‘ഡൊമിനിക്കിനെപ്പറ്റി ഞങ്ങളും അന്വേഷിക്കുന്നു; യഹോവയുടെ സാക്ഷികൾ ഇങ്ങനെ ചെയ്യില്ല, വർഷങ്ങളോളമുണ്ടാകും ഈ മുറിവ്’

? ‘യഹോവയുടെ സാക്ഷികളുടെ’ പ്രവർത്തനം എങ്ങനെയാണെന്ന് വിശദമാക്കാമോ. ആർക്കൊക്കെയാണ് സഭയിൽ ചേരാൻ കഴിയുക. 

∙  ഒരു വ്യക്തി പഠിക്കുന്ന കാര്യങ്ങളിൽ വിശ്വസിക്കണം. ബൈബിളിലെ അടിസ്ഥാന സത്യങ്ങൾ പഠിക്കാൻ സമയം കണ്ടെത്തണം. വർഷങ്ങള്‍ എടുക്കും ചിലപ്പോൾ ഒരു വ്യക്തി യഹോവയുടെ സാക്ഷിയാകാൻ. അത് ആകണോ എന്നതിൽ അദ്ദേഹത്തിന് പൂർണ സ്വാതന്ത്ര്യമുണ്ട്. അങ്ങനെ മാറിക്കഴിയുമ്പോഴാണ് അദ്ദേഹം സഭയിൽ റജിസ്റ്റർ ചെയ്ത അംഗം  ആയി മാറുന്നത്. അങ്ങനെയുള്ളവരാണ് പിന്നീട് സഭയിൽ പ്രവർത്തിക്കുന്നത്. കേരളത്തിൽ ഏകദേശം ഇരുനൂറോളം സഭകളാണ് ഉള്ളത്. ഓരോ സഭകളിലും ശരാശരി നൂറിൽ താഴെ അംഗങ്ങളേ ഉണ്ടാകാറുള്ളൂ.

കൂടുതൽ ആളുകൾ വരുമ്പോൾ ഞങ്ങൾക്ക് ഒരു വിദ്യാഭ്യാസ പരിപാടിയുണ്ട്. ജീവിതത്തെ മാറ്റിമറിക്കുന്ന തത്വങ്ങൾ പ്രായോഗികമായി അവർക്ക് എങ്ങനെയാണ് നടപ്പിൽ വരുത്താൻ കഴിയുക എന്ന് ആ വിദ്യാഭ്യാസ പദ്ധതിയിലൂടെ എല്ലാവരെയും പഠിപ്പിക്കും. ആളുകളുമായി എങ്ങനെ സമാധാനപരമായി ഇടപെടാം, കുടുംബ ബന്ധങ്ങൾ എങ്ങനെ സംരക്ഷിക്കാം തുടങ്ങിയ കാര്യങ്ങളാണ് അവിടെ പഠിപ്പിക്കുന്നത്.

കൺവെൻഷനുകൾ ആണെങ്കിൽ, ‘ക്ഷമയോടെ കാത്തിരിക്കുക’ എന്ന വിഷയത്തിൽ കേരളത്തിൽ മാത്രം പതിമൂന്നോളം കൺവൻഷനുകൾ ഈ വർഷം മാത്രം സംഘടിപ്പിക്കപ്പെട്ടിട്ടുണ്ട്. മൂന്നു ദിവസവും ഇതിന്റെ വിവിധ വശങ്ങളെക്കുറിച്ചായിരിക്കും ചർച്ച ചെയ്യുന്നത്. ഓരോ പ്രദേശത്തെയും സഭകളിലുള്ളവരാണ് ആ കണ്‍വൻഷനുകളിൽ പങ്കെടുക്കുക. അവരും സുഹൃത്തുക്കളും അതുപോലെ ക്ഷണമനുസരിച്ചു വന്ന ആ പ്രദേശത്തുള്ളവരും അതിൽ പങ്കെടുക്കും. അപ്പോൾ ഓരോ കണ്‍വൻഷനിലും അവിടെ എത്താൻ സാധ്യതയുള്ളത് എത്ര പേരായിരിക്കും എന്നതിനെ കുറിച്ച് ഞങ്ങൾക്ക് ഒരു ധാരണയുണ്ടായിരിക്കും.

? ബോംബ് സ്ഫോടന കേസിൽ പൊലീസിൽ കീഴടങ്ങിയ  ഡൊമിനിക്ക്  മാർട്ടിൻെറ  സഭയിലെ ബന്ധം എങ്ങനെയാണ്. സഭയുടെ പ്രവര്‍ത്തനങ്ങളോടുള്ള എതിർപ്പ് മൂലമാണ് സ്ഫോടനം നടത്തിയതെന്ന് മാർട്ടിൻ പറയുന്നുണ്ടല്ലോ.

∙ യഹോവയുടെ സാക്ഷികളുടെ കൂടെ പഠിച്ചിരുന്നു എന്നു പറയുന്ന വ്യക്തി ഇങ്ങനെ ചെയ്തു എന്നു കേൾക്കുമ്പോൾ, ഒരു കുടുംബത്തിലുള്ള ഒരു വ്യക്തി ഇങ്ങനെ ചെയ്തു എന്ന് കേൾക്കുമ്പോഴുള്ള സങ്കടമുണ്ടാവും. എന്നാൽ യഹോവയുടെ സാക്ഷികളിൽപ്പെട്ട ഒരാൾ ഒരിക്കലും ഇങ്ങനെയൊരു കാര്യം ചെയ്യില്ല എന്ന പൂർണ ബോധ്യവും വിശ്വാസവും എല്ലാവര്‍ക്കുമുണ്ട്. ഈ ആക്രമണത്തിന്റെ ഉത്തരവാദിത്തം ഏറ്റെടുത്ത ഡൊമിനിക് മാർട്ടിന്റെ പ്രസ്താവനകൾ മാധ്യമങ്ങളിലൂടെ വായിച്ച അറിവേ ഉള്ളൂ.

6–7 വർഷങ്ങൾക്ക് മുൻപ് ഞങ്ങളുടെ ഏതാനും യോഗങ്ങൾക്കു വന്നിട്ടുണ്ട് എന്നാണ് അദ്ദേഹം അവകാശപ്പെടുന്നത്. യഹോവയുടെ സാക്ഷികളെ അറിയാവുന്നവർക്ക്, ഞങ്ങൾ സമാധാന സ്നേഹികളാണെന്നും നിയമങ്ങൾ അനുസരിക്കുന്നവരാണെന്നും മറ്റുള്ളവരുമായി എന്നും നല്ല ബന്ധങ്ങൾ കാത്തുസൂക്ഷിക്കുന്നവരാണെന്നും അറിയാം. ഡൊമിനിക്കിനെ സംബന്ധിച്ചും അതിനു ശേഷമുണ്ടായ കാര്യങ്ങളെ സംബന്ധിച്ചും ഞങ്ങൾ വിശദമായ അന്വേഷണം നടത്തിക്കൊണ്ടിരിക്കുകയാണ്. അതിനുശേഷം ഔദ്യോഗികമായി തന്നെ പ്രസ്താവന പുറത്തിറക്കും.

? ഇത്ര വലിയ  കൺവൻഷൻ സംഘടിപ്പിക്കുമ്പോൾ പൊലീസിനെ അറിയിച്ചിരുന്നില്ലെന്ന രീതിയിൽ ആക്ഷേപങ്ങൾ ഉണ്ടായിരുന്നല്ലോ, എന്താണ് വാസ്തവം. 

∙ കൺവൻഷനുകൾ നടക്കുന്നതിനു മുൻപ് അതത് പൊലീസ് സ്റ്റേഷനുകളിൽ വിവരമറിയിക്കും. ഇത്തരം പരിപാടികൾ നടക്കുമ്പോൾ ആൾക്കൂട്ടത്തിന്റെ വലുപ്പമനുസരിച്ച് ഫയർഫോഴ്സിനെയും അറിയിക്കേണ്ടതുണ്ട്. ഇതുവരെ നടന്നിട്ടുള്ള എല്ലാ കൺവന്‍ഷനുകളിലും ഞങ്ങൾക്ക് പൊലീസിന്റെ എല്ലാ സഹകരണവും കിട്ടിയിട്ടുണ്ട്. ഈ കൺവൻഷനോട് അനുബന്ധിച്ചും പൊലീസിനെ വിവരമറിയിച്ചിരുന്നു. പിന്നെ ഗതാഗതക്കുരുക്കിന്റെ പ്രശ്നം വരാത്ത സ്ഥലമായതുകൊണ്ട് ഇവിടെ ഏതാനും കൺവൻഷനുകൾ മുൻപ് നടത്തിയിട്ടുമുണ്ട്. അതുകൊണ്ട് അധിക സുരക്ഷാ കാര്യങ്ങളോ ഒന്നും ആവശ്യമായിരുന്നില്ല. എന്നാൽ ഇത്തവണയും പൊലീസിനെ അറിയിക്കുകയും അവർ എല്ലാ സഹായങ്ങളും വാഗ്ദാനം ചെയ്യുകയും ചെയ്തിരുന്നു. 

എന്തെങ്കിലും ആവശ്യം വരികയാണെങ്കിൽ അവരെ അറിയിക്കാനും പറഞ്ഞിരുന്നു. മാധ്യമപ്രവർത്തകർ, പൊലീസ്, നാട്ടുകാർ അങ്ങനെ എല്ലാവരും, ഒരു ദുരന്തം നടന്ന സ്ഥലത്ത് എങ്ങനെയാണോ ദുരിതാശ്വാസ പ്രവർത്തനത്തിൽ ഏർപ്പെടേണ്ടത് അതേ മനോഭാവത്തോടെയാണ് ഇടപെട്ടത്. ഇതിൽ ഒരു രാഷ്ട്രീയം കാണാനോ എന്തെങ്കിലും കുറവു കാണാനോ ആളുകൾ ശ്രമിക്കുന്നില്ല എന്നു കാണുന്നതിൽ വലിയ സന്തോഷമുണ്ട്. നമുക്കിടയിൽ സംഭവിക്കാൻ സാധ്യതയുള്ള ഒരു ദുരന്തം എന്ന പോലെ ആളുകൾ ഇതിനെ കാണുന്നത് സന്തോഷമുള്ള കാര്യമാണ്. 

? 2023 മാർച്ചിൽ ജർമനിയിലെ ഹാംബർഗിൽ യഹോവയുടെ സാക്ഷികൾക്ക് നേരെ ആക്രമണമുണ്ടായല്ലോ. ഭയമുണ്ടോ.

∙ കേരളത്തിൽ എല്ലായിടത്തും യഹോവയുടെ സാക്ഷികൾ താമസിക്കുന്നുണ്ട്. ഓരോരുത്തർക്കും അവരവരുടെ അയൽക്കാരെ അറിയാം. ഞങ്ങൾ എങ്ങനെയാണ് പ്രവർത്തിക്കുന്നതും വിശ്വസിക്കുന്നതും പെരുമാറുന്നതും എന്നറിയാവുന്നതു കൊണ്ട് അവരൊരിക്കലും തെറ്റായ കാര്യങ്ങളെക്കുറിച്ചോ വിശ്വാസങ്ങളെക്കുറിച്ചോ ആരോപണങ്ങൾ ഉണ്ടാകുമ്പോൾ അത് വിശ്വസിക്കില്ല. നമ്മുടെ അയൽപക്കത്തുള്ള ഒരു വ്യക്തിക്ക് ഒരു ദുരന്തം സംഭവിക്കുമ്പോൾ അതിന്റെ കൂടെ നിൽക്കുകയാണല്ലോ ചെയ്യുക. അത്തരം വികാരമുള്ള ഒരു കൂട്ടമാളുകളാണ് കേരളത്തിലുള്ളത്. ആ ഒരു സമാനുഭാവം അവർ പ്രകടിപ്പിക്കുന്നതിൽ ഞങ്ങൾക്ക് സന്തോഷമുണ്ട്.

ഏറ്റവും പ്രധാനപ്പെട്ടത്, ഒരു ദുരന്തത്തിന് ഇരയാകുമ്പോൾ അവർക്ക് ഏറ്റവും ആവശ്യമായത് ആശ്വാസമാണ്. മനുഷ്യർക്ക് ആശ്വസിപ്പിക്കാൻ കഴിയുന്ന വാക്കുകൾക്ക് പരിമിതികളുണ്ട്. എന്നാൽ ദൈവത്തിന് അവരെ ആശ്വസിപ്പിക്കാൻ പറ്റും. ഇപ്പോഴത്തെ സാഹചര്യത്തെ പ്രായോഗികമായി നേരിടാൻ കഴിയുന്ന സഹായങ്ങൾ കുടുംബാംഗങ്ങൾക്ക് നൽകുന്നതിനൊപ്പം തിരുവെഴുത്തുകളിൽനിന്നുള്ള ആശ്വാസവും പ്രത്യാശയും നൽകിക്കൊണ്ട് അവരെ ബലപ്പെടുത്താനാണ് ഞങ്ങൾ ശ്രമിക്കുന്നത്. ഈയൊരു ദുരന്തം വർഷങ്ങളോളം അവരുടെ മനസ്സിലുണ്ടായിരിക്കും. അവർക്ക് ആവശ്യമായ ആശ്വാസവും പിന്തുണയും കൊടുക്കാനുള്ള സൗകര്യങ്ങൾ അതാത് പ്രാദേശിക സഭകളിൽനിന്ന് ഉണ്ടാകും.