‘ആ 3 ദിവസത്തെ അന്വേഷണം വഴിതെറ്റിയിരുന്നെങ്കിൽ എല്ലാം പാളിയേനെ’; പെരിയയിൽ പിണറായി ‘പറന്നിറങ്ങിയിട്ടും’ രക്ഷയില്ല; ഗോവിന്ദന്റെ ‘വകുപ്പും’ രക്ഷിച്ചില്ല!

വിധി വന്നതിനു ശേഷം സിപിഎം സംസ്ഥാന സെക്രട്ടറി എം.വി. ഗോവിന്ദന്‍ നടത്തിയ പ്രസ്താവനയില്‍ത്തന്നെ നിരാശ വ്യക്തം. ‘‘പെരിയ കേസിൽ പൊലീസ് കണ്ടെത്തിയതിന് അപ്പുറം സിബിഐ ഒന്നും കണ്ടെത്തിയില്ല. രാഷ്ട്രീയ ഉദ്ദേശ്യം വച്ച് പാർട്ടിക്കാരെയും നേതാക്കളെയും സിബിഐ കേസിൽ ഉൾപ്പെടുത്തി. എന്നാൽ വധക്കേസിൽ ഭാഗമാക്കാൻ കഴിഞ്ഞില്ല. അതിനു വേറെ ചില വകുപ്പുകൾ സിബിഐ ഉപയോഗിച്ചു. കെ.വി.കുഞ്ഞിരാമന്റെ പേരിലുള്ള കുറ്റം അന്വേഷണത്തെ തടസ്സപ്പെടുത്തി എന്നാണ്. യഥാർഥത്തിൽ അന്വേഷണത്തെ സഹായിക്കുകയാണ് അദ്ദേഹം ചെയ്തത്’’ എന്നായിരുന്നു ഗോവിന്ദന്റെ വാക്കുകൾ. 

ഈ പ്രതികരണത്തിൽ പാർട്ടി സെക്രട്ടറി സൂചിപ്പിക്കുന്ന ‘വേറെ ചില വകുപ്പുകൾ’ എന്താണ്? അതാണ് ‘ഐപിസി സെക്‌ഷൻ 225’. കുറ്റകൃത്യം ചെയ്തു എന്ന് ബോധ്യമുള്ള ഒരു പ്രതിയെ പൊലീസിന്റെ നിയമാനുസൃത കസ്റ്റഡിയിൽ നിന്നോ അറസ്റ്റിൽ നിന്നോ ബലം പ്രയോഗിച്ച് മോചിപ്പിക്കാൻ നടത്തുന്ന ശ്രമത്തെ ചെറുക്കുന്നതിനുള്ള സെക്‌ഷനാണിത്. ക്രൈംബ്രാഞ്ച് ആദ്യം സമർപ്പിച്ച കുറ്റപത്രത്തിൽ ഉൾപ്പെടാതിരുന്ന കെ.വി.കുഞ്ഞിരാമൻ, രാഘവൻ വെളുത്തോളി, കെ.വി.ഭാസ്കരൻ എന്നിവർ സിബിഐ സമർപ്പിച്ച കുറ്റപത്രത്തിൽ ഉൾപ്പെടാൻ വഴിയൊരുക്കിയതും ഇതേ ‘ഐപിസി സെക്‌ഷൻ 225’ ആണ്. എങ്ങനെയാണ് ഈ കുറ്റം മറികടക്കാന്‍ പാർട്ടി നേതാക്കൾ ശ്രമം നടത്തിയത്? പെരിയ കേസിനെത്തന്നെ അട്ടിമറിക്കാൻ നടന്ന ശ്രമങ്ങൾ എന്തെല്ലാമാണ്? അതിൽ സർക്കാർ ഇടപെടൽ എന്തിനു വേണ്ടിയായിരുന്നു?

∙ സിബിഐ അടിച്ചു, പിണറായി സർക്കാരിന് മേലുള്ള ആണികൾ

പെരിയ കേസിലെ കുറ്റക്കാർ എന്നു കണ്ടെത്തി പിടികൂടിയ പ്രതികളെ കെ.വി.കുഞ്ഞിരാമൻ ഉൾപ്പെടെയുള്ള സിപിഎം നേതാക്കൾ പൊലീസ് ജീപ്പിൽ നിന്ന് ഇറക്കിക്കൊണ്ടു പോയതും തെളിവു നശിപ്പിക്കാൻ ശ്രമിച്ചതുമൊന്നും ക്രൈംബ്രാഞ്ച് സമർപ്പിച്ച കുറ്റപത്രത്തിൽ ഉണ്ടായിരുന്നില്ല. ഈ സംഭവത്തിൽ പൊലീസ് എഫ്ഐആർ റജിസ്റ്റർ ചെയ്യുകയോ തെളിവുകൾ രേഖപ്പെടുത്തുകയോ ചെയ്തതുമില്ല. പിന്നീട് ഇത് തെളിവുകൾ സഹിതം കണ്ടെത്തിയ സിബിഐ സംഘം പൊലീസ് ഉദ്യോഗസ്ഥർക്കെതിരെ അന്വേഷണത്തിന് ശുപാർശ ചെയ്യുകയായിരുന്നു.

കൃപേഷിനെയും ശരത് ലാലിനെയും അപായപ്പെടുത്തിയ ആയുധങ്ങൾ പൊലീസ് കണ്ടെത്തിയിരുന്നെങ്കിലും അവയുടെ ഒന്നും ശാസ്ത്രീയ പരിശോധനകൾ നിയമാനുസൃതം പൂർത്തിയാക്കിയിരുന്നില്ല. ഫൊറൻസിക് പരിശോധന അട്ടിമറിക്കാനുള്ള ശ്രമമാണ് ക്രൈംബ്രാഞ്ചും ലോക്കൽ പൊലീസും ഇതിലൂടെ നടത്തിയത്. കൊല ചെയ്യാനുപയോഗിച്ച ആയുധങ്ങൾ ഫൊറൻസിക് സർജന്റെ സാന്നിധ്യത്തിൽ പരിശോധന നടത്തുകപോലും ചെയ്യാതെയാണ് ക്രൈംബ്രാഞ്ച് കേസിൽ കുറ്റപത്രം സമർപ്പിച്ചത്. ആയുധങ്ങളുടെ വലുപ്പം, ഭാരം, രൂപം എന്നിവയും കൊല്ലപ്പെട്ടവരുടെ ശരീരത്തിലെ മുറിവുകളും തമ്മിൽ ബന്ധമുണ്ടെന്ന് ഫൊറൻസിക് സർജൻ സാക്ഷ്യപ്പെടുത്തിയാൽ മാത്രമേ പ്രതികളായി കണ്ടെത്തിയവരുടെ മേലുള്ള ആരോപണങ്ങൾ നിലനിൽക്കുമായിരുന്നുള്ളൂ. ഇത് കൃത്യമായി ചെയ്തില്ലെങ്കിൽ പ്രതികൾക്ക് രക്ഷപ്പെടാനുള്ള സാധ്യതകൾ വളരെക്കൂടുതലായിരുന്നു.

ക്രൈംബ്രാഞ്ചിന്റെ ഭാഗത്തുനിന്നുണ്ടായ ബോധപൂർവമായ ഈ പിഴവുകൂടി ചൂണ്ടിക്കാട്ടിക്കൊണ്ടാണ് ഹൈക്കോടതി കേസന്വേഷണം സിബിഐക്ക് വിട്ടത്. പിന്നീട് സിബിഐ അന്വേഷണ സംഘമാണ് ആയുധങ്ങളുടെ ഫൊറൻസിക് പരിശോധന പൂർത്തിയാക്കിയത്. ക്രൈംബ്രാഞ്ച് അന്വേഷണത്തിലുണ്ടായ ഇത്തരം ബോധപൂർവമായ ഒഴിവാക്കലുകളും മറച്ചുവയ്ക്കലുകളും കൂടുതലായി പുറത്തുവരാതിരിക്കാൻ വേണ്ടി സിബിഐക്ക് കേസ് ഫയൽ കൈമാറാതിരിക്കാനും ക്രൈംബ്രാഞ്ച് ശ്രമം നടത്തിയിരുന്നു. 4 തവണ കത്തു നൽകിയിട്ടും ലഭിക്കാതിരുന്ന ഫയൽ കോടതി ഇടപെടലിന് ശേഷമാണ് സിബിഐയുടെ കൈവശം ലഭിക്കുന്നത്. ഇവയെല്ലാം മുൻനിർത്തിത്തന്നെയാണ് ‘രാഷ്ട്രീയ സമ്മർദത്തിൽ പൊലീസിനു നിഷ്പക്ഷമായി കേസ് അന്വേഷിക്കാൻ കഴിഞ്ഞില്ലെന്ന്’ കോടതി നിരീക്ഷിച്ചതും കേസ് സിബിഐക്ക് കൈമാറിയതും.

∙ നേർവഴിക്കുപോയ അന്വേഷണം വഴിതിരിച്ച് ക്രൈംബ്രാഞ്ച്

പെരിയ ഇരട്ടകൊലപാതകം നടന്ന 2019 ഫെബ്രുവരി 17 കഴിഞ്ഞുള്ള 3 ദിവസങ്ങളിൽ കേസ് അന്വേഷിച്ചിരുന്നത് ലോക്കൽ പൊലീസ് ആയിരുന്നു. ആ ദിവസങ്ങളിൽതന്നെ കേസുമായി ബന്ധപ്പെട്ട ഏറ്റവും നിർണായക വിവരങ്ങള്‍ കണ്ടെത്തുകയും സിപിഎം പെരിയ ലോക്കൽ കമ്മിറ്റി അംഗം എ.പീതാംബരൻ, സുഹൃത്തും സഹായിയുമായ സി.ജെ.സജി എന്നിവരുടെ അറസ്റ്റ് രേഖപ്പെടുത്തുകയും ചെയ്തിരുന്നു. ആ 3 ദിവസങ്ങളിലെ അന്വേഷണവും റിപ്പോർട്ടുകളും വഴിതെറ്റിയിരുന്നെങ്കിൽ പിന്നീട് സിബിഐ ഉൾപ്പെടെയുള്ള ഏത് ഏജൻസി അന്വേഷണം ഏറ്റെടുത്തിരുന്നെങ്കിലും ഒരു ഫലവും ഉണ്ടാകില്ലായിരുന്നെന്ന് കോൺഗ്രസ് നേതാവും അഭിഭാഷകനുമായ എം.കെ. ബാബുരാജ് പറയുന്നു.

സംഭവം നടന്ന് ആദ്യ മണിക്കൂറുകളിൽ തന്നെ തെളിവുകൾ കണ്ടെടുക്കുന്നത് ഉൾപ്പെടെയുള്ള കാര്യങ്ങളിൽ അവർ പുലർത്തിയ ജാഗ്രതയാണ് പിന്നീട് കേസന്വേണത്തിൽ ഏറ്റവും നിർണായകമായി മാറിയത്. എന്നാൽ ഇതിനിടെയാണ് അന്വേഷണത്തിൽ പാർട്ടി ഇടപെടൽ ഉണ്ടാകുന്നതെന്നും അന്വേഷണം ക്രൈംബ്രാഞ്ചിന് വിടാൻ സർക്കാർ തീരുമാനിക്കുന്നതുമെന്നും ബാബുരാജ് ചൂണ്ടിക്കാട്ടുന്നു. ക്രൈംബ്രാഞ്ചിന്റെ ആദ്യ സംഘം വന്നിട്ടും ‘സർക്കാരും പാർട്ടിയും വിചാരിച്ചപോലെ’ കാര്യങ്ങൾ മുന്നോട്ടുപോയില്ല. പ്രതികളെന്നു കണ്ടെത്തിയവർക്കു പുറമേ പാർട്ടിക്കു വേണ്ടപ്പെട്ട മറ്റു പലരിലേക്കും അന്വേഷണം എത്താൻ തുടങ്ങിയതോടെ എസ്പി വി.എം.മുഹമ്മദ് റഫീഖിന്റെ നേതൃത്വത്തിലുള്ള ക്രൈംബ്രാഞ്ച് സംഘത്തിൽ അഴിച്ചുപണികൾ ഉണ്ടായി. അന്വേഷണ തലവനെ തിരികെ വിളിച്ചതിന് പുറമേ സംഘത്തിൽ ഉണ്ടായിരുന്ന ഡിവൈഎസ്പിയേയും സിഐമാരെയും സ്ഥലംമാറ്റി.