മലപ്പുറത്ത് വിഎസ് പറഞ്ഞതല്ല നടന്നത്; 2011ൽ സീറ്റ് നിഷേധം തിരുത്തിയത് യച്ചൂരി; തുറന്നുപറഞ്ഞ് വിഎസിന്റെ സുരേഷ്

? വാർത്ത ചോർത്തി എന്നതിന്റെ പേരിലാണല്ലോ താങ്കളടക്കം വിഎസിന്റെ സ്റ്റാഫിലെ മൂന്നു പേരെ 2013ൽ പുറത്താക്കിയത്. ബ്രാഞ്ച് അംഗങ്ങൾ മാത്രമായ നിങ്ങൾ മൂന്നു പേർക്കും സിപിഎമ്മിലെ ഉന്നത യോഗങ്ങളിൽ നടക്കുന്ന രഹസ്യങ്ങൾ അറിയാ‍ൻ കഴിയില്ലല്ലോ. അപ്പോൾ വിഎസിൽ നിന്ന് വാർത്തകൾ മനസ്സിലാക്കി അതു ചോർത്തി എന്ന് അനുമാനിക്കേണ്ടി വരും. അതാണോ സംഭവിച്ചത്

∙ അതു ശരിയല്ല. ചില ഘട്ടങ്ങളിൽ ചില കാര്യങ്ങൾ പങ്കുവയ്ക്കുമെന്നല്ലാതെ പാർട്ടി തീരുമാനങ്ങൾ പുറത്തു വരട്ടെ എന്ന നിലയിൽ ബോധപൂർവം പറയുന്ന രീതി വിഎസിന് ഒരിക്കലും ഉണ്ടായിട്ടില്ല. വിഎസ് പങ്കെടുക്കാത്ത എത്രയോ യോഗങ്ങളുടെ വാർത്ത പുറത്തു വന്നു! പിബിയിലെ ചർച്ചകൾ വരെ അക്ഷരം പ്രതി മാധ്യമങ്ങളിൽ വന്നു. സമ്മേളനത്തിന് അകത്തു നടക്കുന്ന കാര്യങ്ങൾ വിഎസ് അകത്ത് ഇരിക്കുമ്പോൾ തന്നെ ചോർന്നു വന്നു. അതിനെല്ലാം ഞങ്ങൾ എങ്ങനെ ഉത്തരവാദികളാകും? ഞങ്ങൾ അക്കാര്യത്തിൽ നൂറുശതമാനം നിരപരാധികളാണ്.

? പക്ഷേ വിഎസിനു ഹിതകരമായ പല വാർത്തകളും ആ സമയത്തു പുറത്തു വന്നതു വസ്തുതയല്ലേ? അതിൽ താങ്കളടക്കമുള്ളവർക്കു പങ്കില്ലേ

∙ വിഎസിന്റെ പ്രതിഛായ വളർ‌ത്താനായി ബോധപൂർവം വാർത്തകൾ സൃഷ്ടിക്കുകയും ചോർത്തുകയും എന്നതായിരുന്നു എനിക്കെതിരെയുള്ള കുറ്റപത്രത്തിലെ ഒരു ആരോപണം.യഥാർഥത്തിൽ വിഎസിനെ പലപ്പോഴും നിയന്ത്രിക്കാനാണ് ഞങ്ങളെല്ലാം ശ്രമിച്ചത്. വിഎസ് പാർട്ടിക്ക് അകത്തു തന്നെ നിൽക്കണമെന്ന് ഏറ്റവും ആഗ്രഹിച്ച ഒരാൾ ഞാനാണ്. അദ്ദേഹം വാർത്താസമ്മേളനം നടക്കുമ്പോൾ ഞങ്ങളെല്ലാം അനുഭവിച്ചിരുന്ന ടെൻഷന് കണക്കില്ല. ഒരു വാക്ക് പുറത്തു പോയാൽ തീർന്നു. അന്നെല്ലാം നിങ്ങൾ ശ്രദ്ധിച്ചിരുന്നെങ്കിൽ ഞങ്ങളുടെ നെഞ്ചിടിപ്പ് കേൾക്കാമായിരുന്നു.

? വിഭാഗീയത രൂക്ഷമായ ആ ഘട്ടത്തിൽ പാർട്ടി കമ്മിറ്റികളിൽ നിരന്തരമായ വിമർശനത്തിന് വിഎസ് ഇരയാകുമായിരുന്നല്ലോ. ഏതെങ്കിലും ഘട്ടത്തിൽ അത് അദ്ദേഹത്തെ വിഷമിപ്പിച്ചതായി തോന്നിയോ

∙ ചില ആളുകളുടെ വിമർശനം കടുത്തതാകുമ്പോൾ വിഷമം വിഎസിന്റെ മുഖത്ത് ഉണ്ടാകും. തിരുവനന്തപുരം സംസ്ഥാന സമ്മേളനത്തിന്റെ സമയത്ത് അതു വളരെ പ്രകടമായി. അദ്ദേഹത്തിന് അന്നു സുഖമില്ലാതെ ഇരിക്കുകയായിരുന്നു. സമ്മേളനത്തിൽ പോയി അസുഖവും ബിപിയും കൂട്ടണോ എന്നു ഞങ്ങൾ ചോദിച്ചതാണ്. വിമർശിക്കുമെന്ന് ഭയന്ന് പാർട്ടി സമ്മേളനത്തിനു പോകാതിരിക്കുന്ന രീതിയല്ല വിഎസിന്റേത്. ‘ക്യാപിറ്റൽ പണിഷ്മെന്റ്’ അടക്കമുളള പ്രയോഗങ്ങൾ ആ സമ്മേളനത്തിലാണല്ലോ സംഭവിച്ചത്. അതുൾപ്പെടെ അദ്ദേഹത്തെ പ്രയാസപ്പെടുത്തി. വിഎസിനെ അവിടെ കൊണ്ടിരുത്തിയിരിക്കുന്നത് എന്തിനാണെന്ന് ചില പ്രതിനിധി സഖാക്കൾ ധാർമികരോഷത്തോടെ വന്നു ചോദിച്ചു. അത്രമാത്രം അദ്ദേഹം വിഷമത്തിലായിപ്പോയി. സങ്കടവും രോഷവും എല്ലാം ആ മുഖത്തു കാണാമായിരുന്നു.

? താങ്കൾക്കെതിരെ സംസ്ഥാന കമ്മിറ്റിയും പിബിയും അച്ചടക്ക നടപടി തീരുമാനിച്ച ശേഷം ആ യോഗങ്ങളിൽ പങ്കെടുത്ത വിഎസ് മടങ്ങിപ്പോകുമ്പോഴും താങ്കൾ ഒപ്പമുണ്ടായിരുന്നല്ലോ. എന്തു പറഞ്ഞു

∙ കമ്മിറ്റി കഴിഞ്ഞ് വിഎസ് ഇറങ്ങിവരുന്നതിനു മുൻപു തന്നെ തീരുമാനം അതായിരിക്കുമെന്ന് എനിക്ക് അറിയാമായിരുന്നു. രാവിലെ മുതൽ മാധ്യമങ്ങളിൽ ഞങ്ങൾക്കെതിരെ നടപടി വരുമെന്നു വന്നുകൊണ്ടിരിക്കുകയാണ്. വിഎസ് കാറിൽ കയറി. അദ്ദേഹം എന്നോട് ഒന്നും പറഞ്ഞില്ല, ഞാനും ഒന്നും ചോദിച്ചില്ല. അത്രത്തോളം വിഷാദത്തിൽ ഇരിക്കുന്നതു കണ്ട എനിക്ക് ചോദിക്കാൻ ധൈര്യം വന്നില്ല.‘കേരള ഹൗസിൽ’ എത്തി കുറച്ചു കഴിഞ്ഞപ്പോൾ ഞങ്ങളെ പുറത്താക്കിയ വിവരം ചാനലുകളിലൂടെ വന്നു.

ജനറൽ സെക്രട്ടറി പ്രകാശ് കാരാട്ട് വാർത്താസമ്മേളനം നടത്തുന്നതിനു മുൻപു തന്നെയാണ് വാർത്തകൾ വന്നത്. അപ്പോൾ ‘ മൂന്നാളെയും പുറത്താക്കി എന്നാണല്ലോ വാർത്ത’ എന്നു വിഎസിനോടു ചൂണ്ടിക്കാട്ടി. ‘അതൊന്നും നടക്കാൻ പോകുന്നില്ല’ എന്നായിരുന്നു അദ്ദേഹത്തിന്റെ പ്രതികരണം. സംസ്ഥാന കമ്മിറ്റിയുടെ തീരുമാനം കേന്ദ്രകമ്മിറ്റി തിരുത്തുമെന്നായിരുന്നു വിഎസിന്റെ അതുവരെ ഉള്ള പ്രതീക്ഷ. പുറത്ത് ചാനലുകളുണ്ടെന്നും ഒന്നും പ്രതികരിക്കരുതെന്നും ഞാൻ അപേക്ഷിച്ചു.

? നിങ്ങൾ മൂന്നു പേരെയും വിട്ടു പിരിയാൻ വിഎസ് എന്നിട്ടും തയാറായില്ല എന്നാണല്ലോ കേട്ടത്

∙ പിറ്റേദിവസം രാവിലെ എകെജി സെന്ററിൽ പാർട്ടി യോഗമുണ്ട്. അതിനു പോകാനായി രാവിലെ എത്തിച്ചേരണമെന്ന് വിഎസ് തലേന്നു പറഞ്ഞിരുന്നു. പാർട്ടിക്കു പുറത്തായ ഞാൻ എങ്ങനെയാണ് അതു ചെയ്യുക? എനിക്കൊപ്പം പുറത്താക്കപ്പെട്ട പ്രസ് സെക്രട്ടറി കെ. ബാലകൃഷ്ണനെ വിളിച്ച് എന്റെ സങ്കടം പറഞ്ഞു. പുറത്താക്കിയ തീരുമാനം ഔദ്യോഗികമായി സിപിഎം അറിയാക്കാത്ത സാഹചര്യത്തിൽ കന്റോൺമെന്റ് ഹൗസിലേക്ക് വരാനാണ് അദ്ദേഹം പറഞ്ഞത്. ചെന്നപ്പോൾ എന്നെ പ്രതീക്ഷിച്ചിട്ടെന്ന പോലെ വിഎസ് ഇരിക്കുകയാണ്. പുറത്താക്കിയതൊന്നും തനിക്കു ബാധകമല്ലെന്ന നിലയിലാണ് അദ്ദേഹത്തിന്റെ പെരുമാറ്റം.

എകെജി സെന്ററിലേക്കു പതിവു പോലെ ഒരുമിച്ചു പോകാമെന്ന് പറ‍ഞ്ഞു. പാർട്ടിയിൽ നിന്നു പുറത്താക്കിയ ഒരാൾ വിഎസിനൊപ്പം എകെജി സെന്ററിലേക്കു പിറ്റേന്നു പോകുന്നത് പാർട്ടിയെ വെല്ലുവിളിക്കുന്ന നടപടിയാകുമെന്നു ഞാൻ പറഞ്ഞു. ആദ്യമായാണ് വിഎസിനെ ധിക്കരിച്ചു പറയുന്നത്. പക്ഷേ അദ്ദേഹം സമ്മതിച്ചില്ല.‘സുരേഷ് എന്റെ കൂടെ ഉണ്ടാകണം, ശമ്പളത്തിന്റെ കാര്യമൊന്നും പ്രശ്നമല്ല’ എന്ന് ആവർത്തിച്ചു. പക്ഷേ ആ യാത്രയിൽ അനുഗമിക്കാൻ കഴിയില്ലെന്നു ഞാൻ തീർത്തു പറഞ്ഞു. അതു ശരിയായ ഒരു നടപടിയല്ല എന്ന എന്റെ വാദഗതി ഒടുവിൽ അദ്ദേഹം സമ്മതിച്ചു. ഞങ്ങൾ മൂന്നു പേരും ഒരുമിച്ചു വിഎസിനൊപ്പം ഒരു ഫോട്ടോ എടുത്തു പിരിഞ്ഞു.

? ഔദ്യോഗിക കൃത്യനിർവഹണത്തിൽ നിന്നു പിരിഞ്ഞെങ്കിലും വിഎസിന്റെ വിശ്വസ്ത വലയത്തിൽ തന്നെ നിങ്ങളെല്ലാം തുടർന്നില്ലേ

∙ ഇടയ്ക്കു കാണുകയും ബന്ധപ്പെടുകയും സംസാരിക്കുകയും ചെയ്യുമായിരുന്നു. എന്തെങ്കിലും ആവശ്യം ഉണ്ടെങ്കിൽ പഴയതു പോലെ വിളിക്കുമായിരുന്നു.

? ടി.പി.ചന്ദ്രശേഖരൻ കൊല്ലപ്പെട്ടതാണല്ലോ വിഎസിനെ ഏറ്റവും ഉലച്ച സന്ദർഭങ്ങളിലൊന്ന്. അന്ന് എങ്ങനെയാണ് അതിനോട് അദ്ദേഹം പ്രതികരിച്ചത്

∙ അന്ന് ഞങ്ങൾ തൃശൂരിലായിരുന്നു. രാത്രിയാണല്ലോ ആ ദാരുണ സംഭവം നടന്നത്. ഞാൻ അന്നു വിഎസിനൊപ്പം ഒരേ മുറിയിലാണ് ഉറങ്ങുന്നത്. കുളിക്കാനും വസ്ത്രം മാറാനുമായി തൊട്ടടുത്തുള്ള എന്റെ മുറിയിലേക്കു പോയ സമയത്ത് ആ വിവരം എന്നെ തേടിയെത്തി. തിരിച്ചു വന്നപ്പോൾ വിഎസ് നല്ല ഉറക്കത്തിലാണ്. ഉറക്കത്തിൽ നിന്നു വിളിച്ചു പറഞ്ഞില്ല. പിറ്റേദിവസം രാവിലെ എഴുന്നേറ്റ ഉടനെയും പറയാനുള്ള ധൈര്യം വന്നില്ല. വിഎസ് രാവിലെ പതിവ് പ്രഭാത നടത്തം തുടങ്ങി.

എന്റെ മനസ്സ് ആകെ പ്രക്ഷുബ്ധമായിരുന്നു. പത്രങ്ങളിൽ എല്ലാം ആ വാർത്ത ഉണ്ട്. വൈകാതെ പത്രം വിഎസ് കാണുകയും ചെയ്യും. ഒടുവിൽ എല്ലാ ധൈര്യവും സംഭരിച്ച് അങ്ങനെ ഒരു സംഭവം നടന്നെന്നു ഞാൻ പറഞ്ഞു. അദ്ദേഹം ഭയങ്കരമായ വിഷമത്തിലായിപ്പോയി. ഒരു ഷോക്കിൽ ആയതു പോലെ. ഒന്നും പ്രതികരിച്ചില്ല. വിഎസിന് ഒപ്പം നിൽക്കുന്ന ചില പ്രധാന നേതാക്കൾ വൈകാതെ വിളിച്ചു. കോഴിക്കോട്ടേക്കു പോകരുതെന്നു പറയാനാണ് അവർ ബന്ധപ്പെട്ടത്. പക്ഷേ പിന്തിരിപ്പിക്കാനുള്ള അവരുടെ ശ്രമം വിഎസ് സമ്മതിച്ചില്ല . ടിപിയെ കാണാൻ പോയേ പറ്റൂ എന്നു വ്യക്തമാക്കി. പ്രിയപ്പെട്ട സഖാവിനെ അവസാനമായി കാണാൻ വിഎസ് പോയി.

? അതിനു മുൻപ് ഒരിക്കൽ ടിപി ചന്ദ്രശേഖരൻ വിഎസിനെ വന്നു കണ്ടിരുന്നില്ലേ

∙ സത്യമാണ്. ഞാൻ അന്നു കൂടെ ഉണ്ടായിരുന്നു. ആലുവ ഗെസ്റ്റ് ഹൗസിലേക്ക് ടിപിയെ വിളിക്കാൻ വിഎസ് തന്നെയാണ് എന്നോടു പറഞ്ഞത്. രണ്ടുമണിക്കൂറോളം ഇരുവരും ഒരുമിച്ചുണ്ടായിരുന്നു. ടിപിക്ക് വധഭീഷണി ഉണ്ടെന്നു പൊലീസ് ഇന്റലിജൻസ് റിപ്പോർട്ട് കിട്ടിയ സമയമാണ്. ബൈക്കിലെ യാത്ര നിർത്തി കാർ ഏർപ്പാടാക്കണമെന്ന് വിഎസ് പറഞ്ഞു. അതിനു വേണ്ട കാര്യങ്ങൾ ചെയ്യാമെന്നും അറിയിച്ചു. ‘പാർട്ടി തീരുമാനമാണെങ്കിൽ ഞാൻ ഹെലികോപ്റ്ററിൽ പോയാലും അതു നടപ്പിലാക്കിയിരിക്കുമല്ലോ’ എന്നായിരുന്നു ടിപിയുടെ മറുപടി. ‘എനിക്കു പേടിയില്ല സഖാവേ’ എന്നും പറഞ്ഞു പോയി. വിഎസിന് വലിയ ഇഷ്ടമുള്ളയാളായിരുന്നു ടിപി.

? നെയ്യാറ്റിൻകര ഉപതിരഞ്ഞെടുപ്പ് ദിനം ടി.പിയുടെ ഭാര്യ കെ.കെ.രമയെ വിഎസ് കാണാൻ പോയപ്പോൾ വിലക്കിയില്ലേ

∙ ടിപി കൊല്ലപ്പെട്ട് കൃത്യം ഒരു മാസം കഴിഞ്ഞാണ് രമയെ വിഎസ് കാണുന്നത്. അന്ന് കോഴിക്കോട്ട് വേറെ ചില പരിപാടികളുണ്ടായിരുന്നു. പ്രോഗ്രാം ഷെഡ്യൂൾ സിപിഎം ജില്ലാ സെക്രട്ടറി ടി.പി.രാമകൃഷ്ണനും അയച്ചിരുന്നു. അന്നു രാവിലെ പെട്ടെന്ന് രമയെ കാണാൻ പോകുകയാണെന്നു വിഎസ് എന്നോടു പറഞ്ഞു. അതു വേണോ എന്നു ഞാൻ ചോദിച്ചു. പോകുന്നെങ്കിൽ ടിപി രാമകൃഷ്ണനെ കൂടി അറിയിക്കേണ്ടേയെന്നും ചോദിച്ചു.

പാർട്ടി അറിയാതെ പോകുന്നതു ശരിയല്ലല്ലോ എന്നും പറഞ്ഞു. എസ്. രാമചന്ദ്രൻ പിള്ളയും അന്നു കോഴിക്കോട്ടുണ്ട്. എസ്ആർപിയും ടിപി രാമകൃഷ്ണനും വിഎസിനെ കാണാൻ രാവിലെ വന്നിരുന്നു. അവരോട് ആരോടും ഈ യാത്രയെക്കുറിച്ചു വിഎസ് പറഞ്ഞില്ല. പോകുന്നത് സെൻസിറ്റീവ് ആയ സ്ഥലത്തേക്കാണ് എന്നതിനാൽ അതനുസരിച്ചുള്ള എല്ലാ ക്രമീകരണങ്ങളും എനിക്കു ചെയ്യണം. പൊലീസിനുള്ള സന്ദേശം പോലും പക്ഷേ നൽകാൻ കഴിഞ്ഞില്ല. ഉപതിരഞ്ഞെടുപ്പ് നടക്കുന്ന ദിവസവമാണ് പോയേ പറ്റൂ എന്ന ഒറ്റവാശിയിൽ വിഎസ് നിന്നു. അങ്ങനെയാണ് നാടകീയമായി അവിടേക്കു പോകുന്നത്.

? ആ യാത്രയുമായി ബന്ധപ്പെട്ട് പിന്നീട് ഉണ്ടാക്കാൻ ഇടയുള്ള കോളിളക്കത്തെക്കുറിച്ച് അദ്ദേഹത്തിന് അറിയാമായിരിക്കുമല്ലോ

∙ ഉറപ്പായും. വിഎസിന് അതു നല്ല ബോധ്യമുണ്ടായിരുന്നു. അത്രയും അനുഭവ സമ്പത്ത് അദ്ദേഹത്തിനുണ്ടല്ലോ.

? നടത്താൻ പോകുന്ന ഒരു വിവാദ പ്രതികരണം, അല്ലെങ്കിൽ കേന്ദ്രനേതൃത്വത്തിന് അയയ്ക്കാൻ പോകുന്ന പരാതി, ഇക്കാര്യങ്ങളിൽ മറ്റുള്ളവരുടെ ഉപദേശം തേടുന്ന രീതി ഉണ്ടായിരുന്നോ

∙ അങ്ങനെ ചെയ്യാറില്ല. പക്ഷേ പാർട്ടിയുമായി ബന്ധപ്പെട്ട് ആശയപരമായ ചില പ്രശ്നങ്ങളുണ്ടായിരുന്നല്ലോ. അത് പലരുമായി ചർച്ച ചെയ്യാറുണ്ട്. പക്ഷേ നിലപാട് അദ്ദേഹത്തിന്റേതു തന്നെയായിരിക്കും.

? മറ്റുള്ളവർ പറയുന്നതു കേൾക്കുകയും അംഗീകരിക്കുകയും ചെയ്യുന്ന രീതി വിഎസിനുണ്ടോ

∙ മറ്റു പലരിൽ നിന്നും വിഎസിനെ വ്യത്യസ്തനാക്കുന്നത് അതാണ്. മറ്റുള്ളവർ പറയുന്നത് അദ്ദേഹം ശ്രദ്ധയോടെ കേൾക്കും. തീരുമാനമെടുക്കുന്ന പ്രക്രിയയിൽ അവരുടെ വാദമുഖങ്ങൾ കൂടി കണക്കിലെടുക്കും.

? വിഎസ് പിബിക്ക് അയയ്ക്കുന്ന കത്തുകൾ അദ്ദേഹം തന്നെ തയാറാക്കുന്നതായിരുന്നോ

∙ അദ്ദേഹം തന്നെയാണ് പോയിന്റുകൾ പറയുന്നത്. തയാറാക്കിയശേഷം പൂർണമായും വായിച്ചുനോക്കുകയും തിരുത്തുകയും ചെയ്യും. ഇംഗ്ലിഷാണെങ്കിലും മലയാളമാണെങ്കിലും രണ്ടു മൂന്നു തവണ വായിക്കും.

? മലപ്പുറം സംസ്ഥാന സമ്മേളനത്തിൽ മത്സരം സംഘടിപ്പിച്ച ശേഷം പരാജയപ്പെട്ടതാണല്ലോ വിഎസിന്റെ രാഷ്ട്രീയ ജീവിതത്തിലെ ഒരു പ്രധാന വീഴ്ച. തോറ്റു പോകുമെന്ന ഒരു കണക്കുകൂട്ടലും വിഎസിന് ഉണ്ടായിരുന്നില്ലേ

∙ പന്ത്രണ്ടു പേരാണല്ലോ അവിടെ ഔദ്യോഗിക പാനലിനെതിരെ മത്സരിച്ചത്. അത്രയും പേർ മത്സരിക്കേണ്ടതില്ല എന്ന നിലപാടായിരുന്നു അദ്ദേഹത്തിന്റേത്. അതായിരുന്നു ശരി. പക്ഷേ വിഎസിന്റെ കയ്യിൽ നിന്ന് നിയന്ത്രണം പോയി. മറ്റുള്ളവരുടെ വാദഗതികൾക്കാണ് മേൽക്കൈ ലഭിച്ചത്. അങ്ങനെയാണ് ആ തീരുമാനം വന്നത്. വിഎസ് വല്ലാതെ നിരാശനായി.

? ആ സമയത്ത് അദ്ദേഹം പ്രതിപക്ഷ നേതാവായിരുന്നല്ലോ. ഒരു പക്ഷേ മുഖ്യമന്ത്രി ആയിരിക്കുന്നതിനേക്കാൾ വിഎസ് ശോഭിച്ചത് പ്രതിപക്ഷ നേതാവ് ആയിരിക്കുമ്പോഴാണ്. കെ.എം.ഷാജഹാനും താങ്കളും എല്ലാം ചേർന്ന് വിഎസിന്റെ പ്രതിഛായ ബോധപൂർവം നിർമിച്ചതാണ് എന്ന വാദഗതി പിന്നീട് ഉണ്ടായിട്ടുണ്ടല്ലോ. എന്താണ് വാസ്തവം

∙ കയ്യിൽ കിട്ടുന്ന നിവേദനം വരെ മുഴുവൻ വായിക്കുന്ന രീതിയാണ് വിഎസിന്റേത്. അല്ലാതെ തുടക്കം മാത്രം വായിച്ച് മറ്റാർക്കെങ്കിലും കൈമാറുന്ന രീതി അദ്ദേഹത്തിനില്ല. പ്രകൃതിയുമായും പരിസ്ഥിതിയുമായി ബന്ധപ്പെട്ട വിഷയങ്ങളിൽ എക്കാലത്തും അദ്ദേഹത്തിന് ഉറച്ച നിലപാട് ഉണ്ടായിരുന്നു. അതുകൊണ്ടാണല്ലോ വെട്ടിനിരത്തൽ സമരനായകനായി അക്കാലത്തു തന്നെ ചിത്രീകരിക്കപ്പെട്ടത്. മണ്ണിന്റെ മണമുള്ള രാഷ്ട്രീയ നേതാവാണ് വിഎസ്. കർഷകത്തൊഴിലാളി പ്രസ്ഥാനം ഉണ്ടാക്കിയതും കയർ തൊഴിലാളികളെ സംഘടിപ്പിച്ചതും അദ്ദേഹമാണ്. ആ പശ്ചാത്തലമുള്ള വിഎസിനെ സംബന്ധിച്ച് അത്തരം വിഷയങ്ങൾ ഏറ്റെടുക്കുന്നത് വളരെ സ്വാഭാവികമായിരുന്നു. ആ താൽപര്യത്തിന്റെ ഭാഗമായി തന്നെയാണ് ആ വിഷയങ്ങൾ അദ്ദേഹം ഏറ്റെടുത്തത്.

? മുഖ്യമന്ത്രിയായിരിക്കെ നടത്തിയ മൂന്നാർ ദൗത്യവും അതിന്റെ ഭാഗം തന്നെയായിരുന്നോ

∙ മുഖ്യമന്ത്രിയായിരിക്കുമ്പോഴും പ്രതിപക്ഷ നേതാവിന്റെ റോൾ ചില കാര്യങ്ങളിൽ അദ്ദേഹം തുടർന്നെന്നു വേണം കരുതാൻ. മുഖ്യമന്ത്രിക്ക് ഒരു സ്ഥലം നേരിട്ടു സന്ദർശിച്ച് നടപടി എടുക്കേണ്ട കാര്യമൊന്നുമില്ലല്ലോ. മുഖ്യമന്ത്രിമാർ റിപ്പോർട്ടുകളുടെ അടിസ്ഥാനത്തിൽ തീരുമാനങ്ങൾ എടുക്കുന്ന രീതിയാണ് കണ്ടു വരുന്നത്. എന്നാൽ മൂന്നാറിൽ അനധികൃത കയ്യേറ്റങ്ങളെക്കുറിച്ചു പരാതി ലഭിച്ചപ്പോൾ നേരിട്ടു സന്ദർശിക്കാൻ വിഎസ് തീരുമാനിച്ചു. സത്യത്തിൽ അവിടെ എത്തുന്ന ഘട്ടത്തിൽ ആ നിവേദനം ഞാൻ എടുത്തിട്ടുണ്ടായിരുന്നില്ല. ഒന്നോ രണ്ടോ കയ്യേറ്റ സ്ഥലങ്ങൾ മാത്രം വിഎസ് സന്ദർശിക്കുമെന്നാണ് കരുതിയത്. രാത്രി ഒരു മണിക്ക് ഇടുക്കിയിൽ എത്തിയപ്പോൾ ജില്ലാ സെക്രട്ടറിയായിരുന്ന എം.എം.മണി സഖാവ് സ്വീകരിക്കാനുണ്ടായിരുന്നു.

രാവിലെ കയ്യേറ്റ സ്ഥല സന്ദർശനത്തിന് ഒരുങ്ങിയപ്പോൾ പ്രധാനപ്പെട്ട ചില കയ്യേറ്റ മേഖലകൾ ശ്രദ്ധയിൽ പെടുത്തി. ‘അങ്ങനെ പറഞ്ഞാൽ പോരാ, നിവേദനത്തിൽ പറഞ്ഞിരിക്കുന്ന എല്ലാ സ്ഥലത്തും പോകണം’ എന്നായിരുന്നു മറുപടി. അതോടെ ഞാൻ ടെൻഷനിലായി. തിരുവനന്തപുരത്ത് വിളിച്ച് ആ നിവേദനം ഫാക്സിൽ വാങ്ങി. വിഎസ് പറഞ്ഞ കാര്യം ഞാൻ എം.എം.മണിയോടു പറഞ്ഞപ്പോൾ പ്രധാനപ്പെട്ട സ്ഥലങ്ങളിൽ പോകാം എന്നായിരുന്നു അദ്ദേഹത്തിന്റെയും മറുപടി. എന്നാൽ പരാതിയിൽ ഉള്ള എല്ലാ സ്ഥലങ്ങളിലും പോകും എന്നതിൽ വിഎസ് ഉറച്ചു നിന്നു. സമയമെടുക്കുമെന്നും ദൂരമുണ്ടെന്നും പറഞ്ഞിട്ടും അദ്ദേഹം വിട്ടുവീഴ്ചയ്ക്കു തയാറായില്ല. മണി സഖാവും ഞങ്ങൾക്കൊപ്പം കാറിലുണ്ട്. അദ്ദേഹത്തിന്റെ സഹോദരൻ ലംബോദരൻ കയ്യേറ്റം ചെയ്തുവെന്ന് ആരോപിക്കുന്ന സ്ഥലവും വിഎസ് അന്നു സന്ദർശിച്ചു. മണി സഖാവ് ഒന്നും പറഞ്ഞില്ല.

? എം.എം മണി അടക്കം ഒപ്പം നിന്ന പലരും പിന്നീട് കൂറുമാറിയല്ലോ. ഏതെങ്കിലും ഘട്ടത്തിൽ അതു വിഷമിപ്പിച്ചോ

∙ മണി സഖാവിനോട് പ്രത്യേക വാത്സല്യം ഉണ്ടായിരുന്നു. അദ്ദേഹം അകന്നു പോയത് വലിയ നഷ്ടം പോലെ വിഎസിനു തോന്നിയിരുന്നു.

? ആലപ്പുഴ സംസ്ഥാന സമ്മേളനത്തിൽ നിന്ന് വിഎസ് ഇറങ്ങിപ്പോന്ന സമയത്ത് താങ്കൾ കൂടെയില്ല. പക്ഷേ അദ്ദേഹത്തിന്റെ വലയത്തിൽ ഉണ്ടായിരുന്നു. പാർട്ടി വിട്ടുപോകാൻ ആ സമയത്ത് അദ്ദേഹം ഒരുങ്ങിയോ

∙ ആ ഘട്ടത്തിൽ വിഎസ് വലിയ അസംതൃപ്തിയിലായിരുന്നു. പാർട്ടി സംവിധാനം തന്നെ ഗൗനിക്കുന്നില്ലെന്ന സങ്കടവും രോഷവും അദ്ദേഹത്തിന് ഉണ്ടായിരുന്നു. കമ്മിറ്റികളിലും സമ്മേളനങ്ങളിലും എല്ലാം നടക്കുന്നത് ഏകപക്ഷീയമായ വിമർശനമാണെന്ന വിലയിരുത്തലാണ് അദ്ദേഹത്തിന് ഉണ്ടായിരുന്നത്. അത് വിഎസിനെ വേദനിപ്പിച്ചിരുന്നു.