ഈ മത്സരത്തിന്റ നിബന്ധനകൾതന്നെയാണ് അതിൽ പ്രധാനം. 1968ൽ നടന്ന ഗോൾഡൻ ഗ്ലോബ് റേസിന്റെ അതേ മാതൃകയിലാണ് 2022ൽ ആരംഭിച്ച ഈ റേസും നടക്കുന്നത്. അരനൂറ്റാണ്ടിലേറെ പഴക്കമുള്ള സാങ്കേതിക വിദ്യകൾ മാത്രമാണ് ഉപയോഗിക്കാൻ സാധിക്കുക. മത്സരത്തിന് ഉപയോഗിക്കുന്ന ബോട്ടുകളും അക്കാലത്തെ ഡിസൈൻ ഉപയോഗിച്ചു നിർമിച്ചവയാകണം. നവീന ആശയവിനിമയ സംവിധാനങ്ങൾ ഒന്നും ഉപയോഗിക്കാൻ അനുമതിയില്ല. 

∙ മത്സരം കടുപ്പമേറിയതാണല്ലോ. 16 പേരായി തുടങ്ങിയ മത്സരത്തിൽ ഇപ്പോൾ ശേഷിക്കുന്നതു 3 പേർ മാത്രം! 

ഒറ്റയ്ക്ക് ഒരിടത്തും നിർത്താതെ കടലിലൂടെ ലോകം ചുറ്റിവന്നവർ ചരിത്രത്തിലാകെ ഇരുന്നൂറിലധികം പേരില്ല. ലോകത്തിലെ കടുപ്പമേറിയ ഉദ്യമങ്ങളിലൊന്നായ എവറസ്റ്റ് കീഴടക്കിയവർ അതിലും എത്രയോ ഉണ്ട്. ടെൻസിങ്ങും ഹിലരിയും ആദ്യമായി എവറസ്റ്റ് കീഴടക്കാൻ ഉപയോഗിച്ച അതേ സംവിധാനങ്ങൾ ഉപയോഗിച്ച് ഇപ്പോൾ ആ ദൗത്യ നിർവഹണത്തിന് ഒരാൾ തയാറായാൽ എങ്ങനെയുണ്ടാകും? സമാനമായൊരു കാര്യമാണ് കടലിൽ ‍ഞങ്ങൾ ചെയ്യുന്നത്. 

ബ്രിട്ടിഷ് നാവികനായ സർ റോബിൻ നോക്സ് ജോൺസ്റ്റൻ എന്നയാളായിരുന്നു 1968ലെ ജേതാവ്. അദ്ദേഹത്തിന്റെ കാലത്തെ അതേ സംവിധാനങ്ങൾ മാത്രം ഉപയോഗിച്ചുള്ള യാത്രയാകുന്നതിന്റെ വെല്ലുവിളികളും പരിമിതികളുമെല്ലാം ഇതിലുണ്ട്. 16 പേർ റേസ് തുടങ്ങിയെങ്കിലും ഇപ്പോൾ 3 പേരേയുള്ളൂ. ദൗർഭാഗ്യം, കാലാവസ്ഥാപ്രശ്നങ്ങൾ ഇവയെല്ലാം പലരുടെയും വഴിമുടക്കി. ഞാനും 2018ൽ ഇടയ്ക്കു വച്ച് യാത്ര അവസാനിപ്പിച്ചയാൾ ആണല്ലോ! 

∙ 2018ൽ അപകടംമൂലം മത്സരത്തിൽനിന്നു പുറത്തായത് ഒരു വെല്ലുവിളിയായി ഏറ്റെടുത്തോ? 

തീർച്ചയായും. ‍ഞാൻ ഒരു നാവികനാണ്. ഇന്ത്യൻ നാവികസേനാംഗമായിരുന്ന എന്നെ സംബന്ധിച്ച് അതൊരു അൺഫിനിഷ്ഡ് ബിസിനസ് ആയിമാറി. അതു ഫിനിഷ് ചെയ്യുകയല്ലാതെ എനിക്കു മുന്നിൽ മറ്റൊരു വഴിയുമില്ല. 

∙ കടലിൽ വച്ച് മലയാളികൾ ആരെങ്കിലുമായി സംസാരിച്ചിരുന്നോ? 

ഇത്തവണ സൗത്ത് അറ്റ്ലാന്റിക്കിൽ വച്ച് എറണാകുളം സ്വദേശിയായ അൽഫാസ് എന്നയാളുമായി സംസാരിച്ചിരുന്നു. ബ്രസീലിലെ സാന്റോസിൽനിന്ന് സിംഗപ്പുരിലേക്കു പോകുന്ന ചരക്കുകപ്പലിലെ ഉദ്യോഗസ്ഥനായിരുന്നു അൽഫാസ്. 2018ലും സമാനമായൊരു സംഭവമുണ്ടായി. അന്ന് മൂവാറ്റുപുഴ പുല്ലുവഴി സ്വദേശിയായ മാർട്ടിൻ മാർക്കോസുമായാണ് എനിക്കു സംസാരിക്കാൻ സാധിച്ചത്. 

∙ ഇത്തവണ ബോട്ടിനുണ്ടായ തകരാറുകൾ സ്വയം പരിഹരിച്ചതു വലിയ വാർത്തയായല്ലോ? പായ്‌വഞ്ചി നാവികർക്കു മാതൃകയാക്കാവുന്ന അഭിലാഷ് മോഡൽ എന്നൊക്കെയാണു വിശേഷണങ്ങൾ... 

കാറ്റിന്റെ സഞ്ചാരദിശ കണ്ടുപിടിക്കാൻ ഉപയോഗിക്കുന്ന വിൻഡ്‌വെയ്ൻ തകരാറിലായിരുന്നു. പകരം ഉപയോഗിക്കാൻ കയ്യിലുണ്ടായിരുന്നവ തീർന്നു. ഒടുവിൽ, വഞ്ചിയിലെ ടോയ്‌ലറ്റിന്റെ വാതിൽ അറുത്തെടുത്ത് വിൻഡ്‌വെയ്ൻ ഉണ്ടാക്കി. ഇക്കാര്യം സംഘാടകരോടു സാറ്റലൈറ്റ് ഫോണിൽ ഞാൻ സംസാരിച്ചിരുന്നു. ഇതാകും അഭിലാഷ് മോഡൽ എന്നൊക്കെ ആളുകൾ വിളിക്കാൻ കാരണം. 

നാവികസേനയുടെ സാഗർപരിക്രമ പ്രയാണത്തിന് ഉപയോഗിച്ച ഐഎൻഎസ്‌വി മാദേയി കടലിൽ ഇറക്കിയതു മുതൽ ഞാൻ വഞ്ചിക്കൊപ്പമുണ്ടായിരുന്നു. അതിലെ ചെറിയ നട്ടും ബോൾട്ടും വരെ മുറുക്കാൻ പഠിച്ചിരുന്നു. അതു യാത്രയിൽ എനിക്കു സഹായകമാവുകയും ചെയ്തു. ഇത്തവണ ബയാനത്തുമായി എനിക്ക് അത്ര അടുത്തു പരിചയപ്പെടാൻ സമയം ലഭിച്ചില്ല. മത്സരം തുടങ്ങുന്നതിനു മാസങ്ങൾ മാത്രം മുൻപാണ് എനിക്കീ വഞ്ചി കിട്ടിയത്. എങ്കിലും പരമാവധി ദിവസങ്ങൾ ബയാനതിനെ അടുത്തു പരിചയപ്പെടാനാണ് ഞാൻ ശ്രമിച്ചത്. അതു ഫലം ചെയ്തിട്ടുണ്ട്. 

∙ മഹാസമുദ്രങ്ങൾ തമ്മിൽ എന്തെങ്കിലും വ്യത്യാസമുണ്ടോ?

അറ്റ്ലാന്റിക്കും പസിഫിക്കും തമ്മിൽ എന്താണു വ്യത്യാസമെന്നു ചോദിക്കുന്നവരുണ്ട്. വ്യത്യാസമൊന്നുമില്ല എന്നാണ് എന്റെ മറുപടി. കാരണം, ഭൂമധ്യരേഖയോടു ചേർന്നുള്ള ഭാഗത്ത് കടലിൽ എല്ലായിടത്തും ഒരേ കാലാവസ്ഥയാണ്. അവിടെനിന്നു തെക്കോട്ടും വടക്കോട്ടും മാറുന്നതനുസരിച്ച് കടൽജലത്തിന്റെ താപനിലയിൽ വരുന്ന മാറ്റങ്ങൾ സൃഷ്ടിക്കുന്ന പ്രത്യേകത ഒരുപോലെയായിരിക്കും. ഉദാഹരണത്തിന് 20 ഡിഗ്രി സൗത്ത് അറ്റ്ലാന്റിക് സമുദ്രത്തിന്റെ ഏതാണ്ട് അതേ സ്വഭാവം തന്നെയായിരിക്കും 20 ഡിഗ്രി സൗത്ത് പസിഫിക്കിനും ഇന്ത്യൻ മഹാസമുദ്രത്തിനും!

കടലിന്റെ ഈ മാറ്റം തിരിച്ചറിയുന്നതു രസകരമാണ്. കടലിൽ ഒരു പ്രത്യേക ഭാഗത്തുമാത്രം കാണുന്ന പക്ഷികളും മീനുകളുമൊക്കെയുണ്ട്. അതിലൊന്നാണ് പറക്കുംമത്സ്യം. കടൽജലത്തിൽനിന്ന് ഉയർന്നു പറന്ന് മറ്റൊരിടത്തു മുങ്ങുന്ന അപൂർവമീനുകൾ. ഭൂമധ്യരേഖയോടു ചേർന്നാണ് പറക്കുംമീനുകൾ കാണപ്പെടുക. കടലിൽ ഏതെങ്കിലുമൊരു വലിയ മീൻ അവയെ തിന്നാനെത്തുമ്പോഴാണ് പറക്കുംമീൻ ഇങ്ങനെ ഉയർന്നു ചാടുക. ശത്രുവിൽനിന്നു രക്ഷപ്പെടാൻ ഒരിടത്തുനിന്നു മറ്റൊരിടത്തേക്കു പറപറക്കുന്ന മീൻ!

∙ കരയിൽ എത്തിക്കഴിഞ്ഞാൽ എന്തൊക്കെയാണ് പ്ലാൻ? 

ഒരുപാട് കാര്യങ്ങളുണ്ട്. ഭാര്യ ഉർമിമാലയും മക്കളായ വേദാന്തും അഭ്രനീലും ഗോവയിലെ വീട്ടിലാണ്. അവർ പാരിസിലേക്കു വരുന്നില്ല. നാവികസേനയിൽ ലഫ്റ്റനന്റ് കമാൻഡറായിരുന്ന അച്ഛൻ വി.സി. ടോമിയും അമ്മ വൽസമ്മയും കൊച്ചി കണ്ടനാട്ടെ വീട്ടിലാണുള്ളത്. അതിനാൽ, ഈ ‘ബിസിനസ്’ എത്രയും വേഗം ഫിനിഷ് ചെയ്ത് വീട്ടിലേക്കു മടങ്ങുകയാണ് ആദ്യ ലക്ഷ്യം.

English Summary: Golden Globe Race: The Unbelievable Adventurous Journey of Cmdr Abhilash Tomy