രാത്രി നിശ്ശബ്ദം വരും, ഉന്നം തെറ്റിയാൽ കുത്തേറ്റ് മരണം; മനസ്സുമാറ്റിയത് നെഞ്ചുപൊട്ടിയ ആ കരച്ചിൽ

പിതാവിന്റെ മരണത്തോടെ തോക്ക് ഉപേക്ഷിച്ച ഒരു മകൻ കർഷകരുടെ കണ്ണീരിനു മുൻപിൽ ആ നിലപാട് തിരുത്തി 15 വർഷത്തിനു ശേഷം തോക്കെടുത്തു. 5 മാസത്തിനുള്ളിൽ ആലപ്പുഴ, പത്തനംതിട്ട, കൊല്ലം ജില്ലകളിലായി 60 കാട്ടുപന്നികളെ വെടിവച്ചു വീഴ്ത്തി. വെടിയേറ്റ ശേഷം ഓടിയകന്നവ അതിലേറെ. പലപ്പോഴും മുറിവേറ്റ കാട്ടുപന്നിയുടെ മുന്നിൽ നിന്ന് രക്ഷപ്പെടാനായതും ആയുസ്സിന്റെ ബലംകൊണ്ടു മാത്രം. പക്ഷേ, സർക്കാർ ലൈസൻസോടു കൂടി കാട്ടുപന്നിയെ വെടിവയ്ക്കുന്ന ഔദ്യോഗിക ഷൂട്ടർ ആയ മാവേലിക്കര ഗോമഠത്ത് ദിലീപ് കോശി വെല്ലുവിളികളെ എല്ലാം അതിജീവിച്ചുകൊണ്ട് പ്രയാണം തുടരുകയാണ്. കാടിറങ്ങുന്ന പന്നികളും പന്നികളെ പിടികൂടാനുള്ള കെണിയിൽ മനുഷ്യന്‍ കുടുങ്ങുന്നതും മരണം സംഭവിക്കുന്നതുമെല്ലാം തുടർസംഭവങ്ങളായിരിക്കെ ദിലീപിന്റെ ജീവിതം വീണ്ടും വാർത്തകളിൽ നിറയുകയാണ്.

ഇനിയൊരിക്കലും തോക്കെടുക്കില്ല എന്ന് ഉറപ്പിച്ചിരുന്ന ദിലീപിന്റെ മനസ്സു മാറ്റിയ ഒരു കാഴ്ചയുണ്ട്. അഞ്ച് ഏക്കറോളം വരുന്ന കൃഷി ഒന്നാകെ നശിച്ചതു കണ്ട് നെഞ്ചുപൊട്ടിക്കരഞ്ഞ ഒരു കർഷകന്റെ വിലാപമായിരുന്നു അത്. നാടിന്റെ ആത്മാവ് കർഷകരാണെന്ന് കരുതുന്ന ദിലീപിന് പിന്നെ ഒന്നും നോക്കാനുണ്ടായിരുന്നില്ല. പ്രതിഫലമോ സമയമോ നോക്കാതെ കാട്ടുപന്നികളെ തുരത്താൻ ദിലീപ് ഓടിയെത്തുന്നതിന്റെ കാരണവും അതുതന്നെ. പക്ഷേ, ഇങ്ങനെ വെടിവച്ചിട്ടാൽ മാത്രം തീരുന്നതാണോ വന്യമൃഗങ്ങൾ നാടിറങ്ങുന്ന പ്രതിസന്ധി? എന്തുകൊണ്ടാണ് മനുഷ്യന്‍ പ്രതിരോധങ്ങൾ സൃഷ്ടിച്ചും വന്യമൃഗങ്ങൾ കാടിറങ്ങുന്നതു തുടരുന്നത്? നാളെ വനമേഖലകൾ തീരെയില്ലാത്ത സ്ഥലങ്ങളിലേക്കും കാട്ടുപന്നികൾ എത്തുമോ? ഒൗദ്യോഗിക ഷൂട്ടർ എന്ന നിലയിലെ അനുഭവങ്ങളും നിരീക്ഷണങ്ങളും മനോരമ ഓണ്‍ലൈൻ പ്രീമിയത്തിൽ പങ്കുവയ്ക്കുകയാണ് ദിലീപ് കോശി.

∙ വീണ്ടും തോക്കെടുത്തത് 15 വർഷത്തിനു ശേഷം

2008ലാണ് അച്ഛൻ ഗോമഠത്ത് സണ്ണി എന്നറിയപ്പെട്ട പി.കോശി ജോൺ മരിക്കുന്നത്. അദ്ദേഹത്തിന്റെ പേരിൽ 38 വർഷമായി ഉണ്ടായിരുന്ന 2 ലൈസൻസുകൾ സറണ്ടർ ചെയ്തു. ലൈസൻസ് മക്കളുടെ പേരിലേക്ക് മാറ്റുന്നതിനു നിയമപരമായി അപേക്ഷിക്കാമെങ്കിലും അത് വേണ്ട എന്ന തീരുമാനത്തിൽ ആയിരുന്നു. അങ്ങനെ മുപ്പത്തിനാലാം വയസ്സിൽ തോക്കുമായുള്ള എല്ലാ ബന്ധവും അവസാനിപ്പിച്ചു. 15 വർഷത്തിനു ശേഷമാണ് വീണ്ടും തോക്കെടുക്കാനുള്ള തീരുമാനം അവിചാരിതമായി ഉണ്ടായത്. പോരുവഴി ഗ്രാമപഞ്ചായത്തിൽ ഉള്ള ഒരു സുഹൃത്താണ് അവിടുത്തെ കർഷകർക്ക് വേണ്ടി ആദ്യം ബന്ധപ്പെട്ടത്. തോക്ക് സറണ്ടർ ചെയ്തു എന്നു പറഞ്ഞപ്പോൾ മറ്റാരെയെങ്കിലും തരപ്പെടുത്തുമോയെന്നായി. ആലപ്പുഴ ജില്ലയിൽ തോക്കിന് ലൈസൻസ് ഉള്ളവർ നന്നേ കുറവാണ്. ഉള്ളവരാകട്ടെ സ്വയരക്ഷയ്ക്ക് പിസ്റ്റളുകൾ/റിവോൾവർ ഉള്ളവരും.

എങ്ങനെയെങ്കിലും ഒഴിവാക്കാൻ ശ്രമിക്കുമ്പോൾ വിദേശത്തുള്ള ഒരു ബന്ധുവിന് തോക്ക് ഉണ്ടെന്നും അദ്ദേഹം വരുമ്പോൾ ഞാൻ അദ്ദേഹത്തെ കൂട്ടി വരാമെന്നും അറിയാതെ പറഞ്ഞു പോയി. പിന്നിട് കാര്യങ്ങളുടെ പോക്ക് വളരെ പെട്ടെന്നായിരുന്നു. പോരുവഴി പഞ്ചായത്ത് അടിയന്തരമായി വിളിച്ച കർഷകരുടെ യോഗത്തിൽ, സമ്മർദത്തിന് വഴങ്ങി പങ്കെടുത്തു. ഷൂട്ടിങ് മത്സരങ്ങളിൽ പങ്കെടുത്ത് യോഗ്യത നേടിയിട്ടുള്ളതിനാൽ എത്രയും വേഗം ലൈസൻസ് തരാമെന്നായി വനംവകുപ്പ് ഉദ്യോഗസ്ഥർ. അങ്ങനെ ഞാൻ അവിടെപ്പെട്ടു. ശേഷം പഞ്ചായത്ത് പ്രസിസന്റ് ബിനു മംഗലത്ത് പറഞ്ഞു, നമുക്ക് എലായിൽ വരെ ഒന്നു പോയി കാണാമെന്ന്. അവിടെക്കണ്ട കാഴ്ചകളാണ് തോക്കെടുക്കാൻ എന്നെ പ്രേരിപ്പിച്ചത്.

∙ വേദനയായി ആ കണ്ണീർ

ഏക്കറുകണക്കിനു വിരിപ്പ് പാടങ്ങൾ, ചിറ പിടിച്ചു വാഴ, കപ്പ, പച്ചക്കറി, കൂടെ മറ്റ് ഇടവിള കൃഷികൾ. പക്ഷേ മുന്നോട്ടു നടക്കുമ്പോൾ കാഴ്ചകൾ അത്ര സുഖരകമല്ലായിരുന്നു. കാട്ടുപന്നികൾ കൂട്ടമായി ഇറങ്ങി നശിപ്പിച്ചിരിക്കുന്ന നൂറുകണക്കിന് തൈവാഴകൾ, ഒരേക്കർ വരുന്ന കപ്പക്കൃഷിയുടെ പൊടിപോലും ഇല്ലാതായ തോട്ടങ്ങൾ.. കിളിർത്തു വരുന്ന ചേനയും ചേമ്പുമൊക്കെ കുത്തി മണ്ണിന് മുകളിൽ വച്ചിട്ടുണ്ട്. ഭംഗിയായി കർഷകൻ വെട്ടി കേറ്റിയ പണകൾ മുഴുവൻ ഇടിച്ചു നിരത്തിയിട്ടിരിക്കുന്നു. വയറു നിറഞ്ഞാൽ പിന്നെ പന്നികളുടെ കളിയാണ്. സർവതും നശിപ്പിക്കുന്നതു വരെയുള്ള കുത്തി മറിയ്ക്കൽ. ഇടയ്ക്ക് പ്രസിഡന്റ് എന്നെ കർഷകർക്ക് പരിചയപ്പെടുത്തി, ‘‘പഞ്ചായത്തു നിയോഗിച്ച നമ്മുടെ ഷൂട്ടറാണ്’’.

പ്രായത്തിന്റെ ചുളിവുകൾ വീണ ഒരു കർഷകന്റെ അപേക്ഷ, ‘‘സാറേ സഹായിക്കണം, പണയത്തിന് കാശ് എടുത്താണ്, പാട്ടത്തിന് ഭൂമിയെടുത്താണ് കൃഷിചെയ്യുന്നത്. ഒരു മണി വരെ ഉണർന്നിരുന്നു പടക്കം പൊട്ടിക്കും എന്നിട്ടും...’’ ഉഴുതുണ്ണുന്നവനെ തൊഴുതുണ്ണണമെന്ന് പഴമക്കാർ പറയുന്ന പോലെ അറിയാതെ മനസ്സുകൊണ്ട് തൊഴുതു പോയ നിമിഷങ്ങൾ. അവരുടെ പ്രശ്നങ്ങൾ ഒന്നും ഒരു പഞ്ചായത്തിന് അപ്പുറത്തേക്ക് ആരും കേൾക്കുന്നില്ല എന്നതാണ് യാഥാർഥ്യം. മുന്നോട്ടു വച്ച കാൽ മുന്നോട്ടുതന്നെ എന്ന തീരുമാനമായിരുന്നു പിന്നീട്. മറ്റൊരു പ്രശ്നബാധിത പ്രദേശമായ പാലമേൽ ഗ്രാമപഞ്ചായത്തും സന്ദർശിച്ചു. പ്രസിഡന്റ് വിനോദ് സാർ പഞ്ചായത്തിന്റെ എല്ലാ പിന്തുണയും വാഗ്ദാനം ചെയ്യുമ്പോൾ ഒരു കാര്യം കൂടി ഓർമിപ്പിച്ചു, ‘‘വനം വകുപ്പ് ഉദ്യോഗസ്ഥർ ഒരാഴ്ച തമ്പടിച്ചു ശ്രമിച്ചിട്ടു പോലും ഒരെണ്ണത്തെ പോലും കിട്ടിയില്ല…’’.

∙ ലൈസൻസിനു ശരവേഗം

തോക്കിന്റെ ലൈസൻസിനായി അപേക്ഷയുമായി കലക്ടറേറ്റിലെ ഉദ്യോഗസ്ഥൻ ശിവകുമാർ സാറിന്റെയടുത്തെത്തി. വിഷയത്തിന്റെ ഗൗരവം മനസ്സിലാക്കിയതു കൊണ്ട് പെട്ടെന്നുതന്നെ വിവിധ വകുപ്പുകളുടെ റിപ്പോർട്ട് തേടി അയച്ചു. പൊലീസിന്റെയും സ്പെഷൽ ബ്രാഞ്ചിന്റെയും അനുകൂല റിപ്പോർട്ട്. എന്നാൽ റിപ്പോർട്ട് ജില്ലാ പൊലീസ് മേധാവിയുടെ മുന്നിൽ എത്തിയപ്പോൾ ഒരു കുറിപ്പ്. ‘‘ഈ ആവശ്യത്തിന് ലൈസൻസ് കൊടുക്കണോ?’’ കലക്ടർ ഹരിത വി.കുമാർ ഫയൽ പരിശോധിച്ച ശേഷം പറഞ്ഞു, ‘‘നിങ്ങൾ ലൈസൻസിന് അർഹനാണ്. എന്നാൽ കൊടുക്കണോ? എന്ന ചോദ്യമുയർന്നിട്ടുണ്ട്! ഞാൻ വീണ്ടും ഒരു റിപ്പോർട്ടു കൂടി ആവശ്യപ്പെടാം, അതു ലഭിച്ചാൽ ഇനിയും ഹിയറിങ്ങിനായി വരണമെന്നില്ല. ഞാൻ ലൈസൻസ് അനുവദിക്കാം’’. ഒരാഴ്ചയ്ക്കു ശേഷം ശിവകുമാർ സാറിന്റെ വിളിയെത്തി. കടമ്പകൾ കടന്ന് ലൈസൻസ് കൈയിൽ കിട്ടി.

∙ മുറവിളി ശക്തമായപ്പോൾ നടപടി

കർഷകരുടെ നിരന്തരമായ മുറവിളിക്കും ബഹുമാനപ്പെട്ട ഹൈക്കോടതിയുടെ ഉത്തരവിനും ശേഷമാണ് ചില നടപടികൾ സർക്കാരിന്റെ ഭാഗത്തുനിന്നു വന്നത്. കാട്ടുപന്നികളെ വെടിവയ്ക്കുവാനുള്ള തന്റെ അധികാരം മേയർ, മുനിസിപ്പൽ ചെയർമാൻ, പഞ്ചായത്തു പ്രസിഡന്റ്‌ എന്നിവർക്ക് കേരളത്തിന്റെ ചീഫ് വൈൽഡ് ലൈഫ് വാർഡൻ കൈമാറി. ഓണററി വൈൽഡ് ലൈഫ് വാർഡൻമാരായി അവരെ നിയമിച്ച് അധികാരം നൽകി. അതുപ്രകാരം നിബന്ധനകൾക്കു വിധേയമായി ജനങ്ങളുടെ ജീവനും സ്വത്തിനും കൃഷിക്കും ഭീഷണിയാകുന്ന കാട്ടുപന്നികളെ വെടിവെച്ചു കൊല്ലുവാനുള്ള അധികാരം ഓണററി വാർഡന്മാർക്കായി.

∙ ഇത്തിരി സ്വകാര്യം

പിതാവിന്റെ ഇരട്ടക്കുഴൽ തോക്കിൽ ആറാം വയസ്സിലാണു വെടിവച്ചു പഠിച്ചു തുടങ്ങിയത്. മാവേലിക്കര ബിഷപ് മൂർ കോളജിൽ പ്രീഡിഗ്രി പഠനത്തിനായി എത്തിയപ്പോൾ എൻസിസി അംഗമായി 3 വർഷം തുടർച്ചയായി ഷൂട്ടിങ്ങിൽ ഒന്നാം സ്ഥാനം നേടി. നൂറനാട് മറ്റപ്പള്ളി ഫയറിങ് ഗ്രൗണ്ടിൽ ആയിരുന്നു ആദ്യത്തെ വിജയം. തുടർ വർഷങ്ങളിൽ ഷൂട്ടിങ്ങിൽ ശ്രദ്ധേയമായ നേട്ടങ്ങൾ. കണ്ണൂർ ഡിഫൻസ് കോറിൽനിന്ന് വെപ്പൺ ട്രെയ്നിങ്ങിൽ പ്രത്യേക പരിശീലനം ലഭിച്ചു. ഡിഗ്രിക്കു ശേഷം പ്രവാസ ജീവിതം. അതിനു ശേഷം നാട്ടിൽ മടങ്ങിയെത്തി റോട്ടറി ക്ലബിൽ അംഗമായി. ഭാര്യ:ആശ. മക്കൾ: ദയ, ഡെന, ഡെറിക്. 

∙ എളുപ്പമായിരുന്നില്ല, പന്നിവേട്ട

ആദ്യ ഒരു മാസത്തെ ദൗത്യങ്ങൾ വൻ പരാജയമായിരുന്നു. തിരച്ചിൽ നടത്താൻ ലൈറ്റ് ഓണാക്കുബോൾ തന്നെ കാട്ടുപന്നികൾ അടുത്ത പഞ്ചായത്ത് കടക്കും. തുടർച്ചയായ പരാജയങ്ങൾ കാര്യങ്ങൾ മാറ്റിച്ചിന്തിപ്പിച്ചു. പന്നികളുടെ വഴിത്താരകൾ മനസ്സിലാക്കി പൊക്കമുള്ള സ്ഥലത്ത് മണിക്കൂറുകളോളം ക്ഷമയോടെ കാത്തിരിക്കും. മുതിർന്ന ഷൂട്ടർമാർ പറയും, കളത്തിൽ കൊണ്ടുവന്ന് വെടിവയ്ക്കണമെന്ന്. അങ്ങനെ കാത്തിരിപ്പിന്റെ അവസാനം പ്രകൃതി നിശ്ശബ്ദമാകുന്ന ഒരു സമയമുണ്ട്. അപ്പോൾ ചെവി വട്ടം പിടിച്ചാൽ കേൾക്കാം, കരിയില അനക്കി, ചുള്ളിക്കമ്പുകൾ ഒടിച്ചുള്ള അവന്റെ വരവ്. 10-15 എണ്ണം കാണും ഒരു കൂട്ടത്തിൽ. കുട്ടത്തിലെ ആൺ പന്നിയാകും മുന്നേ നടക്കുക. പിന്നിൽ മറ്റുള്ളവരും.