മദ്യപാനത്തിൽ ഗോവിന്ദൻ പറഞ്ഞതാണോ പ്ലീനം രേഖ! അജൻഡയിൽ‌ പിണറായിക്ക് ‘ഗുഡ് സർട്ടിഫിക്കറ്റ്’? വിഎസിന് കോട്ടയത്ത് കൊടുക്കാത്തത് കൊല്ലത്തു കിട്ടുമോ?

പാലക്കാട് പ്ലീനത്തിനു പിന്നാലെ 2015 ഡിസംബർ 27 മുതൽ 31 വരെ കൊൽക്കത്തയിൽ ചേർന്ന ദേശീയ പ്ലീനവും തെറ്റുതിരുത്തൽ പ്രക്രിയയുടെ അനിവാര്യത ചൂണ്ടിക്കാട്ടി. ഇതിന്റെ ചുവടുപിടിച്ച്, ഒന്നാം പിണറായി സർക്കാർ അധികാരമേറ്റതിനു പിന്നാലെ 2016 നവംബർ 18 മുതൽ 20 വരെ ചേർന്ന പാർട്ടി സംസ്ഥാന കമ്മിറ്റി, സംഘടനാരംഗത്തു നടത്തേണ്ട ഇടപെടലുകളെക്കുറിച്ചു പ്രത്യേക രേഖ തന്നെ തയാറാക്കി. പാലക്കാട് പ്ലീനം ചൂണ്ടിക്കാട്ടിയ മദ്യപാന ശീലം, റിയൽ എസ്റ്റേറ്റ് ബിസിനസ്, ബ്ലേഡ് കമ്പനികളുമായുള്ള ബന്ധം, ആഡംബര ജീവിത ശൈലി എന്നിവയ്ക്കു പുറമേ വരുമാനത്തിൽ കവിഞ്ഞ സ്വത്തു സമ്പാദനം, സദാചാര്യ മൂല്യങ്ങൾ കാത്തുസൂക്ഷിക്കാത്തത്, കമ്യൂണിസ്റ്റ് മൂല്യങ്ങളിൽ നിന്നുള്ള വ്യതിചലനം കുഴൽപ്പണ ഇടപാട് – ലഹരി മരുന്ന് സംഘങ്ങളുമായുള്ള ബന്ധം എന്നിവയും ഇടം പിടിച്ചു. സ്വർണം കള്ളക്കടത്ത് പോലുള്ള ആരോപണങ്ങൾ അന്നും പാർട്ടിക്കുള്ളിൽ ഉയരാത്തതുകൊണ്ട് അവ ആ രേഖയിലും ഇടം പിടിച്ചില്ല. രേഖകൾ ഓരോന്നു പറയുമ്പോഴും ലഹരി മരുന്നു വ്യാപാരത്തിനു വരെ പാർട്ടി നേതാക്കൾ പിടികൂടപ്പെട്ട സംഭവങ്ങൾ പലതുണ്ടായി. പാർട്ടി തല അച്ചടക്ക നടപടികൾ പേരിനു മാത്രമാകുകയും ചെയ്തു.

ബക്കറ്റ് പിരിവ് പാർട്ടിയുടെ ജനകീയ സ്വഭാവത്തിന്റെ പ്രതീകമായി വിശേഷിപ്പിക്കപ്പെട്ട കാലമുണ്ടായിരുന്നു മുൻപ്. ഇന്നും ബക്കറ്റ് പിരിവ് പാർട്ടി നടത്തുന്നുണ്ടെങ്കിലും ബക്കറ്റിന് ഉൾക്കൊള്ളാവുന്നതിനേക്കാൾ വലിത തുക മറ്റു വഴികളിലൂടെ ബക്കറ്റിലെത്തുന്ന പതിവുമുണ്ട്. ഓരോ ഘടകത്തിനും നിശ്ചയിച്ചു നൽകിയിട്ടുള്ള തുക ബക്കറ്റ് പിരിവിലൂടെ കണ്ടെത്തണമെന്നു നേതൃത്വം നിർദേശിക്കുമെങ്കിലും സ്ഥലത്തെ ബാർ– ക്വാറിയുടമകൾ, വ്യവസായികൾ, റിയൽ എസ്റ്റേറ്റ് ബിസിനസുകാർ തുടങ്ങിയവരിൽ നിന്നു നിമിഷങ്ങൾക്കുള്ളിൽ സമാഹരിക്കുന്നതായി പതിവ്. ഇക്കഴിഞ്ഞ ജൂലൈയിൽ ചേർന്ന സംസ്ഥാന കമ്മിറ്റിയോഗം അംഗീകരിച്ച റിപ്പോർട്ട് ഇതു ശരിവയ്ക്കുന്നുണ്ട്. ജനങ്ങളിൽ നിന്നു ഫണ്ട് പിരിക്കുന്നതിനു പകരം ചുരുക്കം ചിലരിൽ നിന്നു സമാഹരിക്കുന്ന രീതിയാണ് കുഴപ്പത്തിനു കാരണമെന്നു റിപ്പോർട്ട് തുറന്നു സമ്മതിക്കുന്നു. സാമ്പത്തിക തർക്കങ്ങളിൽ ഇടപെട്ടു പരിഹാരം കണ്ടെത്തിക്കൊടുത്തു കക്ഷികളിൽ നിന്നു വൻതുക കമ്മിഷനായി വാങ്ങുന്ന പതിവ് ഏറെക്കാലമായി പാർട്ടി നേതാക്കളിലുണ്ട്. പലവിധ കാരണങ്ങളാൽ വിൽപന നടക്കാതെ കിടക്കുന്ന ഭൂമി, സർക്കാരിന്റെയോ തദ്ദേശ സ്ഥാപനങ്ങളുടെയോ പദ്ധതികൾക്കു വേണ്ടി ഏറ്റെടുപ്പിച്ച ശേഷം ഉടമയിൽ നിന്നു ലക്ഷങ്ങൾ കോഴ വാങ്ങുന്ന പതിവും പാർട്ടി നേതൃത്വത്തിന്റെ ശ്രദ്ധയിലുണ്ട്.

∙ കൊല്ലം സമ്മേളനം ‘ചരിത്രം’ കുറിക്കുമോ?

തുടർഭരണം നേടിയ സംസ്ഥാന സർക്കാരിനും പാർട്ടി നേതൃത്വത്തിനും സിപിഎം സംസ്ഥാന സമ്മേളനം ‘ഗുഡ് സർട്ടിഫിക്കറ്റ്’ നൽകുമോ എന്നറിയുന്നതിനാണ് പാർട്ടി അണികൾ ആകാംക്ഷയോടെ കാത്തിരിക്കുന്നത്. വിഭാഗീയതയുടെ കനലുകൾ ഏതാണ്ട് അണഞ്ഞ പാർട്ടിയിൽ നിലവിൽ അത്തരം ‘ഭീഷണി’ കളില്ലെങ്കിലും തുടർ ഭരണത്തിന്റെ വിലയിരുത്തലും വരാൻ പോകുന്ന തദ്ദേശ– നിയമസഭാ തിരഞ്ഞെടുപ്പുകൾക്കുള്ള ഗൃഹപാഠവും ആകും സമ്മേളനത്തിന്റെ മുഖ്യ അജൻഡ. കൊല്ലം ഉൾപ്പെടെ ആദ്യം നടന്ന ചില ജില്ലാ സമ്മേളനങ്ങളിൽ സർക്കാരിനും പാർട്ടി നേതൃത്വത്തിനുമെതിരെ ശക്തമായ വിമർശനങ്ങൾ ഉയർന്നിരുന്നു. മുഖ്യമന്ത്രി പിണറായി വിജയൻ മുഴുവൻ സമയം പങ്കെടുത്ത ചില സമ്മേളനങ്ങളിൽ അതു മയപ്പെട്ടു. 14 ജില്ലാ സമ്മേളനങ്ങളിലും ഉയർന്ന വിമർശനങ്ങൾക്കു ഭരണ– പാർട്ടി നേതൃത്വത്തോടുള്ള ചോദ്യത്തിന്റെ സ്വഭാവമുണ്ടായിരുന്നു. ആ ചോദ്യങ്ങൾ ഇങ്ങനെയായിരുന്നു.

∙ ആർഎസ്എസ് ചങ്ങാത്തം ആരോപിക്കപ്പെട്ട എഡിജിപി എം.ആർ.അജിത്കുമാറിനെ സംരക്ഷിക്കുന്നത് എന്തിനാണ്? സർക്കാരിനു പൊലീസിൽ നിയന്ത്രണം ഇല്ല. നിയന്ത്രണം സമ്പന്നരുടെ കയ്യിലാണ്. സ്റ്റേഷനുകളിൽ സിപിഎം നേതാക്കൾക്ക് ഒരു പരിഗണനയും കിട്ടുന്നില്ല.

∙ ഒന്നാം പിണറായി സർക്കാരിനൊപ്പം രണ്ടാം പിണറായി സർക്കാരിന് എത്താൻ കഴിയുന്നില്ല. ഓരോ ഫയലും ഓരോ ജീവിതമാണെന്നു മുഖ്യമന്ത്രി പറഞ്ഞെങ്കിലും എല്ലാ മേഖലയിലും ഉദ്യോഗസ്ഥ മേധാവിത്തം പിടിമുറുക്കി. ക്ഷേമ പെൻഷൻ കുടിശികയും ഡിഎ കുടിശികയും സമയബന്ധിതമായി നൽകാത്തതു സാധാരണക്കാരെയും സർക്കാർ ജീവനക്കാരെയും ശത്രുക്കളാക്കി. നവകേരള സദസ്സിൽ പരാതിക്കാരെ എത്തിച്ച പാർട്ടി പ്രവർത്തകർക്ക് പുറത്തിറങ്ങി നടക്കാനാകാത്ത സ്ഥിതിയാണ്.

∙ ഒന്നാം പിണറായി മന്ത്രിസഭയിലെ ‘ക്യാപ്റ്റനെ’ മാത്രം നിലനിർത്തുകയും കെ.കെ ശൈലജ ഉൾപ്പെടെ പരിചയ സമ്പന്നരായ മന്ത്രിമാരെ മാറ്റി നിർത്തുകയും ചെയ്തതു ശരിയായോ ?

∙ തലേദിവസം വരെ നടത്തിയ വർഗീയ വിദ്വേഷ രാഷ്ട്രീയത്തെ മറന്നു സന്ദീപ് വാരിയരെ ‘ഉത്തമനായ സഖാവ്’, ‘ക്രിസ്റ്റൽ ക്ലിയർ’ സഖാവും ആക്കാൻ നോക്കിയ നേതാക്കളാണ് പാർട്ടിയുടേത്. വെള്ളം തിളയ്ക്കുന്നതിനു മുൻപ് അരിയുന്നതിനു തുല്യമായിപ്പോയി അത്. കോൺഗ്രസിൽ ചേർന്നപ്പോൾ അയാളുടെ വർഗീയ രാഷ്ട്രീയത്തെ ഉപയോഗിച്ച് പത്രപ്പരസ്യം നൽകി ന്യൂനപക്ഷങ്ങളെ കബളിപ്പിക്കാനും ശ്രമിച്ചില്ലേ ?

∙. നേതാക്കന്മാരുടെ തലക്കനം പ്രവർത്തകർക്ക് അവരെ അപ്രാപ്യരാക്കുന്നു. നേരിൽ കണ്ടാൽ ഫണ്ട് സ്വരൂപിച്ചോ, പത്രം ചേർത്തോ എന്നു മാത്രമാണു ചോദ്യം, ‘നീയും നിന്റെ കുടുംബവും എങ്ങനെ കഴിയുന്നു’ എന്നൊരു അന്വേഷണമേയില്ല. എല്ലാവർക്കും ജാടയും മസിൽ പിടിത്തവുമാണ്. ഇതാണോ കമ്യൂണിസ്റ്റ് ശൈലി ? ഇ.പി.ജയരാജന്റെ നടപടികളും കമ്യൂണിസ്റ്റ് രീതിയ്ക്കു ചേർന്നതല്ല.

∙ സീതാറാം യച്ചൂരിക്കു ശേഷം ജനറൽ സെക്രട്ടറിയെ കണ്ടെത്താൻ കഴിയാത്തത് എന്തുകൊണ്ടാണ് ? ഒരാളെ തീരുമാനിക്കാനുള്ള ഐക്യം ഇല്ലാത്തതു കൊണ്ടാണോ ? ദേശീയ തലത്തിൽ പാർട്ടിക്കു പ്രതീക്ഷ നൽകുന്ന ഒന്നുമില്ല. എന്തുകൊണ്ടാണ് ഈ ദുർവിധി ? പാർട്ടി പ്രവർത്തനത്തിനു വിരമിക്കൽ തീരുമാനിക്കുമ്പോൾ പ്രായമല്ല, വകതിരിവാണു പരിഗണിക്കേണ്ടത്.

∙ മുഖ്യമന്ത്രി പിണറായി വിജയനും പാർട്ടി സെക്രട്ടറി എം.വി.ഗോവിന്ദനും മൈക്ക് ഓപ്പറേറ്റർമാരോടു വരെ തട്ടിക്കയറുന്നു. സാധാരണ ജനങ്ങൾ ഇതു കണ്ടു കൊണ്ടിരിക്കുകയാണെന്ന് ഓർക്കണം. പാലക്കാട് ഉപതിരഞ്ഞെടുപ്പു സമയത്തെ ‘നീലപ്പെട്ടി ’ വിവാദവുമായി ബന്ധപ്പെട്ട് സംസ്ഥാന കമ്മിറ്റി അംഗം എൻ.എൻ.കൃഷ്ണദാസ് നീലപ്പെട്ടി വലിച്ചെറിയാൻ പറഞ്ഞതും മാധ്യമങ്ങളെ അധിക്ഷേപിച്ചതു ഉചിതമായോ ?

∙ എംഎൽഎ ആയ എം.വി.ഗോവിന്ദനു പാർട്ടി സംസ്ഥാന സെക്രട്ടറിയാകാം. എംഎൽഎ ആയ വി. ജോയിക്കു തിരുവനന്തപുരം ജില്ലാ സെക്രട്ടറിയാകാം. എന്നാൽ പഞ്ചായത്ത് അംഗമായ പാർട്ടിക്കാരനു ലോക്കൽ സെക്രട്ടറിയാകാൻ പാടില്ല. ഇതെങ്ങനെ ശരിയാകും ?

∙കൂടെ നിൽക്കുന്ന പാവപ്പെട്ടവനെ കുനിച്ചു നിർത്തി ഇടിക്കുന്നവരായി എസ്എഫ്ഐ മാറി. കാമ്പുള്ള പുതിയ പ്രവർത്തകർ നേതൃത്വത്തിലെത്തുന്നില്ല.