ലോഡ്ജിൽ താമസിച്ചത് തലാൽ തെളിവാക്കി; ‘മുഖത്ത് തുപ്പി, കത്തികൊണ്ട് കുത്തി’; നിമിഷപ്രിയയ്ക്ക് മുൻപിൽ ഇനിയെന്ത്?

∙ സ്വപ്നങ്ങളുമായി വിദേശത്ത്

പാലക്കാട് കൊല്ലങ്കോട് സ്വദേശിയായ നിമിഷപ്രിയ നഴ്സിങ് പഠനം കഴിഞ്ഞ് യെമനിലേക്ക് വിമാനം കയറുന്നത് 2008ലാണ്. അവിടെ സർക്കാരിതര ക്ലിനിക്കുകളിലായിരുന്നു ജോലി. 2011ൽ തൊടുപുഴ സ്വദേശിയായ ടോമി തോമസുമായി നിമിഷയുടെ വിവാഹം നടന്നു. ഖത്തറിൽ ഡ്രൈവറായി ജോലി നോക്കിയിരുന്ന ടോമിയും നിമിഷയ്ക്കൊപ്പം യെമനിലേക്ക് പോയി. പക്ഷേ, ടോമിക്ക് കാര്യമായ ജോലിയൊന്നും ലഭിച്ചില്ല. യെമനിൽ വച്ച് മകൾ മിഷേൽ പിറന്നതോടെ കുഞ്ഞിനെ നോക്കാനായി ഉണ്ടായിരുന്ന ജോലി ടോമിക്ക് ഉപേക്ഷിക്കേണ്ടിയും വന്നു.

ഇതിന് ശേഷമാണ് ഇരുവരുടെയും ജീവിതത്തെ മാറ്റിമറിച്ച സംഭവങ്ങളുണ്ടായത്. ഒരാളുടെ വരുമാനംകൊണ്ട് മാത്രം കുടുംബം മുന്നോട്ട് കൊണ്ടുപോകാൻ കഴിയാത്ത അവസ്ഥയിൽ കഴിയുമ്പോഴാണ്, പ്രായമായ ബന്ധുവിനൊപ്പം നിൽക്കാനാവുമോ എന്ന് ടോമിയോട് നാട്ടിൽനിന്ന് ബന്ധുക്കൾ ചോദിക്കുന്നത്. അവർക്കൊരു സഹായമാവുന്നതിനൊപ്പം തങ്ങളുടെ ചെലവ് കുറയുകയും ചെയ്യുമല്ലോ എന്ന ധാരണയിൽ, ടോമിയും ഒന്നേകാൽ വയസ്സുള്ള മകളും നാട്ടിലേക്ക് മടങ്ങി. വൈകാതെ നിമിഷയും എത്താമെന്നും പിന്നെ മറ്റേതെങ്കിലും രാജ്യത്തേക്ക് ഒരുമിച്ച് പോകാം എന്നുമായിരുന്നു ധാരണ.

∙ ഒപ്പം നിന്ന് തെളിവുകൾ ശേഖരിച്ച തലാൽ

യെമൻ പൗരൻ തലാൽ അബ്ദുമഹ്ദിയുടെ കൊലപാതകത്തിലേക്കും നിമിഷയ്ക്ക് വധശിക്ഷ വിധിക്കുന്നതിലേക്കും നയിച്ച സംഭവങ്ങളുടെ തുടക്കം, യെമനിൽ സ്വന്തമായി ഒരു ക്ലിനിക് തുടങ്ങാം എന്ന ആലോചനയിൽ നിന്നായിരുന്നു. യെമനിലെ പല ക്ലിനിക്കുകളിൽ ജോലി ചെയ്ത് പരിചയമുള്ള നിമിഷപ്രിയയ്ക്ക് സ്വന്തമായി ഒരു ക്ലിനിക് തുടങ്ങിയാൽ എന്തെങ്കിലും ലാഭം നേടാനാവും എന്നതായിരുന്നു പ്രതീക്ഷ. പക്ഷേ, വിദേശ പൗരത്വം ഉള്ള ഒരാൾക്ക് യെമനിൽ അത്തരമൊരു ക്ലിനിക് തുടങ്ങുന്നത് നിയമപരമായി സാധ്യമായിരുന്നില്ല. യെമൻ സ്വദേശിയായ ഒരാളുടെ ലൈസൻസ് ഇക്കാര്യത്തിന് ആവശ്യമായിരുന്നു. നിമിഷ ജോലി ചെയ്തിരുന്ന ക്ലിനിക്കിൽ സ്ഥിരമായി ചികിത്സ തേടിയിരുന്ന തലാൽ അബ്ദുമഹദി സഹായത്തിനെത്തുന്നത് അങ്ങനെയാണ്.

ലൈസൻസ് എടുത്തുതരാമോ എന്ന് ചോദിച്ചപ്പോൾ, ‘അതിനെന്താ ഞാൻ സഹായിക്കാം. നിങ്ങൾ നന്നായി കണ്ടാൽ മതി’ എന്നായിരുന്നു തലാൽ മറുപടി പറഞ്ഞതെന്ന് നിമിഷയുടെ ഭർത്താവ് ടോമി തോമസ് പിന്നീട് മാധ്യമങ്ങളോട് വെളിപ്പെടുത്തിയിട്ടുണ്ട്. ക്ലിനിക്കിനുള്ള നടപടിക്രമങ്ങൾ എല്ലാം പൂർത്തിയാക്കിയശേഷം നിമിഷ നാട്ടിലേക്ക് വരാൻ ഒരുങ്ങിയപ്പോൾ, കേരളം കാണണമെന്ന ആവശ്യവുമായി തലാലും നാട്ടിലെത്തി. ഏതാണ്ട് രണ്ട് മാസത്തോളം നാട്ടിൽ കഴിഞ്ഞ തലാലിനെ അന്ന് ഒരു ലോഡ്ജിലാണ് നിമിഷയുടെ കുടുംബം താമസിപ്പിച്ചിരുന്നത്. തലാലിന്റെ ഭക്ഷണത്തിനും താമസത്തിനും നാട്ടിലെ വിനോദയാത്രകൾക്കുമായി ഏതാണ്ട് രണ്ടുലക്ഷത്തോളം രൂപ അന്ന് നിമിഷയുടെ കുടുംബത്തിന് ചെലവായി. പക്ഷേ, പിന്നീട് നിമിഷയ്ക്ക് എതിരെ ഉപയോഗിക്കാവുന്ന തെളിവുകളാണ് തലാൽ അന്ന് ശേഖരിച്ചുകൊണ്ടിരുന്നതെന്ന് കുടുംബം തിരിച്ചറിഞ്ഞില്ല.

∙ ചതി പറ്റിയത് കരാറിലോ?

നാട്ടിൽ നിന്ന് അന്ന് മടങ്ങിയതിൽപ്പിന്നെ ഭർത്താവും മകളും നിമിഷയെ കണ്ടിട്ടേയില്ല. 2014ൽ മാർച്ചിൽ ടോമിയും മകൾ മിഷേലും യെമനിലേക്ക് എത്താമെന്നും ഏപ്രിലിൽ ക്ലിനിക് തുടങ്ങാമെന്നുമായിരുന്നു പദ്ധതി. പക്ഷേ, അതിനിടെ യെമനിൽ പൊട്ടിപ്പുറപ്പെട്ട യുദ്ധം കണക്കുകൂട്ടലുകൾ തെറ്റിച്ചു. യെമൻ പുതിയ വീസകൾ അനുവദിക്കുന്നത് നിർത്തിവച്ചതോടെ ടോമിക്കും മകൾക്കും നാട്ടിൽതന്നെ തുടരേണ്ടി വന്നു. ഇതിനിടെ നിമിഷ പുതിയ ക്ലിനിക് തുടങ്ങുന്നതിനെതിരെ മുൻപ് ജോലി ചെയ്തിരുന്ന ക്ലിനിക്കിന്റെ ഉടമ പരാതിയുമായി എത്തിയിരുന്നു. ഒടുവിൽ പുതിയ ക്ലിനിക്കിൽ, 33 ശതമാനം നിക്ഷേപം നടത്താമെന്ന് അയാൾ സമ്മതിച്ചു.

ഈ ഉടമ്പടിയോടെ തലാലിന്റെ പിന്തുണയില്ലാതെയും ക്ലിനിക് ആരംഭിക്കാൻ നിമിഷയ്ക്ക് കഴിയുമായിരുന്നു. പക്ഷേ, സഹായിക്കാനെന്ന വ്യാജേന തലാൽ ഒപ്പം നിന്നു. ക്ലിനിക് ആരംഭിക്കുന്നതുമായി ബന്ധപ്പെട്ട് തലാൽ തയാറാക്കിയ രേഖയിൽ 67 ശതമാനം ഓഹരിയും തലാലിന്റെ പേരിലായിരുന്നുവെന്നത് നിമിഷ അറിഞ്ഞില്ല. നിമിഷയുടെ അഭിഭാഷകനും വീട്ടുകാരും പറയുന്നതു പ്രകാരം പിന്നീട് നിമിഷ അനുഭവിക്കേണ്ടി വന്നത് കടുത്ത ശാരീരിക– മാനസിക പീഡനങ്ങളാണ്. നിമിഷ തന്റെ ഭാര്യയാണെന്ന് വ്യാജരേഖകളുണ്ടാക്കി തലാൽ സ്ഥാപിച്ചു. ഭാര്യ എന്ന പേരിലെ കടമകൾ നിർവഹിക്കുന്നില്ലെന്ന് പൊലീസിൽ പരാതിയും നൽകി. ജയിലിൽനിന്ന് നിമിഷ നൽകിയ ഒരു അഭിമുഖത്തിൽ പറയുന്നതനുസരിച്ച്, തലാൽ ക്ലിനിക്കിൽ അക്രമം നടത്തി നിമിഷയുടെ കയ്യിൽ കുത്തി പരുക്കേൽപ്പിക്കുകയും മുഖത്ത് തുപ്പുകയും ചെയ്തിട്ടുണ്ട്.

തലാലിന്റെ കൊലപാതകത്തിൽ നിമിഷയ്ക്ക് പങ്കുണ്ടെന്ന് അംഗീകരിക്കുമ്പോൾ തന്നെയും യെമൻ ഭരണകൂടവും നിയമസംവിധാനവും വേണ്ട സമയത്ത് പിന്തുണ നൽകാതിരുന്നതു കൊണ്ടാണ് അതുണ്ടായതെന്നാണ് കുടുംബത്തിന്റെ വാദം. തലാൽ പിടിച്ചുവച്ച പാസ്പോർട്ട് തിരികെ വാങ്ങാൻ ക്ലിനിക്കിലെ നഴ്സിന്റെ നിർദേശമനുസരിച്ച് ഉറക്കമരുന്ന് കുത്തിവച്ചുവെന്നും മരുന്ന് ഓവർഡോസ് ആയതിനെത്തുടർന്ന് തലാൽ മരണപ്പെടുകയും ചെയ്തുവെന്നാണ് കേസ്. തലാലിന്റെ ശരീരം വെട്ടിമുറിച്ച് കഷണങ്ങളാക്കി ക്ലിനിക്കിലെ നഴ്സായിരുന്ന ഹനാൻ വാട്ടർടാങ്കിൽ ഉപേക്ഷിക്കുകയായിരുന്നു. കൃത്യം നടന്ന് ദിവസങ്ങൾക്കകം തന്നെ നിമിഷപ്രിയയെ യെമൻ ഭരണകൂടം ജയിലിലടയ്ക്കുകയും ചെയ്തു.

∙ വധശിക്ഷയ്ക്ക് കണക്കില്ലാത്ത യെമൻ

വധശിക്ഷ സംബന്ധിച്ച് കടുത്ത നിയമങ്ങൾ നിലനിൽക്കുന്ന രാജ്യമാണ് യെമൻ. രാജ്യത്തിന്റെ പരമാധികാരത്തിനെതിരെ സംസാരിക്കുക, കൊലപാതകം, മയക്കുമരുന്ന് ഉപയോഗം, അവിഹിതം, സ്വവർഗ ലൈംഗിക ബന്ധം, ഇസ്‌ലാം മതം ഉപേക്ഷിക്കുക, വ്യഭിചാരത്തിന് പിന്തുണ നൽകുക എന്നിവയെല്ലാം യെമനിൽ വധശിക്ഷ ലഭിക്കാവുന്ന കുറ്റകൃത്യങ്ങളാണ്. രാജ്യാന്തര നിയമങ്ങൾ അനുസരിച്ച് ഇവയിൽ കൊലപാതകം ഒഴികെയുള്ളതൊന്നും കടുത്ത കുറ്റകൃത്യങ്ങളുടെ പരിധിയിൽപ്പെടുന്നതല്ല. യെമനിലെ നീതിന്യായവ്യവസ്ഥയെപ്പറ്റി മനുഷ്യാവകാശ സംഘടനകൾ പലതവണ വിമർശനം ഉന്നയിച്ചിട്ടുണ്ടെങ്കിലും വധശിക്ഷകളുടെ എണ്ണം കൂടുന്നതായാണ് കണക്കുകൾ. 2023ൽ മാത്രം പതിമൂന്നിലധികം പേരെ യെമൻ തൂക്കിലേറ്റിയിട്ടുണ്ട്.