ ചെങ്കടലിൽ ചരക്കുകപ്പലുകളെ ആക്രമിക്കുന്നത് ഇന്ത്യയടക്കമുള്ള രാജ്യങ്ങൾക്ക് ഭീഷണിയാണ്. ലോകത്തെ ചരക്കുകപ്പലുകളുടെ സഞ്ചാരത്തിൽ പ്രധാന സ്ഥാനമാണ് ഈ ഭാഗങ്ങൾക്കുള്ളത്. റഷ്യയിൽ നിന്നു കൊണ്ടുവരുന്നതടക്കം ഇന്ത്യയുടെ ഊർജ ഇറക്കുമതിയിൽ ചെങ്കടൽ വഴിയുള്ള ചരക്കുനീക്കം പ്രധാനപ്പെട്ടതാണ്. അപകടസാധ്യത ഒഴിവാക്കി കേപ് ഓഫ് ഗുഡ് ഹോപ് വഴി സഞ്ചരിക്കാമെങ്കിലും കൂടുതൽ സമയം വേണം, അതുവഴി ധനനഷ്ടവുമേറെ.

ചെങ്കടൽ പോലെ, ഇറാൻ അതിർത്തി പങ്കിടുന്ന ഹോർമുസ് കടലിടുക്കിലെ സംഘർഷങ്ങളും ഇന്ത്യയ്ക്ക് വലിയ ഭീഷണിയാണ്. ഒമാനും ഇറാനും ഇടയിലുള്ള ഹോർമുസ് കടലിടുക്കാണ് ഒമാൻ ഉൾക്കടലിനെയും അറബിക്കടലിനേയും തമ്മിൽ ബന്ധിപ്പിക്കുന്നത്. ഗൾഫ് രാജ്യങ്ങളിൽനിന്നുള്ള എണ്ണ ലോകമെമ്പാടുമുള്ള സംഭരണശാലകളിലേക്ക് ഒഴുകുന്നത് ഇതുവഴിയാണ്. ഇന്ത്യ ഇറക്കുമതി ചെയ്യുന്ന എണ്ണയുടെ മൂന്നിൽ രണ്ടുഭാഗവും പ്രകൃതി വാതകത്തിന്റെ പകുതിയും ഹോർമുസ് കടലിടുക്കിലൂടെയാണ് എത്തുന്നത്. ഇതുവഴിയുള്ള ഖത്തർ, ഇറാഖ്, സൗദി തുടങ്ങിയ രാജ്യങ്ങളിൽ നിന്നുള്ള ചരക്കുനീക്കവും കാര്യമായി ബാധിക്കപ്പെട്ടേക്കാം. 

∙ വ്യാപാരത്തിനും തീപിടിക്കും

പശ്ചിമേഷ്യയുമായും മധ്യപൂർവദേശത്തെ രാജ്യങ്ങളുമായും ഇന്ത്യയ്ക്ക് മികച്ച വ്യാപാര ബന്ധമാണുള്ളത്. മേഖലയിലെ രാജ്യങ്ങളെ ഇന്ത്യ എണ്ണയ്ക്കായി പ്രധാനമായും ആശ്രയിക്കുമ്പോൾ അവിടെയുള്ള മിക്ക രാജ്യങ്ങൾക്കുമുള്ള ആഹാരസാധനങ്ങൾ, തുണിത്തരങ്ങൾ, മരുന്നുകൾ തുടങ്ങിയവ ഇന്ത്യയിൽ നിന്നുമാണ് വലിയ അളവിൽ എത്തുന്നത്. മേഖലയിൽ യുദ്ധഭീതിയുണ്ടായാൽ ഇന്ത്യയിൽനിന്നുള്ള ചരക്കുനീക്കത്തെയും കാര്യമായി ബാധിക്കാം. ഒട്ടേറെ ഇന്ത്യൻ കമ്പനികൾ ഗൾഫ് രാജ്യങ്ങളിൽ സജീവമായി നിലനിൽക്കുന്നുണ്ട്. പ്രത്യേകിച്ച് കെട്ടിട നിർമാണം, ഹോസ്പിറ്റാലിറ്റി രംഗങ്ങളിൽ. ഇവിടെ ജോലി ചെയ്യുന്നവരിലും നല്ലൊരു ശതമാനവും ഇന്ത്യാക്കാരാണ്. 

2023ലെ കണക്കനുസരിച്ച് ഇന്ത്യയുടെ വ്യാപാരത്തിന്റെ 15 ശതമാനം ജിസിസി (Gulf Cooperation Council) രാജ്യങ്ങളുമായിട്ടാണ്. 16,200 കോടി ഡോളർ മൂല്യത്തിന്റെ കച്ചവടമാണ് ഇന്ത്യയ്ക്ക് ജിസിസിയുമായുള്ളത്. ഇതിൽ വലിയൊരളവും എണ്ണ, പ്രകൃതി വാതകം തുടങ്ങിയവ ഇന്ത്യ ഇറക്കുമതി ചെയ്യുന്നതാണ്. ഭക്ഷ്യവസ്തുക്കൾ, ആഭരണങ്ങൾ, തുണിത്തരങ്ങൾ, മരുന്നുകൾ, രാസവസ്തുക്കൾ, എൻജിനീയറിങ് ഉൽപന്നങ്ങൾ തുടങ്ങിയവയാണ് പ്രധാനമായും ഇന്ത്യ കയറ്റുമതി ചെയ്യുന്നത്.