‘താലം പിടിക്കാനും പൂവു കൊടുക്കാനും മാത്രം മതിയോ സ്ത്രീകൾ?’ തൊലിപ്പുറത്താണോ ‘കേരളീയ’ വിപ്ലവം?

കേരളത്തിന്റെ അറുപത്തിയേഴാം ജന്മദിനത്തിൽ അരങ്ങേറിയ ‘കേരളീയം’ ആഘോഷവേദിയിലെ രണ്ടു ചിത്രങ്ങൾ രണ്ടു കാരണങ്ങളാൽ വൈറലായി. അതിലൊന്ന് നടൻ മോഹൻ ലാൽ ഉദ്ഘാടനവേദിയിൽ സെൽഫിയെടുക്കുന്ന ചിത്രമായിരുന്നു. മലയാളത്തിന് ഏറെ പ്രിയപ്പെട്ട താരങ്ങൾ മുഖ്യമന്ത്രിക്കൊപ്പം സെൽഫിക്കു പോസ് ചെയ്തതിന്റെ കൗതുകം വൈറൽ വേഗത്തിൽ സമൂഹമാധ്യമങ്ങളിൽ നിറഞ്ഞു. ‘ലവും ലൈക്കും’ വാരിക്കോരി വാങ്ങിയ ആ ചിത്രം പൊടുന്നനെയാണ് മറ്റൊരു വിഷയത്തിന്റെ ചർച്ചാ കേന്ദ്രമായത്. സെൽഫിക്കു പോസ് ചെയ്തപ്പോൾ നടൻ മമ്മൂട്ടി നടി ശോഭനയെ ചേർത്തു പിടിച്ചതായിരുന്നു ചർച്ചയുടെ വിഷയം. 

സ്പർശനത്തിന്റെ രാഷ്ട്രീയശരികളെക്കുറിച്ചുള്ള ചർച്ച ഒരു വശത്ത് ചൂടു പിടിച്ചു. മാധ്യമങ്ങളോടു സംസാരിക്കുന്നതിനിടയിൽ മാധ്യമപ്രവർത്തകയെ അനുവാദമില്ലാതെ സ്പർശിച്ചതിനെ തുടർന്ന് നടൻ സുരേഷ് ഗോപിക്കെതിരെ കേസ് റജിസ്റ്റർ ചെയ്തതിന്റെ ചൂടാറുന്നതിനു മുൻപായിരുന്നു കേരളീയം വേദിയിലെ ആ വൈറൽ ചിത്രമെന്നതും സംവാദങ്ങൾക്ക് ആക്കം കൂട്ടി. അതേ വേദിയിലെ മറ്റൊരു ചിത്രവും അടുത്ത ദിവസം വേറിട്ടൊരു ചർച്ചയ്ക്ക് തുടക്കമിട്ടു. കേരളീയം ഉദ്ഘാടനവേദിയിൽ നിലവിളക്കിന് തിരി തെളിയിക്കുന്ന നേരത്തെ ചിത്രമായിരുന്നു അത്. വലിയൊരു ആൺകൂട്ടത്തിൽ പേരിനു മാത്രമായി ശുഷ്കിച്ചു പോയ സ്ത്രീസാന്നിധ്യം ചിലരെയെങ്കിലും അസ്വസ്ഥമാക്കി. ചിലർ അക്കാര്യം ചൂണ്ടിക്കാട്ടി. (കേരളീയം പരിപാടിയുടെ ഉദ്ഘാടന വേദിയിൽനിന്നുള്ള ചിത്രം ചുവടെ )

ആറര പതിറ്റാണ്ടു പിന്നിട്ട കേരളീയ സമൂഹത്തിന്റെ ആഘോഷ ഫ്രെയിമിൽ ഇടംപിടിക്കാൻ സ്ത്രീകൾ ഇനിയും കലഹിക്കേണ്ടി വരുന്നത് കേരളം ആർജിച്ചെന്നു പറഞ്ഞാഘോഷിക്കുന്ന ലിംഗനീതിയുടെ യാഥാർഥ്യത്തിലേക്കാണ് വിരൽ ചൂണ്ടുന്നതെന്ന് ഒരു വിഭാഗം ചൂണ്ടിക്കാട്ടുന്നു. സാമൂഹിക, രാഷ്ട്രീയ, സാംസ്കാരിക മേഖലകളിൽ കേരളം കൈവരിച്ച പുരോഗതിയെ വലിയ ആഘോഷമാക്കിയ കേരളീയം പോലൊരു വേദിതന്നെ, നേടിയെന്നു പറയപ്പെടുന്ന മുന്നേറ്റം ഏതു വരെയെന്നു തുറന്നു കാണിക്കുന്നതിന്റെ  പ്രോഗ്രസ് റിപ്പോർട്ടായും വിലയിരുത്തപ്പെട്ടു. 

∙ ആ സ്ത്രീകൾ സാന്നിധ്യമായി ചുരുങ്ങിയതെങ്ങനെ?

‌‘കേരളത്തെ ലോകത്തിനു മുന്നിൽ സമഗ്രവും സത്യസന്ധവുമായി അവതരിപ്പിക്കുക എന്ന മഹത്തായ ലക്ഷ്യത്തോടെ ആവിഷ്കരിച്ച നവീനവും ബൃഹത്തരവുമായ പദ്ധതിയാണ് കേരളീയം’, തിരുവനന്തപുരത്ത് നടന്ന വർണാഭമായ കേരളീയം ഉദ്ഘാടനവേദിയിൽ അധ്യക്ഷത വഹിച്ച മന്ത്രി കെ.രാജൻ പറഞ്ഞ വാക്കുകളാണിവ. ആ വേദിയും സദസ്സും ആധുനിക കേരളത്തിന്റെ സത്യസന്ധമായ കാഴ്ച ലോകത്തിനു മുന്നിൽ അവതരിപ്പിച്ചു എന്നതു സത്യമാണ്.

രാത്രിയും പകലുമില്ലാതെ നടന്ന ആഘോഷ പരിപാടികളിൽ ലിംഗവ്യത്യാസമില്ലാതെ ആയിരക്കണക്കിനു പേരാണ് പങ്കെടുത്തത്. കേരളീയത്തിന്റെ കാഴ്ചവട്ടത്തിൽ നിറഞ്ഞു നിൽക്കുന്ന സ്ത്രീകൾ പക്ഷേ, ആ പരിപാടിയുടെ ഉദ്ഘാടന വേദിയിൽ വെറും സാന്നിധ്യമായി ചുരുങ്ങിയതെങ്ങനെയാണ്? എന്തുകൊണ്ടാണ് ഇത്തരമൊരു വിഷയം കേരള സമൂഹം ഗൗരവപൂർവം ചർച്ച ചെയ്യേണ്ടതുണ്ട് എന്ന് വിവിധ മേഖലകളിലുള്ളവർ അഭിപ്രായപ്പെടുന്നത്?

∙ എന്താണ് ആ ഉദ്ഘാടന വേദിയിൽ സംഭവിച്ചത്? 

ആഘോഷ പരിപാടികളിൽ മാത്രമല്ല, എല്ലാ മണ്ഡലങ്ങളിലും ഇപ്പോൾ കൂടുതൽ സ്ത്രീകളെ കാണാൻ കഴിയും. കഴിഞ്ഞ കുറേയെറെ വർഷങ്ങളായി സ്ത്രീകൾ ആർജിച്ചെടുത്ത വലിയൊരു നേട്ടമാണ് ഈ ദൃശ്യപരത. എന്നാൽ, പണവും അധികാരവും ഭരണവും ചേരുന്ന കേന്ദ്രസ്ഥാനം ഇപ്പോഴും പുരുഷന്റെ കയ്യിൽ തന്നെയാണെന്ന് കോളജ് അധ്യാപികയും എഴുത്തുകാരിയുമായ അനു പാപ്പച്ചൻ പറയുന്നു.