നിസ്സാരമല്ല തക്കാളിപ്പനിക്കു ശേഷം വരുന്ന പാടുകൾ; എപ്പോഴും മരുന്നിനെ മാത്രം സംശയിക്കല്ലേ; വേദനയില്ലെങ്കിലും ആ കുമിളകൾ ജീവനെടുത്തേക്കാം

ദേഹത്തു കുമിളകളും തിണർപ്പുകളുമൊക്കെയായി കുട്ടികളെ ബാധിക്കുന്ന തക്കാളിപ്പനിയും (ഹാൻഡ് ഫൂട്ട് ആൻഡ് മൗത്ത് ഡിസീസ്) പ്രശ്നക്കാരാണ്. തക്കാളിപ്പനി ബാധിച്ച ശേഷം കുട്ടികളിൽ നഖങ്ങൾ ഇളകിപ്പോകുന്നുണ്ട്. സോറിയാസിസ് ഇതുവരെ വന്നിട്ടില്ലാത്ത കുട്ടികളിൽ പനിക്കുശേഷം വെള്ളത്തുള്ളിയുടെ അത്ര വലുപ്പത്തിൽ ചർമം കട്ടിയായി പൊറ്റപിടിച്ച് ഇളകുന്നതുപോലെയുള്ള ‘ഗട്ടേറ്റ് സോറിയാസിസ്’ ബാധിക്കാറുണ്ട്.  മുടി കൊഴിച്ചിലും വ്യാപകമാണ്.

∙ വെള്ളപ്പാണ്ടിനു ചികിത്സയുണ്ട്

ചർമത്തിനു നിറം കൊടുക്കുന്ന കോശങ്ങളാണു മെലനോസൈറ്റ്സ്. ഇതു മെലാനിൻ എന്ന വർണകമുണ്ടാക്കാൻ പരാജയപ്പെടുന്ന അവസ്ഥയാണു വെള്ളപ്പാണ്ട്. നമ്മുടെ ശരീരത്തിലെ ആന്റിബോഡികൾ തന്നെ മെലനോസൈറ്റ്സ് എന്ന നല്ല കോശങ്ങളെ നശിപ്പിച്ചു കളയുന്ന തരം ഓട്ടോ ഇമ്യൂൺ ഡിസീസ് ആണിത്. മെലനോസൈറ്റ്സ് കോശങ്ങൾ നിറമുണ്ടാക്കാത്തപ്പോൾ അതിനു ചുറ്റുമുള്ള കോശങ്ങൾക്കു നിറം നഷ്ടപ്പെടും. വേദനയോ ചൊറിച്ചിലോ ജീവാപായമോ ഉണ്ടാകാത്ത രോഗമാണിത്. പകരുകയുമില്ല. പക്ഷേ, ഈ പാടുകൾ മൃഗങ്ങളുടെ ദേഹത്താണെങ്കിൽ എല്ലാവരും പറയും ‘എന്തു ഭംഗി!’. മനുഷ്യരിലാകുമ്പോൾ കാഴ്ചപ്പാടു മാറും; മുഖങ്ങൾ ചുളിയും. സമൂഹത്തിന്റെ ഈ കാഴ്ചപ്പാട് മാറ്റിയാൽത്തന്നെ രോഗികൾക്ക് ആശ്വാസമേകുന്ന അവസ്ഥയാണു വെള്ളപ്പാണ്ട്. അവർ നേരിടുന്ന മാനസിക സമ്മർദവും വിഷാദവും കുറയ്ക്കാനുമാവും.

വെള്ളപ്പാണ്ട് ജനിതക രോഗവുമാണ്. എന്നാൽ അടുത്ത തലമുറയിലേക്കു പകരാ‍ൻ 30% സാധ്യത മാത്രമേയുള്ളൂ. ഇപ്പോൾ വളരെ ഫലപ്രദമായ ചികിത്സയുമുണ്ട്. പലയിടങ്ങളിൽ ചികിത്സ തേടി അതൊന്നും പൂർത്തിയാക്കാതെ, രോഗം വ്യാപിക്കാനിടയാക്കരുത് എന്നതു മാത്രമാണു പ്രധാനം. തുടക്കത്തിൽതന്നെ  മികച്ച ചികിത്സ തേടണം. നിറം തിരികെവരാനുള്ള ചികിത്സാഫലം പലരിലും വ്യത്യാസപ്പെട്ടിരിക്കും. രോമകൂപങ്ങളുള്ളയിടത്തു നിറം പെട്ടെന്നു വരും. പക്ഷേ, ചുണ്ടുകൾ, വിരലുകളുടെ അറ്റം തുടങ്ങിയയിടങ്ങളിൽ നിറം വയ്ക്കാൻ വൈകും. ഗുളികകൾ, പുരട്ടാനുള്ള മരുന്നുകൾ എന്നിവ ഉൾപ്പെട്ടതാണു പ്രാഥമികചികിത്സ. നിറം പടരുന്നില്ല എന്നതാണ് ആദ്യഫലം. ചിലയിടങ്ങളിൽ നിറം തിരികെയെത്തി, പക്ഷേ ചിലയിടങ്ങളിൽ പൊട്ടുകൾ പോലെ നിറമില്ലാതെ കാണുന്നു എങ്കിൽ ശസ്ത്രക്രിയയാണു പ്രതിവിധി.

ഇതു  പലതരത്തിലുണ്ട്. ഏതു സ്ഥലത്താണു ശസ്ത്രക്രിയ എന്നത് അനുസരിച്ചു വ്യത്യാസപ്പെട്ടിരിക്കും. വിരലിന് അറ്റത്തൊക്കെ ആണെങ്കിൽ ചെറിയ തുണ്ടുകൾ ആക്കി തൊലി മാറ്റിവയ്ക്കുകയാണു ചെയ്യുക. മുഖത്താണെങ്കിൽ അങ്ങനെ ചെയ്താൽ അഭംഗിയാണ്. അതിനായി സെൽ ഗ്രാഫ്റ്റിങ് ആണു ചെയ്യുക. 

∙ എല്ലാ പാടും കുഷ്ഠമാണോ

ശരീരത്തിൽ വെള്ളപ്പാടുണ്ട്, കുഷ്ഠരോഗമാണോ എന്ന് ആധിയുള്ളവരേറെയാണ്. എല്ലാ വെള്ളപ്പാടും കുഷ്ഠരോഗമാവില്ല. കുട്ടികളിൽ കൂടുതലായി കണ്ടുവരുന്ന പിട്രിയാസിസ് ആൽബ എന്ന അവസ്ഥയും ഇങ്ങനെ തെറ്റിദ്ധരിക്കപ്പെടുന്നുണ്ട്. ചർമം വരണ്ടതാകുന്നതുകൊണ്ടാണ് ഇങ്ങനെയുള്ള വെളുത്തതോ ഇളം ചുമപ്പോ ആയ പാടുകൾ പ്രത്യക്ഷപ്പെടുന്നത്. പച്ചക്കറികൾ ധാരാളം നൽകുക എന്നതാണ് ആദ്യത്തെ പോംവഴി. പാടുകളുള്ളയിടം കറുപ്പിക്കാനുള്ള ഓയിന്റ്മെന്റുകൾ, ചർമത്തിന്റെ വരൾച്ച ഒഴിവാക്കാനുള്ള മാർഗങ്ങൾ, മൾട്ടി വിറ്റാമിനുകൾ എന്നിവയുൾപ്പെട്ടതാണു ചികിത്സ.

ഫംഗസ് കാരണമുള്ള അണുബാധകളായ തേമൽ, പൊരികണ്ണി, ചുണങ്ങ് എന്നിവയും കുഷ്ഠമായി തെറ്റിദ്ധരിക്കപ്പെടാറുണ്ട്. ചിലർക്കു തലയിൽ താരനുണ്ടെങ്കിലും മുഖത്തു വെള്ളപ്പാട് വരാം. പക്ഷേ, കുഷ്ഠരോഗത്തിന്റെ ആരംഭത്തിലുണ്ടാകുന്ന ചെറിയ പാടുകൾ ശ്രദ്ധിക്കണം. ഇത് ‘ഇൻഡിറ്റർമിനേറ്റ് ലെപ്രസി’ എന്നറിയപ്പെടുന്നു. ചിലപ്പോൾ കാലങ്ങളോളം ഈ പാട് അങ്ങനെത്തന്നെ നിലനിൽക്കാം. കുടുംബത്തിൽ ആർക്കെങ്കിലും കുഷ്ഠരോഗം ഉണ്ടെങ്കിൽ കൂടുതൽ ശ്രദ്ധിക്കണം. പാട് വ്യാപിക്കുന്നുണ്ടോ ഇല്ലയോ എന്നതു ശ്രദ്ധിക്കുകയും പരിശോധനയ്ക്കു വിധേയരാകുകയും വേണം.

∙ ചർമം പേടിക്കും മഞ്ഞുകാലം

മഞ്ഞു കൂടുതലുള്ള മാസങ്ങളാണ് ഇനി. വരണ്ട ചർമക്കാരെ ഏറ്റവും പേടിപ്പിക്കുന്ന കാലം. ചർമത്തിലെ ഈർപ്പം ഒന്നുകൂടി കുറയുന്നതോടെ നിലവിലെ പ്രശ്നങ്ങൾ കൂടും. ആദ്യം പ്രശ്നം വരുന്നതു ചുണ്ടുകൾക്കായിരിക്കും. ലിപിഡ് കണ്ടന്റ് ഉള്ള മോയ്സ്ചറൈസർ ഇട്ടാൽ പ്രശ്നം ഒഴിവാക്കാം. മുഖത്തു ഫെയ്സ് മോയ്സ്ചറൈസർ തന്നെ ഇടണം. മേക്കപ്പിടുന്നതും ഇതിനുമീതെ വേണം. വരണ്ട ചർമക്കാർ മഞ്ഞുള്ള കാലത്ത് ഒരുപാടു നേരമെടുത്തു കുളിക്കരുത്. 5 മിനിറ്റിലോ 10 മിനിറ്റിലോ അവസാനിപ്പിക്കണം. ചെറിയ ചൂടുവെള്ളത്തിലോ പച്ചവെള്ളത്തിലോ കുളിക്കുക. നന്നായി ചൂടായ വെള്ളത്തിൽ കുളി വേണ്ട.