കൈപിടിച്ചു കടത്തിലാഴ്ത്തി ചൈന; അഹങ്കാരം കാണിച്ച മുയിസു വീണ്ടും ഇന്ത്യയുടെ വാതിൽക്കൽ; മാലദ്വീപിൽനിന്ന് മോദിയും പാഠം പഠിക്കുമോ?

∙ മുഖ്യവരുമാനം മുടങ്ങിയപ്പോൾ...

പ്രധാനമന്ത്രി മോദിയെ അപമാനിച്ച സംഭവത്തിന് പിന്നാലെ മാലദ്വീപിനെതിരെ ഇന്ത്യൻ വിനോദ സഞ്ചാരികൾ കടുത്ത ബഹിഷ്കരണ തീരുമാനമെടുത്തത് മാലദ്വീപിന് വലിയ സാമ്പത്തിക നഷ്ടമാണുണ്ടാക്കിയത്. 2023 മാർച്ചിനെ അപേക്ഷിച്ച് 2024 മാർച്ചിൽ ഇന്ത്യൻ ടൂറിസ്റ്റുകളുടെ മാലദ്വീപ് സന്ദർശനത്തിൽ 54 ശതമാനത്തിന്റെ ഇടിവാണുണ്ടായത്. തൊട്ടടുത്ത മാസത്തെ കണക്കുകൾ മാലദ്വീപിന്റെ നെഞ്ചിടിപ്പ് കൂട്ടുന്നതുമായി. കണക്കുകള്‍ പ്രകാരം, മാലദ്വീപിലേക്കെത്തിയ സഞ്ചാരികളുടെ എണ്ണത്തില്‍ ഇന്ത്യ ആറാം സ്ഥാനത്തേക്കെത്തി. 2023ൽ ഒന്നാം സ്ഥാനത്തായിരുന്നു ഇന്ത്യയെന്നോർക്കണം. അതോടെയാണ് ഇന്ത്യൻ ടൂറിസ്റ്റുകളെ ആകർഷിക്കാനുള്ള ശ്രമങ്ങൾ മാലദ്വീപ് ആരംഭിച്ചത്.

എന്നിട്ടും പഴയ തോതിൽ ഇന്ത്യക്കാർ മാലദ്വീപിലേക്ക് എത്തിയില്ല. ദ്വീപിൽ യാത്രകൾ നടത്തി ഫോട്ടോകൾ സമൂഹമാധ്യമങ്ങളിൽ പങ്കുവച്ച ഇന്ത്യൻ സെലിബ്രിറ്റികൾക്കു പോലും വിമർശനങ്ങൾ നേരിടേണ്ടി വന്നു. 2024 ജൂണിലെ കണക്കിൽ, മാലദ്വീപിലെത്തിയ വിനോദ സഞ്ചാരികളിൽ കേവലം 6.2 ശതമാനം മാത്രമായിരുന്നു ഇന്ത്യക്കാർ. സഞ്ചാരികളെ ആകർഷിക്കുന്നതിനായി മാലദ്വീപ് അസോസിയേഷന്‍ ഓഫ് ട്രാവല്‍ ഏജന്റ്‌സ് ആന്റ് ടൂര്‍ ഓപറേറ്റേഴ്‌സ് (MATATO) ഇന്ത്യൻ നഗരങ്ങളിൽ റോഡ് ഷോകൾ സംഘടിപ്പിച്ചു. ഡൽഹി, മുംബൈ, ബെംഗളൂരു എന്നീ ഇന്ത്യൻ നഗരങ്ങളിൽ ജൂലൈ, ഓഗസ്റ്റ് മാസങ്ങളിലായിട്ടായിരുന്നു റോഡ് ഷോ.

∙ അപ്പോഴും ‘911’ ഇന്ത്യതന്നെ

മാലദ്വീപുമായുള്ള ബന്ധം വഷളാകുന്ന അവസരത്തിൽ തെക്കുപടിഞ്ഞാറു രാജ്യമായ മൊറീഷ്യസുമായുള്ള നയതന്ത്ര ബന്ധം ശക്തമാക്കാനാണ് ഇന്ത്യ മുന്നിട്ടിറങ്ങിയത്. ഇന്ത്യൻ സഹായത്തോടെ മൊറീഷ്യസിലെ അഗലേല ദ്വീപിൽ എയർസ്ട്രിപ്പിന്റെയും ട്രോൾ ബോട്ടുകൾക്കായുള്ള ജട്ടിയുടെയും നിർമാണം അതിവേഗം പൂർത്തിയാക്കി. ഇതിനൊപ്പം ലക്ഷദ്വീപിലും പ്രതിരോധ സംവിധാനങ്ങൾ ഒരുക്കാൻ ഇന്ത്യ നീക്കം തുടങ്ങി. മാലദ്വീപിനോട് ഏറ്റവും അടുത്തുകിടക്കുന്ന മിനിക്കോയി ദ്വീപിൽ ഐഎൻഎസ് ജടായു എന്ന പേരിൽ നാവികത്താവളം ഈ പദ്ധതികളുടെ ഭാഗമാണ്.

മുയിസുവിന്റെ ഇന്ത്യാ വിരുദ്ധതയ്ക്ക് പരസ്യ പ്രതികരണം നടത്തിയില്ലെങ്കിലും ദ്വീപിനു നൽകി വന്ന സേവനങ്ങൾ ഇന്ത്യ തുടർന്നു. നയതന്ത്ര സംഘർഷത്തിന്റെ ആദ്യ നാളുകളിൽ ഭക്ഷ്യധാന്യങ്ങളടക്കം മറ്റു രാജ്യങ്ങളിൽനിന്ന് ഇറക്കുമതി ചെയ്യാൻ മാലദ്വീപ് ആലോചിച്ചിരുന്നു. എന്നാൽ ഇത് ഫലവത്തായില്ല. ഇതിനിടെ ചൈനീസ് കടം വാങ്ങിക്കൂട്ടിയതു വഴി രാജ്യത്തിന്റെ സാമ്പത്തിക നില പരുങ്ങലിലാവുമെന്ന് മാലദ്വീപിനു രാജ്യാന്തര നാണയ നിധി മുന്നറിയിപ്പ് നൽകി. ഇതും ഇന്ത്യയെ പിണക്കാതിരിക്കാൻ മുയിസുവിന് മേൽ സമ്മർദം കൂട്ടി. ജൂണ്‍ ആദ്യവാരം പ്രധാനമന്ത്രി നരേന്ദ്ര മോദിയുടെ സത്യപ്രതിജ്ഞാ ചടങ്ങിൽ മുയിസു പങ്കെടുത്തതും ഇതിനോടൊപ്പം ചേർത്തുവായിക്കണം.

ഭക്ഷ്യസാധനങ്ങളടക്കം ദ്വീപ് ആവശ്യപ്പെട്ട അളവിൽ ഇന്ത്യയിൽനിന്ന് കയറ്റുമതി തടസ്സമില്ലാതെ തുടർന്നു. മാലദ്വീപിന്റെ കടം തിരിച്ചടവ് ലഘൂകരിച്ച് പിന്തുണ നൽകിയതിനും മുയിസു പരസ്യമായി ഇന്ത്യയോട് നന്ദി പറഞ്ഞു. ജൂലൈ 27ന് മാലദ്വീപിന്റെ 59-ാം സ്വാതന്ത്ര്യദിന ചടങ്ങിൽ പങ്കെടുക്കവേ, ഇന്ത്യയുമായി ശക്തമായ ബന്ധം സ്ഥാപിക്കുമെന്നും അദ്ദേഹം പ്രഖ്യാപിച്ചു. ദ്വീപു രാഷ്ട്രത്തിന് ഇന്ത്യയിൽനിന്നുള്ള 400 കോടി രൂപയുടെ സഹായത്തിനും മാലദ്വീപ് പ്രസിഡന്റ് പരസ്യമായി നന്ദി പറഞ്ഞു. ഇതിനു പിന്നാലെയാണ് അഞ്ച് ദിവസത്തെ പര്യടനത്തിനായി ഒക്ടോബർ ആറിന് മുയിസു ഡൽഹിയിലേക്ക് പറന്നത്. മുംബൈ, ബെംഗളൂരു തുടങ്ങിയ നഗരങ്ങളിലും മാലദ്വീപ് പ്രസിഡന്റ് സന്ദർശനം നടത്തും. ഇവിടങ്ങളിലെ ബിസിനസ് പരിപാടികളിലും പങ്കെടുക്കുന്നുണ്ട്.

. മോദിയുടെ നയതന്ത്ര പരാജയം?

വിദേശനയങ്ങളിലെ യഥാർഥ പരീക്ഷണം അയൽക്കാരെ കൈകാര്യം ചെയ്യുകയെന്നതാണെന്ന് പറഞ്ഞത് മുൻ പ്രധാനമന്ത്രി ഡോ. മൻമോഹൻ സിങ്ങാണ്. ‘അയൽരാജ്യങ്ങൾക്ക് ആദ്യ പരിഗണന’യെന്ന നരേന്ദ്ര മോദി സർക്കാരിന്റെ നയതന്ത്രം പരാജയമായിരുന്നു എന്നതിന്റെ തെളിവാണ് മാലദ്വീപ്. എന്നും ഇന്ത്യയുടെ തണൽ ആഗ്രഹിച്ച കുഞ്ഞൻ ദ്വീപുകൾ കൂട്ടിച്ചേർത്തുണ്ടാക്കിയ മാലദ്വീപിന് ഇന്ത്യയെ വെറുക്കാൻ കഴിയുമായിരുന്നില്ല. കാരണം കുടിവെള്ളം മുതൽ അവശ്യഘട്ടങ്ങളിൽ ചികിത്സാ സഹായംവരെ എത്തിച്ചിരുന്നത് ഇന്ത്യയായിരുന്നു. എന്നിട്ടും മാലദ്വീപ് എന്തുകൊണ്ട് ഇന്ത്യയുമായി പിണങ്ങി എന്നതും ചൈനയുടെ ആയുധമായി മാറി എന്നതും പരിശോധിക്കപ്പെടേണ്ടതാണ്.

മുയിസുവിന് മുൻപും മാലദ്വീപിൽ ചൈന അനുകൂലിയായ അബ്ദുല്ല യമീൻ അധികാരം പിടിച്ചിട്ടുണ്ട്. പക്ഷേ 2013 മുതൽ 2018 വരെ യമീൻ ഭരിച്ചപ്പോൾ ഇല്ലാത്ത തലവേദനകളാണ് ഒരു വർഷത്തിനകം മുയിസു ഇന്ത്യയ്ക്ക് നൽകിയത്. ദക്ഷിണേഷ്യയിലെ ഇന്ത്യയുടെ ‘വല്യേട്ടൻ’ നിലപാടുകൾ അയൽരാജ്യങ്ങളെ പിണക്കുന്നു എന്ന ആരോപണവും കേന്ദ്ര സർക്കാരിനു മേലുണ്ട്. ഇന്ത്യയുമായുള്ള ബന്ധം വഷളായതിനു പിന്നാലെ ഡൽഹി സന്ദർശനത്തിന് മാലദ്വീപ് പ്രസിഡന്റ് ശ്രമിച്ചെങ്കിലും അനുമതി ലഭിക്കാത്തതാണ് സന്ദർശനം നീണ്ടുപോയതിന് കാരണമായതെന്നും റിപ്പോർട്ടുകളുണ്ടായിരുന്നു.

അയല്‍പക്കത്തെ ചെറുതും വലുതുമായ അയൽരാജ്യങ്ങളോട് വലുപ്പച്ചെറുപ്പമില്ലാതെ ഇടപെടുകയാണ് ഇന്ത്യ ചെയ്യേണ്ടത്. മേഖലയിൽ ഐക്യവും സമാധാനവും നിലനിർത്തുന്നതിനായി രൂപീകരിച്ച ‘സാർക്ക്’ പോലെയുള്ള രാജ്യാന്തര സംവിധാനങ്ങൾ പോലും തുരുമ്പെടുത്തു തുടങ്ങി. മൂന്നാമതും അധികാരത്തിലെത്തി മാസം നാലായിട്ടും നരേന്ദ്ര മോദി ഇനിയുമൊരു അയൽരാജ്യത്തു പര്യടനം നടത്തിയിട്ടില്ല. അതേസമയം അഞ്ച് വിദേശ യാത്രകളിലായി എട്ട് രാജ്യങ്ങളിൽ സന്ദർശം നടത്തി.