ഒറ്റനിറത്തിലുള്ള ഷർട്ട്, മടക്കിക്കുത്തിയ മുണ്ട്, തലയിലൊരു ചുറ്റിക്കെട്ട് – ചുമട്ടുതൊഴിലാളി എന്നു കേൾക്കുമ്പോൾ ശരാശരി മലയാളിയുടെ മനസ്സിൽ വരുന്ന ചിത്രം ഇതായിരിക്കും. നോക്കുകൂലി മുതൽ ‘കൈകാര്യംചെയ്യൽ’ വരെയുള്ള സീനുകൾ ഓരോന്നായി മനസ്സിൽ നിറയുകയും ചെയ്യും. ഈ രൂപവും ഭാവവും പഴങ്കഥയാകാൻ അധികകാലം വേണ്ടിവരില്ലെന്ന് ഉറപ്പാക്കുകയാണ് തൊഴിൽവകുപ്പിനു കീഴിലെ രണ്ടു സ്ഥാപനങ്ങൾ. സംസ്ഥാന ചുമട്ടുതൊഴിലാളി ക്ഷേമനിധി ബോർഡ് ആണ് അതിൽ ആദ്യത്തേത്. സ്വയംഭരണ സ്ഥാപനമായ കേരള ഇൻസ്റ്റിറ്റ്യൂട്ട് ഫോർ ലേബർ ആൻഡ് എംപ്ലോയ്മെന്റ് (കിലെ) ആണ് മറ്റൊന്ന്.

പെരുമാറ്റരീതിയിലെ തിരുത്തലിൽ തുടങ്ങി, ആരോഗ്യസുരക്ഷാ അവബോധം നേടി, പുത്തൻ യന്ത്രസാമഗ്രികളിൽ പരിശീലനം നേടി ലൈസൻസും യൂണിഫോമുമായി പുറത്തിറങ്ങുന്ന ‘നവശക്തി’ പദ്ധതിയാണ് ക്ഷേമനിധി ബോർഡ് നടപ്പാക്കുന്നത്. സ്വഭാവരൂപീകരണത്തിൽ തുടങ്ങി യന്ത്രങ്ങളിലെ പരിശീലനം പൂർത്തിയാക്കി ‘സ്കിൽ ഇന്ത്യ’ നൽകുന്ന സർട്ടിഫിക്കറ്റുമായി പുറത്തുവരുന്ന പദ്ധതി കിലെയും നടപ്പാക്കുന്നു.

മാറുന്ന കാലത്തിനനുസരിച്ച് ചുമട്ടുതൊഴിൽ മേഖലയെ പുതുക്കിയെടുക്കണമെന്ന കോടതികളുടെയും സർക്കാരിന്റെയും തൊഴിലാളികളുടെ തന്നെയും താൽപര്യം പതിയെ നടപ്പായിത്തുടങ്ങുകയാണെന്ന് ഈ രണ്ടു സ്ഥാപനങ്ങളും പറയുന്നു. മാറ്റങ്ങൾക്ക് പിൻബലമേകുന്ന നിയമഭേദഗതി കൂടി വരുമെന്നാണു പ്രതീക്ഷ.

∙ കട്ട ഇറക്കും പോലെ മുട്ട ഇറക്കാൻ പോയാൽ എങ്ങനെയിരിക്കും! 

അരിക്കടയിലെ ചാക്ക് അട്ടിയിടുന്നതു പോലെ ഐടി സ്ഥാപനത്തിലെ പെട്ടി കൊണ്ടിട്ടാലോ? വിദഗ്ധ പരിശീലനം ലഭിച്ചവർ മാത്രമേ കൈകാര്യം ചെയ്യാവൂ എന്നു നിഷ്കർഷിക്കുന്ന സാധനങ്ങൾ ഇറക്കാൻ ചുമട്ടുതൊഴിലാളികളെ സജ്ജരാക്കുന്നതാണ് ബോർ‍ഡിന്റെയും കിലെയുടെയും പരിശീലനം. ബോർഡ് കൂടുതൽ ദിവസങ്ങളെടുത്ത് വിശദമായ പരിശീലനം നൽകുന്നു. കിലെ ആകട്ടെ, മൂന്നു ദിവസത്തെ പരിശീലനത്തിനു ശേഷം സ്കിൽ സർട്ടിഫിക്കറ്റ് കൂടി നൽകുന്നു.

രാജ്യത്താകെ സാധുതയുള്ള സർട്ടിഫക്കറ്റ് നൽകുന്ന ഇത്തരമൊരു പരിശീലനം ഇതാദ്യമായാണ് ഒരു സർക്കാർ സ്ഥാപനം നടത്തുന്നതെന്ന് കിലെ പറയുന്നു. തൊഴിൽ നൈപുണ്യം കൂട്ടുക മാത്രമല്ല, പണം കൊടുത്ത് സേവനം ആവശ്യപ്പെടുന്ന സ്ഥാപനത്തോടും തൊഴിലുടമയോടുമുള്ള ബന്ധം എങ്ങനെ ഊഷ്മളമാക്കാമെന്നും പഠിപ്പിച്ചെടുക്കുന്നതാണ് രണ്ടു പദ്ധതികളും.

∙ അങ്ങനെ തുടങ്ങി...

തിരുവനന്തപുരം, കൊച്ചി കിൻഫ്ര ഇൻഡസ്ട്രിയൽ പാർക്കുകളിൽ സാധനസാമഗ്രികളുടെ കയറ്റിറക്ക് ജോലികളിൽ ചുമട്ടുതൊഴിലാളികളുണ്ട്. വിലയേറിയ യന്ത്രഭാഗങ്ങൾ, അതീവജാഗ്രതയോടെ കൈകാര്യം ചെയ്യേണ്ട അസംസ്കൃത വസ്തുക്കളും ഉൽപന്നങ്ങളും പായ്ക്ക് ചെയ്യുന്നതിനുള്ള വസ്തുക്കളും... എല്ലാം കൈകാര്യം ചെയ്യാൻ ചുമട്ടുതൊഴിലാളികൾക്ക് കഴിയുന്നുണ്ടെങ്കിലും വിദഗ്ധ പരിശീലനം ലഭിക്കുന്നതു നല്ലതല്ലേ എന്ന് കിൻഫ്രയിൽനിന്നുയർന്ന നി‍ർദേശമാണ് പരിശീലനത്തിനു തുടക്കമിടാൻ ‘പെട്ടെന്നുണ്ടായ കാരണം’.

പുതിയ സാങ്കേതികവിദ്യകൾ വ്യാപകമാകുന്നതോടെ ചുമട്ടുതൊഴിലാളികൾ അപ്രസക്തരാകുമെന്ന ചർച്ച ഒരുവശത്ത്. ചുമട്ടുതൊഴിലാളികളെ ആധുനികവൽക്കരിക്കേണ്ടത് കാലഘട്ടത്തിന്റെ ആവശ്യമാണെന്ന, മന്ത്രിമാർ ഉൾപ്പെടെയുള്ളവരുടെ നിരീക്ഷണം മറ്റൊരു വശത്ത്. ചുമട്ടുതൊഴിലാളികളുടെ കഴിവുകൾ പരിപോഷിപ്പിക്കുക (ഹെഡ്‌ലോഡേഴ്സ് സ്കിൽ അപ്ഡേഷൻ) എന്ന മട്ടിൽ കിലെയിൽ ചർച്ച നടക്കുന്നതും ഇതേ സമയത്തു തന്നെയാണ്. തൊഴിലാളികൾക്കു പരിശീലനം നൽകാമോ എന്ന് അഭ്യർഥന വന്നതോടെ ട്രെയ്നിങ് മൊഡ്യൂൾ തയാറാക്കി. 

ബോർഡ് ആകട്ടെ, നേരത്തേ തന്നെ മുന്നൊരുക്കം നടത്തിയിരുന്ന പരിശീലന പരിപാടി നടപ്പാക്കിത്തുടങ്ങുകയായിരുന്നു. ബോർഡിന്റെ മൂന്നുഘട്ടങ്ങളിലായുള്ള നവശക്തി പരിശീലന പരിപാടിയുടെ ആദ്യഭാഗത്തിനും അവസാനഭാഗത്തിനും വിദഗ്ധ സംഘങ്ങളിൽനിന്ന് കരാർ ക്ഷണിച്ചു. രണ്ടാം ഘട്ടമായി ഫാക്ടറീസ് ആൻഡ് ബോയിലേഴ്സിന്റെ ‘സുരക്ഷാരഥം’ പദ്ധതി കൂടി ഉൾപ്പെടുത്തി. തൊഴിലാളികൾക്ക് സ്വഭാവരൂപീകരണ ക്ലാസ് മുതൽ യന്ത്രങ്ങളിലുള്ള പരിശീലനം വരെ നൽകി ലൈസൻസ് കൂടി എടുപ്പിച്ച് നൽകുന്നതാണ് നവശക്തി. ബോർഡ് രൂപകൽപന ചെയ്ത പൊതുവായ യൂണിഫോമും നൽകും. പരിശീലനം ലഭിച്ചവരിൽ ആദ്യ സംഘത്തെ ഐഎസ്ആർഒയിൽ ജോലികൾക്ക് നിയോഗിച്ചു കഴിഞ്ഞു.  

∙ തൊഴിൽ വൈദഗ്ധ്യം ഇല്ലെന്നോ?

‘വൈദഗ്ധ്യം’ ആവശ്യമുള്ള ജോലികൾ ചെയ്യണമെന്ന് അതില്ലാത്ത ചുമട്ടുതൊഴിലാളികൾ വാശി പിടിക്കുന്നു എന്നത് പല സ്ഥാപനങ്ങളുടെയും പരാതിയാണ്. പലപ്പോഴും ജോലി നിഷേധിക്കപ്പെടുന്നു എന്നു തൊഴിലാളികളും പരാതിപ്പെടുന്നു. ഇതു മറികടക്കാൻ പരിശീലനം തൊഴിലാളികളെ സജ്ജരാക്കുമെന്ന് ചുമട്ടുതൊഴിലാളി ക്ഷേമനിധി ബോർഡ് കരുതുന്നു. സോഫ്റ്റ് സ്കിൽ ട്രെയിനിങ്, തിയറി, ഡ്രൈവിങ് എന്നിങ്ങനെ 3 ഘട്ടങ്ങളിലായാണ് പരിശീലനം.

തൊഴിൽപരിശീലനമെന്ന പോലെ ആരോഗ്യ, തൊഴിൽസുരക്ഷാ ബോധവൽക്കരണവും പദ്ധതിയിൽ ഉൾപ്പെടുത്തിയിരിക്കുന്നു. എറണാകുളം തൃക്കാക്കരയിലാണ് പൈലറ്റ് പ്രോജക്ട് നടപ്പാക്കിയത്. രണ്ടാംഘട്ടം തിരുവനന്തപുരത്ത്. ഫോർക്ക് ലിഫ്റ്റ്, മിനി ക്രെയിൻ, ട്രെയിലർ എന്നിവയിൽ പരിശീലനം നൽകി. കപ്പലിൽനിന്നും ഉയരം കൂടിയ ട്രക്കുകളിൽനിന്നും ചരക്കിറക്കാനുള്ള വൈദഗ്ധ്യം അങ്ങനെ ഉറപ്പാക്കുന്നു. 147 പേർ ആദ്യ ബാച്ചിൽ പൂർത്തിയാക്കി. ഫാക്ടറീസ് ആൻഡ് ബോയിലേഴ്സ് വകുപ്പിന്റെ മൊബൈൽ ക്ലാസ് റൂം എത്തിച്ചാണ് സുരക്ഷാപാഠങ്ങൾ അവതരിപ്പിച്ചത്. പരിശീലനത്തിന് റജിസ്റ്റർ ചെയ്തവർക്കെല്ലാം ഈ ക്ലാസ് നൽകാൻ മാത്രം അഞ്ചുദിവസമെടുത്തു. 

ലോജിസ്റ്റിക്സ് അനുബന്ധ പരിശീലനമെന്ന നിലയിൽ കേന്ദ്ര ഏജൻസിയായ നാഷനൽ സ്കിൽ ഡവലപ്മെന്റ് കോർപറേഷൻ (സ്കിൽ ഇന്ത്യ) ഉദ്യോഗസ്ഥർ പരിശീലനം നേരിട്ടു വിലയിരുത്തി സർട്ടിഫിക്കറ്റ് നൽകുന്നതാണ് കിലെ പദ്ധതിയുടെ സവിശേഷത. തിരുവനന്തപുരത്തെ പരിശീലനം പൂർത്തിയായി. അടുത്തത് എറണാകുളം ജില്ലയിലാണ്. ക്ലാസുകൾക്കൊപ്പം അതതു ജില്ലയിലെ പ്രധാന വെയർ ഹൗസിൽ എത്തിച്ചാണ് പ്രായോഗിക പരിശീലനം നൽകുന്നത്.  ക്യുആർ കോഡ് വഴി സ്ഥാപനമുടമയ്ക്ക് ആവശ്യമെങ്കിൽ സർട്ടിഫിക്കറ്റിന്റെ സാധുത പരിശോധിക്കാം.

∙ യന്ത്രങ്ങളോടു സംസാരിക്കണം

ഓരോ ജില്ലയിലും തിരഞ്ഞെടുത്ത ശരാശരി 50 തൊഴിലാളികൾക്കാണ് കിലെ പരിശീലനം നൽകുന്നത്. ‘പാക്കേഴ്സ് ആൻഡ് മൂവേഴ്സ്’ മാതൃകയിൽ പരിശീലനം പൂർത്തിയായവരുടെ ക്ലസ്റ്റർ രൂപീകരിക്കും. എല്ലാ ജില്ലകളിലും ക്ലസ്റ്ററുകൾ രൂപീകരിക്കുന്നതോടെ വിദഗ്ധരായ 1000 തൊഴിലാളികളുടെ സംസ്ഥാനതല ശൃംഖല നിലവിൽ‍ വരും. ആദ്യ ക്ലസ്റ്ററുകളിലെ അംഗങ്ങളുടെ സേവനം കൂടി പ്രയോജനപ്പെടുത്തി പരിശീലനത്തിന്റെ അടുത്ത ഘട്ടങ്ങളിലേക്കു കടക്കും. 

യന്ത്രസഹായത്തോടെയും അല്ലാതെയും ലോഡ് ഇറക്കി പഠിക്കുന്നതാണ് നവശക്തി പരിശീലനത്തിന്റെ‌ പ്രധാനഘട്ടം. അതിനു സൗകര്യമുള്ള കൊച്ചിയിലെ സ്ഥാപനത്തിലായിരുന്നു പരിശീലനം. എല്ലാവർക്കും പരിശീലനം നൽകാൻ 60 ദിവസമെടുത്തു. കയറ്റിറക്കുയന്ത്രങ്ങൾ പ്രവർത്തിപ്പിക്കാൻ മോട്ടർ വാഹനവകുപ്പിന്റെ ലൈസൻസ് വേണമെന്നതിനാൽ അതിന് തൊഴിലാളികളെ പങ്കെടുപ്പിക്കുന്നതാണ് അടുത്ത ഘട്ടം.

ഇതോടെ, വൈദഗ്ധ്യം ആവശ്യമുള്ള കയറ്റിറക്കു ജോലികൾ ചെയ്യാൻ തൊഴിലാളികൾ പ്രാപ്തരായെന്നാണ് ചുമട്ടുതൊഴിലാളി ക്ഷേമനിധി ബോർഡിന്റെ വിലയിരുത്തൽ. യന്ത്രസഹായവും വൈദഗധ്യവും ഇല്ലാത്തതു കൊണ്ട് ജോലികളിൽ നിന്ന് ഒഴിവാക്കപ്പെടുന്നതിന് ഇതോടെ അവസാനമാകുമെന്നാണ് പ്രതീക്ഷ. പരിശീലനം പൂർത്തിയാക്കിയ 10 പേരെ ഐഎസ്ആർഒയിലെ ജോലികൾക്ക് നിയോഗിച്ചത് അതിന് ഉദാഹരണമാണെന്നും ബോ‍ർഡ് ഉദ്യോഗസ്ഥർ ചൂണ്ടിക്കാട്ടുന്നു.

∙ മാറും, മട്ടും ഭാവവും...

നോക്കുകൂലി പോലുള്ള പ്രശ്നങ്ങൾ തൊഴിലാളികളുടെ പ്രതിഛായയെ എങ്ങനെ ബാധിക്കുന്നു എന്നതിനെക്കുറിച്ചുള്ള ചർച്ച ബോർഡിന്റെ പരിശീലനത്തിന്റെ ഭാഗമാണ്. അതിവേഗം മാറുന്ന വിപണിയാവശ്യങ്ങളും തൊഴിൽസ്വഭാവവും തിരിച്ചറിയാതിരിക്കുന്നത് ചുമട്ടുതൊഴിലിന്റെ സാധ്യതകൾ ഇല്ലാതാക്കുമെന്ന ആശങ്ക ക്ലാസുകളിൽ ഉയരുന്നു. പെരുമാറ്റതീരിയിലെ മാറ്റം തൊഴിലിലും തൊഴിലാളികളുടെ ശാരീരിക – മാനസിക ആരോഗ്യത്തിലും കൊണ്ടുവരുന്ന മാറ്റങ്ങൾ ഉൾപ്പെടെയുള്ള കാര്യങ്ങൾ ക്ലാസുകളിൽ ചർച്ചയ്ക്കു വരുന്നു.

തൊഴിൽമേഖല സുരക്ഷിതവും ജനസൗഹൃദവുമാക്കുന്നതിനാണ് തൊഴിലാളികളുടെ കൂട്ടായ്മ പ്രയോജനപ്പെടുത്തേണ്ടതെന്ന് ക്ലാസുകളിൽ ഓർമിപ്പിക്കുന്നു. സമൂഹവും തൊഴിലാളിയും എന്ന വിഷയത്തിലെ ക്ലാസ് കിലെ പരിശീലനത്തിന്റെ ഭാഗമാണ്. തൊഴിൽ സ്ഥാപനമുണ്ടെങ്കിലേ തൊഴിലാളിയുള്ളൂ എന്ന ആശയം പരിപാടിയിൽ ചർച്ച ചെയ്യുന്നു. സമൂഹവുമായി ചേർന്നുപോകാനുള്ള വഴികൾ വിശദീകരിക്കുന്നു. ലുങ്കിയും ഷർട്ടും എന്ന പൊതുവേഷത്തിനു പകരം മറ്റേത് സംഘടിത, സ്ഥാപനാധിഷ്ഠിത തൊഴിലാളികൾക്കുമുള്ളതു പോലൊരു വേഷം വേണമെന്ന കാര്യവും ചർച്ച ചെയ്യുന്നു. അതിനുള്ള ആശയങ്ങൾ അവതരിപ്പിക്കുന്നു. തൊഴിലാളികളുടെ നിലപാട് ആരായുന്നു.