‘ഭാരത് രാഷ്ട്ര സമിതി ബിജെപിയുടെ ബി ടീം’, ആ റാവു വിരുദ്ധനെ മോദി മാറ്റിയതെന്തിന്? തിരിച്ചു വരാൻ കോൺഗ്രസ്

മധ്യപ്രദേശ്, രാജസ്ഥാൻ, ഛത്തീസ്ഗഡ് തുടങ്ങിയ പ്രധാന സംസ്ഥാനങ്ങളിൽ ബിജെപിയും കോൺഗ്രസും തമ്മില്‍ നേരിട്ടുള്ള ഏറ്റുമുട്ടലാണെങ്കിൽ തെലങ്കാനയിൽ ത്രികോണ മത്സരമാണ്. അതിൽ മുൻതൂക്കമാകട്ടെ സംസ്ഥാനം ഭരിക്കുന്ന കെ.ചന്ദ്രശേഖര റാവു എന്ന കെസിആറിന്റെ ഭാരത് രാഷ്ട്ര സമിതിക്കും (ബിആർഎസ്). ബിജെപിയും കോൺഗ്രസുമാണ് ഇവിടെ പ്രതിപക്ഷ പാർട്ടികള്‍. നവംബർ 30ന് തിര‍ഞ്ഞെടുപ്പ് നടക്കുമ്പോൾ മത്സരരംഗത്തുള്ള എല്ലാ പാർട്ടികളുടെയും സർവ സന്നാഹങ്ങളും 2014ൽ മാത്രം രൂപംകൊണ്ട ഈ സംസ്ഥാനത്തു കേന്ദ്രീകരിക്കും. 

മൂന്നാം തവണയും അധികാരത്തിലേറാൻ ഏറെ സാധ്യത കൽപ്പിക്കപ്പെടുന്നുണ്ട് ബിആർഎസിന്. അതേസമയം, നഷ്ടപ്പെട്ട തെലുങ്കുമണ്ണ് തിരിച്ചു പിടിക്കാനുള്ള ശ്രമമാണ് കോൺഗ്രസിന്റേത്. ദക്ഷിണേന്ത്യയിൽ വേരുറപ്പിക്കുന്നതിന് തെലങ്കാന പിടിക്കാൻ വലിയ തയാറെടുപ്പുകള്‍ ബിജെപിയും ഇവിടെ നടത്തുന്നു. എന്താണ് തെലങ്കാനയിലെ രാഷ്ട്രീയ സ്ഥിതിഗതികൾ? ഇവിടെ വീശുന്ന രാഷ്ട്രീയക്കാറ്റിൽ ആരു വാഴും? ആരു വീഴും?

∙ ഇതുവരെ ഇളകാത്ത റാവുവിന്റെ കോട്ട, മുന്നേറി കോൺഗ്രസും ബിജെപിയും 

തെലങ്കാനയിലെ വോട്ടർമാർ മൂന്നാം വട്ടവും അധികാരത്തിലേറ്റും എന്നാണ് ബിആർഎസ് പ്രതീക്ഷിക്കുന്നത്. ഇക്കഴിഞ്ഞ ദിവസം പുറത്തുവന്ന സർവേ പക്ഷേ, ഇതിൽ ചില സംശയങ്ങൾ ഉയർത്തുന്നുണ്ട്. തൂക്കുമന്ത്രിസഭയ്ക്കാണ് ഇത്തവണ സാധ്യത കൂടുതൽ എന്നാണ് സർവേഫലം. ഇതനുസരിച്ച് ബിആർഎസ് 43–55 സീറ്റുകൾ നേടും. കോൺഗ്രസിന്റെ വമ്പൻ തിരിച്ചുവരവും സര്‍വേ പ്രവചിക്കുന്നു– 48–60 സീറ്റുകൾ. ബിജെപിക്ക് കിട്ടുക 5–11 സീറ്റുകളും. എന്നാൽ തെലങ്കാന സമരനായകനായ കെസിആറിനെ ജനം കൈവിടില്ല എന്ന ആത്മവിശ്വാസത്തിലാണ് ബിആർഎസ്. 

2018ലും ബിആർഎസിന് അധികാരം നഷ്ടമാകുമെന്ന പ്രതീതി ഉണ്ടായിരുന്നെങ്കിലും ആകെയുള്ള 119 സീറ്റുകളിൽ 88ഉം നേടി രണ്ടാം വട്ടം അധികാരം പിടിച്ചു. രണ്ടാം സ്ഥാനത്തു വന്ന കോൺഗ്രസിന് 19 സീറ്റുകൾ. അസദുദ്ദീൻ ഒവൈസിയുടെ എഐഎംഐഎമ്മിന് ഏഴു സീറ്റുകളും ലഭിച്ചു. ബിജെപിക്ക് ലഭിച്ചത് ഒന്ന്. എന്നാൽ ഏതാനും വർഷങ്ങളായി തെലങ്കാനയിൽ ബിജെപിയുടെ വോട്ടുവിഹിതത്തിൽ വലിയ വർധനയുണ്ടായിട്ടുണ്ട്. 2018ലെ നിയമസഭാ തിരഞ്ഞെടുപ്പിൽ ബിആർഎസ് 46.87% വോട്ടും 88 സീറ്റുകളും നേടിയപ്പോൾ രണ്ടാം സ്ഥാനത്തെത്തിയ കോൺഗ്രസിന്റെ വോട്ട് വിഹിതം 29% ആയിരുന്നു. സീറ്റുകൾ 19. ബിജെപിക്ക് 5.98% വോട്ടുകളും ഒരു സീറ്റും ലഭിച്ചു. 

2019ലെ ലോക്സഭാ തിരഞ്ഞെടുപ്പിൽ ബിആർഎസ് വോട്ട് വിഹിതം കുറഞ്ഞ് 41.71 ശതമാനമായി. സീറ്റുകൾ ആകെയുള്ള 17ൽ ഒൻപത്. ബിജെപിയാണ് വലിയ നേട്ടമുണ്ടാക്കിയത് – 4 സീറ്റുകൾ. വോട്ട് വിഹിതമാകട്ടെ 19.65 ശതമാനമായി ഉയർന്നു. ‌കോൺഗ്രസിന്റെ വോട്ടു വിഹിതം 29.78ഉം സീറ്റുകൾ മൂന്നും. ലോക്സഭയിലെ വോട്ട് വിഹിതത്തിന്റെ അടിസ്ഥാനത്തിൽ അടുത്ത നിയമസഭാ തിരഞ്ഞെടുപ്പിൽ ലഭിക്കുന്ന സീറ്റുകൾ സംബന്ധിച്ച് പ്രവചനം നടത്തിയാൽ  ടിആർഎസ്–71, കോൺഗ്രസ്–21, ബിജെപി–21, എഐഎംഐഎം–6 എന്നിങ്ങനെയായിരിക്കും ഏകദേശ നില. ലോക്സഭാ തിരഞ്ഞെടുപ്പിൽ ചിന്തിക്കുന്നതു പോലെയല്ല വോട്ടർ നിയമസഭാ തിര‍ഞ്ഞെടുപ്പിൽ ചിന്തിക്കുന്നതെന്നതാണ് ഈ പ്രവചനത്തിന്റെ ന്യൂനത.

∙ എങ്ങനെ തകർക്കും കെസിആറിന്റെ വ്യക്തിപ്രഭാവം; ഭരണവിരുദ്ധ വികാരം പിടിവള്ളിയാകുമോ? 

തെലങ്കാന സംസ്ഥാന രൂപീകരണ പ്രക്ഷോഭങ്ങൾക്ക് നേതൃത്വം നൽകിയ കെ. ചന്ദ്രശേഖര റാവുവിന് ഒപ്പം നിൽക്കാൻ പറ്റുന്ന നേതാക്കളൊന്നും കോൺഗ്രസിനോ ബിജെപിക്കോ സംസ്ഥാനത്തില്ല എന്നതാണ് ബിആർഎസിനുള്ള മേൽക്കൈ. മൂന്നാം തവണയും അങ്കത്തിനൊരുങ്ങുമ്പോൾ കെസിആർ തന്നെയാണ് ബിആർഎസിന്റെ ഏറ്റവും വലിയ തുറുപ്പുചീട്ട്. ഒക്ടോബർ 15 മുതൽ 41 തിരഞ്ഞെടുപ്പു റാലികളിലായിരിക്കും അദ്ദേഹം പങ്കെടുക്കുക. അദ്ദേഹത്തിന്റെ വ്യക്തിപ്രഭാവവും സർക്കാരിന്റെ ക്ഷേമപദ്ധതികളും വോട്ടു കൊണ്ടുവരും എന്ന് ബിആർഎസ് വിശ്വസിക്കുന്നു. 

കണ്ടാൽ മൃദുവായ ആളെന്ന് തോന്നുമെങ്കിലും വാക്കുകളിൽ തീ ഒളിപ്പിച്ചിട്ടുള്ള നേതാവാണ് കെസിആർ. വലിയ ആക്രോശങ്ങളോ ബഹളങ്ങളോ ഇല്ലാതെ നാട്ടുമൊഴികളും പഴഞ്ചൊല്ലുകളുമെല്ലാം ചേർത്തുള്ള ഗ്രാമീണ ഭാഷയിൽ പ്രസംഗിക്കുന്ന കെസിആർ വലിയ ജനക്കൂട്ടത്തെ ആകർഷിക്കാറുമുണ്ട്. 115 സീറ്റുകളിലേക്ക് സ്ഥാനാർഥികളെ നേരത്തേതന്നെ പ്രഖ്യാപിച്ചും പ്രകടനപത്രിക പുറത്തിറക്കിയും ബിആർഎസ് മറ്റു രണ്ടു പാർട്ടികളേക്കാൾ മുന്നിലാണ്. കെസിആർ നടപ്പാക്കിയ ജനക്ഷേമ പരിപാടികളാണ് അദ്ദേഹത്തിന്റെ പ്രതിച്ഛായ ഇന്നും മെച്ചപ്പട്ടതാക്കുന്നത്.