‘അരഫ്യൂസൂരി’ അദാനി, ഉടനെത്തി മോദിയുടെ രക്ഷാകരം; അയലത്തും സീൻ ഡാർക്കാണ്; യുഎസിലെ കേസ് വിരട്ടലാകുമോ?

∙ വലിയ ഊർജപ്രതിസന്ധിയിൽ ബംഗ്ലദേശ്

ആഭ്യന്തര സംഘർഷം രൂക്ഷമായ ബംഗ്ലദേശിൽ ഇടക്കാല സർക്കാരിനെ സാമ്പത്തിക ബുദ്ധിമുട്ടുകൾ വല്ലാതെ വലയ്ക്കുന്നുണ്ട്. രാഷ്ട്രീയ അരക്ഷിതാവസ്ഥയിൽപ്പെട്ടുഴലുന്ന രാജ്യത്തിനു കടമായി പണം ശേഖരിക്കാൻ വിദേശ ഏജൻസികളുമായി ചർച്ചയിലാണ് സർക്കാർ. വിദേശ നാണ്യശേഖരം അനുദിനം കുറയുന്നതും കറൻസിയുടെ മൂല്യത്തകർച്ചയും രാജ്യത്തിന്റെ സാമ്പത്തിക സ്ഥിതി ദുരിതത്തിലാക്കി. ഇതേത്തുടർന്ന് വിദേശ ഇടപാടുകളിലെ പ്രതിമാസ പണംചെലവഴിക്കൽ 2-5 കോടി ഡോളറാക്കി രാജ്യത്തെ ഇടക്കാല സർക്കാർ വെട്ടിക്കുറയ്ക്കുകയും ചെയ്തിരിക്കുന്നു.

വൈദ്യുത പ്രതിസന്ധിയിൽ എക്കാലത്തെയും ഗുരുതര അവസ്ഥയിലൂടെയാണ് ബംഗ്ലദേശ് കടന്നു പോകുന്നത്. കൽക്കരി ഇന്ധനമാക്കായിട്ടുള്ള രാജ്യത്തെ ഏഴോളം താപനിലയങ്ങളിൽ ഉൽപാദനം 7099 മെഗാവാട്ടിൽ നിന്ന് 3199 മെഗാവാട്ടായി കുറച്ചു. കൽക്കരി വാങ്ങുന്നതിനായി വിദേശനാണ്യം ചെലവഴിക്കാൻ ഇല്ലാത്തതാണ് കാരണം. പ്രകൃതി വാതകത്തിൽ പ്രവർത്തിക്കുന്ന പ്ലാന്റുകളിലും അവസ്ഥ സമാനമാണ്. ഇതിന്റെ ഇറക്കുമതിയും വെട്ടിക്കുറച്ചിരുന്നു. ഇതോടെ ഇന്ത്യയിൽനിന്നും വൈദ്യുതി എത്തിയില്ലെങ്കിൽ ബംഗ്ലദേശ് വലിയ പ്രതിസന്ധിയിലാവുമെന്ന അവസ്ഥയിലുമായി.

നിലവിൽ ബംഗ്ലദേശിന് വൈദ്യുതി ലഭിക്കുന്ന വലിയ പ്ലാന്റ് ഇന്ത്യയിലെ ഗോഡ്ഡയാണ്. അവിടെയാണ് ഉല്‍പാദനം പകുതിയാക്കി കുറച്ചത്. ഗോഡ്ഡ പ്ലാന്റിലെ വൈദ്യുതി ബംഗ്ലദേശിന്റെ മൊത്തം ആവശ്യത്തിന്റെ പത്ത് ശതമാനം നികത്താൻ ശേഷിയുള്ളതായിരുന്നു. എന്നാൽ രാജ്യത്തെ പ്ലാന്റുകളുടെ പ്രവർത്തനം കുറഞ്ഞതോടെ ഇന്ത്യയിൽനിന്നുള്ള വൈദ്യുതിയുടെ ആവശ്യം വർധിച്ചു. അദാനി പവറിന് പുറമേ എൻടിപിസി, പിടിസി എന്നിവയുൾപ്പെടെയുള്ള ഇന്ത്യൻ പൊതുമേഖല സ്ഥാപനങ്ങളും ബംഗ്ലദേശിന് വൈദ്യുതി നൽകുന്നുണ്ട്.

ഗോഡ്ഡയിൽനിന്നുള്ള വൈദ്യുതി പാതിയായതോടെ ഗ്രാമീണമേഖലയിലടക്കം മണിക്കൂറുകൾ നീണ്ട പവർകട്ടാണ് ബംഗ്ലദേശിലുള്ളത്. ഇതുകാരണം പ്രാദേശിക വ്യവസായങ്ങളും സംഭരണ കേന്ദ്രങ്ങളും വലിയ പ്രതിസന്ധിയിലാണ്. സംഭരണശാലകളുടെ പരിപാലനം ചെലവേറിയതായി മാറി. ഊർജക്ഷാമം വസ്ത്രവ്യവസായത്തെയും ബാധിച്ചു തുടങ്ങിയിട്ടുണ്ട്. ജീൻസ് ഉൾപ്പെടെയുള്ള വസ്ത്രം കയറ്റുമതിയിലൂടെയാണ് വൻതോതിൽ ബംഗ്ലദേശ് വിദേശനാണ്യം നേടിയെടുക്കുന്നത്.

∙ ഹസീനയും അദാനിയും: വഷളാകുമോ അയൽ ബന്ധം?

ആഭ്യന്തര കലഹത്തെത്തുടർന്ന് ഇന്ത്യയിലേക്ക് രക്ഷതേടിയെത്തിയ മുൻ ഭരണാധികാരി ഷെയ്ഖ് ഹസീനയെ വിട്ടുനൽകണമെന്ന ആവശ്യം ബംഗ്ലദേശിൽനിന്ന് ഉയരുന്നുണ്ട്. ഒട്ടേറെ കേസുകളിൽ ഹസീനയെ പ്രതിചേർത്തിരിക്കുകയാണ് ഇടക്കാല സർക്കാർ. ഇന്ത്യ ഹസീനയെ വിട്ടുനൽകിയാൽ ശിഷ്ടകാലം അവർ ജയിലിലാകുമെന്നതും ഉറപ്പാണ്. ഇടക്കാല സർക്കാരിന്റെ ഈ ആവശ്യത്തിനോട് ഇന്ത്യ പ്രതികരണമൊന്നും നടത്തിയിട്ടുമില്ല. അതേസമയം അദാനിക്ക് ബംഗ്ലദേശിൽനിന്ന് ബുദ്ധിമുട്ടുണ്ടാകുമെന്ന് കണ്ടപ്പോൾ കേന്ദ്രം ആവശ്യനടപടികൾ സ്വീകരിക്കുകയും ചെയ്തു. ഇന്ത്യൻ ഗ്രിഡിൽ പ്രവേശിക്കാൻ അനുമതി നൽകിയത് ഫലത്തിൽ ബംഗ്ലദേശിനുള്ള ഇന്ത്യൻ മറുപടിയായും മാറി. അദാനിയെ സംരക്ഷിക്കുമെന്ന സന്ദേശവും ഇതിലുണ്ട്.

∙ ഗോഡ്ഡയും വിവാദങ്ങളും

അദാനിയുടെ ഗോഡ്ഡയ്ക്കു വേണ്ടി കേന്ദ്രസർക്കാർ പരിധിവിട്ട് സഹായങ്ങൾ നൽകുന്നുവെന്ന് മുൻപേ ആരോപണം ഉയർന്നിട്ടുണ്ട്. പ്ലാന്റ് ഉൾപ്പെട്ട 425 ഹെക്ടർ സ്ഥലം പ്രത്യേക സാമ്പത്തിക മേഖലയാക്കി മാറ്റി. ഒട്ടേറെ നികുതി ഇളവുകളും ലഭ്യമാക്കി. പൂർണമായും വൈദ്യുതി കയറ്റുമതി ചെയ്യുന്നു എന്ന പേരിലായിരുന്നു ഇളവുകൾ. കസ്റ്റംസ് തീരുവകളില്‍ ‘ക്ലീൻ എനർജി’ സെസിന് ഉൾപ്പെടെ ഇളവ് നൽകി. ഈ പദ്ധതിയുടെ ചെലവിന്റെ 72 ശതമാനവും വായ്പകളിലൂടെയാണ് കമ്പനി സ്വന്തമാക്കിയത്.