കൊച്ചിയിൽനിന്ന് കടലിന്നടിയിലൂടെ ഒരു ‘സൂപ്പർ ഹൈവേ’; ലക്ഷദ്വീപിൽ ഇനി ഇന്റർനെറ്റ് പറപറക്കും; ‘വലയ്ക്കുള്ളിൽ’ 11 ദ്വീപുകൾ

∙ പദ്ധതി ഇങ്ങനെ

> പേര്: കൊച്ചി– ലക്ഷദ്വീപ് ഐലൻഡ്സ് സബ് മറൈൻ ഒപ്റ്റിക്കൽ ഫൈബർ കണക്‌ഷൻ

> ആകെ നീളം 1944 കിലോമീറ്റർ

> കേബിളുകളുടെ എണ്ണം: 6 ജോഡി

> പ്രഖ്യാപിച്ചത്: 15–08–2020

> പൂർത്തിയാക്കിയത്: 10–07–2023

> ഉദ്ഘാടനം: 03–01–2024

> ആദ്യഘട്ടത്തിലെ വേഗം: 200 ജിബിപിഎസ്

> ഡിസൈൻ കപ്പാസിറ്റി: 1.6 ടിബിപിഎസ്

∙ പദ്ധതിയുടെ പ്രയോജനം

> ലക്ഷദ്വീപിൽ ഇ ഗവേണൻസ് പദ്ധതി പൂർത്തിയാക്കാം.

> വിനോദ സഞ്ചാരം, വിദ്യാഭ്യാസം, ആരോഗ്യം, വ്യവസായം എന്നീ മേഖലകൾക്ക് അതിവേഗ ഇന്റർനെറ്റ് ഗുണം ചെയ്യും.

> ലക്ഷദ്വീപ് മുഴുവൻ അതിവേഗ ഇന്റർനെറ്റ് ലഭ്യമാകും.

> ദ്വീപ് മുഴുവൻ ഒപ്റ്റിക്കൽ കേബിൾ വഴി ബന്ധിപ്പിച്ചതോടെ 4ജി, 5ജി നെറ്റ്‌വർക്കുകൾ ലഭ്യമാക്കാൻ സാധിക്കും.

> ബിഎസ്എൻഎൽ 4ജി ദ്വീപിൽ ലഭിച്ചു തുടങ്ങി.

> 6500 ഒപ്റ്റിക്കൽ ഫൈബർ കണക്‌ഷനുകളും ആദ്യ ഘട്ടത്തിൽ ദ്വീപുവാസികൾക്കു ലഭിച്ചു. ഇതു കൂടുതൽ പ്രദേശത്തേക്കു വ്യാപിപ്പിച്ചു കൊണ്ടിരിക്കുന്നു.

∙ 100 മടങ്ങ് വേഗം

‘‘പുതിയ ഒപ്റ്റിക്കൽ ഫൈബർ കണക്‌ഷൻ വഴി 100 മടങ്ങ് വേഗത്തിൽ ഇന്റർനെറ്റ് ദ്വീപിൽ ലഭിക്കും’’– ഫൈബർ കേബിൾ പദ്ധതി ലക്ഷദ്വീപിൽ ഉദ്ഘാടനം ചെയ്ത് നടത്തിയ പ്രസംഗത്തിൽ ഇതായിരുന്നു പ്രധാനമന്ത്രി നരേന്ദ്രമോദിയുടെ ഉറപ്പ്. 2020ൽ ചെങ്കോട്ടയിലെ സ്വാതന്ത്ര്യദിന പ്രസംഗത്തിലാണു നരേന്ദ്രമോദി പദ്ധതി പ്രഖ്യാപിച്ചത്. ഉപഗ്രഹങ്ങൾ വഴിയാണ് ഇതു വരെ ലക്ഷദ്വീപിൽ ഇന്റർനെറ്റ് നൽകിയിരുന്നത്. ഇതിനു പക്ഷേ, ഒപ്റ്റിക്കൽ ഫൈബറിന്റെ അത്ര വേഗം ലഭിക്കില്ല. 

വിനോദ സഞ്ചാര വികസനം മുന്നിൽക്കാണുന്ന ദ്വീപിന് അതിവേഗ ഇന്റർനെറ്റ് ഏറ്റവും ആവശ്യമായ അടിസ്ഥാന സൗകര്യമാണ്. നേരത്തേ പല ദ്വീപുകളിലും ഇന്റർനെറ്റ് വേഗം വളരെക്കുറവായിരുന്നു. കൂടാതെ മൊബൈൽ ഫോൺ കണക്ടിറ്റിവിറ്റിയും പല പ്രദേശങ്ങളിലും ലഭ്യമല്ലായിരുന്നു. കൂടുതൽ വേഗത്തിൽ ഇന്റർനെറ്റ് എത്തുന്നതോടെ ഈ പ്രശ്നങ്ങൾ പരിഹരിച്ചു. 

∙ കൊച്ചിയിലെ മൂന്നാമത്തെ കേബിൾ ലാൻഡിങ്

കൊച്ചിയിൽ ലാൻഡിങ് പോയിന്റുള്ള മൂന്നാമത്തെ സബ് മറൈൻ കേബിളാണ് കൊച്ചി ലക്ഷദ്വീപ് ഐലൻഡ് (കെഎൽഐ). 39 രാജ്യങ്ങൾ കണക്ട് ചെയ്യുന്ന സീ–മി–വി 3 (സൗത്ത്– ഈസ്റ്റ് ഏഷ്യ– മിഡിൽ ഈസ്റ്റ്–വെസ്റ്റേൺ യൂറോപ്പ് 3), 4 രാജ്യങ്ങളെ ബന്ധിപ്പിക്കുന്ന സേഫ് (സൗത്ത് ആഫ്രിക്ക ഫാർ ഈസ്റ്റ്) എന്നീ സബ് മറൈൻ കേബിളുകളുടെ ഒരു ലാൻഡിങ് പോയിന്റ് കൊച്ചിയാണ്. 39,000 കിലോമീറ്റർ നീളം വരുന്ന സീ–മി–വി 3 രാജ്യത്ത് മുംബൈയിലും ലാൻഡ് ചെയ്യുന്നുണ്ട്. 92 ടെലികോം ഇൻവെസ്റ്റേഴ്സ് ചേർന്നുള്ള കൺസോർഷ്യത്തിന്റെ കീഴിലാണ് ഇത്. 13,500 കിലോമീറ്ററാണ് സേഫ് സബ്മറൈൻ കേബിളുകളുടെ ആകെ നീളം.

∙ ആൻഡമാൻ മുൻഗാമി

ലക്ഷദ്വീപിലേക്കു സബ്മറൈൻ കേബിൾ പദ്ധതി വരും മുൻപ് 2020ൽ  ആൻഡമാൻ നിക്കോബാർ ദ്വീപുസമൂഹത്തിലേക്കുള്ള സബ് മറൈൻ കേബിൾ പദ്ധതി ഉദ്ഘാടനം ചെയ്തിരുന്നു. 2313 കിലോമീറ്റർ ദൂരത്തിൽ ചെന്നൈയിൽനിന്നു പോർട്ട് ബ്ലെയറിലേക്കും അവിടെനിന്നു മറ്റു ദ്വീപു സമൂഹങ്ങളിലേക്കുമാണ് കേബിൾ വലിച്ചിരിക്കുന്നത്. 1224 കോടി രൂപയായിരുന്നു ഈ പദ്ധതിയുടെ ചെലവ്.