∙ രക്ഷയിലേക്കൊരു അരുവി

ക്ഷീണവും വിശപ്പും മുറിവുകളുടെ വേദനയും നിമിത്തം കാട്ടിലൂടെ നടക്കുകയെന്നത് വളരെ പ്രയാസകരമായി മാറിയ സന്ദർഭത്തിലാണ് അവളൊരു അരുവി കണ്ടെത്തിയത്. അതോടെ രക്ഷപ്പെടാനാവുമെന്ന പ്രതീക്ഷ ശക്തമായി. അരുവിയുടെ തീരം ചേർന്നു നടക്കുകയെന്നത് വളരെ ക്ലേശകരമായിരുന്നെങ്കിലും അരുവിയുടെ തീരത്തുനിന്ന് മാറിയാൽ പിന്നീട് കണ്ടെത്താനായില്ലെങ്കിൽ രക്ഷപ്പെടുകയെന്നത് അസാധ്യമാണെന്ന് അവൾക്കുറപ്പായിരുന്നു. യാത്രയ്ക്കിടയിൽ പലതവണ രക്ഷാപ്രവർത്തകരുടെ ഹെലികോപ്റ്ററുകൾ അവളുടെ മുകളിലൂടെ കടന്നുപോയെങ്കിലും ഇടതൂർന്ന വനമേഖല അവളെ രക്ഷാപ്രവർത്തകരിൽനിന്ന് മറച്ചുപിടിച്ചു.

അരുവിയുടെ കരയിലൂടെ മുന്നോട്ടുപോകവേയാണ് മരണത്തിന്റെ സൂചനയെന്നപോലെ ഒരു കൂട്ടം കഴുകന്മാരുടെ കരച്ചിൽ കേട്ടത്. കൂട്ടത്തോടെയുള്ള കഴുകന്മാരുടെ കരച്ചിൽ വലിയ ജീവിയുടെ മൃതശരീരം കാണുമ്പോഴാണെന്നറിയാമായിരുന്ന ജൂലിയാന അങ്ങോട്ട് നടന്നു. നടുക്കുന്ന കാഴ്ചയാണ് അവൾ അവിടെ കണ്ടത്. വിമാനത്തിൽനിന്ന് താഴോട്ട് വീണ മൂന്ന് യാത്രക്കാർ സീറ്റടക്കം പാതി മണ്ണിനടിയിലാക്കപ്പെട്ടിരിക്കുന്നു! കാലുകൾ മാത്രമേ പുറത്ത് കാണാനുള്ളൂ. ആ കാഴ്ച കണ്ട് വിറങ്ങലിച്ച് നിന്നെങ്കിലും മറ്റൊന്നും ചെയ്യാനില്ലാതിരുന്ന ജൂലിയാന കൂട്ടത്തിലെ സ്ത്രീയുടെ പാദങ്ങള്‍ പരിശോധിച്ച് തന്റെ അമ്മയല്ലെന്നുറപ്പിച്ച് തിരിച്ച് നടന്നു. ആ പാദങ്ങളിലെ നഖങ്ങളിൽ നെയിൽപോളിഷ് പുരട്ടിയിരുന്നു. മരിയയാകട്ടെ ഒരിക്കലും നെയിൽപോളിഷ് ഉപയോഗിച്ചിരുന്നില്ല.

അരുവിയുടെ സമീപത്തുകൂടെ കുറച്ചുദൂരം കൂടി നടന്നപ്പോൾ ജൂലിയാന വലിയൊരു നദിക്കരയിലെത്തി. നീന്തൽ വശമുണ്ടായിരുന്നതുകൊണ്ട് നദിയിലിറങ്ങി ഒഴുക്കിനൊപ്പം പൊങ്ങുതടി പോലെ കിടന്നു പോകാൻ തന്നെ അവൾ തീരുമാനിച്ചു. അവിടെയുമുണ്ടായിരുന്നു അപകടം. പിരാന! മുറിവുകളുമായി നദിയിലിറങ്ങിയാലത്തെ അവസ്ഥ ആലോചിക്കേണ്ടതില്ല. എന്നാൽ, പിരാന മത്സ്യങ്ങൾ ആഴവും ഒഴുക്കും കുറഞ്ഞ സ്ഥലങ്ങളിൽ മാത്രമാണ് കാണുന്നതെന്ന് അച്ഛൻ പറഞ്ഞുതന്നതോർമ വന്ന അവൾ നദിയുടെ മധ്യത്തിലേക്ക് നീങ്ങി ഒഴുക്കിനൊപ്പം യാത്ര തുടങ്ങി.

∙ രക്ഷാ കരങ്ങളിലേക്ക്...

നദിയിലൂടെ ഒഴുക്കിനൊപ്പം സഞ്ചരിച്ചും കരയിലിറങ്ങി നടന്നും മുന്നോട്ട് നീങ്ങിയെങ്കിലും പത്താം ദിവസമായപ്പോഴേക്കും രക്ഷപ്പെടുമെന്നുള്ള പ്രതീക്ഷ അവൾ കൈവിട്ടു തുടങ്ങി. പുഴ വലിയൊരു വളവിലേക്കെത്തുകയായിരുന്നു. നേരിയൊരു പ്രതീക്ഷയോടെ അകലേക്ക്നോക്കിയ അവളുടെ കണ്ണുകൾ വികസിച്ചു. ഏറെയകലെയല്ലാതെ നദീ തീരത്ത് ഒരു ബോട്ട് കെട്ടിയിട്ടിരിക്കുന്നു! ആദ്യമതൊരു മരീചികയാണെന്ന് വിചാരിച്ച ജൂലിയാന പലതവണ സ്വയം നുള്ളി, കണ്ടത് സത്യം തന്നെയാണെന്ന് ബോധ്യപ്പെടുത്തി. 

ബോട്ട് കെട്ടിയതിന് സമീപത്ത് പനയോലമേഞ്ഞ ഒരു കുടിലുണ്ടായിരുന്നു. കുടിലിൽ ആരെയും കണ്ടെത്താനായില്ലെങ്കിലും ഒരു കാൻ പെട്രോൾ ജൂലിയാനെ കണ്ടെത്തി. കാട്ടിലൂടെ അലഞ്ഞുള്ള യാത്രയ്ക്കിടെ അവളുടെ വലതു തോളിലെ മുറിവിൽ പുഴുവരിച്ചു തുടങ്ങിയിരുന്നു. അവൾ കുറച്ചു പെട്രോൾ മുറിവിലേക്ക് ഒഴിച്ചു. ഒരിക്കൽ വളർത്തുനായയുടെ മുറിവിൽ പുഴു വന്നപ്പോൾ അച്ഛൻ അവിടെ മണ്ണെണ്ണ ഒഴിച്ചത് ഓർമയിൽ വച്ചാണ് ഇതുചെയ്തത്. പെട്രോളിൽനിന്ന് ‘രക്ഷപ്പെടാൻ’ പുഴുക്കൾ ശരീരത്തിനകത്തേക്ക് തുളച്ചു കയറാൻ ശ്രമിച്ചെങ്കിലും മുപ്പതോളം പുഴുക്കളെ അവൾ വലിച്ചെടുത്തു. വേദന അസഹനീയമായിരുന്നെങ്കിലും പുഴുക്കളോരോന്നായി പുറത്തുചാടി. അപകടത്തിനുശേഷം അന്നാദ്യമായി മനുഷ്യസാന്നിധ്യത്തിന്റെ അദൃശ്യമായ സുരക്ഷിതത്വത്തിൽ അന്നു രാത്രി അവൾ അവിടെയുറങ്ങി. 

പിറ്റേദിവസം രാവിലെ മനുഷ്യശബ്ദം കേട്ടുണർന്ന ജൂലിയാന, 11 ദിവസങ്ങൾക്കുശേഷം ആദ്യമായി ജീവനുള്ള മനുഷ്യരെ കാണുകയായിരുന്നു. തദ്ദേശീയരായ പെറൂവിയൻ മീൻപിടിത്തക്കാരായിരുന്നു അവർ. വെളുത്ത് മെലിഞ്ഞ് മുഷിഞ്ഞ ജൂലിയാനെ കണ്ട അവർ ജലദേവതയാണെന്നാണ് ആദ്യം ധരിച്ചത്. ജൂലിയാനയ്ക്കാകട്ടെ അവരെ കണ്ടപ്പോൾ തോന്നിയത് തന്നെ രക്ഷിക്കാനെത്തിയ മാലാഖമാരാണെന്നാണ്. തദ്ദേശീയർക്ക് മനസ്സിലാകുന്ന സ്പാനിഷ് ഭാഷയിൽ അവൾ പറഞ്ഞു. ‘‘എന്റെ പേര് ജൂലിയാന‌. ലാൻസ വിമാനപകടത്തിൽനിന്ന് രക്ഷപ്പെട്ടതാണ്!’’ ആദ്യത്തെ അന്ധാളിപ്പ് മാറിയ അവർ ഉടൻതന്നെ തങ്ങളുടെ ബോട്ടിൽ അവളെ രക്ഷപ്പെടുത്തി.

∙ അദ്ഭുതകരം ആ രക്ഷപ്പെടൽ!

വിമാനത്തിലുണ്ടായിരുന്ന 92 ആൾക്കാരിൽ ജൂലിയാന ഒഴികെയുള്ളവരെല്ലാം കൊല്ലപ്പെട്ടു. ജൂലിയാനയടക്കം 14 പേർ അപകടത്തെ അതിജീവിച്ചിരുന്നു. എന്നാൽ ആമസോൺ കാട് എന്ന വെല്ലുവിളിയെ അതിജീവിക്കാൻ ജൂലിയാനയ്ക്ക് മാത്രമേ സാധിച്ചുള്ളൂ എന്ന് പിന്നീടുള്ള റിപ്പോർട്ടുകളിൽ കണ്ടെത്തി. കുട്ടിക്കാലം മുതൽ അച്ഛനമ്മമാർ പ്രകൃതിയുമായി ചേർത്തു വളർത്തിയതിന്റെ അനുഭവ പരിജ്ഞാനമാണ് അവളുടെ രക്ഷയ്ക്കെത്തിയത്. ജൂലിയാനയുടെ അമ്മ മരിയയുടെ മരണം അത്യന്തം ദയനീയമായിരുന്നു. ഭൂമിയിൽ പതിച്ചപ്പോഴും ജീവനുണ്ടായിരുന്ന അവർക്ക് സാരമായി പരുക്കേറ്റിരുന്നു. വീണിടത്തുനിന്ന് അനങ്ങാനാവാതെ ദിവസങ്ങങ്ങളോളം അർധപ്രാണനായി കിടന്നതിനൊടുവിലാണ് അവർ മരണമടയുന്നത്. 

അത്രയും ഉയരത്തിൽനിന്ന് താഴോട്ട് വീണിട്ടും രക്ഷപ്പെട്ടതിനെപറ്റി പിന്നീട് ജൂലിയാന പറഞ്ഞതിങ്ങനെ ‘‘വിമാനത്തിൽനിന്ന് പുറത്തേക്ക് തെറിച്ച ഞാൻ ഒരു മേപ്പിൾ ഇല അതിന്റെ കുരുവുമായി താഴേക്ക് വരുന്നതുപോലെയോ വായുവിലൂടെ ചെറിയൊരു ഹെലികോപ്റ്റർ പോലെ കറങ്ങിക്കറങ്ങിയോ... കൃത്യമായി ഓർമയില്ല’’ വായു മർദത്തിന് പൊടുന്നനെയുണ്ടായ മാറ്റമാണോ അതോ ആമസോണിലെ മരച്ചില്ലകളുടെ വിതാനമാണോ ആ പെൺകുട്ടിയുടെ രക്ഷയ്ക്കെത്തിയത്? കൃത്യമായ ഉത്തരം ആർക്കുമില്ല. അത്യപൂർവ്വമായി മാത്രം പ്രകൃതിശക്തികൾ ഏത് അപകടവാസ്ഥയിലും ചില ജീവനുകളെ അതിന്റെ അതിജീവനത്തിനായി വിട്ടുകൊടുക്കുന്നു. ജൂലിയാനയെ ചികിത്സിച്ചിരുന്ന ഡോക്ടറും ഒരിക്കൽ പറഞ്ഞു, അന്ന് പെട്രോൾ ഒഴിച്ച് പുഴുക്കളെ ഒഴിവാക്കിയില്ലായിരുന്നെങ്കില്‍ അവളുടെ വലതുകൈ മുറിച്ചു മാറ്റേണ്ടി വന്നേനെ എന്ന്!

∙ എവിടെയാണിന്ന് ജൂലിയാന?

അപകടത്തിനുശേഷം, മാതാപിതാക്കളുടെ ജന്മസ്ഥലമായ ജർമനിയിലേക്കാണ് ജൂലിയാന പോയത്. മാതാപിതാക്കളുടെ ഗവേഷണപാത പിന്തുടർന്ന് ബയോളജിയിൽ തുടർപഠനം നടത്തിയ ജൂലിയാന ജർമനിയിൽ പഠനം പൂർത്തിയാക്കിയ ശേഷം മഴക്കാടുകളിലെ വവ്വാലുകളെ പറ്റി ഗവേഷണം നടത്താൻ പെറുവിലേക്ക് പോയി. 1989ൽ, ജർമൻ ശാസ്ത്രജ്ഞനായ എറിക് ഡില്ലറെ വിവാഹം കഴിച്ച ജൂലിയാന 2000–ത്തിൽ പിതാവിന്റെ മരണശേഷം പാൻഗ്വാന ഗവേഷണ കേന്ദ്രത്തിന്റെ ഡയറക്ടറായി. പിന്നീട് തിരികെ ജർമനിയിലെത്തിയ ജൂലിയാന ഇപ്പോൾ മ്യൂണിക്കിലെ ‘ബവേറിയൻ സ്റ്റേറ്റ് കലക്‌ഷൻ ഓഫ് സുവോളജി’യിൽ ലൈബ്രേറിയനായി ജോലി ചെയ്യുകയാണ്.

ജൂലിയാനയുടെ സാഹസികമായ രക്ഷപ്പെടലിനെ അടിസ്ഥാനമാക്കി 1974–ൽ ‘മിറാക്കിൾസ് സ്റ്റിൽ ഹാപ്പൻ’ എന്ന പേരിൽ ഇറ്റാലിയൻ സിനിമ പുറത്തിറങ്ങി. 1998–ൽ വെർനർ ഹെർസോഗ് സംവിധാനം ചെയ്ത ‘വിങ്സ് ഓഫ് ഹോപ്’ എന്ന ഡോക്യുമെന്ററിയിൽ ജൂലിയാന നേരിട്ട് തന്റെ അനുഭവം വിവരിക്കുന്നുണ്ട്. വെർനറിന് വ്യക്തിപരമായ മറ്റൊരു താൽപര്യവും ജൂലിയാനയുടെ കാര്യത്തിലുണ്ടായിരുന്നു. ജൂലിയാന അപകടത്തിൽപെട്ട അതേ ലാൻസ വിമാനത്തിൽ യാത്ര ചെയ്യുന്നതിനായി ടിക്കറ്റ് ബുക്ക് ചെയ്തിരുന്നയാളായിരുന്നു വെർനർ. തന്റെ സിനിമയുടെ ഷൂട്ടിങ് ലൊക്കേഷൻ തേടിയുള്ള യാത്രയുടെ ഭാഗമായിട്ടായിരുന്നു അത്. എന്നാൽ അവസാന നിമിഷം യാത്ര ഒഴിവാക്കിയ അദ്ദേഹത്തിനു തിരിച്ചുകിട്ടിയത് സ്വന്തം ജീവനായിരുന്നു.

തെക്കൻ കൊളംബിയയിലെ അരരാക്കുവരയിൽനിന്നു പറന്നുയർന്ന ചെറുവിമാനം കാക്വെറ്റ പ്രവിശ്യയിൽ ആമസോൺ കാടിനുമുകളിൽവച്ച് മേയ് ഒന്നിനു തകർന്നു വീണ സംഭവമാണ് ജൂലിയാനയുടെ കഥ വീണ്ടും ലോകത്തിന്റെ ഓർമകളിലേക്കെത്തിച്ചത്. ഏഴു പേരുമായി യാത്ര പുറപ്പെട്ട വിമാനമാണു തകർന്നു വീണത്.വിമാനത്തിലുണ്ടായിരുന്ന 3, 9, 4 വയസ്സും വെറും 11 മാസവും പ്രായമുള്ള നാലു സഹോദരങ്ങൾ രക്ഷപ്പെട്ടതായുള്ള വിവരത്തെത്തുടര്‍ന്ന് വൻ തിരിച്ചിലാണ് കൊളംബിയൻ സൈന്യം നടത്തുന്നത്. കുട്ടികളുടെ അമ്മയും രണ്ടു പൈലറ്റുമാരും അപകടത്തിൽ മരിച്ചിരുന്നു. ഹുയിറ്റൊട്ടോ ഗോത്രക്കാരായ കുട്ടികള്‍ക്ക് കാട് പരിചിതമാണ്. ഇവരെ കണ്ടെന്ന് ഗോത്രവിഭാഗത്തിലെ ചിലർ നൽകിയ വിവരത്തിന്റെ അടിസ്ഥാനത്തിലാണ് ഇപ്പോഴും തിരച്ചിൽ തുടരുന്നത്. 

English Summary: How Teenager Juliane Koepcke Survived an Amazon Plane Crash: Explaining the LANSA Disaster