ഹിസ്ബുല്ല തലവനോട് ഖമനയി അന്നേ പറഞ്ഞു: അവർ നിങ്ങളെ കൊല്ലും; ബങ്കറിലേക്ക് തുളച്ചെത്തിയ ബോംബ്; നസ്‌റല്ലയുടെ കൊലയാളിയായി വിഷപ്പുക!

∙ എന്തിനായിരുന്നു ആ അറസ്റ്റുകൾ?

നസ്‌റല്ലയുടെ മരണത്തിനു തൊട്ടു പിന്നാലെ ഇറാനിൽ നിരവധി പേരെയാണ് അറസ്റ്റ് ചെയ്തത്. ഇറാനിലെ മുതിർന്ന സുരക്ഷാ ഉദ്യോഗസ്ഥരെ വരെ അറസ്റ്റു ചെയ്ത് ചോദ്യം ചെയ്തു. ഐആർജിസിയിലെ ചിലരാണ് നസ്റല്ലയുടെ ലൊക്കേഷൻ സംബന്ധിച്ച കൃത്യമായ വിവരങ്ങൾ നൽകിയതെന്നാണ് റിപ്പോർട്ട്. ലബനനിലേക്ക് പോയ ഉദ്യോഗസ്ഥരെയും ചോദ്യം ചെയ്തു. ഇറാന് പുറത്ത് താമസിക്കുന്ന സൈനികരുടെ ബന്ധുക്കളെ കേന്ദ്രീകരിച്ചും അന്വേഷണം നടക്കുന്നുണ്ട്. ലബനനിലേക്ക് യാത്ര ചെയ്തിരുന്ന ചില സൈനികരെയാണ് അറസ്റ്റ് ചെയ്തത്. അറസ്റ്റ് ചെയ്യപ്പെട്ട ഒരാൾ ആ ദിവസങ്ങളിൽ നസ്‌റല്ല എവിടെയാണെന്ന് ചോദിച്ചിരുന്നു. സംശയിക്കുന്ന ചിലരുടെ കുടുംബം ഇറാനു പുറത്തേക്ക് താമസം മാറ്റിയതായും കണ്ടെത്തി. ഇറാന്റെ രഹസ്യാന്വേഷണ വൃത്തങ്ങളിൽ ആശങ്ക ഉയർന്നതിനെത്തുടർന്ന് നിരവധി അറസ്റ്റുകളാണ് നടന്നത്. 

∙ യുഎസിൽ നിന്നെത്തിച്ച ‘ബങ്കറുകളുടെ അന്തകൻ’

ലഭ്യമായ റിപ്പോർട്ടുകൾ പ്രകാരം 2005 മുതൽ ഇസ്രയേലിന് യുഎസ് ബങ്കർ ബസ്റ്റർ ബോംബുകൾ നൽകുന്നുണ്ട്. 2023ലെ 650 കോടി ഡോളറിന്റെ സൈനിക സഹായ പാക്കേജിൽ ഇത്തരം ആയിരത്തിലധികം ബോംബുകൾ ഉൾപ്പെടുത്തിയിട്ടുണ്ട്. ഈ ബോംബുകളിൽ പ്രത്യേകം ഫ്യൂസുകളാണ് (പൊട്ടിത്തെറിക്കാൻ വേണ്ട സംവിധാനം) സജ്ജീകരിച്ചിരിക്കുന്നത്, ടാർഗറ്റ് ചെയ്‌ത ബങ്കറുകളിൽ തുളച്ചുകയറിയതിനുശേഷം മാത്രമാണ് സ്ഫോടനം നടക്കുക. ഹസൻ നസ്‌റല്ല താമസിച്ചിരുന്ന, ഹിസ്ബുല്ലയുടെ യോഗങ്ങൾ നടന്നിരുന്ന ബങ്കറിനകത്തേക്ക് തുളച്ച് കയറിയാണ് ബോംബ് പൊട്ടിത്തെറിച്ചത്. മുകളിൽ നിന്ന് ലംബമായി വീണ ബോംബുകൾ ആഴങ്ങളിലേക്ക് തുളച്ചിറങ്ങി പൊട്ടിത്തെറിക്കുകയായിരുന്നു. ഇത് നാശനഷ്ടത്തിന്റെ തോതും വർധിപ്പിച്ചു.

∙ എന്താണ് ബങ്കർ ബസ്റ്റർ ബോംബുകൾ?

ബങ്കർ ബസ്റ്റർ ബോംബുകൾ ഗ്രൗണ്ട് പെനട്രേഷൻ മ്യൂനിയൻസ് എന്നും അറിയപ്പെടുന്നു. ഉറപ്പുള്ള കെട്ടിടങ്ങളോ ഭൂഗർഭ ബങ്കറുകളോ തകർക്കാൻ ഡിസൈൻ ചെയ്ത പ്രത്യേക ആയുധങ്ങളാണിത്. 2 മുതൽ 4 ടൺ വരെ ഭാരമുള്ള ഈ ബോംബുകളിൽ സ്‌ഫോടകവസ്തുക്കൾ നിറയ്ക്കുകയും ലക്ഷ്യത്തിലെത്തിയ ശേഷം മാത്രമേ പൊട്ടിത്തെറിക്കൂ എന്ന് ഉറപ്പാക്കാൻ പ്രത്യേകം ഫ്യൂസുകൾ ഘടിപ്പിക്കുകയും ചെയ്യുന്നു. നാശനഷ്ടങ്ങളുടെ തോത് വർധിപ്പിക്കാൻ 30 മീറ്റർ വരെ ഭൂഗർഭ അറയിലേക്ക് അല്ലെങ്കിൽ ആറ് മീറ്റർ വരെ ഉറച്ച കോൺക്രീറ്റിലേക്ക് തുളച്ചുകയറാൻ ഈ ബോംബുകൾക്ക് കഴിയും.

∙ തുടക്കമിട്ടത് രണ്ടാം ലോകമഹായുദ്ധ കാലത്ത്

രണ്ടാം ലോകമഹായുദ്ധസമയത്താണ് ബങ്കർ ബസ്റ്ററുകൾ എന്ന ആശയം ആദ്യമായി ഉടലെടുത്തത്. ജർമൻ എൻജിനീയർ ഓഗസ്റ്റ് കോൻഡേഴ്‌സ് വികസിപ്പിച്ചെടുക്കുകയും 1942നും 1943നും ഇടയിൽ പരീക്ഷിക്കുകയും ചെയ്ത സംവിധാനമാണിത്. എന്നാൽ, പിന്നീട് ആധുനിക യുദ്ധത്തിലും ഈ ബോംബുകൾക്ക് പ്രാധാന്യം ലഭിച്ചു, പ്രത്യേകിച്ചും ഗൾഫ് യുദ്ധകാലത്ത്. ബങ്കറുകൾ കേന്ദ്രീകരിച്ചും ആക്രമണങ്ങൾ വേണ്ടിവന്നതോടെ കൃത്യമായ ഗൈഡഡ് സംവിധാനങ്ങളുള്ള യുദ്ധോപകരണങ്ങൾ നിർമിക്കാനും തുടങ്ങി. ഒളിത്താവളങ്ങൾ കേന്ദ്രീകരിച്ച് ശത്രുക്കൾ ആക്രമിക്കാൻ തുടങ്ങിയതോടെയാണ് ഇത്തരം ബോംബുകളും ഇസ്രയേൽ പ്രയോഗിക്കാൻ തുടങ്ങിയത്.

∙ ബങ്കർ ബസ്റ്റർ ബോംബുകൾ ഏതെല്ലാം തരം?

ഗൈഡഡ് ബോംബ് യൂണിറ്റ് 28 (ജിബിയു-28) ആണ് ഇതിൽ പ്രധാനപ്പെട്ട ഒന്ന്. ഗൾഫ് യുദ്ധകാലത്ത് വികസിപ്പിച്ചെടുത്ത ഈ 5 ടൺ ബോംബ് കൃത്യമായ ലക്ഷ്യത്തിനായി ലേസർ ഗൈഡഡ് സാങ്കേതികവിദ്യയുടെ സഹായത്തോടെയാണ് പ്രയോഗിച്ചിരുന്നത്. ഗൈഡഡ് ബോംബ് യൂണിറ്റ് 37 (ജിബിയു-37) ആണ് രണ്ടാമത്തേത്. പ്രതികൂല കാലാവസ്ഥയിൽ പോലും പ്രയോഗിക്കാവുന്ന ജിപിഎസ് - ഗൈഡഡ് ബോംബ് ആണിത്. മാസിവ് ഓർഡനൻസ് പെനട്രേറ്റർ (ജിബിയു-57) ആണ് മറ്റൊരു ബങ്കർ ബസ്റ്റർ ബോംബ്. 30 ടൺ ഭാരമുള്ള ഏറ്റവും വലിയ ബങ്കർ ബസ്റ്റർ ആണിത്. 200 അടി വരെ ഉറപ്പിച്ച കോൺക്രീറ്റിലേക്ക് തുളച്ചുകയറാൻ ഡിസൈൻ ചെയ്‌തിരിക്കുന്നതാണിത്.

∙ ബോംബിനെ നയിക്കുന്നത് ജിപിഎസും ലേസറും

ബങ്കർ തകർക്കാനായി നിർമിക്കുന്ന ബോംബുകളെല്ലാം കൃത്യമായി ടാർഗറ്റ് ചെയ്യുന്നതിനും ചുറ്റുവട്ടത്തുള്ള നാശനഷ്ടങ്ങൾ കുറയ്ക്കുന്നതിനുമായി വിപുലമായ ജിപിഎസ്, ലേസർ ഗൈഡൻസ് സംവിധാനങ്ങൾ ഉപയോഗിച്ചാണ് ബോംബിന്റെ പ്രവർത്തനം. ശക്തമായ പുറംതോടിൽ നിർമിച്ചതിനാൽ, പൊട്ടിത്തെറിക്കുന്നതിന് മുൻപ് കഠിനമായ കെട്ടിടങ്ങളിലേക്ക് വരെ ആഴത്തിൽ തുളച്ചുകയറാൻ ബോംബുകളെ സഹായിക്കുന്നു. ഇത് കമാൻഡ് സെന്ററുകൾ, ആയുധപ്പുരകൾ, മറ്റ് തന്ത്രപ്രധാനമായ സ്ഥലങ്ങൾ എന്നിവ ലക്ഷ്യമിടുന്നതിനും സഹായിക്കും..

∙ ജനസാന്ദ്രതയുള്ള പ്രദേശങ്ങളിൽ വേണ്ട 

ബങ്കർ ബസ്റ്റർ ബോംബുകൾ രാജ്യാന്തര നിയമപ്രകാരം നിരോധിച്ചിട്ടില്ലെങ്കിലും ജനസാന്ദ്രതയുള്ള പ്രദേശങ്ങളിലെ ഉപയോഗം ധാർമിക ആശങ്കകൾ ഉയർത്തുന്നുണ്ട്. ജനീവ കരാർ പ്രകാരം ആൾതാമസമുള്ള പ്രദേശങ്ങളിൽ ഇത്തരം ബോംബുകൾ പ്രയോഗിക്കുന്നതിന് വിലക്കുണ്ട്. എന്നാൽ, ഇസ്രയേലും യുഎസും പലപ്പോഴും പാർപ്പിട സമുച്ചയങ്ങളിൽ ഈ ബോംബുകൾ ഉപയോഗിക്കുന്നുണ്ട്. ഇതിനെതിരെ ഇറാൻ രംഗത്തുവന്നിരുന്നെങ്കിലും പതിവുപോലെ എല്ലാം അൽപായുസ്സായിത്തീർന്നു. മാത്രവുമല്ല. ലബനനിൽ ആക്രമണത്തിന്റെ പുതിയ ഘട്ടങ്ങളിലേക്കും ഇസ്രയേൽ കടന്നുകഴിഞ്ഞു. ഇനിയെന്ത് എന്ന വലിയ ചോദ്യം മാത്രം ബാക്കി...