ഇന്നും ‘ചരക്കുകൾ’ പോലെ കൈമാറുന്ന തൊഴിലാളികൾ, മറഞ്ഞിരിക്കുന്ന അടിമലോകം; ഇടുക്കിയുടെ ‘വലസൈ പറവകൾ’

? രാഷ്ട്രീയവും മതവും അടിമത്തജീവിതവും വരെ പറയുന്നുണ്ട് വലസൈ പറവകൾ എന്ന സിനിമയിൽ. ഇത് സമകാലിക കേരളത്തിന്റെ നേർച്ചിത്രമാണെന്നു പറയാനാകുമോ.

വലസൈ പറവകൾ ഒരു രാഷ്ട്രീയ സിനിമയാണ്. അതിൽ തൊഴിലാളികളുടെ രാഷ്ട്രീയവും സംവിധായകന്റെ രാഷ്ട്രീയവും ഒക്കെ പ്രതിപാദിക്കുന്നുണ്ട്. നമ്മുടെ നാട്ടിലാണ് ഇങ്ങനെ സംഭവിക്കുന്നതെങ്കിൽ അത് നമ്മുടെ നാടിന്റെ പ്രശ്നം തന്നെയല്ലേ? ഇതൊരു രാഷ്ട്രീയ പ്രശ്നമാണ്. അവരുടെ വിശ്വാസങ്ങളും സാമൂഹിക അവസ്ഥയും പ്രശ്നങ്ങളുമെല്ലാം സിനിമയുടെ ഭാഗമാണ്. നമ്മൾ മലയാളികൾ എന്തൊക്കെയോ ആണെന്ന് പറയുമ്പോഴും അതിനുള്ളിൽ ഇത്തരത്തിലുള്ള മനുഷ്യരെ, അവരുടെ അവസ്ഥയെ നമ്മൾ പരിഗണിക്കുന്നുണ്ടോ എന്നതൊക്കെ ചോദ്യമാണ്? നേരത്തേ പറഞ്ഞല്ലോ, മുതലാളിമാർക്ക് കൈമാറ്റം ചെയ്യാൻ പറ്റുന്ന ചരക്കായാണ് ഇവരെ കാണുന്നത്. വേറെ ഏതെങ്കിലും മേഖലയിൽ തൊഴിലാളികളെ കൈമാറ്റം ചെയ്യാനാകുമോ?

? ശക്തമായ രാഷ്ട്രീയം പറയുന്ന സിനിമയാണല്ലോ ഇത്. എന്താണ് സുനിലിന്റെ രാഷ്ട്രീയം.

‘‘അന്യന്റെ വാക്കുകൾ സംഗീതം പോലെ ശ്രവിക്കുന്ന കാലമുണ്ടാകണം’’ എന്ന കാൾ മാർക്സിന്റെ വാക്കുകളാണ് എന്റെ രാഷ്്ട്രീയം. ബുദ്ധനും ശ്രീനാരായണ ഗുരുവും ക്രിസ്തുവും എല്ലാവരും ഇതുതന്നെയാണ് പറഞ്ഞത്. എല്ലാവരും പറയുകയും എന്നാൽ നമ്മൾ സൗകര്യം പോലെ മറന്നുപോയതുമായ കാര്യമാണ് ‘എല്ലാവരും തുല്യരാണ്, എല്ലാവർക്കും ഈ ഭൂമിയിൽ ഒരേപോലെ അവകാശമുണ്ട്’ എന്നതൊക്കെ. എല്ലാം മാനവീയമായി കാണുന്നയാളാണ് ഞാൻ.  അതുതന്നെയാണ് സിനിമയിലൂടെ പറയാനും ശ്രമിക്കുന്നത്. ‘‘ലോകം നിർമിച്ചവരോട് ലോകം തെറ്റു ചെയ്തിരിക്കുന്നു’ എന്ന സംവിധായകന്റെ വാക്കുകളിലൂടെയാണ് ഈ സിനിമ ആരംഭിക്കുന്നതു തന്നെ. 

? 2013ൽ സുദേവന്റെ സിആർ നമ്പർ 89 എന്ന സിനിമ ഐഎഫ്എഫ്കെയിൽ മികച്ച മലയാള ചിത്രത്തിനുള്ള നെറ്റ്പാക് അവാർഡ് നേടിയിരുന്നു. മികച്ച സിനിമയ്ക്കുള്ള സംസ്ഥാന അവാർഡും ആ ചിത്രത്തിനായിരുന്നു. ക്രൗഡ് ഫണ്ടിങ്ങിലൂടെയാണ് സുദേവൻ ചിത്രത്തിനു വേണ്ട പണം കണ്ടെത്തിയത്. ഇപ്പോൾ വലസൈ പറവകളും ഒരു സാധാരണ ചിത്രമായാണ് ഐഎഫ്എഫ്കെയിൽ എത്തുന്നത്. എന്തെല്ലാമാണ് പ്രതീക്ഷകൾ?

എനിക്ക് അങ്ങനെ വലിയ പ്രതീക്ഷകളൊന്നുമില്ല. കാരണം ഞാൻ ഐഎഫ്എഫ്കെയുടെ മുറ്റത്ത് സിനിമയെ സ്വപ്നം കണ്ട് വികസിച്ച ഒരാളാണ്. അതുകൊണ്ട് ഐഎഫ്എഫ്കെയിൽ തന്നെ എന്റെ സിനിമ എത്തുകയും ഇങ്ങനെയൊരു സിനിമ കാണാൻ ആളുകളെ പ്രേരിപ്പിക്കുന്നതുമൊക്കെ എനിക്ക് വലിയ കാര്യം തന്നെയാണ്. കൂടുതൽ ജനങ്ങളിലേക്ക് സിനിമ എത്താൻ കഴിഞ്ഞിരുന്നെങ്കിൽ എന്ന പ്രതീക്ഷയല്ലാതെ മറ്റ് അമിത പ്രതീക്ഷകളൊന്നുമില്ല. ജനങ്ങൾ എന്റെ സിനിമ ഏറ്റെടുക്കുന്നതാണ് വലിയ അംഗീകാരമായി കാണുന്നത്. 

? സ്വതന്ത്ര ചലച്ചിത്രകാരന്മാർക്ക് കേരളം എത്രമാത്രം പിന്തുണ നൽക്കുന്നുണ്ട്? ഇത്തരം ചിത്രങ്ങൾ കൂടുതൽ പേരിലേക്ക് എത്തണ്ടേ? അതിന് തിയറ്റർ കിട്ടാത്ത പതിവുണ്ടല്ലോ? വലസൈ പറവകളും തിയറ്റർ റിലീസ് ഉണ്ടാകുമോ.

തിയറ്റർ റിലീസിലേക്ക് എന്റെ സിനിമ എത്തണമെന്നുതന്നെയാണ് ആഗ്രഹം. എന്നാൽ ഇത്തരം സിനിമകൾക്കു തിയറ്റർ കിട്ടാറില്ല എന്നതാണ് വാസ്തവം. വാണിജ്യസിനിമകൾ‌ പ്രദർശിപ്പിക്കാനുള്ള ഇടങ്ങളായി തിയറ്ററുകൾ മാറുകയും കാണികൾ അതിനനുസരിച്ച് പഴയ തമിഴ് സിനിമകളിലെ ഫാൻസ് അസോസിയേഷൻ സംസ്കാരത്തിലേക്ക് രൂപപ്പെടുകയും ഒക്കെ ചെയ്യുന്ന പുതിയ കാലത്ത് നമുക്ക് മാറ്റമുണ്ടാകുമെന്ന് പ്രതീക്ഷിക്കുക മാത്രമാണ് ചെയ്യാനാകുക. എന്റെ സിനിമകൊണ്ട് അങ്ങനൊരു മാറ്റം സംഭവിച്ചില്ലെങ്കിലും ലോകത്ത് എല്ലാം മാറ്റത്തിന് വിധേയമാണ്, ഇതും മാറും. 

ഞാൻ ഒരു സിനിമയ്ക്കും എതിരല്ല. എല്ലാത്തരം സിനിമകളും– വാണിജ്യസിനിമകളും കലാമൂല്യമുള്ള സിനിമകളും ഉണ്ടാകട്ടെ. ലോകത്തെല്ലായിടത്തും സിനിമയുടെ സ്കൂൾ എന്നു പറയുന്നത് കലാമൂല്യമുള്ള സിനിമകളാണ്. ഹോളിവുഡ് ഉൾപ്പെടെ വലിയ കൊമേഴ്സ്യൽ സിനിമാ ഗ്രൂപ്പാണ് എല്ലായിടത്തും സമാന്തര സിനിമകളുടെ ചലച്ചിത്രോത്സവങ്ങൾ സംഘടിപ്പിക്കുന്നത്. സിനിമകളുടെ സ്കൂൾ അവിടെനിന്നാണ് ഉണ്ടാകുന്നതെന്നും അവർ പറയുന്നു. സെർജി ഐസൻസ്റ്റീന്റെ ബാറ്റില്‍ഷിപ് പൊട്ടംകിൻ എന്ന സിനിമയിലാണ് മൊണ്ടാഷ് എന്ന സാങ്കേതികത അല്ലെങ്കിൽ ഒരു പുതിയ അവതരണരീതി ഉണ്ടാകുന്നത്. അതാണ് കൊമേഴ്സ്യൽ സിനിമ ചെയ്യുന്നവരും കടംകൊണ്ടത്. ഇത്തരത്തിൽ എല്ലാത്തരത്തിലുള്ള സിനിമയുടെ പരീക്ഷണങ്ങളും ലോകസിനിമ കടംകൊണ്ടിട്ടുള്ളത് സമാന്തര സിനിമകളിൽനിന്നാണ്. 

അതുകൊണ്ട് ലോകത്ത് എല്ലായിടത്തും വാണിജ്യസിനിമാ മേഖലതന്നെ സമാന്തരസിനിമകളെ പ്രോത്സാഹിപ്പിക്കുന്ന ഒരു സാഹചര്യമുണ്ട്. നിർഭാഗ്യവശാൽ നമ്മുടെ നാട്ടിൽ അതില്ല. പക്ഷേ അത് മാറ്റത്തിന് വിധേയമായേ മതിയാകൂം. ഈ സ്റ്റാർഡം എന്നു പറയുന്ന പ്രതിഭാസമൊക്കെ ഇന്ത്യൻ സിനിമയിൽനിന്ന്, പ്രത്യേകിച്ച് മലയാള സിനിമയിൽനിന്ന് അപ്രത്യക്ഷമാകും. ലോകത്തെ ഏറ്റവും നല്ല സിനിമകൾ എടുത്താൽ അതിലൊന്ന് അടൂർ ഗോപാലകൃഷ്ണന്റെയാണ്. എന്നാൽ അദ്ദേഹത്തെ എത്രത്തോളം ആദരിക്കുന്നുണ്ട്? മറ്റ് ‘സ്റ്റാറുകളെ’ ക്ഷണിക്കുന്ന വമ്പൻ വേദികളിൽ എന്തുകൊണ്ട് അടൂർ ഗോപാലകൃഷ്ണൻ ഇല്ലാതെ പോകുന്നു എന്നൊക്കെ ചിന്തിക്കുമ്പോഴാണ് അതിന്റെ സാഹചര്യം നമുക്ക് മനസ്സിലാകുക. അതൊക്കെ മാറുമെന്നാണ് എന്റെ ശുഭാപ്തിവിശ്വാസം. ('വലസൈ പറവകളു'ടെ ലൊക്കേഷനുകളിലൊന്നിലെ കാഴ്ചയാണ് ചുവടെ).

? മുൻപ് ഐഎഫ്എഫ്കെയിൽ വന്നിട്ടുണ്ടാവില്ലേ? ലോകസിനിമകൾ കണ്ടത് പ്രചോദനമായിട്ടുണ്ടോ.

തിരുവനന്തപുരം സ്ഥിരം വേദിയായതിനുശേഷം എല്ലാ വർഷവും ഐഎഫ്എഫ്കെയിൽ പങ്കെടുക്കാറുണ്ട്. നിരവധി സിനിമകൾ അങ്ങനെയുണ്ട്. ഒരെണ്ണം എടുത്തു പറയാൻ കഴിയില്ല. എന്നിലെ സിനിമക്കാരന്റെ രൂപപ്പെടുത്തുന്നതിലും ഇത്തരത്തിൽ ഒരു രാഷ്ട്രീയ സിനിമ രൂപപ്പെടുത്തുന്നതിലും ഈ സിനിമകളൊക്കെ എന്നെ സഹായിച്ചിട്ടുണ്ട്. ഐഎഫ്എഫ്കെയിൽനിന്നു കിട്ടിയ സൗഹൃദങ്ങളുടെ സ്വാധീനവും അവരുമായുള്ള നിരന്തര ചർച്ചകളുമൊക്കെ വലിയ പ്രചോദനമാണ് നൽകിയത്. 

? സുനിലിന്റെ ദേശാടനമാണോ ഇത്തരമൊരു കഥയിലേക്കും എത്തിച്ചത്? യാത്രകൾ ഇഷ്ടമാണോ.

ഇന്ത്യയിലെ പല സംസ്ഥാനങ്ങളിലും ഞാൻ ജീവിച്ചിട്ടുണ്ട്. എന്റെ യാത്രകളും ഞാൻ കണ്ട ജീവിതങ്ങളും ഇത്തരം ഒരു കഥയിലേക്ക് എത്താൻ പ്രചോദനമായിട്ടുണ്ട്. എവിടെച്ചെന്നാലും അവിടുത്തെ സാധാരണക്കാരുമായി ഇടപഴകാനും അവരെ മനസ്സിലാക്കാനുമാണ് ശ്രമിച്ചത്. അവരിലൊരാളായി മാറാനാണ് ഇഷ്ടപ്പെട്ടത്. അതൊക്കെ എന്റെ സിനിമയെ സ്വാധീനിച്ചിട്ടുണ്ടെന്നാണ് വിശ്വാസം.