‘സ്ത്രീകൾ തങ്ങൾക്കു വേണ്ടിയും ജീവിക്കണം’; കല്യാണിയും ദാക്ഷായണിയും മോഹിനിയാട്ടത്തിലേക്ക്; സുകന്യ എന്നും ദേവിക എന്നും പേരായ രണ്ടു നർത്തകർ

∙ സ്ത്രീകൾ ‘ബോൾഡാ’യിരിക്കണം, അവനവന് വേണ്ടിയും ജീവിക്കണം

സ്ത്രീകൾ ‘ബോൾഡാ’യിരിക്കണം. വിഷമങ്ങൾ മാത്രം അടക്കിപ്പിടിച്ച് ഒതുങ്ങിക്കൂടാതെ, പ്രയാസങ്ങളെ നേരിട്ടുതന്നെ ജീവിക്കണം. മറ്റുള്ളവർക്കു വേണ്ടി ജീവിക്കുന്നതിനൊപ്പം സ്വന്തം ഇടവും കണ്ടെത്തണം. നമുക്കുവേണ്ടി കുറച്ചുസമയമെങ്കിലും ദിവസവും ചെലവഴിക്കാൻ കഴിയണം. അതിനുവേണ്ടി ശ്രമിക്കാറുമുണ്ട്. എല്ലാവരോടും അതു പറയാറുമുണ്ട്. ജീവിതം ഒന്നേയുള്ളൂ. ജീവിതത്തിൽ നമുക്ക് സംതൃപ്തിയുണ്ടാവണം. ആ ചിന്താഗതിയുള്ളതുകൊണ്ടായിരിക്കും നോവലിനോട് കുറച്ചു കൂടുതൽ ഇഷ്ടം തോന്നിയത്. 

∙ ദ്രൗപദിയുടെ മനോവിചാരങ്ങളിലൂടെ

പി.കെ.ബാലകൃഷ്ണന്റെ ‘ഇനി ഞാൻ ഉറങ്ങട്ടെ’ എന്ന നോവലിന്റെ നൃത്താവിഷ്ക്കാരം കഴിഞ്ഞ സൂര്യ ഫെസ്റ്റിവലിന് അവതരിപ്പിച്ചിരുന്നു. ദ്രൗപദിയായിരുന്നു കഥാപാത്രം. കർണനെ മറ്റൊരു തലത്തിൽ നോക്കിക്കാണുന്നതാണ് കഥ. കുന്തിയുടെ മൂത്ത പുത്രനാണു കർണനെന്ന് ദ്രൗപദി അറിയുമ്പോൾ മനസ്സിൽ വരുന്ന ചിന്തകളാണ് അവതരിപ്പിച്ചത്. സംസ്ഥാന സർക്കാരിന്റെ ചില പരിപാടികളിലും ജില്ലാ ടൂറിസം പ്രമോഷൻ കൗൺസിലിന്റെയും കേരള ഭാഷാ ഇൻസ്റ്റിറ്റ്യൂട്ടിന്റെയും ചില ചടങ്ങുകളിലും ദൂരദർശനിലും നൃത്തം അവതരിപ്പിച്ചിട്ടുണ്ട്.

∙ നൃത്തം എന്നും ഒപ്പം, സമൂഹത്തെ അവതരിപ്പിക്കണം

വളരെ ചെറുപ്പത്തിലേ നൃത്തം പഠിക്കുകയും അവതരിപ്പിക്കുകയും ചെയ്യാൻ തുടങ്ങിയിരുന്നു. കലാമണ്ഡലം സത്യവ്രതൻ സാറിന്റെ അടുത്തുനിന്നായിരുന്നു പഠനം തുടങ്ങുന്നത്. ഭരതനാട്യവും മോഹിനിയാട്ടവും കുച്ചിപ്പുടിയും പഠിച്ചു. ഡി​ഗ്രി കാലത്താണ് എന്റെ ശരീരഭാഷയ്ക്കു കൂടുതൽ ഇണങ്ങുന്നത് മോഹിനിയാട്ടമാണെന്നു മനസ്സിലായതും അതിൽ ശ്രദ്ധിച്ചതും. പിന്നീട് പത്മശ്രീ ഭാരതി ശിവജിയെ പരിചയപ്പെട്ടു. അവരുടെ ശിക്ഷണത്തിൽ കുറെ പഠിച്ചു. വിവാഹശേഷം നൃത്തത്തിൽ 12 വർഷത്തോളം ഇടവേള വന്നു. ഇപ്പോൾ വീണ്ടും സജീവമായി. നൃത്തസംവിധാനം ചെയ്തു തുടങ്ങിയിട്ട് അഞ്ചാറുവർഷമേ ആയിട്ടുള്ളു. നിലവിൽ സ്വന്തമായി നൃത്തസംവിധാനവും ഭാരതി ശിവജിയുടെ സംഘത്തിനൊപ്പം നൃത്തവും ചെയ്യാറുണ്ട്. സമൂഹത്തിലെ നിരവധി പ്രശ്നങ്ങൾ മോഹിനിയാട്ടത്തിലൂടെ അവതരിപ്പിക്കണമെന്നുണ്ട്. അതാണ് ആ​ഗ്രഹം. അങ്ങനെയാണ് ഒരു ശാസ്ത്രീയകലയ്ക്ക് പ്രാധാന്യവും നിലനിൽപ്പും ആസ്വാദനവും വരുന്നത്. വായനയും അത്യാവശ്യമാണ്. ഏതു കല കൂടെക്കൊണ്ടുനടക്കുമ്പോഴും വായന വേണം.

∙ ഒന്ന് മറ്റൊന്നിനു തടസ്സമല്ല

നൃത്താഭിരുചിയുള്ള കൂട്ടികളെ പ്രോത്സാഹിപ്പിക്കാറുണ്ട്. പഠനം മാത്രം മതിയെന്നു വിചാരിക്കുന്ന കാലത്തായിരുന്നു എന്റെ സ്കൂൾ വിദ്യാഭ്യാസം. ഏറ്റവും നന്നായി പഠിക്കുന്ന കുട്ടിയാണ് ഏറ്റവും നല്ല കുട്ടിയെന്ന ആ ധാരണയൊക്കെ മാറി. എന്തിനോടാണോ കുട്ടിക്ക് അഭിരുചി, അതും ഒപ്പം കൂട്ടി ബാക്കിയെല്ലാം പഠിക്കാൻ സാധിച്ചാൽ ജീവിതവിജയം ഉറപ്പാണ്. എന്റെ നൃത്ത താൽപര്യത്തെ പ്രോത്സാഹിപ്പിച്ചിരുന്നത് അച്ഛൻ കുട്ടികൃഷ്ണൻ നായരും അമ്മ പുഷ്പവേണിയുമായിരുന്നു. പഠനത്തോടൊപ്പം നൃത്തവും കൊണ്ടുപോവാൻ പലരും പ്രോത്സാഹിപ്പിക്കാറില്ല. ഒന്നു മറ്റൊന്നിനു തടസ്സമല്ലെന്നും ‍രണ്ടും ഒരുപോലെ പ്രാധാന്യത്തോടെ കൊണ്ടുപോവാൻ സാധിക്കുമെന്നും അച്ഛനും അമ്മയും പറയുമായിരുന്നു.