ബിജെപിയെ ജയിപ്പിച്ചത് 5 സീറ്റിലെ ‘തോൽവി’; ഇനിയില്ല ഹരിയാനയിൽ ‘ആയാറാം ഗയാറാം’; ജാട്ട് കോട്ടകളിലും നില തെറ്റി

‘ആയാറാം ഗയാറാം’ രാഷ്ട്രീയത്തെ ഹരിയാന കൈവിട്ടിരിക്കുന്നു. പ്രവചനങ്ങളെയെല്ലാം അട്ടിമറിച്ച് പരസഹായമില്ലാതെ ഭരിക്കാൻ ബിജെപിക്ക് ഹരിയാന ഹാട്രിക് വിജയം നൽകുമ്പോൾ, പതിറ്റാണ്ടുകളായുള്ള കാലുമാറ്റ രാഷ്ട്രീയത്തിന്റെ പേരുദോഷത്തിനു കൂടിയാണ് അന്ത്യമാവുന്നത്. കോൺഗ്രസിന്റെ മുന്നേറ്റം പ്രവചിച്ച എക്സിറ്റ് പോളുകളെയെല്ലാം നിഷ്പ്രഭമാക്കിയാണ് ബിജെപിയുടെ ചരിത്രത്തിലെ ഏറ്റവും വലിയ മുന്നേറ്റം. ജമ്മു കശ്മീരിലെ ഭേദപ്പെട്ട പ്രകടനവും ബിജെപിക്ക് ആശ്വാസം നൽകുമ്പോൾ, ഹരിയാനയിലെ പരാജയം കോൺഗ്രസിന് അപ്രതീക്ഷിത തിരിച്ചടിയാണ്. എക്സിറ്റ് പോളുകൾ ഒരിക്കൽ കൂടി തകർന്നു വീഴുന്നതും ഹരിയാനയിൽ കണ്ടു.

2014ൽ നേടിയ 47 സീറ്റും മറികടന്ന് വ്യക്തമായ ഭൂരിപക്ഷം ഹരിയാനയിൽ ഉറപ്പിക്കാനായത് നരേന്ദ്ര മോദിക്കും ബിജെപി നേതൃത്വത്തിനും നൽകുന്ന ആത്മവിശ്വാസം ചെറുതല്ല. തൊട്ടടുത്ത് തലസ്ഥാനമായ ഡൽഹിയിൽ 2025ലും മഹാരാഷ്ട്രയിലും ജാർഖണ്ഡിലും 2024ലും നടക്കുന്ന തിരഞ്ഞെടുപ്പിനെ നേരിടാൻ ബിജെപിക്കു കൂടുതൽ കരുത്തും ആത്മവിശ്വാസവും പകരുന്നതുകൂടിയാണ് ഹരിയാനയിലെ തുടർച്ചയായ മൂന്നാം ജയം. ലോക്സഭാ തിരഞ്ഞെടുപ്പിൽ ഹരിയാനയിൽ തകർന്നടിഞ്ഞ ബിജെപി മാസങ്ങൾക്കിപ്പുറം നടന്ന നിയമസഭാ തിരഞ്ഞെടുപ്പിൽ കരുത്തുകാട്ടിയതെങ്ങനെയാണ്? ഗ്രൂപ്പ് പോരാണോ കോൺഗ്രസിന് വിനയായത്?

∙ കോൺഗ്രസിന് ആശ്വാസമായി വിനേഷ്

മോദിപ്രഭാവം അസ്തമിച്ചെന്നും ഒരു പതിറ്റാണ്ട് തുടർച്ചയായി ബിജെപി ഭരിച്ച ഹരിയാനയിൽ ശക്തമായ ഭരണവിരുദ്ധ വികാരം ഉണ്ടെന്നുമായിരുന്നു മുഖ്യ പ്രതിപക്ഷമായ കോൺഗ്രസും മാധ്യമങ്ങളും മിക്ക നിരീക്ഷകരും വിലയിരുത്തിയിരുന്നത്. എക്സിറ്റ് പോൾ ഫലം വന്നപ്പോൾ അത് ശരിവയ്ക്കുന്നതായിരുന്നു ബിജെപി നേതൃത്വത്തിന്റെ പോലും മൗനം. എന്നാൽ തൊഴിലില്ലായ്മ, കാർഷിക വസ്തുക്കൾക്ക് മിനിമം താങ്ങുവില തുടങ്ങിയ വിഷയങ്ങളുമായി ബന്ധപ്പെട്ട് കോൺഗ്രസ് ഉയർത്തിയ മുദ്രാവാക്യങ്ങളെയും വീണ്ടുമുയർന്നു വന്ന കർഷക സമരത്തെയും ഗുസ്തി താരങ്ങളുടെ എതിർപ്പിനെയുമെല്ലാം മറികടന്ന് അദ്ഭുത വിജയം നേടാൻ ബിജെപിക്കായി. കോൺഗ്രസും ബിജെപിയും തമ്മിൽ നേർക്കുനേർ പോരാട്ടമായി മാറിയപ്പോൾ മറ്റു കക്ഷികൾ നിഷ്പ്രഭമാവുന്നതും ഹരിയാനയിൽ കണ്ടു.

ജാട്ട് കോട്ടകളിൽ ശക്തരെന്നു കരുതിയ ചൗട്ടാല കുടുംബത്തിന്റെ ഇന്ത്യൻ നാഷനൽ ലോക്ദളും ജനനായക് ജനതാ പാർട്ടിയും തകർന്നടിഞ്ഞു. ഹരിയാനയിൽ വൻ പ്രതീക്ഷ ഉയർത്തിയ ആം ആദ്മി പാർട്ടിക്ക് ഒരു ചലനവുമുണ്ടാക്കാനായില്ല. ഈ പാർട്ടികൾ പിടിച്ച നാമമാത്ര വോട്ടുകൾ ഒരു മണ്ഡലത്തിലെയും ജയപരാജയത്തെ ബാധിച്ചില്ലെന്നതും ശ്രദ്ധേയമാണ്. ഐഎൻഎൽഡി 4 ശതമാനം വോട്ടു നേടിയപ്പോൾ ആം ആദ്മിക്ക് കിട്ടിയത് 1.75 ശതമാനവും ജെജെപിക്ക് ഒരു ശതമാനത്തിൽ താഴെയും മാത്രമാണ്.

കോൺഗ്രസിലെ ഗ്രൂപ്പ് പോര് പരാജയത്തിനു കാരണമായി എന്ന് ഒരു വിഭാഗം വാദിക്കുമ്പോൾ, ബിജെപിയും വിമതരെക്കൊണ്ട് പൊറുതിമുട്ടിയിരുന്നു എന്നതാണ് യാഥാർഥ്യം. ഒരു ഡസനോളം വിമതരെയാണ് ബിജെപി പുറത്താക്കിയത്. എന്നാൽ ഇതൊന്നും തിരഞ്ഞെടുപ്പു ഫലത്തെ ബാധിച്ചില്ലെന്നതാണ് കണക്കുകൾ നൽകുന്ന സൂചന. കോൺഗ്രസിന്റെ പരാജയത്തിനിടയിലും ഗുസ്തി താരം വിനേഷ് ഫോഗട്ടിന്റെ വിജയം തിളക്കമുള്ളതാണ്. ആദ്യം പിന്നിലായിരുന്ന ഫോഗട്ട് അവസാന മൂന്ന് റൗണ്ടിലാണ് മുന്നേറി വിജയം ഉറപ്പിച്ചത്. കോൺഗ്രസ് പിന്തുണയിൽ വലിയ വിജയ പ്രതീക്ഷവച്ച് ഭിവാനിൽ മത്സരിച്ച സിപിഎമ്മിന് ജയിച്ചു കയറാനായില്ല.

എല്ലനാബാദിൽ അഭയ് ചൗട്ടാല രണ്ടാമത് എത്തിയതൊഴിച്ചാൽ അവരുടെ മറ്റൊരു സ്ഥാനാർഥിയും രണ്ട് ശതമാനം വോട്ട് പോലും നേടിയില്ല. ആം ആദ്മിയുടെ മിക്ക സ്ഥാനാർഥികൾക്കും കിട്ടിയത് ശരാശരി 1000 വോട്ടുമാത്രമാണ്. ജനനായക് ജനതാപാർട്ടിയുടെ സ്ഥിതിയും വ്യത്യസ്തമല്ല. ഫലത്തിൽ ഹരിയാനയുടെ ചരിത്രത്തിലാദ്യമായി നേരിട്ടുള്ള തിരഞ്ഞെടുപ്പു പോരാട്ടത്തിന് സാക്ഷ്യം വഹിച്ചെന്നു വിലയിരുത്താം.

∙ ലോക്സഭയിൽ നിന്ന് പഠിച്ച് ബിജെപി

ലോക്സഭാ തിരഞ്ഞെടുപ്പിൽ അഞ്ചു വീതം സീറ്റാണ് കോൺഗ്രസും ബിജെപിയും നേടിയത്. അന്ന് 40 നിയമസഭാ സീറ്റിൽ മുന്നേറിയ ബിജെപിക്ക് അത് 50ലേക്ക് ഉയർത്താൻ കഴിഞ്ഞപ്പോൾ എഎപിയ്ക്കൊപ്പം 50 സീറ്റിൽ മുന്നേറിയ കോൺഗ്രസിന് ഇത്തവണ വൻ തിരിച്ചടിയാണ് നേരിട്ടത്. 2014ൽ ലോക്സഭാ തിരഞ്ഞെടുപ്പിന് പിന്നാലെ നിയമസഭയിലേക്ക് വ്യക്തമായ ഭൂരിപക്ഷം നേടിയാണ് ഹരിയാനയിൽ ബിജെപി കുതിപ്പു തുടങ്ങിയത്. 90ൽ 47 സീറ്റ് നേടിയ ബിജെപി ലോക്സഭാ തിരഞ്ഞെടുപ്പിൽ 2014ൽ ഏഴും 2019ൽ 10 സീറ്റും സ്വന്തമാക്കിയാണ് ഹരിയാനയിൽ അടിത്തറ ഉറപ്പിച്ചത്. എന്നാൽ 2024ലെ ലോക്സഭാ തിരഞ്ഞെടുപ്പിൽ 5 സീറ്റിലേക്ക് കൂപ്പുകുത്തിയപ്പോഴുണ്ടായ തിരിച്ചറിവിൽ നിന്നാണ് ഇപ്പോഴത്തെ വിജയത്തിന് ബിജെപി അടിത്തറയിട്ടതെന്നു വേണം കരുതാൻ.