ചാറ്റ് ജിപിടിക്കു വേണ്ട പ്രോസസറുകള്‍ നിര്‍മിച്ച കമ്പനിയാണ് എൻവിഡിയ. പ്രവര്‍ത്തന മികവ് കുറഞ്ഞ എഐ ചിപ്പുകളുണ്ടാക്കി ചൈനയ്ക്ക് നല്‍കി ബിസിനസ് നിലനിര്‍ത്താന്‍ എൻവിഡിയ ശ്രമിച്ചെങ്കിലും അതിനും യുഎസ് ഗവണ്‍മെന്റ് തടയിട്ടു. എൻവിഡിയ എഐ പ്രോസസറിനായി ടിക് ടോകിന്റെ മാതൃസ്ഥാപനമായ ബൈറ്റ്ഡാന്‍സ് ഉള്‍പ്പെടെയുള്ള ഒട്ടേറെ ചൈനീസ് കമ്പനികളാണ് കാത്തുകെട്ടി കിടക്കുന്നത്.

∙ പെട്ടെന്നുണ്ടായ കാരണം

കംപ്യൂട്ടർ ചിപ്പുകള്‍ നിര്‍മിക്കുന്ന ലിത്തോഗ്രഫി യന്ത്രം ചൈനയ്ക്കു നല്‍കുന്നതില്‍നിന്ന് ഡച്ച് കമ്പനിയെ യുഎസ് തടഞ്ഞതാണ് പെട്ടെന്നുള്ള പ്രകോപനത്തിന് കാരണമായത്. ചിപ് നിർമാണത്തേക്കാൾ അതിസങ്കീര്‍ണമാണ് ലിത്തോഗ്രഫി യന്ത്രത്തിന്റെ നിര്‍മാണം. നീണ്ട വർഷങ്ങളുടെ ഗവേഷണം വേണം അവ രൂപപ്പെടുത്തിയെടുക്കാൻ. എഎസ്എംഎല്‍ എന്ന ഡച്ച് കമ്പനിയാണ് ലിത്തോഗ്രഫി യന്ത്രം നിർമിക്കുന്നതില്‍ അഗ്രഗണ്യര്‍. എഎസ്എംഎല്ലില്‍ നിന്ന് യന്ത്രഘടകങ്ങൾ വാങ്ങി ഇന്റല്‍, ടിഎസ്എം, ക്വാല്‍കോം, മൈക്രോണ്‍, എൻവിഡിയ, തുടങ്ങിയ കമ്പനികള്‍ ഉന്നത ശേഷിയുള്ള ചിപ്പുകള്‍ വ്യാവസായിക അടിസ്ഥാനത്തില്‍ നിര്‍മിക്കുന്നുണ്ട്.

∙ യുഎസ് യുദ്ധവിമാനത്തിലും ചൈനീസ് സാന്നിധ്യം!

ദുർലഭ ധാതുക്കളുടെ വിതരണം നിർത്തിക്കളയുമെന്ന് ചൈന ഭീഷണിമുഴക്കുന്നത് ഇതാദ്യമല്ല. ജപ്പാനുമായി സെൻകാക്കു ദ്വീപനെച്ചൊല്ലിയുണ്ടായ തർക്കത്തെ തുർന്ന് അവയുടെ കയറ്റുമതിയിൽ ചൈന നിയന്ത്രണങ്ങൾ കൊണ്ടുവന്നു. യുഎസിന്റെ നേതൃത്വത്തിൽ ജപ്പാനും യൂറോപ്യൻ രാജ്യങ്ങളും ലോക വ്യാപാര സംഘടനയെ (ഡബ്ല്യുടിഒ) സമീപിച്ചു. വാദപ്രതിവാദങ്ങൾക്ക് ഒടുവിൽ 2014ൽ ഡബ്ല്യുടിഒ നിയന്ത്രണം നിയമപരമല്ലെന്ന് വിധിച്ചു.

ദുർലഭ ധാതുക്കളുടെ ശേഖരം ചൈനയുടെ മാത്രം കൈപ്പിടിയിൽ ഒതുങ്ങുന്നതിന്റെ അപകടത്തെക്കുറിച്ച്  ലോകത്തിന് ആദ്യമായി ബോധ്യപ്പെട്ട സന്ദർഭമായിരുന്നു അത്. യുഎസിന്റെ യുദ്ധവിമാനമായ എഫ്–35ൽ ഓരോന്നിലും ചൈനയിൽനിന്ന് ഇറക്കുമതി ചെയ്യുന്ന 417 കിലോ ദുർലഭ ലോഹങ്ങൾ ഉപയോഗിക്കുന്നുവെന്ന കണ്ടെത്തൽ വിവാദമായതിനെ തുടർന്ന് വിമാനങ്ങളുടെ നിർമാണത്തിന് കാലതാമസം വന്നു.

∙ യുഎസിനെ ആശങ്കപ്പെടുത്തുന്ന ചൈനയുടെ കുത്തക

ദുര്‍ലഭമായ ഈ ലോഹങ്ങളുടെ ഖനികള്‍ ചൈനയ്ക്ക് വേണ്ടതിലധികമുണ്ട്. ഉല്‍പാദനച്ചെലവും ഖനനം വരുത്തുന്ന പരിസ്ഥിതിനാശവുമെല്ലാം യുഎസ് ഉള്‍പ്പെടെയുള്ള രാജ്യങ്ങളെ ദുർലഭ ധാതുക്കൾ സംസ്കരിച്ചെടുക്കാനുള്ള വൈദഗ്ധ്യം നേടുന്നതില്‍നിന്ന് പിന്തിരിച്ചപ്പോള്‍ ചൈന നിരന്തര ശ്രദ്ധയോടെ മുന്നേറി. 1985 ആയപ്പോഴേക്കും അവയുടെ ഉൽപാദന വിതരണ ശൃംഖല മുഴുവനും ചൈനയുടെ നിയന്ത്രണത്തിലായി. 

ആധുനിക ചൈനയുടെ ശിൽപിയായ ഡെങ് സിയാവോപിങ് 1987ല്‍ തന്നെ റെയര്‍ എര്‍ത്തിന്റെ പ്രാധാന്യം തിരിച്ചറിഞ്ഞിരുന്നു. മധ്യ പൗരസ്ത്യ ദേശത്തിനു കരുത്തായി എണ്ണ ഉണ്ടെങ്കില്‍ ചൈനയ്ക്ക് ദുർലഭ ധാതു ശേഖരമുണ്ടല്ലോ എന്ന് പ്രവചന സ്വരത്തോടെ അദ്ദേഹം പറഞ്ഞിരുന്നു. അവ ചൂഷണം ചെയ്ത് നേട്ടമുണ്ടാക്കാനുള്ള മാർഗങ്ങൾ നടപ്പാക്കി. ഇന്ന്, ചൈനയില്‍ റെയർ എർത്ത് പ്രോസസിങ്ങും മെറ്റലര്‍ജിയും പഠിപ്പിക്കുന്ന 39 സർവകലാശാലകൾ ഉണ്ടെങ്കില്‍ യുഎസിൽ ആകെയുള്ളത് സമീപകാലത്ത് രൂപംകൊണ്ട ചില സ്റ്റാർട്ടപ്പുകൾ മാത്രമാണ്. 

∙ എന്താണ് ഈ കുഞ്ഞൻ? അടുത്തറിയാം ചിപ്പുകളെ

ചിപ്, മൈക്രോചിപ്, കംപ്യൂട്ടർ ചിപ്, ഇന്റഗ്രേറ്റഡ് സര്‍ക്യൂട്ട് അഥവാ ഐസി എന്നെല്ലാം അറിയപ്പെടുന്നത് ഒരു സിലിക്കോണ്‍ പാളിക്കുള്ളില്‍ ഉള്‍ച്ചേര്‍ത്തിരിക്കുന്ന അനേകം ഇലട്രോണിക് സർക്യൂട്ടുകളുടെ ഒരു കൂട്ടത്തെയാണ്. ഒരു കൈവിരല്‍ നഖത്തിന്റെ വലിപ്പുള്ള ചിപ്പില്‍ കോടിക്കണക്കിന് ട്രാൻസിസ്റ്ററുകൾ അടങ്ങിയിരിക്കുന്നു. ചിപ്പുകളെ തരംതിരിക്കുന്നത് നാനോമീറ്ററിലാണ്. ഒരു മീറ്ററിന്റെ നൂറുകോടിയില്‍ ഒന്നാണ് ഒരു നാനോമീറ്റര്‍. ഒരു ചുവന്ന രക്താണുവിന് 7000 നാനോമീറ്ററും ഒരു വൈറസിന് 14 നാനോമീറ്ററും വലിപ്പമുണ്ടാകും! എന്ന് പറയുമ്പോൾ നാനോ മീറ്ററിന്റെ സൂക്ഷ്മ സ്വഭാവം വ്യക്തമാല്ലോ.